အာႏကွိုꩻမွိုန်းပါꩻ

အဝ်ႏ ဝီခီပီးဒီးယား ကို

"အာႏကွိုꩻမွိုန်းပါꩻ မာꩻထာꩻမာꩻ" လောကကိုယို မာꩻထာꩻမာꩻအမျိုꩻမုဲင်ꩻမုဲင်ꩻယောဝ်း နမ်းတွမ်ႏနမ်း မဉ်ႏအာႏကွိုꩻချာဒျာႏနောဝ်ꩻမꩻ အီႏခွꩻသꩻတငါနွောင်ꩻဒါႏနောဝ်ꩻသွူ။ ထာꩻမာꩻတဗာႏ စစရာႏရာႏ မဉ်ႏအာႏကွိုꩻဗာႏနေကပါꩻနောဝ်ꩻ ထာꩻမာꩻတဉ်ႏခွေါင်နွောင်ꩻတောဝ်းဒွိုန်း၊ ထာꩻမာꩻအောဝ်ႏယောင်ႏယဲင် ဝုဲင်ဝဲင်းထင်ႏလင်ꩻဗာႏနေကနောဝ်ꩻသွူ။ ပစ္စုပ္ပန်ႏကာႏလ ပစ္စက္ခယိုခါအနေႏ မဉ်ႏထွားဗာႏ နီပအိုဝ်ႏဒေႏသ အခေႏနေႏအလꩻနောဝ်ꩻ ထာꩻမာꩻအထွောင်းမုဲင်ꩻ အမျိုꩻမုဲင်ꩻ အစားမုဲင်ꩻတယောဝ်း နီတွမ်ႏနီကအီႏခွုမ်စံႏ မာꩻနွောင်ꩻချာခြေင်းခြေင်းတွောင်တွောင်နောဝ်ꩻ အဲဉ်ထောဝ်းငါႏဒွိုန်းနောဝ်ꩻသွူ။ ထာꩻမာꩻတယ်ႏအပေႏ ဗꩻအတန် စစရာႏရာႏ အာႏကွိုꩻဗာႏဒျာႏဝင်ꩻလွဉ်းလွဉ်းတဲင် ဝင်ꩻမာꩻတွိုင်ꩻ၊ ဝင်ꩻဆျာႏတွိုင်ꩻ၊ ဝင်ꩻချာႏတွိုင်ꩻနုဲင်းမုဲင်ꩻလဲ့ နီအောဝ်ႏခံႏဗာႏဒျာႏလီꩻလီꩻနောဝ်ꩻသွူ၊ စစရာႏရာႏ ကွပ်ကွိုꩻငါႏပါꩻတဲင် နီထွုံꩻစံႏ ယိုꩻယာႏဟောဝ်ဖုံႏနောဝ်ꩻ ကွဲထိုꩻမားမားစွဉ်ႏဒျာႏနောဝ်ꩻသွူ။ နီထွုံꩻစံႏယိုꩻယာႏ ထိုꩻမားဗာႏပွုံႏနုဲင်းမုဲင်ꩻနဲတဲင် နီမွိုးနီဖါ ပွိုင်းလဲင်ႏခါဖုံႏနောဝ်ꩻ မဉ်ႏဖြေꩻစာဝင်ꩻသွို့ꩻခြံဟံႏယာႏ သိန်ႏလွူးဝါႏလွူးတရိုꩻတောဝ်း၊ မွိုးဖါဖန်းဖေႏ ပိုလီꩻအမွီႏဖုံႏတရိုꩻတောဝ်း၊ တောႏလမ်းတောႏပါႏဝင်ꩻတရိုꩻနောဝ်း နီဒုံဆောင်ႏစီꩻကန်ꩻဖုံႏ တရိုꩻတောဝ်းနောဝ်ꩻ ထူႏသွုံꩻချာဒျာႏ နီထွုံꩻစံႏယိုꩻယာႏ(ထုံးတမ်းစဉ်လာဥပဒေ)ဥပဒေႏနောဝ်ꩻသွူ။ နီထွုံꩻစံႏယိုꩻယာႏ ဥပဒေႏနောဝ်ꩻ တဖြာꩻတွမ်ႏတဖြာꩻ အံႏသွင်ꩻရိုႏသေႏလူႏလုဲင်ႏငါႏဝင်ꩻ၊ တဖြာꩻတွမ်ႏတဖြာꩻထာꩻလဲ့ တပြွန်ကာႏသော့ꩻတောဝ်းဝင်ꩻ၊ တရိမ်လူႏလုဲင်ႏတောဝ်းဝင်ꩻထာꩻဖုံႏနောဝ်ꩻသွူ။ မဉ်ႏပွုံႏခွိုင်ꩻနယ်ဗာႏနောဝ်ꩻ မဉ်ႏထော့ဝင်ꩻခြံကူခြံနားလဲ့ စွိုင်ခါꩻဗော့ꩻကောႏယ၊ မတ်တောင်ꩻခါꩻဗော့ꩻ လုံးတူႏ၊ သိန်ႏမွူးစတဲင်နုဲင်းနောဝ်ꩻဖုံႏ၊ မတ်တောင်ꩻအီတွမ်ႏနုဲင်းနောဝ်ꩻပေႏလဲ့ တခြဲ့ꩻလူႏလုဲင်ႏတောဝ်းဝင်ꩻထာꩻ၊ ဝင်ꩻနီစူꩻခါꩻဒါႏအတွိုင်ꩻ တဖြာꩻတွမ်ႏတဖြာꩻ အံႏသွင်ꩻလူႏလုဲင်ႏဟောဝ်ငါႏဝင်ꩻဖုံႏနောဝ်ꩻသွူ။ နုဲင်းယိုခါနောဝ်ꩻ လိုꩻယဟန်ႏသား ကွိုꩻထာꩻသေမာꩻ၊ ကွိုꩻထာꩻနုတ်ꩻတွူမာꩻ၊ နေးတွမ်ႏထာꩻသေ အံႏနွောင်ꩻအီပါꩻတဲင် နုဲင်းဒျာႏသေင်ႏလွူးဝါႏလွူးဖုံႏနောဝ်ꩻ မွိုးဖါထွုံꩻစံႏဥပဒေႏအလꩻ ဝင်ꩻကမုဲင်ခါꩻဒါႏ အကူအနားဖုံႏယို အံႏသွင်ꩻတောဝ်းဝင်ꩻတွော့ꩻ အံႏနွောင်ꩻအီတောဝင်ꩻ တွမ်ႏသစ်တောဥပဒေႏဖုံႏနောဝ်ꩻသွူ။ ဝင်ꩻသွို့ꩻယာႏခြံယာႏဖုံႏလဲ့ တရိမ်နွိုင်ႏ၊ သိမ်ꩻနွိုင်ႏဝင်ꩻထာꩻတဲင် သွို့ꩻခြံသား မဉ်ႏထေင်ချာလဲ့ "အောဝ်ႏမုဲင်ꩻသီဟံႏဂရန်၊ အောဝ်ႏမုဲင်ꩻသီပွုံႏစံႏ(၁၀၅)"နုဲင်းနောဝ်ꩻဖုံႏသွူ။ နီသွို့ꩻခြံသား မွိုးဖါကအွဉ်ႏကုဲင်သေꩻခါꩻဒါႏ ထွုံꩻစံႏယိုꩻယာႏ ဥပဒေႏအလꩻ စာႏရင်ꩻအင်ꩻတအောဝ်ႏဖိုတောဝ်းရင်ꩻ၊ စာႏရင်ꩻအင်ꩻ တဲမ်းခရႏတလိုႏတောဝ်း၊ အောဝ်ႏတောဝ်းယောဝ်း လွူးဒျာႏသꩻဟောဝ်၊ ထူႏသွုံꩻလွဉ်ꩻဒျာႏ မွိုးဖါထွုံꩻစံႏဥပဒေႏတွော့ꩻ အုံအောဝ်ႏလွောက်ꩻနာႏလွဉ်ꩻဒျာႏရင်ꩻနောဝ်ꩻသွူ။ ထူႏဂွုဏ်ႏအံႏဖြာႏ ဟောဝ်လွောက်ꩻနာႏထွိုက်ငါႏ မွိုးဖါထွုံꩻစံႏဥပဒေႏယို နေးတွမ်ႏပညာႏထာꩻသေတဲင် လိုꩻကအံႏနွောင်ꩻအီချာ နီခမ်းသားမွိုးဖါလဲ့ အောဝ်ႏအာငါႏနောဝ်ꩻမꩻ ယိုမာꩻငါ ဖေႏကထွာဗာႏပုဲင်ႏနောဝ်ꩻ မဉ်အွဉ်ႏသေငါႏ လိုꩻသေလိုꩻဒါႏ ထာꩻသူႏသေဆေ့ꩻသားနုဲင်းနောဝ်ꩻသွူ။ လိုꩻယဟန်ႏသား မဉ်လꩻနွိုင်ႏဝင်ꩻထာꩻ၊ မဉ်လꩻခြေင်ဝင်ꩻထာꩻတဲင် ဖေႏကနွောင်ꩻဝင်ꩻအနေႏ လွေꩻကွိုꩻတောပါꩻအာႏဏာႏအောဝ်ႏသား သဲင်ꩻလောက်ꩻအံႏချာ နီခမ်းသားမွိုးဖါဖုံႏ အောဝ်ႏပြုံႏပြင်ႏ ဗောႏဗယ်ႏထာꩻနောဝ်ꩻသွူ။ နုဲင်းတဲမ်းလိတ်သား နမ်းကမော့ꩻဗာႏနောဝ်ꩻ (၁၄-၂-၂၀၁၆)နီꩻ ဘာႏသာႏတဗွိုန်တောဝ်း ပအိုဝ်ႏဒုံပေႏတဒုံ မဉ်လꩻခြေင်ဝင်ꩻသိန်ႏလွူးတဲင် နီမွိုးဖါထွုံꩻစံႏဥပဒေႏအလꩻ သိန်ႏကူသိန်ႏနား ဝင်ꩻဗွေႏကကျꩻစွိုင်ရဲဉ်ႏခါꩻဒါႏ စေးကောႏယနောဝ်ꩻ မတ်လောက်တောဝ်းဝင်ꩻထာꩻတွော့ꩻ နေးတွမ်ႏဝွေꩻသီးဒုံအမျာꩻအာႏ ကျံႏထူႏသိမ်ꩻခြေင်ဝင်ꩻသိန်ႏလွူးနောဝ်ꩻသွူ။ သိန်ႏလွူးသား ထွိုင်ႏတဖေႏတောဝ်းနောဝ်ꩻ ကွိုꩻစွဉ်ႏသစ်တော ဥပဒေႏအလꩻတွော့ꩻ ထူႏသိမ်ꩻထိုꩻခြေင်စွဉ်ႏ ဝင်ꩻသေင်ႏမွူးနောဝ်ꩻသွူ၊ သိန်ႏလွူးသား ထွိုင်ႏဖဲ့ꩻချာဝင်ꩻသိန်ႏနောဝ်ꩻ ဟဲ့ꩻသဲင်ꩻစွဉ်ႏ သစ်တောတွမ်ႏယဲꩻဆွမ်ꩻစွဉ်ႏဝင်ꩻဗွေႏ၊ တွယ်ႏဆာပါစွဉ်ႏဝင်ꩻနောဝ်ꩻသွူ။ လိုꩻနုဲင်းယိုစား မဉ်ႏအောဝ်ႏသော့ꩻအာမွိုင် နီပအိုဝ်ႏကိုနောဝ်ꩻ နီပအိုဝ်ႏလိုꩻမျိုꩻယို အီႏထွာလွဉ်နုဲင်းမုဲင်ꩻ၊ ယဟန်ႏသား မာꩻထာꩻမာꩻနောဝ်ꩻ ကိစ္စပေႏပေႏတယောဝ်း၊ နီတွမ်ႏနီအောဝ်ႏထွူအီဒျာႏတယောဝ်း အွဉ်ႏဗွိုအနမ်း၊ အွဉ်ႏဒါႏအနမ်း၊ အွဉ်ႏယံအနမ်းတဲင် ကွိုꩻတောပါꩻ မာꩻထာꩻမာꩻတွော့ꩻ ခွေသီနီနာꩻချင်ꩻချင်ꩻ လွောင်ႏဗူႏရေꩻပြုဲင်ပြင်ꩻထိုꩻဗာႏဝင်ꩻနောဝ်ꩻသွူ။ နီချင်ꩻချင်ꩻ သွီႏလီထိုꩻဝင်ꩻကာႏတောဝ်း ဝင်ꩻလိုꩻမျိုꩻလင် ထီႏနီလဲ့ ထင်းဖွီထီႏပေႏပါ နီပအိုဝ်ႏ၊ ဝင်ꩻသေထွꩻနီခွိုꩻနွယ်ႏအာႏပေႏခရာႏဖုံႏတွော့ꩻ ကွဲညည နီဒုံဆောင်ႏရပ်ရာႏဒေႏသကို ဝင်ꩻနွို့ဒွါႏသော့ꩻလို့စူခင်ႏ၊ ဝင်ꩻနွို့အံႏဆျာႏပျင်ႏထိုꩻလိုꩻနောဝ်ꩻသွူ။ နီပအိုဝ်ႏကို လိုꩻအွဉ်ႏဗွိုအနမ်းသား၊ လိုꩻကျွားလိုꩻမောႏ လွိုင်ႏအာငါႏတဲင် ဟော်ꩻထွားလိတ်သား ကဉ်းထွားစံꩻချာဒျာႏ နီရပ်ရာႏဒေႏကို ပငါပရာꩻ၊ ကွပ်ပွိုးလိုꩻအွဉ်ႏဗွိုနမ်းသား အာငါႏနောဝ်ꩻမꩻ နီဒုံဆောင်ႏနောဝ်ꩻ နုဲင်းစွဉ်ႏအရဲအပါႏအဲဉ်ထောဝ်း၊ ဝင်မဉ်နွို့ခိန်ႏမုဲင်ꩻနွို့၊ ဝင်ꩻမဉ်ထန်ႏခိန်ႏမုဲင်ꩻထန်ႏ၊ ဝင်ꩻမဉ်ဆွမ်ꩻခိန်ႏမုဲင်ꩻဆွမ်ꩻ၊ ကမ်းစွဉ်ႏဝင်ꩻသꩻမာꩻနွောင်ꩻအံႏ နီလိုꩻမျိုꩻနောဝ်ꩻသွူ။ လိုꩻယဟန်ႏ တကေးတကြားငါဝင်ꩻတဲ့ ထုမ်ႏဝင်ꩻအပဲစ်၊ စဲစ်ဝင်ꩻအမာႏ၊ အံႏဆျာႏဝင်ꩻဖေႏကလꩻ အွဉ်သဲင်ꩻစဲ့ꩻ အွဉ်သဲင်ꩻယဲꩻ နီရပ်ရာႏကိုတဲင် သဲင်ꩻလောက်ꩻအံႏဝင်ꩻ၊ သဲင်ꩻဆွမ်ꩻပျင်ႏတင်ꩻ၊ သဲင်ꩻတွယ်ႏတံႏခြေင်ပျင်ႏဝင်ꩻသားဖုံႏတဲ့ အောဝ်ႏနောဝ်ꩻသွူ။ ကွပ်စွဉ်ႏလိုꩻနုဲင်းကယို လွိုင်ႏအာသော့ꩻ နီလိုꩻမျိုꩻကိုတဲင် အာႏကွိုꩻပါꩻ မာꩻထာꩻမာꩻဖုံႏတွော့ꩻ ကွဲညညနီထွုံꩻစံꩻဟောဝ်ဖုံႏ ထိုꩻမား၊ ကွဲညည နီလိုꩻမျိုꩻပါ ထိုꩻမားဒါႏနောဝ်ꩻသွူ၊ ပွိုးတမုဲင်ꩻနဲးတဲင် ဝင်ꩻထွိုင်ႏအံႏနွောင်ꩻဗာႏဖိုနီ တွမ်ႏဝင်ꩻဥပဒေႏဖုံႏနောဝ်ꩻ နီမွိုးဖါထွုံꩻစံႏ ဥပဒေႏဖုံႏယို ယွုမ်းအံႏချာဒွုမ်၊ ထွိုင်ႏယွုမ်းအံႏချာဒွုမ်နောဝ်ꩻ စူꩻလွဉ်ꩻနုဲင်းနုဲင်း ဝင်ꩻဥပဒေႏတွော့ꩻ နီထွုံꩻစံႏဥပဒေႏ ထိုꩻမားဗာႏနောဝ်ꩻသွူ။ ကွပ်စွဉ်ႏ နီယို စူꩻလွဉ်ꩻပါꩻကွေႏကွေႏတဲင် နီထာꩻယူႏထာꩻတွေꩻ၊ နီသွိုန်ႏနီသꩻဖုံႏ၊ နီနမ်းဖုံႏယိုလဲ့ ပါလွဉ်ꩻနုဲင်းနုဲင်းထိုꩻဝင်ꩻတွော့ꩻ ထွိုင်ႏသေနမ်းနောဝ်ꩻ နီယို ပါꩻမျောႏထိုꩻလဲဥဉ်အကျောင်ꩻ-။ နမ်းသꩻနီပါꩻ ယံချံꩻသာႏ ဒါႏသွူတဲ့ တွမ်ႏပညာႏအံႏနွောင်ꩻမွိုန်းနီစွိုးခွိုꩻ-[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ရက်ခွိုꩻပအိုဝ်ႏသွီႏစဲစ်(ခွိုꩻစုပ်တသာလိုꩻယွဲ)
  2. မောင်းမွူးခံꩻ အမုဲင်-၄၀၊ မဲ့ငါ-၂၃