အမျတ်သွတ်ꩻထာꩻရာꩻသူပါꩻ

"အနုတ္တရိယသုတ် (အမျတ်သွတ်ꩻထာꩻရာꩻ ၆-ပါꩻ)" ရဟန်ꩻသီးဖုံႏဟွေး အမျတ်သွတ်ꩻထာꩻရာꩻ အဝ်ႏသူပါꩻ၊ သူပါꩻကရိုꩻနောဝ်ꩻ- ၁။ ဒဿနာနုတ္တရိယ - အမျတ်သွတ်ꩻထာꩻထီႏ ၂။ သဝနာနုတ္တရိယ - အမျတ်သွတ်ꩻထာꩻဟွူန် ၃။ လာဘာနုတ္တရိယ - အမျတ်သွတ်ꩻလꩻလာဘ် ၄။ သိက္ခာနုတ္တရိယ - အမျတ်သွတ်ꩻသိက္ခာႏ ၅။ ပါရိစရိယာနုတ္တရိယ - အမျတ်သွတ်ꩻလောင်ꩻကပ် ၆။ အနုဿတာနုတ္တရိယ - အမျတ်သွတ်ꩻထာꩻယူႏလꩻ အဝ်ႏသူပါꩻနုဲင်းနောဝ်ꩻသွူ။ ရဟန်ꩻသီးဖုံႏဟွေး- ၁။ ထီႏဆင်ရတနာႏ၊ ထီႏသေရတနာႏ၊ ထီႏပတ္တမျာꩻနဝ်ꩻ ဒုံသားထာꩻထီႏ၊ ပုထုဇဉ်ႏထာꩻထီႏဒျာႏ၊ အရိယာႏသီး ထာꩻထီႏမွေးတဝ်း၊ ထာꩻထီႏနဝ်ꩻနဝ်ꩻ ရာႏဂဖေ့တာႏ၊ သေအီသစ္စာႏ၊ လꩻအီနိဗ္ဗာန်ႏမွေးတဝ်း၊ နေးတွမ်ႏထာꩻယွုမ်းအံႏတဲင် ထီႏဘုရာꩻ (ကေႏညိုႏဘုရာꩻ)၊ ထီႏသံဃာႏ (ကေႏညိုႏသံဃာႏ)နောဝ်ꩻမꩻ ကိလေႏသာႏစင်ကြောင်းအီတာႏ၊ သောကလျားဆွိုး၊ ထာꩻငွိုးယေန်ဖေ့၊ တွိုႏထေ့နိဗ္ဗာန်ႏတဲင် ထီႏဘုရာꩻ ထီႏသံဃာႏနဝ်ꩻမꩻ ထွာအမျတ်သွတ်ꩻ ထာꩻထီႏနောဝ်ꩻသွူ။ ၂။ ဟွုန်ထုံငေါဝ်း၊ ဟွုန်မောင်းငေါဝ်း၊ ဟွုန်တိန်ႏငေါဝ်း၊ ဟွုန်ငေါဝ်းတဲက်၊ ဟွုန်ငေါဝ်းသချင်ꩻ၊ ဟွုန်တရာꩻမာႏဖုံႏနဝ်ꩻ ငိမ်ꩻဖေ့ရာႏဂ၊ ဒုက္ခလွစ်ထန်ႏ၊ လꩻအီနိဗ္ဗာန်ႏတာႏမွေးတဝ်း။ ဟွုန်ဒျာႏ နီဗွေႏဘုရာꩻတရာꩻ၊ ဟွုန်ဒျာႏဘုရာꩻတပဲ့ꩻသံဃာႏ တရာꩻမွေးတရာꩻမဲဉ်ႏနဝ်ꩻမꩻ လꩻအီနိဗ္ဗာန်ႏတွော့ꩻ ဟွူန်တရာစဲစ် တရာꩻမဲဉ်ႏနဝ်ꩻ ထွာအမျတ်သွတ်ꩻ ထာꩻဟွူန်နောဝ်ꩻသွူ။ ၃။ လꩻပို၊ လꩻမာ၊ လꩻတခြိုꩻဥစ္စာႏနဝ်ꩻ ငိမ်ꩻဖေ့ရာႏဂ၊ ဒုက္ခလွစ်ထန်ႏ၊ လꩻအီနိဗ္ဗာန်ႏတာႏမွေးတောဝ်း၊ ယွုမ်းခြောႏခြဲ့ꩻဘုရာꩻ-လꩻသဒ္ဓါႏတရာꩻနဝ်ꩻတမျိုꩻ၊ ယွုမ်းတဉ်ႏတွော့ꩻ သံဃာႏ-လꩻသဒ္ဓါႏတရာꩻနဝ်ꩻတမျိုꩻ၊ လꩻသဒ္ဓါႏစဲစ်စဲစ် မဲဉ်ႏမဲဉ်ႏနုဲင်းနဝ်ꩻမꩻ လꩻအီနိဗ္ဗာန်ႏတဲင် ထွာအမျတ်သွတ်ꩻလာဘ်နောဝ်ꩻသွူ။ ၄။ လောကကိုယို သွဉ်ထုမ်းဆင်၊ သွဉ်ထုမ်းသေ၊ သွဉ်ခꩻခြီႏဒါႏ၊ သွဉ်သမဏဗျဟ္မဏသီး အကျင်ꩻမာႏ၊ ကသွဉ်(သိက္ခာႏ)ယိုဖုံႏနောဝ်ꩻ လꩻအီနိဗ္ဗာန်ႏတာႏမွေးတောဝ်း၊ သွဉ်ဒျာႏသီႏလ၊ သွဉ်ဒျာႏသမာႏဓိ၊ သွဉ်အားထွုတ်ဒျာႏ ဝိပဿနာႏနောဝ်ꩻမꩻ လꩻအီနိဗ္ဗာန်ႏတွော့ꩻ "သီႏလ သမာႏဓိ ပညာႏ"နောဝ်ꩻ ထွာအမျတ်သွတ်ꩻ သိက္ခာႏနောဝ်ꩻသွူ။ ၅။ လွူးခွန်ဒဲဉ်၊ လွူးပုဏ္ဏာꩻဒဲဉ်၊ လွူးသဌေꩻဒဲဉ်ဖုံႏနဝ်ꩻ လꩻနိဗ္ဗာန်ႏတာႏမွေးတဝ်း၊ ရေႏမိုးနိဗ္ဗာန်ႏထွူတဲင် ကပ်လူႏဗွေႏဘုရာꩻသွမ်ꩻ၊ လောင်ꩻလူႏဗွေႏသံဃာႏသွမ်ꩻနဝ်ꩻမꩻ လꩻအီနိဗ္ဗာန်ႏတဲင် ထွာအမျတ်သွတ်ꩻ လောင်ꩻကပ်နောဝ်ꩻသွူ။ ၆။ ယူႏလꩻပို၊ ယူလꩻတခြိုꩻဥစ္စာႏနဝ်ꩻ လꩻအီနိဗ္ဗာန်ႏတာႏမွေးတဝ်း၊ ယူႏလꩻသေႏသေႏ ဗွေႏဘုရာꩻဂွုဏ်ႏ (ပွါꩻမျာꩻဗုဒ္ဓါနုဿတိ) ယူႏလꩻသေႏသေႏသံဃာႏဂွုဏ်ႏ (ပွါꩻမျာꩻသံဃာနုဿတိ)နဝ်ꩻမꩻ လꩻအီနိဗ္ဗာန်ႏတွော့ꩻ ထွာအမျတ်သွတ်ꩻ ထာꩻယူႏလꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ အနုတ္တရိယသုတ်)