၆၂။အဏ္ဍဘူတဇာတ်
၆၂။ အဏ္ဍဘူတဇာတ် ဘုရာꩻအွ်ႏဇေတဝန်ကျောင်ꩻကိုခိင်ႏ ရဟန်ꩻတပါꩻ ဗွိုႏသာႏသနာႏတဲင် ဘုရာꩻသွန်သင်ဖေႏ- အွိုးစခါ ဗာရာဏသီခမ်း ဗြဟ္မဒတ်ခုန်စိုး ဘုရာꩻလောင်ꩻ သဲင်္ထွာခုန်ပို အရွဲႏတွိုႏသွန်ဒါႏလို့ထာꩻဒါႏထွူ ဖါထင်ႏအဲန္ထဝ်းထင်ႏထွာခုန်၊ မိန်ꩻဗြဟ္မဒတ်၊ ခုန်တွမ်ႏပုရောဟိတပုဏ္ဏာꩻ တောႏဗေး၊ ခုန်မီႏအွန်ႏစွꩻစွꩻလင်ꩻဗေးနွ်ꩻ ရွတ်ပါအငွ်း (ခြောင်တကဲင်ႏအာ၊ တခြာထွာသိုႏ၊ လိုꩻမူႏလꩻထာꩻဗန်ႏ ပျောႏတွမ်ႏထိန်ႏ)ထွူမꩻ အွံစွꩻ၊ မီႏမာမာနျ်းနွ်ꩻ ခုန်နွောင်ꩻစုမ်ႏလဲင်ႏ၊ ခုန္ထင်ႏနွောင်ꩻအာငါႏတဲင် ပုဏ္ဏာꩻဟွုန်ကဲန်း၊ ပုဏ္ဏာꩻယူႏ"ဖေႏကနွောင်ꩻဗာႏခုန္နဝ်ꩻ ထိုမ်ႏကဒွို့လိုꩻမူႏ တပျောႏဗာႏတွ်းလိုꩻခိုလင်နွ်ꩻမꩻ"ရိုꩻတဲင် ပုဏ္ဏာꩻနွ်ꩻ ဒါႏကေႏမွေးစွန်ႏ လိုꩻမူႏလိုꩻခိုလက္ခဏာႏကျမ်ꩻနွ်ꩻမꩻ ထွားလိုꩻမူႏဟို့ꩻဗုက်ꩻ၊ အမီႏလွူးအပို ကအီႏထန္ဒာႏအမူႏနွ်ꩻ ဟဲ့ꩻသဲင်ꩻအလမ်း၊ အပိုမူႏထင်ႏအွ်ႏ ဝွေꩻဖြေꩻနေးဖေႏအမွိုးဥစ္စာႏ အွန်ႏလွေꩻထိုꩻဒျာႏ၊ ထူႏအပိုဒုမ်ꩻ၊ ဝွေꩻလွူးတန်၊ ဝွေꩻလမ်းကိုတဲ့ အွန္ဒျာႏလိုꩻမူႏလွန်းး၊ ပါꩻမူႏပေႏနွ်ꩻ ချ်ႏလꩻတန်တွ်းဒွိုန်းအခါႏကိုယို ပုဏ္ဏာꩻထင်ႏတောႏတွ်းဒုမ္ဗေး၊ ပါꩻမူႏပေႏ ဝွေꩻကလွူးနွ်ꩻတန်မꩻ၊ တွေꩻအျ်ႏလꩻမꩻ ကွဲးထင်ႏထေ့၊ ခုန်ဟဲ့ꩻတောႏဗေး၊ တွိုႏပုဏ္ဏာꩻခလဲ့ꩻ ပုဏ္ဏာꩻရွတ်ငွ်း (ခြောင်တကဲင်ႏအာ၊ တခြာထွာသိုႏ၊ လိုꩻမူႏလꩻထာꩻဗိန်ႏ ပျောႏတွမ်ႏထိန်ႏစားကိုနွ်ꩻ ခွေမာပါတွ်း)ထွူမꩻအွံစွꩻ၊ မီႏမာꩻနျ်းနွ်ꩻ ပုဏ္ဏာꩻနွောင်ꩻစုမ်ႏစူ၊ ခုန်ထင်ႏသုမ်ꩻအာလဲင်္ငါႏ ခုန္တဲ့ ဟွုန်ကဲးန္ဒာႏ ပုဏ္ဏာꩻနေနေနွ်ꩻမꩻ "ပုဏ္ဏာꩻယို အလွိုးရအမာ ဝါꩻတဖြာꩻစားအွ်ႏမွေးဟယို နွ်ꩻမꩻဝွေꩻနွောင်္ခွေ"၊ လဲႏစောႏတနာႏ ထင်ႏသေအမွေးခါ ဟဲ့ꩻလိုꩻဒွ်အေႏ ဖေႏကလꩻ အွန်ႏလွေꩻယားပုဏ္ဏာꩻမာ၊ ပုဏ္ဏာꩻလမ်းနွုတ္ထပ်ထျꩻ အွန်ႏထာꩻဟွမ်ဆဲင်ႏ၊ ကားထာꩻနွုမ်ꩻဟွမ် အလွီးအထီ အအောက်ꩻအတူႏ ပရုက်စာသော့ꩻစုမ်ႏစေ့ꩻ၊ ပုဏ္ဏာꩻမာ ပုဏ္ဏေꩻသူꩻ ပေါႏရိုꩻလိုꩻခိုနွ်ꩻ ဖေႏထီႏပုဏ္ဏာꩻတဖြာꩻဒုမ်ꩻ၊ အထိင်ꩻပွေါးသားဖိုင်ႏ လိုꩻမူႏလွန်းး၊ အမာꩻလွူးသားတဲ့ အမူႏဒျာႏ၊ အမာꩻလွူးသား မီႏလွေꩻဖြေꩻထာꩻဟွမ် ကွ်ႏဖိုင်ႏနွ်ꩻ ကာႏလွေꩻဗာႏ ဒွ်အေႏဆဲင်ႏ၊ ပါꩻဒွ်အေႏဆဲင်ႏသားနွ်ꩻတဲ့ ထင်ႏသေစဲင်းသွူ ပါꩻမူႏနွ်ꩻ ထွာပုဏ္ဏေꩻမူႏမာꩻလွူးသားတဲင် တနီꩻကို ထင်ႏထီႏပါꩻမူႏနွ်ꩻလွေꩻဆေꩻ အွ်ႏဆဲင်ႏကို ထန်ႏလွေꩻ၊ လွေꩻအွန်ႏခြို့ꩻအနမ်း ပါꩻမူႏနွ်ꩻခင်ႏထျꩻ၊ စူတဲ့ ခုမ်ပါꩻမူႏနွ်ꩻခင်ႏ၊ "မွိုး- နီမွိုးလွေꩻခိꩻငါႏထာꩻမျ်ꩻကို" ငွိုးပါဒေါ့ꩻပါ၊ အသောင်အထျꩻနွ်ꩻတဲ့ ဒွ်အေႏစွိုꩻဖိုင်ႏ အွန်ႏတဗေႏတဗာႏအလွိုး၊ ငွိုးရောင်နျ်းးထာꩻ၊ "နီမွိုးပိုဖိုင်ႏယိုတဲ့ ဗိုန်န်"အွ်ႏသင်ႏစွန်ႏတမွိုးး၊ ပါꩻမူႏနွ်ꩻတဲ့ ယုမ်းထိုꩻခန်းဒျာႏ၊ တဖေါ့လို့ခန္ဒျာႏလို့ဝင်ꩻငွန်ꩻ တွမ်ႏပါဆဲင်ႏသား။ "နီမွိုး အွ်ႏမျ်ꩻကို?"၊ "နီမွိုးအွ်ႏအိုင် သက်ပေႏယောင်ꩻရေꩻ ပုဏ္ဏာꩻမာပေႏ ကိန္နီမူႏထျꩻ၊ အွ်ႏမာꩻလွူးဖေႏပုဏ္ဏေꩻမူႏ"၊ "နီမွိုးအီႏလွေꩻမျ်ꩻယို?"၊ "အီႏလွေꩻဖြေꩻဖေႏ ပုဏ္ဏေꩻမူႏတာႏ ကွ်ႏဟွမ်ဖိုင်ႏ" ဒွ်အေႏထင်ႏဟွုန် ပေါႏနွ်ꩻတဲ့ "စဟန္နီꩻမာꩻငါ နီမွိုးလွေꩻမွုန္ဒုမ်ဆေꩻ၊ လွန္ထူႏဗော့ꩻယို"ရိုꩻတဲင် ဖေႏထင်ႏကွ်ႏသိန်ကရဝေႏ အလွီးသား၊ ကွ်ႏတရေꩻအမျိုꩻမျိုꩻ အီထင်ႏဖေႏ၊ ပုဏ္ဏေꩻမူႏရိုꩻ "ဟန္နီꩻ မုဏ္ဏာꩻမွော့ဖေႏအာငါႏ နီမွိုးကွ်ႏငိုꩻမျ်ꩻ"၊ အမွိုးဒေါ့ꩻချာ "ပုဏ္ဏာꩻဖေႏမွးတွ်း ခွေထူႏခွေပိုဆဲင်ႏကို အီႏထင်ႏဒျာႏ"။ တဲႏနွ်ꩻမာꩻငါ ပုဏ္ဏာꩻကဖေႏကွ်ႏငိုꩻနွ်ꩻ ဝွေꩻသိမ်ꩻ၊ ကလိုႏဒါႏကွ်ႏမျိုꩻနွ်ꩻ ထူႏဒွ်အေႏဆဲင်ႏကို အီႏထင်ႏဖေႏ၊ ထင်ႏမွိုတ်ထွူဝင်ꩻမꩻ ဒွ်အေႏအွန်ႏဆာစွန်ႏအနမ်း၊ အမွိုးထင်ႏလွန်ရီ "မဲန္ထီႏငါႏ ခွေဖူးပုဏ္ဏေꩻမူႏတဲင် ထွာဗာႏထာꩻဆာ၊ ပေါႏခွေထီႏဗာႏတွ်းနွ်ꩻ ခွေအီႏသီသွူ"။ အမွိုးထင်ႏဒေါ့ꩻဟွုန် ပုဏ္ဏေꩻမူႏဒေါ့ꩻ "ဟဲ့ꩻလွန်ဟျ်း ခွေဖေႏခွင်ꩻဒျာႏ"နွ်ꩻခါမꩻ ထူႏထာꩻအီႏ ထောက်ꩻလူး တခါꩻပွေါးသား၊ တခါꩻပွေါးသား လို့ထာꩻအီႏခိꩻဒုမ် လွင်းထိုꩻဗာႏ၊ ထာꩻအီႏနွ်ꩻ ဝွေꩻထူႏနွို့ဒျာႏသွူ ပါꩻမျ်ꩻဒေါ့ꩻအာထာꩻတဲ့ အွန်ႏလို့ထန်ႏထာꩻအီႏ၊ တွိုႏတနီꩻကို ဒွ်အေႏသားနွ်ꩻ သော့ꩻထာꩻအီႏခြောင်းကို အီထင်ႏထေ့ပုဏ္ဏေꩻမူႏထျꩻ။ ဒွ်အေႏသားနွ်ꩻ ယားကျ်ထွူဝင်ꩻသီႏလတဲင် အိုင်နို့ꩻထာꩻ၊ ထင်ႏလꩻနီသိုမ်နီꩻခါ ပုဏ္ဏေꩻမူႏဒေါ့ꩻ "နီဝေးအွ်ႏလိုႏလွေꩻလဲန်း"၊ ဒွ်အေႏဒေါ့ꩻ "ခွေမဲန်ဟိုႏသေꩻခါꩻငါႏ ပုဏ္ဏာꩻကတူႏထွူမꩻ ခွေလွေꩻ"ထင်ႏရိုꩻတဲင် ပုဏ္ဏေꩻမူႏဒေါ့ꩻအဝါꩻ "ခွေမဲန်ဟွုန်ငါႏ နာꩻတိင်ႏငွ်း၊ နာꩻကေားဒိုင်ႏ ခွေကေားကျူႏ" ပုဏ္ဏာꩻဒိုင်ႏဖေႏခန်းတိင်ႏ။ "နာꩻအွ်ႏထွား ခွေကျူႏထာꩻတဒါႏတွ်း၊ နာꩻမဲ့နွ်ꩻ ဗဲန်ပိတ်ꩻခါꩻနေး တွမ်ႏဟွမ်မꩻ ခွေကျူႏ"ရိုꩻတွော့ꩻ ဗဲန်ပိတ်ꩻခန်းမဲ့ထွူမꩻဒိုင်ႏ၊ ပါꩻမူႏ အွ်ႏကျူႏထာꩻဒေါ့ꩻ "ခွေမဲန်ဟိုႏပါငါႏ နာꩻကတူႏ"၊ အဝါꩻရိုꩻ "ဟိုႏပါတဲ့လꩻဒျာႏ"၊ ပါꩻမူႏဟဲ့ꩻ ဒွ်အေႏလွန်ဟိုႏ၊ "နာꩻစူပနဲန်ႏနဲန်ႏပေႏနွ်ꩻ ဟိုႏခွေကတူႏမွော့ဆာငါႏ၊ နျ်းစွန်ႏလိုꩻခိုစူတန်"၊ ပါꩻမူႏဖေႏခုမ်အစူ ပါꩻခိုလွင်းအိုင်နို့ꩻထာꩻ၊ ပါꩻမူႏထူႏနားမန်ꩻ သူႏဖေႏအဝါꩻကတူႏ၊ ပုဏ္ဏာꩻလွေꩻထာꩻဖဲ့ꩻချာ ဒွ်အေႏသားနွ်ꩻ အွန်ႏသော့ꩻခြောင်းကို ထေထန်ႏ။ ဒွ်အေႏသား ထင်ႏဒေါ့ꩻဟွုလ္လို့ ခုန်ဟောခမ်ꩻ၊ တွိုႏတနီꩻ ပုဏ္ဏာꩻထင်ႏခꩻစာꩻခုန်တဲင် ခုန်ဟဲ့ꩻတောႏဗေး၊ ပုဏ္ဏာꩻတသေတွ်းအမာ သီႏလကျ်တဲင် ဒေါ့ꩻ(ခြောင်တကဲင်ႏအာ၊ တခြာထွာသိုႏ၊ လိုꩻမူႏလꩻထာꩻဗိန်ႏ ပျောႏတွမ်ႏထိန်ႏစားကိုနွ်ꩻ ခွေမာပါတွ်း)ထွူ အွံစွꩻလင်ꩻဗေး သုမ်ꩻဒျာႏဟောခမ်ꩻ၊ ဟောခမ်ꩻဒေါ့ꩻပုဏ္ဏာꩻ "နာꩻပုဏ္ဏေꩻနွ်ꩻ သီႏလကျ်လဲန်း၊ နာꩻတခါꩻနွုတ်ꩻရန်း နာꩻထင်းအီႏဗိန်ႏ တဗိန်ႏနွောင်ꩻတွ်း၊ လိုꩻမူႏဝါꩻတဖြာꩻဒုမ်ꩻနွ်ꩻ တအွ်ႏနွောင်ꩻတွ်း၊ နာꩻပုဏ္ဏေꩻမူႏမဲန်ဟွုန်နာꩻတိင်ႏငွ်း၊ မဲန်ကျူႏထာꩻ၊ မဲန်ပေ့ꩻနာꩻမဲ့၊ မဲန်ဟိုႏနာꩻကတူႏဖိုင်ႏနွ်ꩻ အဝါꩻထိန်ႏဉာဏ်ႏဒျာႏလွန်းးအကျောင်ꩻ- ၆၂။ ယံ ဗြာဟ္မဏော အဝါဒေသိ၊ ဝီဏံ သမုခဝေဌိတော။ အဏ္ဍဘူတာဘတာ ဘရိယာ၊ တာသု ကော ဇာတု ဝိဿသေ။ ယံယေနကာရဏေန- ပွိုးဒျာႏဝါꩻပေႏအတွက်တာႏတဲင်၊ သမုခဝေဌိတော- တွမ်ႏထာꩻခွ်ဒွုန် ဗဲန္တိန်ႏခါꩻမဲ့ထွူမꩻ၊ အဝါဒေသိ- အွန္ဒိုင်ႏ၊ ဝီဏံ- နာꩻတိင်ႏ၊ တံကာရဏံ- အခရာႏနွ်ꩻ၊ ဗြာဟ္မဏော- ကထွာအဝါꩻပုဏ္ဏာꩻနာꩻနွ်ꩻ၊ (နဇာနာသိ- တသေတွ်း)၊ တာသု- မာသီးအမျိုꩻယို၊ အဏ္ဍဘူတာဘတာ- နေးအျ်ႏခန်း အမွိုးဟို့ꩻကိုခိင်ႏကာႏရိုꩻတဲ့၊ ကော- ပညာႏအွ်ႏသား အဖြာꩻမျ်ꩻကဲး၊ ဝိဿသေ ဇာတု- အီႏယုမ်းလꩻဟောင်း။ ပုဏ္ဏာꩻထင်ႏဟွုန်ခုန်ငွ်း သဲင်ꩻစဲစ္ဆေꩻအမာ၊ အမာရိုꩻ "ခွေယို ပေါႏလွိုတဲင်နာꩻနွ်ꩻ လိုꩻခိုလင် ခွေတခွေါင်းဖိုတွ်း၊ နာꩻမီႏတယုမ်းတွ်းနွ်ꩻ ခွေနွို့နဲနာꩻမေႏပုမ်ႏကိုဗုန္ဒျာႏ" ထင်ႏဒေါ့ꩻနျ်းနွ်ꩻတဲင် ပုဏ္ဏာꩻမာꩻမွေးစွန်ႏမေႏပုမ်ႏ၊ ပုဏ္ဏေꩻမူႏတဲ့ ထွန်ႏအမာꩻလွူးသားလွေꩻဒေါ့ꩻ အဝါꩻပေႏ (ဒွ်အေႏသား)၊ "ခွေမီႏအီႏနွို့မေႏမဲ့ꩻ လောႏလွန္ထို့ꩻခွေစူ"၊ တွိုႏအနီꩻနွို့မေႏခါ ပုဏ္ဏေꩻမူႏဒေါ့ꩻ ငွ်းသစ္စာႏ (လွိုတဲင်နာꩻနွ်ꩻ လိုꩻခိုလင်စူ ခွေတခွေါင်းဖိုတွ်း ခွေသစ္စာႏငွ်းမီႏမဲန်ႏ မေႏဖေႏကခိုးမွုန်းခွေ) အီႏကျမ်ႏနွို့မေႏ ဒွ်အေႏသားရိုꩻ "သီထွားမွိုင် ပုဏ္ဏာꩻဖြားထာꩻမာꩻနွ်ꩻ အွန္ဒျာႏအမာနွို့မေႏ" ဒေါ့ꩻထွူလောႏလွေꩻထွို့ꩻပုဏ္ဏေꩻမူႏစူ၊ ပုဏ္ဏေꩻမူႏဒေါ့ꩻချာ "ပုဏ္ဏာꩻ- ခွေနွို့ဗွန္တဝ်းဒုမ်၊ ခွေသစ္စာႏကျ်လဲန်း၊ ပါꩻခိုတဖြာꩻလွန်ထွို့ꩻလဲန်းခွေစူ"၊ ပုဏ္ဏာꩻဖြားရိုꩻ "သီဖိုင်ႏယို ချာႏလဲန်းခွေမဲ့နား" တွဲႏအမာထွူ ဝါးထိုꩻထိုꩻခန္ဒျာႏ။ ပွိုးနွ်ꩻမꩻ လိုꩻမူႏယို ဗွေစုမ်ႏတွမ်ႏလိုꩻယုက်သီးအကျင်ꩻ၊ ထိင်ꩻကွန်တလꩻတွ်း၊ မဲလ္လꩻနွ်ꩻ သမုဒယ၊ မီႏလꩻတဲ့ဒုက္ခ၊ လꩻတွ်းတဲ့ဒုက္ခ၊ ထီႏအပဲတ္တဲင် မဲလ္လတွ်းလိုꩻမူႏ၊ မဲလ္လꩻဒျာႏတရာꩻနွ်ꩻမဂ္ဂ၊ သꩻမဲလ္လꩻလိုꩻမူႏ မီႏထိုꩻမားထိုꩻနွ်ꩻ နိရောဓ၊ ရဟန်ꩻအိုန္နဝ်ꩻ ထင်ႏသေငါꩻသစ္စာႏလိတ်ꩻပါꩻတဲင် ထွာထိုꩻခန္ဒျာႏ သောတာႏပန်ႏအရိယာႏ။ အဏ္ဍဘူတဇာတ် ထွူယို။[၁][၂][၃]