အွဉ်ႏတန်ႏဖိုꩻသွော့အခိန်ႏ

"အွဉ်ႏတန်ႏဖိုꩻလွေသွော့အခိန်ႏ" တွမ်ႏမွူးလာစတဲင် ကအွဉ်ႏထွော့ခါꩻဒါႏကာႏလနဝ်ꩻ ဟဲ့ꩻအခိန်ႏ မန်းအဘိဓာန်ႏကျမ်ꩻကို အွဉ်ႏနယ်ခါꩻနုဲင်းနဝ်ꩻ၊ ထာꩻရာꩻအမျိုꩻမုဲင်ꩻတဲ့ယဝ်း ရာႏသီႏကရိုꩻနဝ်ꩻ အဝ်ႏလွဗာႏလွဉ်းလွဉ်း၊ ကိစ္စမျိုꩻမုဲင်ꩻတရိုꩻတဝ်း ကအဝ်ႏဒါႏမို့ꩻဆꩻလယိုနဝ်ꩻ အခိန်ႏအဝ်ႏလွဗာႏကွေႏကွေႏ၊ အီႏလွူးဖွာꩻလွဉ်ခိန်ႏ၊ အီႏသီခိန်ႏ၊ အီႏဆို့ꩻရုဲင်ခိန်ႏ၊ ကဆို့ꩻရုဲင်ꩻခါထွူယို အဝ်ႏလိုႏရဲ့ခိန်ႏ၊ အတ်ႏလိုႏထူꩻသိမ်ꩻခိန်ႏ၊ သꩻပေႏသꩻခိုးလျားခိန်ႏ၊ ပျောႏသွင်ႏမွန်းသွိုꩻခိန်ႏ၊ ဒေါ့ꩻရီဒေါ့ꩻတောႏချာငါလို့ဝင်ꩻခိန်ႏ၊ အိုမ်ဖူးဖြေꩻ အဝ်ႏလိုႏအုံတေ့ꩻထာꩻခိန်ႏ-စတဲင် အဝ်ႏလွအစွိုးစွိုးနုဲင်းနဝ်ꩻသွူ။ အခိန်ႏကရိုꩻနဝ်ꩻ အံႏအော်ꩻခရာႏ ဟဝ်မွေးငါႏတန်သွူ၊ အခိန်ႏနဝ်ꩻ အွဉ်ႏရေꩻတဝ်းတမုဲင်ꩻမုဲင်ꩻ၊ တပွေါးတဝ်းတမုဲင်ꩻမုဲင်ꩻတွော့ꩻ ဝွေꩻတဖူꩻလွေꩻအဝ်ႏလွေꩻဒျာႏနုဲင်းနဝ်ꩻ၊ တနေင်ႏကရိုꩻဒါႏ အခိန်ႏအခန်ꩻအထွော့အလောင်း လိုꩻပေႏတွမ်ႏလိုꩻတန်သီး ယူႏခံႏပုံႏ တဗိုန်တဝ်းလွဝင်ꩻ၊ တနေင်ႏကာႏလနဝ်ꩻ လိုꩻပေႏတဖြာꩻအတာႏ ညဆွာꩻငါႏလဲ့ လိုꩻတန်တဖြာꩻအတာႏနဝ်ꩻ ကဲဉ်းအာ အခိန်ႏလို့ထိုꩻစွော့ꩻဗော့ꩻနုဲင်းနဝ်ꩻလွုမ်ꩻသွူ။ အခိန်ႏကရိုꩻနဝ်ꩻ ဗိုန်ပီနုဲင်းစွဉ်ႏ သေကလွင်းတခိုတ်ထာꩻနဝ်ꩻအတွိုင်ꩻ လို့မွိုင်မွေးစွဉ်ႏ၊ လိုꩻဖုံႏကဲဉ်းအာအာနဝ်ꩻ မွိုင်းအဝ်ႏတရွစ်ꩻပါလွဉ်ꩻလွဒျာႏ အခိန်ႏကရိုꩻဒါႏ သေကအီတရွစ်ꩻဆꩻချာဖုံႏသွ၊ လိုꩻတွိုင်ꩻ တနီꩻတာႏ အခိန်ႏအဝ်ႏလွဒျာႏ ပငါပရာꩻဖုံႏ၊ လိုꩻတွိုင်ꩻ တနီꩻအကို အခိန်ႏဗေင်ႏထာꩻ အဝ်ႏ(၈)နားရီႏ၊ လိုꩻတွိုင်ꩻ တနီꩻအကို မာꩻထာꩻမာꩻခိန်ႏ အဝ်ႏ(၈)နားရီႏ၊ တနီꩻအကို လိုꩻတွိုင်ꩻအရေꩻတန်အခိန်ႏ အဝ်ႏ(၈)နားရီႏနဝ်ꩻသွူ။ လိုꩻတွိုင်ꩻအရေꩻတန်အခိန်ႏ ကအဝ်ႏ(၈)နားရီႏအကိုယို အံႏအွꩻခိန်ႏ ပါသော့ꩻ(၂)နားရီႏ၊ အခိန်ႏမာꩻကျမ္မာႏရေꩻ ပါသော့ꩻ(၂)နားရီႏ၊ စီꩻပွါꩻရေꩻတွမ်ႏဖေႏနမ်းကထင်ႏထို အခိန်ႏဟော်ꩻထွားလိတ် ပါသော့ꩻ(၂)နားရီႏ၊ ဝင်ꩻအကျိုꩻတာႏ အခိန်ႏမာꩻလိုꩻမုရေꩻထာꩻမာꩻဖုံႏလဲ့ အဝ်ႏပါသော့ꩻလဲဉ်းနဝ်ꩻကိုသွူ။ လောကအကို ကမဉ်ထင်ႏထိုလွိုင်ႏကွုန်ꩻဒါႏ လိုꩻတွိုင်ꩻဖုံႏနဝ်ꩻ အွဉ်ႏရေꩻလွမွေးစွဉ်ႏ အခိန်ႏ၊ လိုꩻဘဝအကို အခိန်ႏနဝ်ꩻ ထွာဒျာႏ အရေꩻတန်အနီꩻအရင်ꩻတဗာႏတန်သွူ၊ အနီꩻအရင်ꩻအလောင်ႏအလင်နဝ်ꩻ ထိုမ်ႏဖြေꩻနေး၊ လုဲင်ႏနေး၊ ထူႏလနေးလို့ဝင်ꩻလꩻနွောင်ꩻဒျာႏလဲ့ အခိန်ႏကရိုꩻဒါႏ အနီꩻအရင်ꩻယိုနဝ်ꩻ ဖြေꩻနေး၊ ထူႏလနေး၊ လုဲင်ႏနေးလို့ဝင်ꩻ တလꩻနွောင်ꩻတဝ်းသွူ။ နမ်းကလꩻဒါႏအခိန်ႏယို အကျိုꩻဖေႏကအဝ်ႏ ကေားကသုံꩻဒါႏသားဖုံႏနဝ်ꩻ ထင်ႏထိုလွိုင်ႏကွုန်ꩻကယ်ꩻထဲင်းစွဉ်ႏ ကေားတသုံꩻတဝ်းသားသွူ၊ အခိန်ႏကရိုꩻနဝ်ꩻ အဝ်ႏတကြွီႏလွေꩻပုံႏမဲဉ်ႏ၊ ကတကြွီႏပိုန်းထိုꩻထွူ အခိန်ႏတမိနစ်နဝ်ꩻ ဖေႏရွဉ်တသောင်ႏ ဖြေꩻချာနေးခန်းလဲ့ တလꩻနွောင်ꩻတဝ်းဒွုမ်၊ "ထောင်တဖူꩻ တနားရီႏတွိုင်ꩻနဝ်ꩻ အသက်ဒွေါင်ႏဆွာꩻ တနားရီႏ"ရိုꩻလွနုဲင်းနဝ်ꩻဖုံႏသွူ။ လိုꩻဘဝကိုယို ခွုင်းကားတဲင် ထာꩻရာꩻဖိုꩻတန်ႏမျိုꩻနဝ်ꩻ ဖေႏလွဗာႏ ကတန်ႏအတန်ႏဖိုꩻအတွိုင်ꩻ၊ ကတန်ႏအတန်ႏဖိုꩻကရိုꩻနဝ်ꩻ အလင်တမွေးတဝ်း ထွာမာꩻထာꩻမာꩻဒျာႏသွူ၊ လိုꩻတွိုင်ꩻ ပေါႏမဉ်ႏမဉ်ထင်ႏထိုမွေးမွေးနဝ်ꩻ ဆေ့ꩻရေးဗာႏအခိန်ႏ၊ အကျိုꩻဖေႏကအဝ်ႏ သုံꩻဒါႏဒါႏဗာႏ၊ ဘာႏသာႏတဗာႏ(မွေးတဝ်းလဲ့) ပညာႏတမျိုꩻမျိုꩻယို တနီꩻတနီꩻအကို မဉ်ႏလွူꩻလွေꩻမဲဉ်ႏမဲဉ်ႏ တနားရီႏတနားရီႏငါလဲ့ နေင်ႏဆေ့ꩻဆေ့ꩻပေႏအကို အီႏဒါႏကျင်ႏလဲပ်နွောင်ꩻကရိုꩻနဝ်ꩻ ဒေါ့ꩻခရာႏလဲင်ꩻတလိုႏဒွုမ်နဝ်ꩻသွူ။ ကေားကမဉ်လွိုင်ႏကွုန်ꩻဒါႏလိုꩻတွိုင်ꩻ အွဉ်ႏရေꩻအခိန်ႏတဲင် အဝ်ႏလိုႏထိုမ်ႏလွငါႏ နမ်းတွမ်ႏနမ်းတဖူꩻထင်ႏထို၊ နမ်းတွမ်ႏနမ်း ကျိုꩻစာꩻချာဒါႏသေႏသေႏ အကျင်ꩻစားနဝ်ꩻနဝ်ꩻ မာꩻတိုꩻပွါꩻအာနွောင်ꩻအီ လိုꩻတဖြာꩻသီး နမ်းစိုန်ꩻနမ်းအာႏ အာပွန်းတန်သွူ၊ အခိန်ႏနဝ်ꩻ ရွဉ်တန်သွူဒျာႏရင်ꩻ၊ နေးတွမ်ႏရွဉ်တောင်ꩻပဏာမတဲင် စက္ကန့်တွိုင်ꩻ၊ မိနစ်တွိုင်ꩻ၊ နားရီႏတွိုင်ꩻနဝ်ꩻ ခဉ်ႏတဲက်တွက်ထွားနွောင်ꩻဒျာႏသွူ၊ ကွပ်နဝ်ꩻမꩻ ပေါႏမဉ်ႏယားကုဲင်ပျင်ႏခြေင်ထိုꩻအခိန်ႏလဲ့ တွမ်ႏကယားကုဲင်ပျင်ႏထိုꩻဒါႏရွဉ်နဝ်ꩻ ဗိုန်ဗိုန်ဝင်ꩻနဝ်ꩻသွူ။ လောကအကို လိုꩻကတွိုႏနွောင်ꩻ ထာꩻအောင်ႏမျင်ႏမုꩻအမော့ကီသားဖုံႏနဝ်ꩻ ကဲဉ်းအာအာ ဝင်ꩻထိုမ်ႏဒျာႏအနယ်ꩻ အခိန်ႏဖေႏကလို့ဆေ့ꩻစား၊ နမ်းကအဝ်ႏလိုႏမာꩻဒါႏ ထာꩻမာꩻဖုံႏအကို ကဲဉ်းအာအာ ဝွေꩻသီးအွဉ်ႏရေꩻဒျာႏ ထာꩻမာꩻတာႏဝွန်ႏကအဝ်ႏလိုႏမာꩻရီးစားလွုမ်ꩻ၊ ထာꩻမာꩻအမျိုꩻမုဲင်ꩻနဝ်ꩻ သာမည၊ ထာꩻမာꩻအမျိုꩻမုဲင်ꩻနဝ်ꩻ အဓိက-ကဲဉ်းအာအာ ဝင်ꩻဖန်းဖြယ်ရီးဒျာႏနုဲင်းနဝ်ꩻသွူ။ မဲ့တခွယ်ႏတရွို့ꩻထိုꩻတဝ်း နမ်းပဓာနတာႏဝွန်ႏနဝ်ꩻနဝ်ꩻ ထွာသုံꩻအခိန်ႏ အကျိုꩻဖေႏကအဝ်ႏရင်ꩻသွူ၊ တနီꩻတာႏအဆုဲင်ꩻသွတ်ꩻ မွူးဟာလင်ꩻနဝ်ꩻ မွူးရဝ်ꩻတနီꩻတာႏ ကအီႏခွုမ်မာꩻဗာႏ ပဓာနထာꩻမာꩻဖုံႏယို အဝ်ႏလိုႏမုဲင်သေꩻခါꩻနေး စာႏရင်ꩻ၊ တဖူꩻညာꩻဒွါ မဲင်ႏပေါင်ꩻအာအာခန်းတဲ့ယဝ်း အထျꩻနဝ်ꩻ တဲႏဗာႏဒျာႏ ပထမခင်ႏတကာယိုသွူ။ အစွိုꩻအဗူႏတဗာႏတဲ့သင်၊ လိုꩻတစုတဗူႏလဲ့သင်၊ လိုꩻတဖြာꩻတောႏအနေႏလဲ့သင် ဖေႏနေးကအောင်ႏမျင်ႏအီနဝ်ꩻ ထာꩻရဲဉ်ꩻသေꩻထာꩻဖန်းဖြယ်ယို အဝ်ႏပါသော့ꩻ အရေꩻတန်ကဏ္ဍကိုသွူ၊ ကအီႏဗွောင်ဒါႏ နေင်းထီဆဲင်ႏတဆဲင်ႏအတွက် ထာꩻရဲဉ်ꩻထာꩻဖန်းဖြယ်မဉ်ႏယံလဲ့ ယံအတွိုင်ꩻ ပေါႏမဉ်ႏညံးတဲ့ ညံးအတွိုင်ꩻ ကွာႏအာထိုꩻစွဉ်ႏလို့ဝင်ꩻ၊ ကွပ်နဝ်ꩻမꩻ မဲ့ဆꩻလခေတ်ယိုခါ အဝ်ႏလိုႏအွဉ်ႏရေꩻလွူꩻလွငါႏ ထာꩻရဲဉ်ꩻထာꩻဖန်းဖြယ် အခရာႏဖုံႏနဝ်ꩻသွူ။ ကရဲဉ်ꩻကဖန်းဖြယ်ဒါႏ ထာꩻမာꩻတဗာႏဗာႏအကို စဉ်ꩻစာꩻယူႏသော့ꩻပါဗာႏ ရွဉ်တောင်ꩻ၊ လိုꩻ၊ တခြိုꩻ၊ အနယ်ꩻပညာႏ အဖဲ့ꩻစွုမ်ႏသွူ၊ အကျောင်ꩻအခရာႏနဝ်ꩻကိုခြာ ပါတဝ်းတလꩻတဝ်းနဝ်ꩻ ထွာဒျာႏအခိန်ႏတန်နဝ်ꩻသွူ၊ ရဲဉ်ꩻဖန်းဖြယ်သော့ꩻပါဗာႏ အခိန်ႏ၊ လိုꩻတဖြာꩻအနေႏ မဉ်ꩻရဲဉ်ꩻဖန်းဖြယ်ချာနမ်းတဲ့ နမ်းခြွိုင်ႏသန်ꩻရေꩻ၊ အခွုမ်အမာꩻ၊ ရွဉ်ရေꩻတောင်ꩻရေꩻကိစ္စလွုမ်ꩻတကာႏတဝ်း စဉ်ꩻစာꩻယူႏသော့ꩻပါ သေႏသေႏချာႏချာႏဗာႏ အခိန်ႏယင်နဝ်ꩻသွူ။ အောင်ႏမျင်ႏ တအောင်ႏမျင်ႏတဝ်းနဝ်ꩻ အဆုံꩻအဖျတ်နဝ်ꩻ အဝ်ႏဒင်ႏယင်းဒျာႏ ရဲဉ်ꩻဖန်းဖြယ်နွောင်ꩻအခိန်ႏတကားမုဲင်ꩻလောင်းနဝ်ꩻသွူ၊ အခိန်ႏကရိုꩻနဝ်ꩻ ဟန်ႏနီꩻအတာႏ သုံꩻဗာႏတဝ်းတွော့ꩻ စုသေꩻခါꩻတေားမွူးရဝ်ꩻတာႏလဲ့ သမ်းတထွာတဝ်း၊ လွေꩻအပ်သေꩻခါꩻအွိုးဘဏ်ကိုလဲ့ သမ်းတလꩻတဝ်း၊ လိုꩻကလိုႏအခိန်ႏသားယို ဗိုန်ပီနုဲင်းပါꩻကဖေႏလလို့ဝင်ꩻရွဉ် ဖေႏနုဲင်းနဝ်ꩻ သမ်းတလꩻတဝ်း၊ အခိန်ႏကရိုꩻနဝ်ꩻ ဝွေꩻတွမ်ႏဝွေꩻ အဝ်ႏဝေ့ꩻပန်ႏဒျာႏအရင်ꩻစားနဝ်ꩻက၊ တခိန်ႏအကို ဖေႏကလꩻဗာႏခွုင်းယိုခွုင်းနဝ်ꩻ အဝ်ႏယင်းဒျာႏ ကေားကရဲဉ်ꩻဖန်းဖြယ်ဒါႏ အခိန်ႏအကျိုꩻဖေႏကအဝ်ႏသားလောင်း အာတန်နဝ်ꩻသွူ။ ဝင်ꩻကထေဖြေ့ꩻလီဒါႏ ထာꩻရဲဉ်ꩻထာꩻဖန်းဖြယ် အကျောင်ꩻခရာႏ လိတ်အုပ်ဖုံႏနဝ်ꩻ အဝ်ႏအာတန်သွူ၊ ထာꩻမာꩻဖုံႏလဲ့ အဝ်ႏအာတန်နေနေ၊ လိုꩻပေႏလိုꩻယွဲးဘဝ အခိန်ႏတနားရီႏတွမ်ႏ လိုꩻတန်ဘဝအခိန်ႏတနားရီႏနဝ်ꩻ ဗိုန်တဝ်းဒွုမ်လို့ဝင်ꩻတဲင် အကွဲꩻလွဉ်အခါႏလွဉ်စွဉ်ႏလို့ဝင်ꩻ၊ ကမာꩻနွောင်ꩻအကျိုꩻလဲ့ တဗိုန်တဝ်းအတွိုင်ꩻ အတန်ႏဖိုꩻချင်ꩻလဲ့ တပီတဝ်းဒွုမ်၊ ကလꩻလွဉ်ဒါႏ အကျိုꩻအမျတ်လဲ့ ကွာႏအာအေားထိုꩻစွဉ်ႏနဝ်ꩻသွူ။ အရွယ်ႏအဝ်ႏပေႏတွင်ꩻခိန်ႏ လိုꩻတွိုင်ꩻ အဝ်ႏလိုႏအွဉ်ႏတန်ႏဖိုꩻငါႏ အခိန်ႏ၊ နမ်းမဉ်ႏအွဉ်ႏရေꩻ ထွူႏထွူႏတွုမ်တွုမ်အခိန်ႏမꩻ ဆုဲင်ꩻတခိန်ႏခိန်ႏသူꩻ လိုꩻတွိုင်ꩻသီး အီႏအွဉ်ႏတန်ႏဖိုꩻလွ၊ အွဉ်ႏရေꩻထွူႏထွူႏတွုမ်တွုမ်လွ အခိန်ႏ၊ အမဲဉ်ႏတဗာႏနဝ်ꩻတဲး အခိန်ႏတွိုင်ꩻနဝ်ꩻ အရေꩻတန်ဒျာႏကွေႏကွေႏ၊ တန်ႏဖိုꩻအဝ်ႏဒျာႏကွေႏကွေႏ၊ တနီꩻနီꩻအကို နမ်းတာႏ အခိန်ႏအကျိုꩻကအဝ်ႏနဝ်ꩻ ခွုင်းကားမုဲင်ꩻ အဝ်ႏလိုႏနပ်တွက်ငါႏသွူ။ လိုꩻတွိုင်ꩻ တရွေꩻတဝ်းအဆင်းအရန်း တနီꩻအကို အခိန်ႏအဝ်ႏလွ (၂၄)နားရီႏလွုမ်ꩻ၊ မဲ့ဆꩻငါ ပုဂ္ဂိုလ်ႏသက်ကလꩻ (၅၇)သားတဖြာꩻယို ဝွေꩻကဗေင်ႏထာꩻခိန်ႏနဝ်ꩻ အဝ်ႏနေင်ႏ(၂၀)၊ ကအံႏအွꩻအခိန်ႏနဝ်ꩻ အဝ်ႏ(၃)နေင်ႏ၊ မာꩻထာꩻမာꩻခိန်ႏနဝ်ꩻ အဝ်ႏ(၁၇)နေင်ႏ၊ ကပျောႏထာꩻခိန်ႏနဝ်ꩻ အဝ်ႏ(၇)နေင်ႏ၊ ထောင်တဖူꩻ ကရုဲင်ꩻတသွိုးခိန်ႏနဝ်ꩻ အဝ်ႏ(၆)နေင်ႏ၊ ကွဉ်ကꩻခွမ်ꩻလာꩻခိန်ႏနဝ်ꩻ အဝ်ႏ(၂)နေင်ႏ၊ မာꩻတဝ်းတမုဲင်ꩻမုဲင်ꩻ ကအုံပဆားခိန်ႏနဝ်ꩻ အဝ်ႏ(၂)နေင်ႏနုဲင်းနဝ်ꩻအကျောင်ꩻ အွဉ်ႏဟွုန်တမာဗာႏနုဲင်းယိုသွူ။ (ဝွန်ႏခံႏချက်။ အဗွေႏဖြားကတဲမ်းနဝ်ꩻ တဲမ်းမန်းနေးဒျာႏ၊ ယိုကိုနဝ်ꩻ လွောက်ꩻရာꩻပြန်ႏပအိုဝ်ႏချာဖေႏနေးတဲင် ငဝ်းမဉ်ႏတချော်ꩻပြေတဝ်းလဲ့ သေနာႏစွꩻခွင်ꩻဖေႏသွော့အကျောင်ꩻ)