အမော့ꩻအကျုံႏငတ်ꩻ
"ခြွိုင်ႏသန်ꩻရေꩻအမော့ꩻအကျုံႏ(၅)" ခွန်ကုဝေ အုံသွဉ်လိတ် ဝေင်ꩻပခုက္ကူ(၅)နေင်ႏထွူ နေင်ႏ ၁၃၅၀-ဗွေနဝ်ꩻ သဲင်ꩻဆိုႏချာယင်း ဇာႏတိရပ်ဒုံ၊ ဝေင်ꩻဟိုပုံꩻ ကျောင်ꩻလဲင်းခါႏကိုသွူ။ တဲႏနေင်ႏ ၁၃၅၁-ဗာႏ၊ ဗꩻတွိုႏလွေꩻ နေင်ႏ ၁၃၆၀-ဗွေ၊ အနေင်ႏတဆီနဝ်ꩻ အုံချꩻလိတ် ဝေင်ꩻဟိုပုံꩻ၊ ကျောင်ꩻဇောတိကာရမကိုသွူ။ ခွန်ကုဝေ အုံကျောင်ꩻဇောတိကာရာ ဝေင်ꩻဟိုပုံꩻကို တဲႏနေင်ႏ ၁၃၅၁-ဗာႏ၊ ဗꩻတွိုႏလွေꩻ ၁၃၅၅-ဗာႏ၊ ၄-နေင်ႏနဝ်ꩻ အုံလေနေင်ႏလဲ့ ထွိုင်ႏတွိုႏ နေင်ႏ ၁၃၅၅-ဗာႏ၊ ဗꩻတွိုႏလွေꩻ နေင်ႏ ၁၃၆၀-ဗွေ၊ ၆-နေင်ႏနဝ်ꩻ ပေါႏလိတ်ဝါႏလို့လဲ့ သဲင်ꩻအုံဒျာႏ ကျောင်ꩻလဲင်းခါႏ၊ သဲင်ꩻအွဉ်ဖေါက်ဒျာႏ ကာꩻတဖူꩻသွူ။ အွဉ်ဖေါက်ကာꩻတဖူꩻ တဲႏပင်စောက် ဗꩻသဲင်ꩻဒုံလဲင်းခါႏနဝ်ꩻ တနေင်ႏတစိꩻစိꩻ ၆-နေင်ႏဗွေမꩻ တွိုႏဖြွဉ်သဲင်ꩻလꩻ ဒုံလဲင်းခါႏသွူ။ ကာꩻတဖူꩻထွိုင်ႏတွိုႏဖြွဉ်နဝ်ꩻ ခမ်းခါခမ်းသဲင် အဝ်ႏလိုႏမွဉ်းဖျင်စောင်းသျောက်လွေꩻ ကာꩻတဖူꩻတဲင် နေင်ႏ ၁၃၆၁-ဗာႏမာꩻငါနဝ်ꩻ သဲင်ꩻဆိုႏယင်းဒျာႏဝါႏ ကျောင်ꩻလဲင်းခါႏကိုသွူ။ ခွန်ကုဝေ သဲင်ꩻဆိုႏချာဝါႏ ကျောင်ꩻလဲင်းခါႏနဝ်ꩻ တဲႏနေင်ႏ ၁၃၆၁-ဗာႏ ဗꩻတွိုႏလွေꩻ နေင်ႏ ၁၃၆၉-ဗာႏ၊ ဒဲဉ်ကံလာ ကထွက်သဲင်ꩻလံးခိန်ႏနဝ်ꩻသွူ။ ထွက်သဲင်ꩻလံးထွူ ၁၃၇၀-ဗာႏ၊ တနေင်ႏကိုနဝ်ꩻ အုံဒျာႏဒုံလဲင်ႏခါႏကိုလဲ့ ထွိုင်ႏတွိုႏ ၁၃၇၁-ဗာႏနဝ်ꩻ ဗွေႏဗွန်နောင်တောင်ꩻ ဟဲ့ꩻလင်ꩻအုံဒျာႏ ကျောင်ꩻနောင်တောင်ꩻထျꩻသွူ။ ခြွိုင်ႏသန်ꩻရေꩻ အမော့ꩻအကျုံႏ (၅)ယိုနဝ်ꩻ ကသဲင်ꩻဆိုႏချာဒျာႏဝါႏ ကျောင်ꩻလဲင်းခါႏ တဲႏနေင်ႏ ၁၃၆၁-ဗာႏ၊ ဗꩻတွိုႏလွေꩻ ၁၃၆၉-ဗာႏ၊ ၉-နေင်ႏအကို အနေင်ႏမုဲင်ꩻနဝ်ꩻတောင်ꩻတဝ်း၊ မော့ꩻကျုံႏဗာႏဒုံလဲင်းခါႏကိုသွူ။ အနေင်ႏမုဲင်ꩻနဝ်ꩻ တောင်ꩻတဝ်းရိုꩻကီလဲ့ သဲင်ꩻဆိုႏချာဝါႏ ဒုံလဲင်းခါႏအလဲင်ႏယို အလွိုးတညငါႏတဝ်း၊ အလွိုးနီသိုမ်နေင်ႏအကိုနဝ်ꩻသွူ။ တွိုႏခꩻတဟာ ဝုဲင်ႏဘုရာꩻထွူ ၇-နားရီႏခွယ်ꩻရပ်နဝ်ꩻ သျင်ႏဖါတောင်ႏပေႏ (နမ်းခုတ်) ဖျော်ထင်ႏကျောင်ꩻတဲင် ဝွေꩻပိုခိုတသန်ꩻ ကတောႏလံးဒါႏ မွိုးဖြားစင်ꩻဗူးပိုမူႏ မီꩻယွန်ꩻနဝ်ꩻ အုံဟဝ်တဝ်းတွော့ꩻ ထင်ႏပင်ꩻခွန်ကုဝေ၊ အွဉ်ႏကုဝေသဲင်ꩻထွားဖေႏအပိုသွူ။ အခိန်ႏယို အတွင်ꩻယိုနဝ်ꩻ နွို့ဝင်ꩻဂိုဏ်ꩻသား ခွန်ကုဝေနဝ်ꩻ ပွိုင်းဝွို့တွမ်ႏပယောဂရောဂါႏနဝ်ꩻ မဉ်ꩻအဝ်ႏထန်ႏစ အဝ်ႏကျောႏစထာꩻ ဒုံလဲင်းခါႏကို အခိန်ႏသွူ။ ခွန်ကုဝေနဝ်ꩻ အဝ်ႏအုံချꩻလိတ် ကျောင်ꩻဇောတိကာရာမ (ရန်ႏကင်ꩻ)ကို အနေင်ႏတဆီနဝ်ꩻလဲ့ ပွိုင်းဝွို့တွမ်ႏပယောဂရောႏဂါႏနဝ်ꩻ အဝ်ႏလိုမ်ꩻလာꩻ၊ အဝ်ႏမော့ꩻကျုံႏဗာႏ ၄-၅ဖြာꩻသွူ။ နဝ်ꩻတွော့ꩻ အတွင်ꩻယို အခိန်ႏယိုနဝ်ꩻ ပွိုင်းဝွို့တွမ်ႏပယောဂ ရောႏဂါႏနဝ်ꩻ လိုမ်ꩻလာꩻအဝ်ႏကုဲင်း၊ လိုꩻလာꩻအဝ်ႏစွယ်ꩻခိန်ႏသွူ။ သျင်ႏဖါတောင်ႏထင်ႏပင်ꩻ အွဉ်ႏသဲင်ꩻထွားအ ပိုတသန်ꩻနဝ်ꩻ အွိုထွူလက္ခံႏထွူတဲင် သျင်ႏဖါတောင်ႏသဲင်ꩻထွူတညတဝ်း သဲင်ꩻလွဉ်ꩻခန်းဒျာႏဆꩻချာသွူ။ သျင်ႏဖါတောင်ႏပို တသန်ꩻနဝ်ꩻ အဝ်ႏညီꩻအဖီစင်ꩻမွိုးဗူႏလံး အွိုးလဲင်းခါႏ ဒုံဒွမ်ကဟဲ့ꩻဒါႏ တွူးလောင်းနဝ်ꩻသွူ။ ထွိုင်ႏတွိုႏသဲင်ꩻလံးနဝ်ꩻ လိုꩻအဝ်ႏခူအဝ်ႏခါနေးစွဉ်ႏ မေႏဖါႏထျꩻ လိုꩻဆာတသန်ꩻနဝ်ꩻ အဝ်ႏမေႏဖါႏထျꩻနဝ်ꩻ လိုꩻဆာရိုꩻနဝ်ꩻလဲ့ အဝ်ႏဗေင်ႏထာꩻယွေးယွေးတမွေးတဝ်း၊ အဝ်ႏအုံထွိုင်ႏဗုဲင်တွမ်ႏဟွမ်၊ အဝ်ႏအုံစို့ꩻဒျာႏမေႏသွူ။ ခွန်ကုဝေ အုံလင်ꩻသွူ မေႏဖါႏထျꩻခိုႏလဲ့ ဝုဲင်ႏလဲ့တဝုဲင်ႏတဝ်း၊ စွော့ꩻလဲ့တစွော့ꩻတဝ်း၊ နုဲင်းဒျာႏတထီႏတဝ်း၊ အဝ်ႏဒေါ့ꩻဒျာႏထာꩻယက်ꩻယက်ꩻသွူ။ "ဝွေꩻဒေါ့ꩻဒါႏငဝ်း အကိုနဝ်ꩻ- "ထီႏလိုꩻထ၊ အသွင်ꩻဖွီဒါႏဒျာႏရင်ꩻကနေား၊ မဲဉ်အေႏလူးလဲ့ အေႏလူးဒျာႏ၊ မဲဉ်ဆီႏလူးလဲ့ ဆီႏလူးဒျာႏ၊ မဲဉ်ရိုꩻနုဲင်းမုဲင်ꩻလဲ့ ရိုꩻဒျာႏ၊ မဲဉ်မာꩻနုဲင်းမုဲင်ꩻလဲ့ မာꩻဒျာႏနဝ်ꩻက"ငဝ်းနုဲင်းယိုလဲ့ပါတဲင် တသန်ꩻယိုနဝ်ꩻ သွီႏတလီꩻရောႏဂါႏ တမွေးတဝ်း၊ လူꩻဟောင်း၊ ကျက်ဟောင်းမာꩻဒျာႏ ခွန်ကုဝေ ယူႏခန်းနုဲင်းနဝ်ꩻသွူ။ နဝ်ꩻတွော့ꩻ အီႏဒေါ့ꩻရီဝွေꩻ၊ အီႏအွဉ်ႏအပ်နမ်းခန္ဓာႏ၊ အီႏအွဉ်ႏအပ်နမ်းထာꩻဆာနဝ်ꩻ အလွိုးတလꩻတဝ်း၊ ထာꩻဆာအဝ်ႏပူꩻထွူလဲဉ်းတဲင် တွိုင်ႏတယ်ႏရတနာႏသိုမ်ပါꩻ၊ တွိုင်ႏလူꩻဟဝ် လူꩻဒါႏ လူꩻသမ္မာႏသီး၊ တွိုင်ႏဝိဇ္ဇာႏသီး ဆရာႏသီးတွော့ꩻ ပျုသစ္စာႏ၊ ကွီအကူႏအညီႏ ချုက်သꩻကိုနေးဗော့ꩻသွူ။ ထွူနဝ်ꩻ ဒေါ့ꩻရီခန်းဝွေꩻ ဟဝ်ဟဝ်သွူ။ "နာꩻနဝ်ꩻ အဝ်ႏအုံမုဲင်ꩻကို" "အဝ်ႏတဝ်းအွိုးထာꩻအုံႏတန်၊ ထာꩻကင်ဆုံးသူꩻနဲ့ဟွေး" "နာꩻနဝ်ꩻ မဉ်ႏနုဲင်းမုဲင်ꩻအီ?" "နာꩻနဝ်ꩻ လူꩻသေင်ႏနဲ့ လူꩻဝါႏနဲ့?" "လူꩻသေင်ႏလဲ့ တမွေးတဝ်း၊ လူႏဝါႏလဲ့တမွေးတဝ်း၊ ကျက်ဒျာႏ" "တသန်ꩻမာꩻနာꩻနုဲင်းမုဲင်ꩻအီး?" "ဒါႏတဲ့ အေႏလူး ဆီႏလူးခွေသနဲ့" "နဝ်ꩻတွော့ꩻ ရီုလုဲင်ႏအဖါ- "စောင်းမွေးနဲ့ ဖြားတောင်ႏ" "မွေးတဲ့ဩ" "လင်ꩻရိုႏသေႏယင်းတဝ်းနဲ့အီး?" "ရိုႏသေႏဒျာႏဩ" နဝ်ꩻတွော့ꩻ ရီလုဲင်ႏတသန်ꩻ- "ဝင်ꩻရိုႏသေႏလဲဉ်းနာꩻ နဝ်ꩻအီႏ၊ မာꩻပုဲင်ႏဒွုမ်ဝင်ꩻမွိုင်" "သေတဝ်း ခွေတထီႏတဝ်း ပါꩻမုဲင်ꩻမုဲင်ꩻဖျော်က၊ မဉ်ရိုႏသေႏလဲ့ တနꩻဒျာႏ ခွေတအဲဉ်ထဝ်းလံးမတဝ်၊ အလွဉ်ရိုႏသေႏနဝ်ꩻ ခွေတထီႏတဝ်း၊ ခွေထီႏဒျာႏ အလွဉ်ခꩻခွေ တွမ်ႏတနတ်လွုမ်ꩻက" "ပါꩻမုဲင်ꩻလွဉ်ခꩻနာꩻ" "အီႏသေနဲ့၊ ဒါႏလဲ့ လိုꩻဖြားယယယိယိနဝ်ꩻသနဲ့" နဝ်ꩻတွော့ꩻ ရီလုဲင်ႏဖြားတောင်ႏ- "ခꩻဗာႏမွေးနဲ့ ဖြားတောင်ႏ" "ခꩻဗာႏမွေးအော်" နဝ်ꩻတွော့ꩻ တသန်ꩻလောႏဒေါ့ꩻသော့ꩻ၊ စံႏသွူငင်းဒေင်တဲင် "ထွားမွိုင်ယို ခꩻဖေႏလိုꩻ ငင်းဒေင်တွော့ꩻ ဆာအွူထံနေးစွဉ်ႏထာꩻယို"ရိုꩻခန်းနုဲင်းနဝ်ꩻသွူ။ ခွန်ကုဝေ ထွိုင်ႏသေသွူ အခရာႏနုဲင်းယိုနဝ်ꩻ နေးတွမ်ႏငဝ်းအွီႏငွါသာႏ၊ နေးတွမ်ႏငဝ်းမေတ္တာႏတဲင် ကျံႏဒေါ့ꩻရီကျံႏတောင်ꩻပြန်ႏနေး အမျိုꩻမျိုꩻသွူ။ ထွိုင်းကွဲဒေါ့ꩻဒေါ့ꩻနဝ်ꩻ နုဲင်းစွဉ်ႏအီႏလက္ခံႏယောင်ႏယောင်ႏ အငဝ်းဟံးပဲန်ႏထိုꩻခန်းသွူ။ အဝ်ႏတဆင်ႏ အကွီအွꩻနေင်းထီတဲင် ခွန်ကုဝေ ထွဉ်ႏခန်းအဖါဆျာꩻဖေႏသွူ။ အွꩻနေင်းထီ ၂-ဝန်ႏထွိုင်ႏထွူနဝ်ꩻ ကွီဆွဉ်းလုဲင်ႏယာထူ (ဆေးလိပ်)တဲင် ခွန်ကုဝေ အွဉ်ႏအဖါဖြားတောင်ႏ ဖေႏခန်းယာထူပတ္တမျာꩻတလီးသွူ။ အွꩻနေင်ႏထီ ဆွဉ်းယာထူထွိုင်ႏထွူနဝ်ꩻ အငဝ်းဟမ်းပေါင်းဆွော့ꩻခွုန်ꩻယင်းစွဉ်ႏ၊ အဝ်ႏတဆင်ႏ ယꩻမေႏကွို့ꩻတွော့ꩻ ခြုက်ခြက်စွဉ်ႏမေႏအွူသွူ။ ခွန်ကုဝေနဝ်ꩻ ရီခရာႏ ဒေါ့ꩻခရာႏ တောင်ꩻပြန်ႏခရာႏ ငဝ်းတအဲဉ်ထဝ်းဒွုမ်တဲင် အုံထဲင်းတဆင်ႏ ထင်ႏခွုန်ꩻခန်းဒျာႏကျောင်ꩻသွူ။ ထွိုင်ႏသေဆုဲင်ꩻနဝ်ꩻ ပယောဂသီးယို ပယောဂအမျိုꩻမုဲင်ꩻတယဝ်း မဲဉ်ကွီထာꩻမုဲင်ꩻကွီ ဖေႏဗာႏတဝ်း၊ မဉ်ႏဖေႏနဝ်ꩻ ထွာတသီႏဖြေႏတဲင် အမိန်းအာႏဏာႏစွုတ်ꩻထိုꩻရိုꩻနဝ်ꩻသွူ။ နုဲင်းမွူးရဝ်ꩻနီꩻ မွူယာခိုႏ နားရီႏ ၂-ဆင်ႏရပ်နဝ်ꩻ တသန်ꩻတမက်ꩻ ထွက်လောႏ (ထွက်သောဇေယျ) ဖျော်ထင်ႏ၊ သဲစ်အုံလင်ꩻဝုဲင်ႏထွူလဲ့ ထွက်လောႏနဝ်ꩻ တနီႏတနွော့ꩻ ဒေါ့ꩻခန်းနုဲင်းယို- "ဗွေႏ- ကျွꩻသဲင်ꩻလမ်းမွိုင်မွိုင်ဗွေႏ၊ တသန်ꩻသူꩻနဝ်ꩻ အုံဗော့ꩻတဗွုန်ႏတဝ်းဒွုမ်၊ တားထာꩻ ဒိုႏထာꩻခြေင်ခြေင်၊ ဒိုႏပါတွမ်ႏနီဗွေႏဩ" "ဟွူ-အဒိုႏခွေနုဲင်းမုဲင်ꩻအီ" "အရိုꩻ- သီဗွေႏစင်ꩻ ကျငါႏတခွိုင်းမုဲင်ꩻ၊ မီႏယွုမ်းငါႏသီဗွေႏစင်ꩻကျလဲ့ ထင်ႏပင်ꩻသဲင်ꩻဟုဲင်း၊ သတ်တဝင်ꩻယို'အရိုꩻနုဲင်းနဝ်ꩻဩ" ခွန်ကုဝေ ကထွိုင်ႏဟွုန်ငဝ်းနုဲင်းယိုနဝ်ꩻ သꩻဟမ်းပေါင်းတနွော့ꩻနွော့ꩻထိုꩻစွ်ႏသွူ။ သဲင်ꩻမွေးလိုႏလိုႏ၊ သဲင်ꩻမွေးတဝ်းလိုႏလိုႏ၊ အဝ်ႏစဉ်ꩻစာꩻခုဲင်ႏခန်းထာꩻသွူ။ မီႏသဲင်ꩻတဝ်းနဝ်ꩻ တသန်ꩻယို ပါꩻမုဲင်ꩻအီႏထွား၊ ပါꩻမုဲင်ꩻအီႏပွေါး၊ အမီႏလဲ့ꩻငီႏငါမေႏနဝ်ꩻ ယိန်းယပ်ꩻယပ်ꩻ၊ မီႏသဲင်ꩻလဲ့ ထွိုင်ႏရိုꩻအဒိုႏထာꩻနဝ်ꩻ အဝ်ꩻငမ်းခန်းယောင်ႏယောင်ႏသွူ။ နဝ်ꩻတွော့ꩻ "မဲဉ်ထွာမုဲင်ꩻထွာသဲင်ꩻစွဉ်ႏ"ဆုံꩻဖျတ်နုဲင်းနဝ်ꩻတဲင် "အွူ-သဲင်ꩻအွဉ်ဟုဲင်း၊ မဲ့ꩻခွေသဲင်ꩻ"ရိုꩻဖေႏခန်း ထင်ႏပင်ꩻသား ထွက်လောႏနုဲင်းနဝ်ꩻသွူ။ ခွန်ကုဝေ ထွိုင်ႏတွိုႏသဲင်ꩻလံးငါနဝ်ꩻ အဝ်ႏဟွုန်ထင်ႏခန်း အငဝ်းအဝ်ႏဒေါ့ꩻသင်ႏထာꩻတဲင် ယꩻမဝ်ꩻခန်း သိုႏလောင်းလံးငါတလောင်ႏတွော့ꩻ ဗွုမ်ထင်ႏခန်း တဒေါင်တဆင်ႏသွူ။ "ပါꩻမုဲင်ꩻအဝ်ႏဒါ့ꩻသင်ႏထာꩻလံးကီနဝ်ꩻ"ရိုꩻခန်းနုဲင်းနဝ်ꩻ၊ "ဒေါ့ꩻသမ်းတနယ်ꩻ ကျလဲ့ ထင်ႏလွဉ်ဟုဲင်း"ဒေါ့ꩻချာစွဉ်ႏ ကွန်ကုဝေနုဲင်းနဝ်ꩻသွူ။ ခွန်ကုဝေနဝ်ꩻ နုဲင်းမုဲင်ꩻမုဲင်ꩻရိုꩻထဲင်းဒွုမ်တွော့ꩻ ထင်ႏတွယ်ႏသွူးသွူးစွဉ်ႏ တွမ်ႏသိုႏလောင်ႏသွူ။ ခွန်ကုဝေ ကတွယ်ႏစနဝ်ꩻ တွမ်ႏအစူကျံႏရဲးခါꩻလဲ့ တွယ်ႏထွိုင်ႏလꩻလစ်ꩻငတ်ꩻဆင်ႏနဝ်ꩻ ခြဝ်အငဝ်းငွိုးဗွေဒုံ ဗွေဆောင်ႏစွဉ်ႏထာꩻသွူ။ "အွဉ်ႏထွူခန်းဗွေႏ၊ အွဉ်ႏထွူခန်း၊ ခွေသွဉ်းအီႏသီသွူ၊ ခွေသွဉ်းသဲင်ꩻသွူဗွေႏ၊ ခွေသွဉ်းတအုံတဝ်းဒွုမ်၊ တွယ်ႏပုဲင်ꩻဒွုမ်ခွေသွဉ်းဗွေႏ"တသန်ꩻနဝ်ꩻ ငွိုးလဲ့ငွိုး၊ ဒေါ့ꩻလဲ့ဒေါ့ꩻခန်းနုဲင်းယိုသွူ။ တွိုႏနဝ်ꩻမꩻ ခွန်ကုဝေနဝ်ꩻ တွယ်ႏဒွုမ်တဲင် အုံလင်ꩻခန်း မေႏဖါႏထျꩻခိုႏသွူ။ ဒေါ့ꩻဒွုမ်နုဲင်းမုဲင်ꩻမုဲင်ꩻတွော့ꩻ အုံထွားဗော့ꩻအခေႏနေႏသွူ။ ထွိုင်ႏလꩻ ၁၅-မိနေစ်ရပ်နဝ်ꩻ ငွိုးလဲ့ငွိုးဒွုမ်၊ ဒေါ့ꩻဒေါ့ꩻဒွုမ်ထာꩻ၊ ဗေင်ႏတလွာꩻလင်ꩻခန်း ခင်ႏလမ်းဗေင်ႏကိုတဲင် ခွန်ကုဝေလဲ့ ထင်ႏချာခန်းဒျာႏကျောင်ꩻသွူ။ တွိုႏအနီꩻဆုဲင်ꩻဆုဲင်ꩻဖုံႏနဝ်ꩻ ခွန်ကုဝေ အဝ်ႏသဲင်ꩻထေ့စွဉ်ႏစွုမ်ႏနီꩻနီꩻ၊ သဲင်ꩻဖေႏအွꩻထီတသီႏဖုံႏ၊ ထီသစ္စာႏဖုံႏ၊ သဲင်ꩻဖေႏ အမိန်းဖုံႏတွော့ꩻ ဟဝ်သဲင်ꩻစွုန်းသဲင်ꩻခန်းဒျာႏ တနီꩻတစိꩻစိꩻသွူ။ ထွိုင်ႏဟဝ်သက်သာႏနဝ်ꩻ ခွန်ကုဝေ ကွဲးသဲင်ꩻစꩻ သဲင်ꩻစꩻတွော့ꩻ ညညနဝ်ꩻ ဟဝ်လွစ်ဟဝ်တငါခန်းဒျာႏသွူ။ တသန်ꩻနဝ်ꩻ လိုꩻသေကေꩻဇူꩻတရာꩻတဖြာꩻတဲင် ဗꩻတွိုႏယိုခါ နေင်ႏမဲ့လာမဲ့နဝ်ꩻနဝ်ꩻ ကုဲင်းလွဉ်ကန်းတော့ꩻ ခွန်ကုဝေသွူ။ ယိုခါနဝ်ꩻ လံးအဝ်ႏခေါ်လဲဉ်း လဲင်ႏခါႏဒုံနဝ် ထီကတူႏခိုႏနဝ်တွော့ꩻ ခꩻတလဲင်ႏ ပွယ်ꩻမဟာႏဒုဂ်နဝ်ꩻ ဗို့ꩻမဲးတနꩻဘုရာꩻတဲင် မဉ်ꩻတွင်ႏတငါနေးခန်းဒျာႏ "ဘုရာꩻကာႏသန်ꩻ"နုဲင်းနဝ်ꩻသွူ။ ယိုနဝ်ꩻ ပွိုင်းဝွို့တွမ်ႏ ကျက်မာꩻတဲင် ခွန်ကုဝေမော့ꩻဗာႏ ကျုံႏဗာႏခြွိုင်ႏသန်ꩻရေꩻ အမော့ꩻအကျုံႏ တစွိုးတမျိုꩻသွူ။ [၁][၂]