အန္တရာယ်ႏအာငါႏထာꩻသီတာႏ

အဝ်ႏ ဝီခီပီးဒီးယား ကို

"ဒုတိယ မရဏဿတိသုတ် (အန္တရာယ်ႏအာငါႏ ထာꩻသီတာႏ)" "ဒုတိယမရဏဿတိသုတ် (အန္တရာယ်ႏအာငါႏ ထာꩻသီတာႏ)" "ရဟန်ꩻသီးဖုံႏဟွေး- 'ယူႏလꩻထာꩻသီ-မရဏဿတိ'ကမ္မဋ္ဌာန်ꩻယို မဉ်ႏပွါꩻမျာꩻအာအာ၊ မဉ်ႏယူႏလꩻသေႏသေႏနားနားနဝ်ꩻ အကျိုꩻတန်ငါႏ၊ အကျိုꩻအဝ်ႏသွုပ်ငါငါ၊ တနꩻလွေꩻနိဗ္ဗာန်ႏသူꩻ၊ တွိုႏအနာလွိုသူꩻ တွိုႏစွဉ်ႏနိဗ္ဗာန်ႏ၊ ကွပ်နဝ်ꩻမꩻ လွꩻမွုန်းလာꩻလာꩻ၊ အားထွုတ်ပွါꩻမျာꩻ မရဏဿတိ ကမ္မဋ္ဌာန်ꩻနောဝ်ꩻဟုဲင်း။ ရဟန်ꩻသီးဖုံႏဟွေး- သာႏသနာႏတောႏကိုယို ရဟန်ꩻ(တပါꩻ)နဝ်ꩻ ပွန်းလꩻ (ပိုးန်လꩻ) မွူးယာခိုႏ၊ တွိုႏမွူးဟာတွော့ꩻ ဝွေꩻယူႏစဉ်ꩻစာꩻနုဲင်းယို- ခွေသက်အန္တရာယ်ႏ ကသီအီဒါႏ အကျောင်ꩻတရာꩻဖုံႏနဝ်ꩻ အဝ်ႏအာတန်၊ 'ရူးအဲင်ႏတဲ့သီဒါႏ၊ ခြို့ꩻထာꩻ(ရော့ꩻတဝ်း)တဲ့ သီဒါႏ၊ ထဲ့ထာꩻတဲ့ သီဒါႏ၊ အံႏထာꩻတရော့ꩻတဝ်းတဲ့ သီဒါႏ၊ သꩻရာႏသဲင်တဲ့ သီဒါႏ၊ နုတ်ချက်ꩻသေင်တဲ့ သီဒါႏ၊ တလီꩻဆန်တဲ့ သီဒါႏ၊ တလီꩻဖျတ်တဲ့ သီဒါႏ၊ တလီꩻပေ့ꩻတဲ့ သီဒါႏ၊ လိုꩻမာꩻသီတဲ့ သီဒါႏ၊ ဘီလူꩻ(တကောင်ႏတကုဲင်-လူꩻကုဲင်ဖုံႏ)တဲ့ မာꩻသီဒါႏ၊ ကွပ်ရောႏဂါႏ တမျိုꩻမျိုꩻတဲ့ သီဒါႏ'စတဲင် ကသီအီဒါႏ အကျောင်ꩻတရာꩻဖုံႏနဝ်ꩻ အဝ်ႏအာတန်၊ ယူႏစဉ်ꩻစာꩻနုဲင်းနဝ်ꩻ။ (ဟန်ႏနီꩻ မွူးယာခိုႏ တနီꩻမွူးမွူး၊ ခွေမော့ꩻတောဝ်း အန္တရာယ်ႏ၊ ခွေသီထိုꩻတောဝ်း၊ ခွေကံႏဟောဝ်မွေးစွဉ်ႏထာꩻ၊ ယူႏစဉ်ꩻစာꩻနုဲင်းနောဝ်ꩻ)။ ရဟန်ꩻသီးဖုံႏဟွေး- ရဟန်ꩻနဝ်ꩻနဝ်ꩻ ပွန်းလꩻမွူးယာ တွိုႏမွူးဟာတွော့ꩻ ယူႏဖျင်-မွူးယာခိုႏနဝ်ꩻ သီတဝ်း၊ မွေးလဲဉ်းသွူ၊ အဝ်ႏကုဲင်တော မွူးဟာ ထာꩻခေ့ꩻခိုႏယိုတဲ့ ခွေသက်အန္တရာယ်ႏ ကသီအီဒါႏ အကျောင်ꩻတရာꩻဖုံႏနဝ်ꩻ အဝ်ႏအာတန်၊ 'ခွေယို လꩻပယ်ႏထိုꩻဗာႏဒွိုန်း အကုသိုလ်ႏနဝ်ꩻ အဝ်ႏနေကဟောင်းနဲ'ယူႏဆင်ႏချင်ႏဗာႏနုဲင်းနောဝ်ꩻ၊ လꩻပယ်ႏဗာႏဒွိုန်း အကုသိုလ်ႏနဝ်ꩻ အဝ်ႏနေတဲင် 'ခွေမဉ်ႏသီစွော့ꩻထိုꩻမွိုင် ဟန်ႏနာꩻယိုမွိုင် ခွေအီႏလွေꩻမော့ꩻ ထာꩻဒုက္ခသနယ်'ယူႏနုဲင်းနဝ်ꩻထွူတွော့ꩻ ဖေႏကယ်ႏထိုꩻနွောင်ꩻ အကုသိုလ်ႏနဝ်ꩻနဝ်ꩻ သꩻမဉ်ပယ်ႏထိုꩻမွေးမွေးဗာႏ၊ နေးတွမ်ႏသတိꩻပညာႏ နဲ့စ်အားထွုတ်မွေးမွေးဗာႏ (အားထွုတ်ခေ့ꩻ အားထွုတ်နာꩻဗာႏ)တရာꩻ၊ နဲ့စ်အားထွုတ်ဗာႏစွဉ်ႏ တကားမုဲင်ꩻနဲတဲင်- ဥပမာႏ-ပါꩻတဖြာꩻနဝ်ꩻ မေႏခိုးအကတူႏ တရိုꩻတဝ်း၊ မေႏခိုးအခွမ်ꩻလာꩻ (ကအဝ်ႏနမ်းလောင်း)နဝ်ꩻ တရိုꩻတဝ်း၊ (ပေါႏမေႏခိုးနုဲင်းနဝ်ꩻနဝ်ꩻ အဗွေႏအုံစွူဗော့ꩻနုဲင်းနဝ်ꩻနဲ့၊ အနဲ့စ်မာꩻနုဲင်းမုဲင်ꩻ၊ ယူႏစံꩻဟုဲင်း)၊ ပေါႏမေႏခိုးသွူဝွေꩻနုဲင်းနဝ်ꩻနဝ်ꩻ အုံစွူလꩻတဝ်း၊ သꩻမဉ်မာꩻဖေ့မွေးမွေးစွဉ်ႏမေႏ၊ မေႏဖေႏနေးကဖေ့တဲ့ နဲ့စ်မာꩻဖေ့မွေးစွဉ်ႏ၊ အနုဲင်းနဝ်ꩻနေနေ- ကထွာထိုꩻ အကုသိုလ်ႏနဝ်ꩻ ဗွန်ပီနုဲင်းမေႏနဝ်ꩻသွူ၊ မေႏအကုသိုလ်ႏ ဖေႏနေးကထိုꩻမားချာနောဝ်ꩻ သꩻဗွန်နုဲင်းဗာႏ မေႏကခိုးလိုꩻ၊ နဲ့စ်ပယ်ႏထိုꩻမွိုင်မွိုင်ဗာႏ နုဲင်းမေႏကခိုးလိုꩻနောဝ်ꩻသွူ။ ရဟန်ꩻသီးဖုံႏဟွေး- ပေါႏလေတနာꩻတဲ့ သꩻရေꩻဗာႏ၊ ထာꩻတနာꩻကိုယို ခွေမော့ꩻတဝ်းအန္တရာယ်ႏ၊ ခွေသီထိုꩻတောဝ်း၊ ယိုနဝ်ꩻ တွိုႏဖျင်လဲဉ်းထာꩻလေ၊ ဟန်ႏနီꩻ မွူးယာခိုႏယို ခွေသီတဝ်း ရိုꩻနွောင်ꩻတဝ်း၊ ယူႏဗာႏသက်အန္တရာယ်ႏ၊ ယူႏဗာႏထာꩻသီ၊ နဲ့စ်ပယ်ႏဗာႏအကုသိုလ်ႏ၊ နဲ့စ်မာꩻဗာႏကုသိုလ်ႏ၊ ပေါႏအောဝ်ႏမာꩻလွေꩻ နုဲင်းနဝ်ꩻနောဝ်ꩻ (တနီꩻတဝ်းတဲ့တနီꩻ) လꩻဗာႏမဂ်ဉာဏ်ႏ ဖိုလ်ႏဉာဏ်ႏ တွိုႏဗာႏနိဗ္ဗာန်ႏ အမန်ႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ ဒုတိယ မရဏဿတိသုတ်)[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၃၀၄)