အသာတမန္တဇာတ်

၇။ ဣတ္ထိဝဂ် (၆၁) အသာတမန္တဇာတ် ဘုရာꩻအွ်ႏဇေႏတဝန်ႏကျောင်ꩻကိုခါ ဒေါ့ꩻသွန်ဖေႏ ရဟန်ꩻဗွိုႏသာႏသနာႏတပါꩻ- အွိုးစခါ ဗာရာဏသီႏခမ်း ဗြဟ္မဒတ်ခုန်စိုး ဘုရာꩻလောင်ꩻအွ်ႏထွာ ဒိသာပါမောက္ခဆရာႏ ဂန္ဓာရတိုင်း တက္ကသီလာခမ်း၊ ဗာရာဏသီပုဏ္ဏာꩻတဖြာꩻ တဲႏကလွူးပိုအနီꩻနွ်ꩻမာꩻငါ ပူႏဇောႏခါꩻမေႏ ဗꩻတွိုႏအပိုသက်လꩻတဆီသူ၊ မွိုးဖါဒေါ့ꩻဖေႏပိုခို "မီႏမဲန်တွိုႏဗြဟ္မာႏခမ်းနွ်ꩻ ထူႏမေႏယို ထန်ႏတခြာ၊ မာꩻလွူးမေႏ၊ မီႏမဲန်ထိုမ်ႏဥစ္စာႏနွ်ꩻ ကန္တော့ꩻအီဆရာႏတာႏ ထူႏရွန်တရီင်ယို လွေꩻသွန်သွော့ပညာႏ"၊ ပုဏ္ဏာꩻပေႏယူႏ "မာꩻလွူးမေႏတခြာကိုတန္နဝ်ꩻ ခွေတမာꩻနွောင်ꩻတွ်း၊ မဲန်အွံထွာဒျာႏဗြဟ္မာႏ၊ အပိုသးမ္မဲန်ဒါႏဒျာႏ ပညာႏလိုꩻအခမ်း၊ နွ်ꩻမꩻထူႏရွန်တရီင်လွေꩻသွန်ပညာႏ၊ ထင်္ဒါႏထွူ သဲင်္ထေ့ချာမွိုးဖါ။ ပုဏ္ဏာꩻခိုဗင်ႏနွ်ꩻ အမွိုးဖါ မဲန်ဖေႏအိုင်တွ်းလမ်း၊ မဲန်အွန္ထီႏဒျာႏလိုꩻမူႏသီးအပဲတ်၊ မဲန်အွန်လွူးဒျာႏမေႏတခြာကို၊ နွ်ꩻမꩻရီအပို "ပိုခိုသွန်ပညာႏနွ်ꩻ အသာတမန္တန်ႏနွ်ꩻ သွန်ပါဗာႏနေ?၊ မီႏသွန်ပါဗာႏတွ်းတဲ့ လွေꩻသွန်ယင်းဟျ်း"၊ အမွိုးထွန္တဲင် လွေꩻဗာႏယင်းတလဲင်ႏ၊ ဆရာႏသီးမွိုးနွ်ꩻ အသက်လꩻတရျာꩻနီဆီ၊ ဆရာႏနမ်းတွိုႏ အွလ္လူးထီ၊ အွန်အမ်ႏဒဲန်၊ အွန်အွꩻထီ၊ အွ်ႏမာꩻနျ်းနွ်ꩻ ဝင်ꩻပသို့ꩻငါႏတဲင် ဆရာႏထူႏလွေꩻအမွိုးဖြား၊ ထူႏထော့ꩻပတ်ဟူ အမ်ႏခရာႏဖိုင်ႏ မာꩻတွမ်ႏသိုမ္ပေႏ ထွားထီကရော့ꩻအရပ်၊ ကယီန်အရပ်၊ လွေꩻမာꩻလွူးဒျာႏအမွိုးတခြာကို၊ ပုဏ္ဏာꩻခိုဗင်ႏ ထိုမ်ႏဆရာႏမော့ꩻတွ်း၊ လွေꩻလွန်ꩻဗာႏတခြာကို၊ ဆရာႏရိုꩻ "မွော့လွန်ချာမွိုင်ငါႏနွ်ꩻ၊ အွ်ႏလိုႏထာꩻမျ်ꩻ"ထင်ႏရီ "နီမွိုးထွန်ႏလွန်သွန် အသာတမန္တန္တဲင် လွန်တွိုႏချာဗာႏ"။ ဆရာႏတဲ့ သေနာႏထွူဒျာႏ၊ အမွိုးမာꩻဖေႏ အပိုကထီႏလိုꩻမူႏအသီးအပဲတ်၊ ဆရာႏရိုꩻ "ခွေအီႏသွန်ဖေႏနာꩻ အသာတမန္တန်၊ စဟန္နီꩻမာꩻငါ နာꩻမာꩻဖေႏခွေထာꩻမာꩻ၊ အွလ္လူးမွိုးဖြားထီ၊ ပဆူႏဖေႏမွိုးဖြားခွမ်ꩻလာꩻ၊ ဖေႏအမ်ႏဖေႏအွꩻ၊ စိမ်ႏဖြွꩻဝိုတ်ပတ်၊ မီႏဝိုတ်ပတ်ခါ ဒေါ့ꩻပါငဝ်းကိလေႏသာႏ၊ အသက်တရျာꩻနီဆီလဲန်းမီႏတဲ့ နျ်းကဒွိုန်းခွိုင်းယို၊ အသက်အွ်ႏပေႏခိင်ႏနွ်ꩻက အီႏနျ်းမျ်ꩻရိုꩻတဲင် ဒေါ့ꩻအာာ၊ အံႏဖြာႏအာာ၊ နီမွိုးအီႏဒေါ့ꩻချာနာꩻ ငွ်းနျ်းမျ်ꩻနွ်ꩻ နာꩻတွမ်ႏဝင်ꩻသꩻမွုန်းခွေ ဒေါ့ꩻနဲချာလို့လို့"။ ဆရာႏကဒေါ့ꩻအတွိုင်ꩻ ပုဏ္ဏာꩻခိုဗင်ႏထင်ႏမာꩻ မွိုးဖြားသꩻကိုယူႏ "ပုဏ္ဏာꩻပေႏယို- မဲန်မုန်းပျောႏခွေ အငမ်းအဆရာႏဒျာႏ"ရိုꩻတဲင် ထွန်ႏပုဏ္ဏာꩻပေႏ မာꩻသီချာအဆရာႏ၊ ပုဏ္ဏာꩻပေႏရိုꩻ "ခွေမာꩻသီဗုန္တဝ်း"၊ အမွိုးဖြားရိုꩻ "နာꩻမီႏအွန်ႏကျ်တွ်းခွေငါ မာꩻသီဆရာႏကိစ္စနွ်ꩻ ခွေထူႏတာႏဝုန္ဒျာႏ"။ အမွိုးဖြားကဒေါ့ꩻအတွိုင်ꩻ ပုဏ္ဏာꩻပေႏ ဒေါ့ꩻနဲချာလို့ဆရာႏ၊ ဆရာႏထင်ႏဟွုန်တပဲ့ꩻငွ်းတဲင် တွက်ထွား မွိုးဖြားသက်တန်ꩻ အီႏလို့သွူဟန္နီꩻ သေစဲင်းရီးထွူမꩻ လွေꩻဖဲ့ဖက်ꩻဒွိုႏမွူး၊ တဲ့ꩻဆရာႏရုက် အွန်ႏဗီင်ႏတအာထာꩻ သိုမ္ပေႏကို ကူႏလောင်း၊ အွ်ႏနွ်ꩻ ယွိုင်ႏလွေꩻတဖြွီꩻ ဗꩻတွိုႏမွိုးဖြားထျꩻ၊ ထူႏခွါတဗာႏ လွေꩻဖေႏမွိုးဖြား၊ စမ်ႏလွေꩻတဖြွီꩻ တွိုႏသိုမ္ပေႏကို စမ်ႏဆရာႏငွန်ꩻ၊ တွမ်ႏခွါဗက်ꩻလင်ꩻ သီင်ႏငွ်းထင်ႏသင်ႏ၊ ဘုရာꩻလောင်ꩻတဲ့ဒေါ့ꩻ "မွိုးဖြားမွော့မာꩻတွိုးနျ်းနွ်ꩻ" ထင်ႏဟွုန်အပိုငွ်း "ပါꩻသေလို့လဲန်းခွေကဲꩻ" ဝင်ꩻသꩻငါႏဝင်ꩻတဲင် မွိုးဖြားသီဝꩻလင်ꩻဗော့ꩻ သိုမ္ပေႏကို၊ ဆရာႏတွမ်ႏပုဏ္ဏာꩻပေႏ သင်္ဂျိုဟ်ႏဖေႏမွိုးဖြားထင်ႏထွူ ဆရာႏရိုꩻ "တပဲ့ꩻဟွေး- သီမွိုးကထွန်ႏလွန်သွန္ဒါႏ အသာတမန္တရာႏကရိုꩻနွ်ꩻ ဖေႏကသေလိုꩻမူႏသီးအပဲတ်၊ မာꩻဆင်ꩻရဲꩻဒါႏလိုꩻ၊ မာꩻယုက်မာꩻဖွိုႏဒါႏလိုꩻအကျောင်ꩻနျ်းနွ်ꩻဒျာႏ"။ ပုဏ္ဏာꩻပေႏတဲ့ ကန္တော့ꩻရိုႏသေႏထွူ ဆရာႏတဲင် သဲင်္ချာခန်းဒျာႏ မွိုးဖါထျꩻ၊ သဲင်ꩻဒေါ့ꩻအမွိုး "လိုꩻမူႏသီးအပဲတ်နွ်ꩻ ခွေထီႏစဲင်းလဲန်း၊ ခွေမဲန်အိုင်တွ်းဒုမ်လမ်း၊ ခွေအီႏလွေꩻထွာဒျာႏသျင်ႏရသေ့ꩻ။ ၆၁။ အသာ လောကိတ္ထိယော နာမ၊ ဝေလာ တာသံ န ဝိဇ္ဇတိ ။ သာရတ္တာ စ ပဂဗ္ဘာ စ၊ သိခီ သဗ္ဗဃသော ယထာ ။ တာ ဟိတွာ ပဗ္ဗဇိဿာမိ၊ ဝိဝေက မနုဗြူဟယံ ။ လောကေ- လောကကို၊ ဣတ္ထိယောနာမ- လိုꩻမူႏသီးအမျိုꩻနွ်ꩻ၊ အသာ- ဖေႏဒါႏလိုꩻထာꩻဒုက္ခ၊ တာသံ- လိုꩻမူႏသီးယို၊ ဝေလာ- ဖြားဆားပေႏတန် အခံꩻတွိုင်ꩻနွ်ꩻ၊ နဝိဇ္ဇတိ- တအဲန္ထဝ်း၊ သာရတ္တာစ- မက်ကာမဂုဏ်ႏ၊ ပဂဗ္ဘာစ- နံးဖြောင်းသꩻသိုမ္ပာꩻလိုမ်းအွ်ႏသော့ꩻလို့ကာမဂုဏ်ႏကို၊ သိခီယထာ- ဗိုန္ပီနျ်းမေႏ၊ သဗ္ဗဃသော- ဟွ်ကျ်ရွေꩻတွ်း ကခိုးလို့ဒါႏထာꩻ ကားကအွ်ႏအတွိုင်ꩻ၊ ဧဝံတထာ- ဗိုန္ပီနွ်ꩻ၊ ဣတ္ထိယော- လိုꩻမူႏသီးယို၊ (လဒ္ဓံ လဒ္ဓံ- လꩻရာꩻလိုꩻယို၊ သေဝန္တိ-မုန်းပျောႏလို့ဒါႏသွူ။) ဟိတွာ- ခွေအီႏစွန်ꩻသွူ၊ တာ- လိုꩻမူႏမျိုꩻတဲင်၊ ပဗ္ဗဇိဿာမိ- ဗျ်ခန်းတွမ်ရဟန်ꩻ၊ ဝိဝေကံ- ကာယစိတ္တ ဝိဝေကယို၊ အနုဗြူဟယံ- မာꩻပွါꩻထွူတဲင်၊ (ဘဝိဿာမိ- ခွေအီႏလွေꩻထွာဒျာႏ၊ ဗြဟ္မလောကပရာယနော- လိုꩻကွုတ်ဗြဟ္မာႏခမ်း)။ ပုဏ္ဏာꩻခိုဗင်ႏ ဝျ်ႏထင်ႏမွိုးဖါ ထန္တခြာပွါꩻ နီပါꩻဝိဝေက ဘဝထင်ႏပ္လောင်ꩻ ဗြဟ္မာႏခြောင်ꩻတွိုႏ ဗိုန္ထိုဟောꩻသွုပ် လိတ်ꩻပုက်သစ္စာႏ ထင်ႏပျꩻပါထိုန်း ရဟန်ꩻအိုန္နဝ်ꩻ တွိုႏဖျောထွာဗာႏ သောတာႏပန်ႏအရိယာႏသွူ။ ဘုရာꩻစိုးယိုခါ ပုဏ္ဏာꩻပေႏသီးမွိုးနွ်ꩻ ဘဒ္ဒကာပိလာနီထေရီ၊ ပုဏ္ဏာꩻပေႏသီးဖါနွ်ꩻ မဟာကဿပထေရ၊ ပုဏ္ဏာꩻပေႏနွ်ꩻ အာနန္ဒထေရ၊ ဒိသာပါမောက္ခဆရာႏတန္နဝ်ꩻ သဲင်္ထွာသမ္မာသမ္ဗုဒ္ဓဘုရာꩻနွ်ꩻသွူ။ အသာတမန္တဇာတ် ထွူယို။