အဝ်ႏလိုႏအွဉ်ႏလဲဉ်းဒုံစီꩻကန်ꩻ
"အဝ်ႏလိုႏအွဉ်ႏလဲဉ်း ဒုံစီꩻကန်ꩻ" လောကကိုယိုလဲင်ႏခါ အမူႏတွံႏအခို၊ အထီးတွမ်ႏအမွူး တောႏလမ်းတောႏပါႏမုꩻနဝ်ꩻ တလွစ်ကင်ꩻတဝ်းဝင်ꩻ၊ ကွပ်အကျောင်ꩻမုဲꩻတဲင် နီလိုꩻသီးလဲ့နဝ်ꩻ၊ တိရစ္ဆာန်ႏလဲ့နဝ်ꩻ ကအုံပဋိသန္ဓေႏခါနဝ်ꩻ သဲင်ꩻအုံစွဉ်ႏ လောဘတဏှာႏရာႏဂနဝ်ꩻတဲင် သတ္တဝါႏဖုံႏနဝ်ꩻ အမူႏတွံႏအခို အထီးတွမ်ႏအမွူးနဝ်ꩻ လောဘကိလေႏသာႏ တဏှႏရာႏဂနိုꩻဆောႏမုꩻနဝ်ꩻမꩻ တဖြာꩻတွံႏတဖြာꩻ ထီႏဝင်ꩻနဝ်ꩻ ဖဝင်ꩻတထွာတဝ်း၊ အုံညီꩻအဝ်ႏရဝ်းဝင်ꩻ၊ တောႏလမ်းတောႏပါႏဝင်ꩻနဝ်ꩻ ထွာလွဉ်ဗာႏနဝ်ꩻသွူ။ ကထွာနုဲင်းနဝ်ꩻခါ အထိန်ꩻအတီ အချုပ်အချယ်ႏ ဘာႏသာႏရေꩻတရာꩻလဲ့နဝ်ꩻ၊ လိုꩻမျိုꩻရေꩻစီꩻကန်ꩻ ထုံꩻစံႏလဲ့ယဝ်း၊ အစိုꩻရဥပဒေႏလဲ့ပီပီ မီႏတအွဉ်ႏတဝ်း၊ မီႏတအဝ်ႏတဝ်းနဝ်ꩻလဲင်ႏခါ ယိုနဝ်ꩻလိုꩻ၊ ယိုနဝ်ꩻ တိရစ္ဆာန်ႏ ကွယ်ꩻပျာꩻဒွုမ်ဝင်ꩻနဝ်ꩻသွူ။ ကွပ်စွဉ်ႏဘာႏသာႏရေꩻတရာꩻ၊ လိုꩻမျိုꩻရေꩻထုံꩻစံႏ၊ အစိုꩻရဥပဒေႏတဲင် ယိုနဝ်ꩻမွိုး၊ ယိုနဝ်ꩻဖါ၊ ယိုနဝ်ꩻဖူး၊ ယိုနဝ်ꩻဝေး ခွဲꩻချာꩻဝင်ꩻ၊ ထိန်ꩻသေꩻခါꩻ ကိလေႏသာႏတဏှာႏ ရာႏဂတဲင် လိုꩻတွံႏတိရစ္ဆာန်ႏ ကွယ်ꩻပျာꩻလꩻဝင်ꩻနဝ်ꩻသွူ။ ဘာႏသာႏရေꩻ၊ လိုꩻမျိုꩻရေꩻ၊ အစိုꩻရဥပဒေႏစီꩻကန်ꩻ မဉ်ႏတအဝ်ႏတဝ်း၊ မဉ်ႏတအွဉ်ႏတဝ်းနဝ်ꩻလဲင်ႏခါ အွဉ်ႏစွꩻလွစ် ကိလေႏသာႏတဲင် မွိုးဖါဖူးဝေးမန်ႏ တသေတဝ်း သတ်လွဝင်ꩻတဲင် နွို့သော့ꩻဝင်ႏသော့ꩻ ပါသော့ꩻတောဒျာႏ တိရစ္ဆာန်ႏသီးအကွိုင်ꩻကိုနဝ်ꩻသွူ။ လိုꩻမျိုꩻရေꩻအထုံꩻစံႏ၊ ဘာႏသာႏရေꩻတားရဲးမုꩻ ဥပဒေႏထိန်ꩻတီမုꩻ အဝ်ႏမဉ်ႏလဲ့ လိုꩻယဟန်ႏနဝ်ꩻ တောႏလမ်းချာပို၊ တောႏလမ်းချာမွိုး၊ တောႏလမ်းချာဖူးဝေးနဝ်ꩻ ညညတလဲင်ႏ အဝ်ႏပေါႏပေါက်လွဉ်နဝ်ꩻ ဟွုန်ဗာႏထီႏဗာႏနဝ်ꩻသွူ။ လိုꩻနုဲင်းနဝ်ꩻခါ လိုꩻမျိုꩻရေꩻ၊ အထုံႏစံႏလဲ့ မယူႏ၊ ဘာႏသာႏရေꩻအယူႏဝါႏဒလဲ့ မလွောက်ꩻ၊ အစိုꩻရဥပဒေႏလဲ့ တနာႏတဝ်း၊ အဝင်ႏသော့ꩻဒျာႏ လိုꩻတိရစ္ဆာန်ႏကိုနဝ်ꩻသွူ။ နဝ်ꩻမꩻ အစိုႏရဥပဒေႏကိုနဝ်ꩻ လိုꩻခိုပေႏနဝ်ꩻ အသက်မီႏလꩻ တဆီသွစ်ꩻနေင်ႏနဝ်ꩻမꩻ အရွယ်ႏတွိုႏ၊ ဝင်ႏသော့ꩻလိုꩻတန်ခိုဗင်ႏကို၊ အမူႏပေႏလဲ့ အသက်မဉ်ႏလꩻ တဆီသွစ်ꩻနေင်ႏနဝ်ꩻမꩻ အရွယ်ႏတွိုႏ၊ ဝင်ႏသော့ꩻ လိုꩻတန်မူႏနံꩻကို၊ နဝ်ꩻမꩻလဲ့ တောႏလမ်းတောႏပါႏလꩻ ဥပဒေႏအဝ်ႏနုဲးနဝ်ꩻသွူ။ အစိုꩻရ ကအွဉ်ႏဗာႏဥပဒေႏနုဲးနဝ်ꩻခါ ကွပ်စွဉ်ႏနီလိုꩻသီးယို ကိလေႏသာႏဖေါက်ပြန်ႏမုꩻ အာႏတလာငါႏတဲင် အွဉ်ႏဗာႏဥပဒေႏနုဲးနဝ်ꩻသွူ။ တစွိုးနဝ်ꩻ အသက်အရွယ်ႏတတွိုႏတဝ်း လိုꩻမူႏလိုꩻပေႏနဝ်ꩻလဲင်ႏခါ ကထင်ႏတောႏလမ်းတောႏပါႏဝင်ꩻနဝ်ꩻ လိုꩻမုꩻကိစ္စ၊ ပိုဝါꩻဝွတ္တရာꩻ တသေတဝ်း၊ တစဲင်းတဝ်း၊ တဒါႏတဝ်းလဲ့ခေါ်ခေါ်၊ ကိလေႏသာႏခိုးလျားလိုꩻခိုဖုံႏနဝ်ꩻ အရွယ်ႏတတွိုႏတဝ်းလဲ့ အုဲႏနွိုင်ႏနင်ႏဆေꩻ ယားကုဲဒျာႏ လိုꩻမူႏပေႏဖုံႏနဝ်ꩻသွူ။ ကအုဲင်ႏထွူနုဲးနဝ်ꩻလဲ့ မတ်ပိုမတ်မာတဲင် အုဲင်ႏဝင်ꩻတမွေးတဝ်း၊ အုဲႏလယ်ႏဒျာႏ အပျောႏတာႏ၊ အထာꩻ ပျောႏ အကိလေႏသာႏ ကထင်ႏကွို့ꩻလွဉ်၊ ကထင်ႏဗွိုႏလွဉ်နဝ်ꩻလဲင်ႏခါ ဖွိုင်ꩻစလယ်ႏအကင် တတန်ꩻဖြေင်းတဝ်းဒွိုန်း တမာဝါꩻအွဉ်ႏကုဲလဲဉ်းဝင်ꩻနဝ်ꩻသွူ။ တွိုႏနဝ်ꩻလဲင်ႏခါ- (၁) မဲးရင်းမူႏပေႏ အာစွဉ်ႏဒျာႏ (၂) မွိုးဖါလဲ့ သꩻဆင်ꩻရယ်ꩻဗာႏ (၃) လိုꩻမူႏပေႏနမ်းကိုႏကျင်ꩻ ကုဲင်စွဉ်ႏဒျာႏ (၄) အခိုနဝ်ꩻလဲ့ ထွာလယ်ႏဒျာႏ ယားကုဲမူႏနံꩻပေႏနဝ်ꩻသွူ။ အဟဝ်တကွက်ꩻ တပေါႏပေါက်တဝ်းနဝ်ꩻသွူ။ မဲ့ဆငါလဲင်ႏခါ ကထီႏဗာႏကဟွုန်ဗာႏနဝ်ꩻ ထွာစွဉ်ႏဒျာႏ လိုꩻခိုဖုံႏ ယားကုဲလိုꩻမူႏပေႏ၊ လိုꩻမူႏပေႏနဝ်ꩻ ထွာစွဉ်ႏဒျာႏ လိုꩻခိုသီး ထာꩻပျောႏအီတာႏ၊ မာꩻပြေႏအီ လိုꩻခိုသီးကိလေႏသာႏ အသုံꩻအဆောင်ႏတမျိုꩻ နဝ်ꩻသွူ။ ကွပ်နဝ်ꩻမꩻ အရွယ်ႏတူႏ တတူႏတဝ်း တရွေꩻတဝ်း၊ ကလꩻဒါႏ မူႏနံꩻပေႏနဝ်ꩻ အပေႏနဝ်ꩻလဲ့နဝ်ꩻ၊ အတန်လဲ့နဝ်ꩻ ထူႏလွအုဲႏလွစွဉ်ႏဒျာႏ၊ အသက်လဲ့ တထောက်တဝ်း၊ ပိုအရွယ်ႏ လီꩻအရွယ်ႏလဲ့ ထောက်ထွားတဝ်း၊ ဝင်ꩻမွိုးဝင်ꩻဖါ သꩻအီႏဆင်ꩻရယ်ꩻလဲ့ တငဲ့ညာႏတဝ်း၊ ဝင်ꩻအီႏဒေါ့ꩻ ဝင်ꩻအီႏဖြဝ်ႏလဲ့ တဝင်ꩻသꩻတဝ်း၊ လွောက်ꩻလွဉ်ꩻဒျာႏ အကိလေႏသာႏတဲင် အကိလေႏသာႏမဉ်ႏရောင်း၊ မဉ်ႏဗွိုႏလွဉ်နဝ်ꩻလဲင်ႏခါ အွဉ်ႏကုဲချာဝင်ꩻ၊ အွဉ်ႏကုဲဝင်ꩻတဲင် ထုမ်ႏတောတောဖျင် အတသာ၊ အုဲင်ႏတောတောဖျင်တဖြာꩻ၊ အမဉ်ႏထွာနုဲင်းယိုခါ ထွာလို့လယ်ႏဒျာႏ လိုꩻယားချာအမျိုꩻနဝ်ꩻသွူ။ တွိုက်ꩻစွန်ထူႏချာအမျိုꩻသာꩻ၊ နိစ္စက်ချာအမျိုꩻသာꩻ၊ လဲဉ်အံႏချာအမျိုꩻသာꩻ၊ အမျိုꩻသာꩻလွောင်ႏဗူႏမုꩻ ယံကလီ၊ သွင်ꩻသော့ꩻယာလံ၊ သွင်ꩻသောꩻထာꩻတောႏ၊ သွင်ꩻသော့ꩻ ဒဝ်ထီသူႏရာႏတဲင် ကယားလယ်ႏဒျာႏထာꩻနုဲးနဝ်ꩻမꩻ မီႏမာꩻနုဲးနဝ်ꩻမꩻ ဝင်ꩻဟဲ့ꩻယားအမျိုꩻသာꩻတမွေးတဝ်း၊ အုဲႏလိုꩻမူႏ နီသုမ်ဖြာꩻတဲင် တလွူးတဝ်း၊ အွဉ်ႏကုဲပြာႏ တထွားတဝ်း၊ အံႏလွဉ်ꩻစွဉ်ႏဒျာႏ လိုꩻမူႏထာꩻလုပ်ထာꩻမာꩻနဝ်ꩻလဲ့ ယားအမျိုꩻသာꩻနေနေ၊ အုဲႏမာတဖြာꩻထွူတဖြာꩻတဲင် အွဉ်ႏကုဲ၊ ပိုကအဝ်ႏနဝ်ꩻလဲ့ တထွားချာတဝ်းပို၊ မွိုးဖါကထင်ႏဖဝင်ꩻနဝ်ꩻလဲင်ႏခါ ပိုနဝ်ꩻ မွိုးဖဲ့ꩻလဲ့တမွေးတဝ်း၊ ဖါဖဲ့ꩻလဲ့တမွေးတဝ်း၊ လဲဉ်းခါႏခါႏမွိုးထျꩻ၊ လဲဉ်းခါႏခါႏဖါထျꩻ၊ ပိုနဝ်ꩻတန်လဲႏဒျာႏ တဖူꩻလောင်းနဝ်ꩻလဲ့ ယားကုဲလိုꩻပေႏအမျိုꩻသာꩻနေနေ။ ယဟန်ႏနဝ်ꩻ တမာဝါꩻအွဉ်ႏကုဲဝင်ꩻတဲင် ပစ္စေꩻဥစ္စာႏလဲ့ကုဲ၊ ပိုလီꩻနဝ်ꩻခါ နာꩻလွူးလဲ့ တနွောင်ꩻတဝ်း၊ ခွေလွူးလဲ့ တဒါႏတဝ်းတဲင် ဖေႏလော်လယ်ဗာႏဝင်ꩻနဝ်ꩻလဲ့ အဝ်ႏဗောႏစွဉ်ႏဒျာႏနဝ်ꩻသွူ။ ပါꩻကောထူႏလွူးသားသားအဝ်ႏတဲင် လိုꩻပေႏနဝ်ꩻ ပေါင်ꩻခံႏသားနဝ်ꩻသွူ။ နဝ်ꩻလဲ့ တဟဝ်တဝ်းနေနေ၊ လိုꩻပေႏသꩻဖေါက်ပြန်ႏတဲင် လိုꩻပေႏကုဲအီအကျောင်ꩻတမျိုꩻနဝ်ꩻသွူ။ ကွပ်နဝ်ꩻမꩻ နီပအိုဝ်ႏခြာ နီပအိုဝ်ႏအမျိုꩻသာꩻကို မဲးရင်းလဲ့ယံကဆေ့ꩻ၊ ပေါရင်းလဲ့ယံကခြော အီႏမာꩻဗာႏနုဲးမုဲꩻနော၊ ပေါဖြားဒုံ လိုꩻပေႏခေါင်ႏဆောင်၊ ခိုဗင်ႏခေါင်ꩻ၊ မူႏနံꩻခေါင်ꩻသီး ဟဝ်ယူႏစဉ္စာꩻငါႏနဝ်ꩻသွူ။ မဉ်ႏတယူႏတဝ်း၊ မဉ်ႏတစဉ္စာꩻတဝ်း၊ မဉ်ႏတပျုပျင်ႏတဝ်းနဝ်ꩻ နီပအိုဝ်ႏအမျိုꩻသာꩻ လင်ꩻထဲ့ဖွိုႏဒါႏနဝ်ꩻသွူ။ ယိုလဲင်ႏခါ နီပအိုဝ်ႏလိုꩻတန်သီး ပညတ်သေꩻခါꩻ စီꩻကန်ꩻတမျိုꩻနဝ်ꩻ မူႏနံꩻခိုဗင်ႏ မီႏတောႏလမ်းနဝ်ꩻ အီထိုꩻဗာႏတဝ်း၊ မီႏအီထိုꩻနဝ်ꩻခါ မီႏတနာႏလွဉ်ꩻတဝ်းနဝ်ꩻခါ ဖေႏပဲစ်ဖေႏတံႏ အွဉ်ႏသေꩻခါꩻစီꩻကန်ꩻ ဥပဒေႏနုဲင်းနဝ်ꩻသွူ။ အဝ်ႏလိုႏထဲင်းသော့ꩻပါဒျာႏ နုဲးဆလယိုသွူ။ (၁) လိုꩻမူႏပေႏနဝ်ꩻ အသက်တဗွေတဝ်း ၁၈-နေင်ႏနဝ်ꩻ တောႏလမ်းတောႏပါႏလꩻတဝ်း (၂) ကထွာလိုꩻခိုလဲ့ အသက်တဗွေတဝ်း ၁၈-နေင်ႏ လိုꩻမူႏပေႏနဝ်ꩻ မာꩻပိုမာꩻမာ တောႏလမ်းတောႏပါႏလꩻတဝ်း (၃) ကထွာမွိုးဖါသားလဲ့ ပိုမူႏနံꩻပေႏ အသက်တဗွေတဝ်း ၁၈-နေင်ႏနဝ်ꩻ ဖေႏတောႏလမ်းတောႏပါႏ လꩻတဝ်း (၄) လိုꩻခိုပေႏလဲ့ ပေါႏအသက်တဗွေတဝ်း ၁၈-နေင်ႏနဝ်ꩻ တောႏလမ်းတောႏပါႏလꩻတဝ်း၊ မဉ်ႏတောႏလမ်းတောႏပါႏနဝ်ꩻလဲင်ႏခါ အမူႏပေႏမီႏလွဉ်ꩻတဲ့ ဖေႏပဲစ်ဖေႏတံႏ၊ အခိုပေႏမီႏလွဉ်ꩻတဲ့နဝ်ꩻ၊ မွိုးဖါမီႏဖေႏတောႏလမ်းလဲ့ယဝ်း ဖေႏပဲစ်ဖေႏတံႏဗာႏနဝ်ꩻသွူ။ ကအွဉ်ႏနယ်ထွူ ယိုလစ်ꩻချက်နဝ်ꩻ ကထွာဒါႏ ဖြားဒုံလဲ့နဝ်ꩻ၊ ဒုံမွိုးဒုံဖါလဲ့နဝ်ꩻ၊ လိုꩻပေႏခေါင်းဆောင်လဲ့ယဝ်း၊ အုပ်ချုပ်ရေꩻသားလဲ့သင် အဝ်ႏလိုႏမာꩻမွိုင်င်လဲဉ်းနဝ်ꩻသွူ။ မဉ်ႏတမာꩻတဝ်း၊ မဉ်ႏတရဲးခါꩻတဝ်း ယိုလဲင်ႏခါနဝ်ꩻ မဲးရင်းပေႏ၊ ပေါရင်းပေႏဖုံႏ ပေါႏအာထာꩻတကာႏတဝ်း ပညာႏရေꩻ၊ စီꩻပွာꩻရေꩻ၊ လိုꩻမုꩻအရေꩻလဲ့ ဆုတ်ယုတ်ကုဲပါ၊ လိုꩻပေႏလဲ့ သꩻလော်လယ်၊ ထာꩻမာꩻထာꩻခွုမ်ကုဲင်နဝ်ꩻသွူ။ မဉ်ႏတမာꩻသေꩻခါꩻတဝ်း ဒုံဆောင်ႏစီꩻကန်ꩻနုဲးနဝ်ꩻခါ လိုꩻမူႏပေႏဖုံႏလဲ့ အသက်တဗွေတဝ်း၊ အရွယ်ႏတတွိုႏတဝ်း၊ ထာꩻသူႏသေ တအဝ်ႏတဝ်းတဲင် တောႏလမ်းတောႏပါႏဝင်ꩻနဝ်ꩻ တညတဝ်း အွဉ်ႏကုဲင်ဝင်ꩻ၊ တွိုႏနဝ်ꩻ ကထွာမွိုးဖါသားလဲ့ သꩻဆင်ꩻရယ်ꩻဗာႏ၊ မဉ်ႏထွားစွဉ်ႏ စွိုးခွိုꩻဖဲ့ꩻလဲ့ တဟဝ်တဝ်း။ ရွဉ်ကအဝ်ႏဒါႏလိုꩻနဝ်ꩻလဲ့ ကိလေႏသာႏသောင်ꩻကျန်ꩻတဲင် ယားအီဒါႏ လိုꩻမူႏပေႏ၊ ပေါရင်းပေါမုဲးဖြားလဲ့ ယားကုဲဒါႏ လိုꩻမူႏပေႏနဝ်ꩻသွူ၊ ယိုခါလဲင်ႏ မျက်မောက်ကထီႏဗာႏနဝ်ꩻ ပေါရင်းပေါမုဲး သက်သွံဆီလစ်ꩻဆီဖုံႏနဝ်ꩻ ကျံႏချောက်ဒျာႏ ဝင်ꩻပိုမူႏပေႏ သက်တဆီနီ တဆီသွံနေင်ႏနဝ်ꩻ အဝ်ႏထီႏဗာႏနဝ်ꩻသွူ။ လိတ်တဲမ်းသား ကထီႏဗာႏ (အမဉ်ꩻ၊ အဒုံ အွဉ်ႏထန်ႏနယ်ပျꩻလဲ့ တဟဝ်တဝ်းတဲင် အွဉ်ႏကုဲချာသေꩻ) ပါꩻပေါရင်း အမာအဝ်ႏလဲဉ်းသွံပန်၊ အသက်အဝ်ႏလဲဉ်း သွံဆီလွိုငါနဝ်ꩻသွူ။ ဝွေꩻနဝ်ꩻလဲင်ႏခါ ၁၃၃၀-ဗွေနေင်ႏ တင်ꩻကျွစ်လာလောင်း သွံနီꩻကိုနဝ်ꩻ အီထိုꩻပါꩻမူႏပေႏတဖြာꩻ၊ ပါꩻမူႏနဝ်ꩻ အရွယ်ႏအဝ်ႏ တဆီပုဲင်နေင်ႏ၊ ဟွုန်လိုꩻတန်တဖြာꩻ ဒေါ့ꩻနုဲးနဝ်ꩻသွူ။ ကထင်ႏအီထိုꩻ ပါꩻမူႏပေႏနဝ်ꩻတဲင် လိုꩻတန်ဖုံႏ ဖေႏပဲစ်ဖေႏတံႏ အွဉ်ႏလွေꩻမာꩻတဖူꩻနဝ်ꩻသွူ။ ကကုဲထွူ အမာနုဲးနဝ်ꩻလဲ့ အရွဉ်လဲ့ တအဝ်ႏတဝ်းနုဲးဝင်ꩻ၊ အီထိုꩻထွူလိုꩻမူႏပေႏ သဲင်ꩻလွဉ်ꩻတဲင် အံႏခရာႏတအဝ်ႏတဝ်းတဲင် ထင်ႏကွီငါးဒျာႏ ဗွေႏဗွန်ဟူကျောင်ꩻနဝ်ꩻသွူ။ (ကတဲမ်းဗာႏနုဲးယိုနဝ်ꩻ အဝ်ႏထီႏစွဉ်ႏမဲ့၊ အဝ်ႏဟွုန်စွဉ်ႏနားနဝ်ꩻမꩻ ထေထန်ႏတဲမ်းဗာႏနဝ်ꩻသွူ။) ဝွေꩻသီးကထွာပုံႏနဝ်ꩻ မဉ်ႏစဉ္စာꩻဝွေႏဖန်ႏနဝ်ꩻလဲင်ႏခါ လိုꩻနုဲးနဝ်ꩻခါ တသူႏသေတဝ်း၊ တသေနာႏတဝ်း အဟဝ်အကုဲင်၊ လိုꩻမူႏပေႏ တဆီပုဲနေင်ႏနဝ်ꩻ ဝွေꩻသီးယားဖျက်လဲ့ ဒေါ့ꩻနွောင်ꩻဒျာႏနဝ်ꩻသွူ။ မီႏထွာဖျင် ဝွေꩻသီးစီꩻပွာꩻရေꩻ အထာꩻမာꩻနဝ်ꩻလဲ့ စီꩻပွာꩻရေꩻထာꩻမုဲꩻလဲ့ တအဝ်ႏတဝ်း၊ ထာꩻလုပ်ꩻထာꩻမာꩻလဲ့ တဲးတဲးဝါးဝါးလဲ့ တမာꩻတဝ်း၊ ကွပ်နဝ်ꩻမꩻ လိုꩻနုဲးနဝ်ꩻခါ လိုꩻယားအမျိုꩻသာꩻ၊ လိုꩻယားလိုꩻမူႏပေႏဖုံႏ ရိုꩻဗာႏနုဲးနဝ်ꩻသွူ။ ကထွာဒုံမွိုးဒုံဖါ လိုꩻတန်ဖုံႏ မီႏတဆုံꩻမꩻတဝ်း၊ မီႏတအွဉ်ႏတဝ်းဒုံစီꩻကန်ꩻ၊ မီႏပညတ်သေꩻခါꩻတဝ်း၊ မီႏတေက်ꩻတဝ်းလိုꩻနုဲးနဝ်ꩻခါ အသွꩻကွဲးပေါႏပေါႏတဲင် ယားဒျာႏဝင်ꩻပိုဝင်ꩻလီꩻတကာႏတဝ်း ထွာဒျာႏ လိုꩻလယ်ႏလိုꩻလွင်ꩻ၊ ကွဲးညည မာꩻလော်လီးလော်လယ်၊ တခွန်ꩻစွန်ပေါႏ၊ လိုꩻမွိုက်လိုꩻကုဲင် ပေါႏသော့ꩻဒါႏဒုံကိုနဝ်ꩻသွူ။ အမီႏထွာလွဉ် လိုꩻလေႏလိုꩻလွင်ꩻ တခွန်စွန်သားနဝ်ꩻလဲင်ႏခါ ထာꩻမုဲꩻအီႏယပ်ꩻသꩻဗာႏနဝ်ꩻ ဒုံဆောင်ႏရပ်သားအမျာꩻ ယပ်ꩻသꩻဗာႏ၊ သꩻဆင်ꩻရယ်ꩻဗာႏ၊ လိုꩻဟဝ်ဖုံႏ အုံအဝ်ႏဗာႏထာꩻနုဲးနဝ်ꩻသွူ။ လိုꩻလော်လိုꩻလွင်ꩻ ကထင်ႏအဝ်ႏသော့ꩻဒုံကို ဆောင်ႏကိုနဝ်ꩻ ယားကုဲဒါႏလိုꩻမူႏပေႏ အသꩻဓာတ်၊ အော်ကုဲဖျာꩻယောင်ꩻဒါႏ အမျိုꩻမျိုꩻတကာႏတဝ်း လိုꩻမူႏပေႏဖုံႏနဝ်ꩻ ဝွေꩻသီးယားကုဲင်ဒါႏနဝ်ꩻသွူ။ ကထွာဒါႏလိုꩻခိုပေႏ အမွိုးအဖါလဲ့နဝ်ꩻ၊ လိုꩻမူႏပေႏအမွိုးအဖါလဲ့နဝ်ꩻ သꩻဆင်ꩻရယ်ꩻ သꩻဒုက္ခလွဉ်ꩻဗာႏစွဉ်ႏဒျာႏနဝ်ꩻသွူ။ ကွပ်နဝ်ꩻမꩻ လိုႏအွဉ်ႏငါႏ ဒုံစီꩻကန်ꩻနုဲင်းဆချာ ကအွဉ်ႏနယ်လွဉ်ထွူနဝ်ꩻသွူ။ "ထွာပေါရင်း နီသွံပန်၊ သက်လဲ့တန် သွံလစ်ꩻဆီ၊ နမ်းလောင်းကီ ပီရူႏရာႏ၊ ယားကုဲင်ဒျာႏ လိုꩻမူႏပေႏ၊ အုဲင်ႏသေႏသေႏ တမွေးတဝ်း၊ အုဲႏဖြီႏဖြဝ်း အုဲႏဆောင်းဒျာႏ၊ အွဉ်ႏကုဲပြာႏ ထုမ်ႏတောတော၊ လိုꩻမူႏနော နမ်းလောင်းခါ၊ ဟို့ꩻလဲ့ပါ ပိုပေႏဗ၊ ဗွူတဖျ ရွဉ်ကျပ်ဗီႏ၊ မမော့ꩻထီႏ ကေန်ꩻဒုက္ခ၊ လိုꩻခိုမွ ကနိစ္စက်၊ လိုꩻမျိုꩻတွက် မထင်ႏထို၊ ပစ္စေꩻယို မတိုꩻပွာꩻ၊ နီတွံႏနာꩻ ပအိုဝ်ႏကို၊ မေတ္တာႏယို ဟဝ်အွဉ်ႏငါႏ၊ လိုꩻမျိုꩻဒျာႏ အချင်ꩻင်ꩻ၊ ဟွုန်သညင်ꩻ သꩻနဝ်ꩻခါ၊ စောင်ꩻသျောက်ဗာႏ အမျိုꩻယို၊ နီလိုꩻခို တာႏဝွန်ႏဒျာႏ၊ ယံသေနာႏ လိတ်စောင်ႏကို၊ ပါစွုမ်ႏယို ဟော်ꩻသွော့ဝင်ꩻ၊ နိုꩻဆောႏလင်ꩻ တွံႏသွꩻလုဲး၊ ဟော်ꩻကုဲးကုဲး ဝွေႏဖန်ႏသွော့၊ တဖေင်ꩻမွော့ မတ်နေးထူႏ၊ ခိုတွံႏမူႏ နီလိုꩻမျိုꩻ၊ ယံထင်ႏထို ယံတိုꩻတက်၊ ဟွုန်ဟဝ်ရက် ကျံႏဖန်ႏတဲမ်း၊ အမာႏမဲဉ်ႏ အဝ်ႏနီစား၊ ယံခွယ်ꩻချာꩻ နေးထူႏလွ၊ ထာꩻကေန်ꩻမွ ထွာအီဒါႏ၊ ဝေါင်းထိုꩻဗာႏ နုဲႏထိုꩻညာꩻ၊ အဟဝ်စား လွိုက်ထူႏနော လိတ်ဟော်ꩻသားသီးယာဟွေး။ [၁][၂]