အောဝ်ႏထဲ့ဆုဲင်ꩻနေက

"အောဝ်ႏထဲ့ဆုဲင်ꩻနေက ပအိုဝ်ႏဘဝကံႏကျမ္မာႏ" အယပ်ꩻအခုဲင်ႏခါႏ နီပအိုဝ်ႏလိုꩻမျိုꩻ ကတွူႏဖါႏလွဉ်နောဝ်ꩻ ကောင်တန်လဲ့ အထွိုင်ထွိုင်၊ တနွိုင်လဲ့အဖြုံႏဖြုံႏ၊ လွောင်ႏလွောင်ႏဗူႏဗူႏ အွဉ်ဝင်ꩻဖျတ်ကာႏလွေꩻဗာႏလဲဉ်း၊ နေးရဲင်ꩻထေအာႏ တွူႏတရန်လွေꩻဗာႏဖိုလဲဉ်း ဖေႏကဖျော်တွိုႏဗꩻထဲင်း ဘဝသာႏယာႏရေꩻကရိုꩻဒါႏ ခင်ႏလမ်းကို ယိုခါတွမ်ႏယိုခါလဲ့ အောဝ်ႏထောင်လွေꩻနေက တဖူꩻကျံꩻ၊ အောဝ်ႏသောင်ခြင်ꩻနေက နီလိုꩻအခွင်ꩻအရေꩻနောဝ်ꩻသွူ။ ကလွောင်ႏဗူႏထွူလဲဉ်းဒါႏ နီခွိုꩻရဲင်ꩻအာႏယို လိုꩻအကိုတွမ်ႏအကို ယားချာလဲ့အောဝ်ႏ၊ အထန်ႏသားလွဉ်နွို့ယားလဲ့အောဝ်ႏတဲင် ဖေႏကကုဲင်ပြင်ꩻထိုꩻဗာႏမွိုန်းနောဝ်ꩻ နေးတွမ်ႏသတိꩻပညာႏ နီရဲကာႏကွယ်ႏဗာႏ၊ နိးတွမ်ႏအမျာꩻရဲင်ꩻအာႏ နီဝါးထန်ႏဗာႏ အယားသား နီပအိုဝ်ႏရပ်ရာႏကိုနောဝ်ꩻမꩻ နီအီႏတွိုႏဗꩻ အသာႏယာႏသွတ်ꩻ ခင်ႏလမ်းအုံနောဝ်ꩻသွူ။ စူꩻမွိုန်းထာꩻတွူ တွမ်ႏထာꩻမောႏ၊ တွမ်ႏခေတ်ယိုခါ တလောႏတောဝ်းဒွုမ်၊ စူꩻမွိုန်းထာꩻပျောႏတွမ်ႏထာꩻလွင်ꩻ အောဝ်ႏလိုႏကျိုꩻစာꩻလုပ်ꩻမာꩻငါႏလဲဉ်း စီꩻပွာꩻရေꩻ၊ အောဝ်ႏလိုႏသွဉ်ထူႏမွေးငါႏ ပညာႏရေꩻ၊ ပညာႏအောဝ်ႏမꩻ မာꩻစီꩻပွာꩻလꩻ၊ စီꩻပွာꩻရေꩻဟောဝ်မꩻ သွဉ်ထူႏနွောင်ꩻပညာႏ၊ ပညာႏအောဝ်ႏမꩻ မဲ့နားဗွောင်၊ မဲ့နားဗွောင်မꩻ ခံႏဗာႏတောဝ်း ဝင်ꩻလိန်ႏလဲဉ်၊ ခံႏဗာႏတောဝ်း ဝင်ꩻနွောင်ꩻအံႏ၊ ထမ်ႏဗာႏတောဝ်းဝင်ꩻတခြိုꩻ၊ သဲင်ꩻထွာဗာႏလိုꩻ ဝင်ꩻကွိုꩻလꩻ၊ ကွပ်ပွိုးနောဝ်ꩻမꩻ ခွန်တွမ်ႏနင်ꩻ၊ ကျိုꩻစာꩻသွော့ဝင်ꩻ မဉ်ဖေႏအာႏ၊ အရေꩻတန်ငါႏ နုဲင်းယိုခါ၊ လွေꩻစွဉ်ႏဝင်ꩻခြာလဲ့နောဝ်ꩻ၊ အုံစွဉ်ႏအွိုးချာလဲ့နောဝ်ꩻ ပါꩻမုဲင်ꩻရွဉ်အာတဲ့ လꩻမဲ့ငါ၊ ပါꩻမုဲင်ꩻပညာႏတန်လဲ့ လꩻခင်ႏလမ်း၊ ဝင်ꩻငမ်းဝင်ꩻရက်၊ ဝင်ꩻနိစ္စက်ဗွိုန်ႏတောဝ်းနီနာꩻနောဝ်ꩻသွူ။ ခမ်းမုဲင်ꩻထီမုဲင်ꩻတရိုꩻတောဝ်း ကထင်ႏထိုလဲဉ်းဒါႏ လိုꩻမျိုꩻဖုံႏနောဝ်ꩻ ထွာဒျာႏလိုꩻသေလိုꩻဒါႏ၊ လိုꩻပညာႏသားလွဉ်းလွဉ်းတဲင် နီလိုꩻမျိုꩻထင်ႏထိုရေꩻတာႏလဲ့ အောဝ်ႏလိုႏအာငါႏ လိုꩻသေလိုꩻဒါႏ၊ လိုꩻပညာႏသားဖုံႏ၊ လိုꩻရက်ခွိုꩻမျိုꩻ အွဉ်ငါသားဖုံႏ၊ လိုꩻတွူႏတရန်နွောင်ꩻ အယပ်ꩻအခုဲင်ႏဖုံႏနောဝ်ꩻသွူ။ နဲင်ႏငံႏတောႏ ကတဲမ်းထွို့ꩻဒါႏ အခေႏခံႏဥပဒေႏဖုံႏ၊ စီႏရင်ႏတရာꩻနယ်ꩻဖုံႏ၊ သွို့ꩻခြံလုဲင်းယာႏ လုပ်ꩻမာꩻနယ်ꩻဖုံႏ၊ သွို့ꩻခြံလုဲင်းယာႏ ဖန်းဖြယ်ခွုမ်စံႏနယ်ꩻဥပဒေႏဖုံႏယို ပအိုဝ်ႏကို လိုꩻကသေထွꩻသား အောဝ်ႏဆေ့ꩻနေကတဲင် ဖေႏကအာလွဉ်နောဝ်ꩻ အောဝ်ႏလိုႏငါႏ လိုꩻဝါႏသနာႏသား၊ အောဝ်ႏလိုႏဟော်ꩻထွားဝင်ꩻ ဥပဒေႏစွုမ်ႏဖြာꩻဖြာꩻ၊ နောဝ်ꩻမꩻ ဝင်ꩻလဲဉ်လꩻတောဝ်း နီနာꩻသွူ။ ယောင်ꩻဆင်ꩻဖေႏကတရေꩻနောဝ်ꩻ ထွားတမွန်ႏ၊ ဘ၀ဖေႏကတရေꩻနောဝ်ꩻ ထွားဗာႏလိတ်၊ လိတ်ကရိုꩻယို ပါꩻမုဲင်ꩻထွား ပါꩻမုဲင်ꩻဒါႏ၊ ပါꩻမုဲင်ꩻဝါႏသနာႏ ပါꩻမုဲင်ꩻထင်ႏထို၊ အုံဗော့ꩻနုဲင်းယို ထွာလိုꩻသွုမ်ꩻ၊ မဉ်ႏတွိုႏစွော့ꩻတရာꩻရွုမ်ꩻ ထွာလိုꩻဗား၊ ချာငါဝီႏဝါး သꩻဆင်ꩻရယ်ꩻ၊ နယ်ꩻတောလိုꩻတန် တွမ်ႏဖြားဒုံ၊ ကထွာဗာႏနုဲင်းယို ပါႏဒျာႏနီနမ်းထာꩻအုံအောဝ်ႏတဲင် ယိုမာꩻငါ ဖေႏကထွာထဲင်းဗာႏမွိုန်းနောဝ်ꩻ အခိုလဲ့ လိုႏသွဉ်ထူႏ၊ အမူႏတဲ့ လိုႏကျိုꩻစာꩻ၊ နောဝ်ꩻမꩻနီယို အီႏထွꩻပါꩻသွူ။ ခမ်းထီတဖြုံႏ အရေꩻကတန်ဒါႏ အုပ်ချွုတ်ရေꩻ၊ စီႏရင်ႏတရာꩻရေꩻ၊ ပျုဥပဒေႏရေꩻ အရေꩻယိုသွံပါꩻ ဖေႏကအောဝ်ႏသွော့ နီနာꩻခွိုꩻနယ်ႏစူကိုနောဝ်ꩻ လိုꩻတဖြာꩻ၊ အစွိုꩻတစွိုꩻ မာꩻတလꩻတောဝ်း၊ လိုꩻတွိုင်ꩻစွုမ်ႏဖြာꩻ ဆွန်ꩻစွီႏဝင်ꩻစူ ကျိုꩻစာꩻသွိုသွိုဝင်ꩻမꩻ ထာꩻယူႏဗွိုန်ပီ၊ ထာꩻမာꩻပီဝင်ꩻမꩻ ခွုမ်မာꩻလꩻ၊ တနယ်ꩻမဉ်ႏဒေါ့ꩻဗာႏ ဆဲင်ႏရာꩻနဲင်ႏငံႏတောႏ အစိုႏရဌာႏနကို နီပိုလီꩻလꩻဘွဲ့သား အောဝ်ႏသော့ꩻအာအာမꩻ နီရုဲင်ꩻတသွိုးလꩻ၊ နီခွုမ်သဲဉ်ꩻလꩻ အရေꩻတန် နီမာꩻပဲင်ႏခွင်ꩻဖုံႏနောဝ်ꩻသွူ။ ခေတ်ပြောင်ꩻလုဲင်ႏမုꩻအလꩻ နီပအိုဝ်ႏဘဝ နီပအိုဝ်ႏမာꩻပဲင်ႏခွင်ꩻ နီပအိုဝ်ႏအနီꩻအရင်ꩻဖုံႏနောဝ်ꩻ အဗွေတဗာႏ တလꩻစံႏစာꩻဗာႏဒွိုန်းလဲ့ တွိုႏဒျာႏ နီထာꩻခံႏစာꩻနောဝ်ꩻ တနီꩻတစွိုး၊ တရောဝ်ꩻတမျိုꩻ အကျိုꩻအောဝ်ႏဖေႏလွဉ်၊ တဒုံတောဝ်းလဲ့ တဒုံ၊ တထွောင်းတောဝ်းလဲ့ တထွောင်း အောဝ်ႏခွိုင်းလွဉ်နေက နီယိုꩻယာႏ၊ အောဝ်ႏဗာႏလွဉ်နေက နီယေန်ႏငဲရေꩻ၊ နီထွုံꩻစံႏနုဲင်းယိုနောဝ်ꩻ အောဝ်ႏလိုႏထုမ်ႏဒါႏဒါႏ အဖြေႏဟောဝ်တဗာႏ၊ အောဝ်ႏလိုႏထုမ်ႏမော့ꩻမော့ꩻ နီပျဿနာႏ အရွီးအခိုႏတဲင် အချင်ꩻချင်ꩻ ယီးချာငါဗွော့ꩻဝင်ꩻနောဝ်ꩻ အွိုးတဖဲ့ꩻသားသူꩻ ငတေ့ꩻဒါႏနီနာꩻသွူတကာႏတောဝ်း အဖြေႏမဲဉ်ႏလဲ့ နီတလꩻတောဝ်းသွူ။ ဖိုးဖန်ႏအဖုံႏ ကေအဲင်ႏဒါႏ၊ လိုꩻထန်ႏအဖုံႏ ပါꩻမျောႏဒါႏ၊ နီကခံႏစာꩻဗာႏ နုဲင်းယိုခါ နေးတွမ်ႏသꩻဗွာ ထွိုင်ႏခွုမ်မာꩻ၊ အောဝ်ႏလိုႏထူႏခါꩻ သွဉ်ခန်ꩻတဲင် ယံကကုဲင်ထဲင်းဗာႏမွိုန်းနီယာႏ၊ ယံကနာႏထဲင်းဗာႏမွိုန်း နီအခွင်ꩻ၊ နီသွို့ꩻနီဟံႏယာႏ လိုႏမာꩻငါႏနမ်းပဲင်ႏခွင်ꩻ၊ အချင်ꩻချင်ꩻလဲ့သင်၊ ပါꩻထူႏထိုꩻလဲ့သင် ဖေႏကလꩻဗာႏမွိုန်းနောဝ်ꩻ အောဝ်ႏလိုႏငါႏဟံႏဂရန်၊ ဟံႏပွုံႏစံႏ၊ ဟံႏဂရန် ဖေႏကအောဝ်ႏစွုမ်ႏဖြာꩻဖြာꩻ ထွိုင်ႏခွုမ်မာꩻကျိုꩻစာꩻခန်းဝင်ꩻ၊ စူꩻထာꩻလွꩻတွော့ꩻ ဆို့ꩻသေင်ႏကဲဉ်၊ မုဲင်ခါꩻထာꩻမွူးစဲဉ်ႏဖုံႏနောဝ်ꩻ တလွံးကွံႏလꩻဒွုမ်အကျောင်ꩻ တမာလွေꩻဗာႏ ခမ်းသားမွိုးဖါသီးဖုံႏသွူဩ။