ဥစ္ဆင်္ဂဇာတ်
၆၇။ ဥစ္ဆင်္ဂဇာတ် ဘုရာꩻအွ်ႏဇေတဝန်ႏကျောင်ꩻကိုခိင်ႏ ကောသလတိုင်း ပါꩻဝင်ꩻသိုမ် ခွုမ္ပနားတခြာတန်မော့၊ တခြာတန္ကို စိုန်သားဖိုင်ႏ စိုန္ထာꩻထွူလွင်း၊ ပါꩻခြီးင်္ဒါလွန်ꩻ လွေꩻဆွမ်ꩻတေား ပါꩻဝင်ꩻသိုမ်၊ ပသာထေ့ကောသလခုန်၊ အွ်ႏတဆင်ႏ ပါꩻမူႏတဖြာꩻလွန်ငွိုးထာꩻ "ဖေႏခွေခွမ်ꩻလာꩻ၊ ခွေမဲလ္လꩻငါႏခွမ်ꩻလာꩻ" ငွိုးတိင်္နားထာꩻခုန်ထျꩻ၊ ခုန်ထင်ႏဖေႏခွမ်ꩻလာꩻ၊ "ခွမ်ꩻလာꩻနျ်းယို မွေးတွ်း၊ ဝါꩻကရိုꩻဒါႏ ခွမ်ꩻလာꩻဒျာႏ၊ ကွန်ကꩻခန်းခွမ်ꩻလာꩻငိုꩻတန်တဲ့ ပေါႏဝါꩻတအဲန္ထဝ်းနွ်ꩻ ခွန္ဆေ့ꩻတန်၊ ခြောင်တဲ့ထီအွ်ႏမꩻ၊ ခမ်းထီတဲ့ ခုန်အွ်ႏမꩻ၊ လိုꩻမူႏတဲ့ဝါꩻအွ်ႏမꩻ" ခုန္နိဿက်ငါႏ ပါꩻမူႏငွ်းတဲင် "ပါꩻဝင်ꩻသိုမ်ယို တွမ်ႏနာꩻရော့ꩻဝင်ꩻနျ်းမျ်ꩻ?"။ ပါꩻမူႏဒေါ့ꩻနဲ "တဖြာꩻနွ်ꩻရော့ꩻဝါꩻ၊ တဖြာꩻနွ်ꩻ ရော့ꩻဖူး၊ တဖြာꩻနွ်ꩻရော့ꩻပို၊ ပေါႏနွ်ꩻတဲ့ နာꩻကမဲလ္လꩻအဖြာꩻနွ်ꩻ ထူႏဟျ်း"။ ထင်ႏဟွုန်ခုန်ငွ်းခွင်ꩻ ပါꩻမူႏနွ်ꩻဒေါ့ꩻ "ပေါႏခွေတသီတွ်းနွ်ꩻ ဝါꩻတဲ့အျ်ႏယင်းဒါႏဒျာႏ၊ ပိုတဲ့ လွူးယင်းဒါႏဒျာႏ၊ ယိုခါ ခွေမွိုးဖါအဲန္ထဝ်းဒုမ်နွ်ꩻမꩻ ဖူးကရိုꩻနွ်ꩻ တလꩻနွောင်ꩻတွ်း၊ နွ်ꩻမꩻ ခွေမဲလ္လꩻဒျာႏခွေဖူး" ထင်ႏဟွုန်ပါꩻမူႏငွ်း ခုန္နိဿက် ဖေႏလို့တဲꩻလိုꩻဝင်ꩻသိုမ်၊ ရဟန်ꩻဖိုင်ႏ အိုင်ပ္လိုင်ႏဓမ္မာႏရုင်ႏကို ဒေါ့ꩻလွဝင်ꩻ ပါꩻမူႏတဖြာꩻ ကဲႏဆဲႏနွောင်ꩻလို့ဝင်ꩻသိုမ်ပုင်ႏတွင်ꩻ ဘုရာꩻကျွꩻလွန်၊ ဘုရာꩻရိုꩻ "ပါꩻမူႏနွ်ꩻ မာꩻလွတ်နွောင်ꩻလိုꩻဝင်ꩻသိုမ်အသက်နွ်ꩻ ယိုခါဒုမ်ꩻမွေးတွ်း၊ ကရီးခါတဲ့ မာꩻလွတ်ဖိုလဲန္ဒျာႏအကျောင်ꩻ ဘုရာꩻဟောꩻနဲ- အွိုးစခါ ဗာရာဏသီခမ်း ဗြဟ္မဒတ်ခုန်စိုး (ဝတ္ထုဗိုန်ဝင်ꩻ)ပါꩻမူႏဒေါ့ꩻနဲ- ၆၇။ ဥစ္ဆင်္ဂေ ဒေဝ မေ ပုတ္တော၊ ပထေ ဓာဝန္တိယာ ပတိ ။ တဉ္စ ဒေသံ န ပဿာမိ၊ ယတော သောဒရိယမာနယေ။ ဒေဝ- ခုန်ဟွေး၊ မေ- ခွေတာႏ၊ ပုတ္တော- ပိုနွ်ꩻ၊ (သုလဘော- လꩻယိုꩻ၊ ဍာကသဒိသောဝ- ဗိုန္နျ်းဟန်ႏသိလ္လာႏ)၊ ဥစ္ဆင်္ဂေ- အွ်ႏသော့ꩻထွူဒျာႏငင်းဒီင်ကို၊ ပတိ- ဝါꩻနွ်ꩻ၊ (သုလဘော-လꩻယိုꩻ)၊ ဓာဝန္တိယာ- ဗိုန္နျ်းလိုꩻမူႏအွ်ႏလောႏထာꩻ၊ ပထေ- မော့ꩻတငါငါဒျာႏတဖူꩻလောင်း၊ သောဒရိယံ- တဟို့ꩻချင်ႏလွူးဖူးကရိုꩻနွ်ꩻ၊ အာနယေ (အာနေယျံ)- ကအီႏလꩻလွန္ဒာႏ၊ တဉ္စဒေသံ- အရပ်မျ်ꩻနွ်ꩻ၊ နပဿာမိ- ခွေထီႏတွ်း၊ ယတော- ပွိုးနွ်ꩻမꩻ ခွေကွီဗာႏဖူးသွူ။ နံပါတ်(၆၇) ဥစ္ဆင်္ဂဇာတ် ထွူယို။[၁][၂][၃]