အီႏဖြား'ဆာ'သီဗာႏ

"သုခုမာလသုတ် (အီႏဖြားဗာႏ၊ အီႏဆာဗာႏ၊ အီႏသီဗာႏလွဉ်းလွဉ်း)"

နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး- ခွေယိုနဝ်ꩻ နုညံꩻပွို့ꩻပနဲဉ်ႏမွေးစွဉ်ႏထာꩻ၊ ကအဝ်ႏပေႏခါ ဖါ(ခွန်တန်သုဒ္ဓေါဒန)တဲ့ ရက်မွေးစွဉ်ႏခွေ၊ လူးထီတာႏ အွဉ်ႏဖေႏစွဉ်ႏဒျာႏ သွံနောင်၊ အုံသော့ꩻတာႏ မာꩻဖေႏစွဉ်ႏဒျာႏ သွံဆောင်၊ ကွဉ်ꩻဆဲင်ꩻကတူႏပေါက်-စတဲင်အခြွိုင်းအခြိုꩻ အမျိုꩻမျိုꩻနဝ်ꩻ ဖြေꩻလွဉ်ကာသိခမ်းလွဉ်းလွဉ်း၊ အယံသွတ်ꩻစားလွဉ်းလွဉ်း။ ရဟန်ꩻသီးဖုံႏဟွေး- ခွေယူႏလꩻထာꩻဖြားတဲင် အရွယ်ႏကျွား၊ သꩻကျွား(မာန)နဝ်ꩻ ထိုꩻမားစွဉ်ႏ၊ ခွေယူႏလꩻထာꩻဆာတွော့ꩻ 'ခွေယိုခြွိုင်ႏသန်ꩻဟ-မာႏန'နဝ်ꩻ ထဲ့လထိုꩻစွဉ်ႏ၊ ခွေယူႏလꩻထာꩻသီတဲင်တွော့ꩻ 'ခွေယို လိုꩻသက်ထို-အွဉ်ႏဖြိုနမ်း'(မာန)နဝ်ꩻ ဟွုန်ငမ်းမွေးစွဉ်ႏထာꩻသွူ။ ရဟန်ꩻသီးဖုံႏဟွေး- ပေါႏတယူႏတဝ်း ထာꩻဖြားနဝ်ꩻ သꩻကျွား(မာန)ထွိုင်ႏဒါႏ၊ ထီႏလိုꩻဖြားတဲ့ ဗွိုႏဒါႏ၊ ပသို့ꩻဒါႏ၊ အီႏဟဲ့ꩻငါမွိုးဖြားဖါဖြားငါတဲ့ ဟွုန်ဝင်ꩻသꩻဝင်ꩻ၊ ခွေယို အဝ်ႏဆားနေက ကွပ်မာႏနနဝ်ꩻတဲင် ထင်းဒျာႏသီဒါႏတောဝ်းထာꩻ၊ မာꩻမွိုင်းဒျာႏအကုသိုလ်ႏ၊ မာꩻတဝ်းကုသိုလ်ႏတွော့ꩻ ကထွိုင်ႏသီဆုဲင်ꩻနဝ်ꩻ လင်ꩻထဲ့ဗာႏ ငါးရုဲင်ꩻနောဝ်ꩻသွူ။ ရဟန်ꩻသီးဖုံႏဟွေး- ပေါႏတယူႏတဝ်း ထာꩻဆာနဝ်ꩻ ခွေယို လိုꩻခြွိုင်ႏသန်ꩻဟ၊ မွိုးမာႏနနဝ်ꩻတဲင် နုဲင်းစွဉ်ႏတသီဒါႏတဝ်းထာꩻ၊ မာꩻမွိုင်းဒျာႏအကုသိုလ်ႏ၊ မာꩻတဝ်းကုသိုလ်ႏတွော့ꩻ ကထွိုင်ႏသီဆုဲင်ꩻနဝ်ꩻ လင်ꩻထဲ့ဗာႏ ငါးရုဲင်ꩻနောဝ်ꩻသွူ။ ရဟန်ꩻသီးဖုံႏဟွေး- ပေါႏတယူႏလꩻတဝ်း ထာꩻသီနဝ်ꩻ ခွေယို လိုꩻသက်ဆွာꩻဟ၊ တောႏတောႏတသီတဝ်း၊ ယူႏနုဲင်းနောဝ်ꩻတဲင် မာꩻမွိုင်းဒျာႏအကုသိုလ်ႏ၊ မာꩻတဝ်းကုသိုလ်ႏတွော့ꩻ ကထင်ႏသီဆုဲင်ꩻနဝ်ꩻ လင်ꩻထဲ့ဗာႏ ငါးရုဲင်ꩻနောဝ်ꩻသွူ။ ရဟန်ꩻသီးဖုံႏဟွေး- ခွေယိုနဝ်ꩻ မဉ်ဆားနုဲင်းမုဲင်ꩻဆား အီႏဖြားဗာႏထာꩻ၊ မဉ်သန်ꩻနုဲင်းမုဲင်ꩻသန်ꩻ အီႏဆာဗာႏထာꩻ၊ သက်မဉ်ဆွာꩻနုဲင်းမုဲင်ꩻဆွာꩻ အီႏသီဗာႏထာꩻ၊ ယူႏသေႏသေႏဗာႏနုဲင်းနဝ်ꩻ၊ ပေါႏယူႏနုဲင်းနဝ်ꩻနဝ်ꩻ သꩻဟွူန်ငမ်း ထာꩻဖြား၊ သꩻဟွူန်ငမ်းထာꩻဆာ၊ သꩻဟွူန်ငမ်း ထာꩻသီပေါႏလွဉ်၊ တွိုႏနဝ်ꩻမꩻ သေမာꩻကုသိုလ်ႏ၊ မာꩻကုသိုလ်ႏနောဝ်ꩻမꩻ ခန္ဓာႏကုဲင်လီ မဉ်ႏသီသူꩻနောဝ်ꩻ တွိုႏလွေꩻဗာႏ ဘဝဟောဝ်ဘဝသာႏနောဝ်ꩻသွူ။ ရဟန်ꩻသီးဖုံႏဟွေး- ပေါႏယူႏအရွယ်ႏသားနဝ်ꩻ သꩻကျွားပေါႏဒါႏ၊ ချꩻသိက္ခာႏ၊ ထွက်ထိုꩻဒါႏထာꩻ၊ 'ပေါႏယွုမ်းနမ်းခြွိုင်ႏသန်ꩻနဝ်ꩻ သဲင်ꩻလမ်းနန်းတဝ်း'ရိုꩻနုဲင်းနဝ်ꩻတဲင် ထွက်ဒါႏထာꩻ၊ ပေါႏယွုမ်းသက်ဆွာꩻတဲ့ ထွက်ဖြားဒါႏထာꩻ'နဝ်ꩻသွူ။ ရဟန်ꩻသီးဖုံႏဟွေး- ခွေယို အီႏဖြားဗာႏထာꩻ၊ အီႏဆာဗာႏထာꩻ၊ အီႏသီဗာႏထာꩻ ယူႏနုဲင်းနဝ်ꩻတဲင် ဗွိုႏမွုန်းလိုꩻဖြား၊ ပသို့ꩻမွုန်းလို့ꩻဖြား၊ ဟောဝ်ဗွိုႏတဝ်း၊ ဟောဝ်ပသို့ꩻတဝ်းလိုꩻဖြား၊ ဝွတ်ပတ်သွော့ လိုꩻဖြားနော၊ မာꩻသွော့ကုသိုလ်ႏ၊ အားထွုတ်မွေးမွေးသွော့တရာꩻ၊ မဉ်ႏထွာလꩻခန်း ရဟန္တာႏနဝ်ꩻမꩻ လွစ်ခန်းခန်း ထာꩻဖြား၊ ထာꩻဆာ၊ ထာꩻသီနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ သုခုမာလသုတ်)