ခွိုꩻစုပ်တသာလိုꩻယွဲး
"ခွိုꩻစုပ်တသာလိုꩻယွဲးတွမ်ႏ သမဲင်ꩻဖေႏပွုံႏတာႏ" "အနာႏဂတ်စွိုးခွိုꩻခမ်းထီ ထင်းထိုသွောင်းရေꩻယို သွီႏသက်အောဝ်ႏဒင်ႏ လိုꩻယွဲးယိုခါလောင်း"ငေါဝ်းနောဝ်ꩻအတွိုင်ꩻ စွိုးခွိုꩻတာႏတဲ့နောဝ်ꩻ၊ ခမ်းထီတာႏတဲ့နောဝ်ꩻ၊ ဘာႏသာႏ သာႏသနာႏတာႏတဲ့နောဝ်ꩻ၊ ပညာႏခြွိုင်ႏသန်ꩻ စီꩻပွါꩻရေꩻတာႏတဲ့နောဝ်ꩻ စတဲင်ဖေႏကမွန်ဗန်၊ ဖေႏကပြွူႏဖြို၊ ဖေႏကထင်ႏထိုတသွောင်းရေꩻနောဝ်ꩻ အဓိကလိုꩻယွဲးယိုခါယံနောဝ်ꩻသွူ။ ခွိုꩻစုပ်တသာလိုꩻယွဲးယိုခါ စွုမ်ႏဖြာꩻဖြာꩻလောင်း သꩻဓာတ်ရက်စွိုးခွိုꩻလိုꩻမျိုꩻ မဉ်ႏအောဝ်ႏမꩻ၊ စွုမ်ႏဖြာꩻမဉ်ႏထွာလိုꩻဆꩻမꩻ အနာႏဂတ် နိစွိုးခွိုꩻနီလိုꩻမျိုꩻယို အီႏဆꩻ၊ အရောင်ႏအီလေလꩻ၊ အမဉ်ꩻအီႏတွိုႏဗꩻ ကုလရွုမ်ဆꩻကီနောဝ်ꩻသွူ။ နုဲင်းယိုခါ ကလွောင်ႏဗူႏလွေꩻဒါႏ ပအိုဝ်ႏလိုꩻယွဲး (PYN) စွုမ်ꩻစွိုꩻယို အသက်ဖေႏကမွန်ဗန်နောဝ်ꩻ အရေꩻတန်ငါႏ၊ (PYN)အာႏပေႏခရာႏ အောဝ်ႏဖဲ့ꩻမုဲင်ꩻလဲ့ (PNO)ဖုံႏ အောဝ်ႏလိုႏထွားလွိုတောဝ်း၊ အောဝ်ႏလိုႏယီးအွဉ်ႏနယ်တဖူꩻစွို့ꩻစွဉ်ႏ၊ အောဝ်ႏလိုႏဖေႏအခင်ႏလမ်း၊ အောဝ်ႏလိုႏဖေႏအာႏ အထာꩻမာꩻ၊ အောဝ်ႏလိုႏစွဲးကမ်းကိုဖေႏ အဖဲ့ꩻဖဲ့ꩻအခေါဝ်ခေါဝ်နောဝ်ꩻသွူ။ (PYN)ထာꩻမာꩻတဖူꩻရဲဉ်ႏကို (PNO) ဖေႏကထွာဗာႏမွိုန်း အရဲးအတာႏနောဝ်ꩻလဲ့ အရေꩻတန်ငါႏ "အေႏတွတ်ꩻသွဉ်နျာႏအို"လိုꩻဖြားရီးခါ ထာꩻယူႏအဲဉ်ႏသား ငေါဝ်းနုဲင်းယို ဖေႏကဒေါ့ꩻထေ့လူးဗာႏမွိုန်းနောဝ်ꩻ အောဝ်ႏလိုႏအွဉ်ႏသတိꩻငါႏနောဝ်ꩻသွူ။ ကရီးခါ "ဂျူးလိုꩻပေႏ" ထီႏဝါးလေ့အောဝ်ႏဝုဲင်းထာꩻ ထာꩻခြေင်လောင်းနောဝ်ꩻ ရိုꩻအဖါ "ဖါဖါ ပိုခိုမဉ်ကျောင်ႏနုဲင်းနုဲင်းငါႏထာꩻ နုဲင်းဝါးလေ့သူꩻလꩻနေ?"တဲ့၊ အဖါရိုꩻချာ "လꩻဒျာႏအီ ပိုခို၊ ပိုခိုမီႏမဲဉ်ကျောင်ႏနုဲင်းဝါးလေ့သူꩻလဲ့ ကျိုꩻစာꩻသွော့၊ မဲ့ꩻပိုခိုကျောင်ႏဒါႏဒျာႏ"တဲ့ အောဝ်ႏနောဝ်ꩻ ဝင်ꩻပိုကွဲယူႏယူႏ၊ ကွဲကျံႏကျံႏ၊ ကွဲမာꩻမာꩻတဲင် အောဝ်ႏထာꩻယူႏတဲမ်းနယ်အပွုံႏ၊ အောဝ်ႏအပွုံႏ မာꩻနယ်အပွိုင်အခြုံတွော့ꩻ ကွဲကျံႏကျံႏ၊ ကွဲထွင်ႏထွင်ႏလဲ့ ထွာလွဉ်ဗာႏ သင်္ဘောꩻကွင်ႏနောဝ်ꩻသွူ။ "မောင်းမွူးသင်ႏလဲဉ်း၊ မောင်းဗဲင်ႏသင်ႏဒွိုန်း"တယ်ႏစွဉ်ႏနီခမ်းထီကလꩻလွဉ် လွစ်တခြင်ရေꩻ မာꩻလွဉ်ယို နေင်ႏပေါင်ꩻ(၇၀)လွိုလဲဉ်း ခေတ်လုဲင်ႏပြောင်ꩻလဲဉ်း ခွိုင်းမုဲင်ꩻဗာႏဗာႏလဲ့ ပွိုင်းဝွို့တွမ်ႏ လိုꩻယွဲကအီႏထူႏလွေꩻဒါႏ စွိုးခွိုꩻပွုံႏတာႏ တန်တန်အာအာနောဝ်ꩻ အောဝ်ႏတောဝ်းငါႏ၊ အီႏထူႏဗာႏလဲ့ အခွင်ꩻအရေꩻအောဝ်ႏတောဝ်းငါႏ၊ ခံႏဗာႏအာဒျာႏ ဝင်ꩻတိတ်ꩻခံႏဘဝသွူ။ ခွိုꩻစုပ်တသာလိုꩻယွဲး မဉ်ႏလွောင်ႏဗူႏတောဝ်း၊ မဉ်ႏတထူႏဒါႏတောဝ်း စွိုးခွိုꩻပွုံႏတာႏနောဝ်ꩻ ခေတ်အစုပ်မုဲင်ꩻမုဲင်ꩻယောဝ်း နီစွိုးခွိုꩻနီလိုꩻမျိုꩻယို အောဝ်ႏကုဲင်ဆုဲင်ꩻသေႏသေႏဗာႏဒျာႏဝင်ꩻ၊ ထွာဗာႏစွူစွူဒျာႏဝင်ꩻသွဉ်း၊ လွိုက်ဒင်ႏယင်းလိုꩻတန်လဲ့ စူꩻယိုꩻယင်းဗော့ꩻ နုဲင်းခေတ်ပွိုင်းလဲင်ႏတွိုင်ꩻတွိုင်ꩻလွုမ်ꩻတွော့ꩻ နီပအိုဝ်ႏမဉ်ႏအောဝ်ႏလိုႏလွိုက်ဒင်ႏလိုꩻတန်လိုꩻယံနောတ်ꩻ အယပ်ꩻအခုဲင်ႏအောဝ်ႏအာငါႏ၊ အခွင်ꩻအရေꩻ ခွင်ꩻအီအာငါႏသွူ။ နုဲင်းခေတ်လိုꩻယွဲးယိုခါဖုံႏနောဝ်ꩻ ကဉ်းအာအာဒါႏရောင်လဲဉ်းပညာႏ၊ လꩻလဲဉ်းဝင်ꩻဘွဲ့ဖုံႏ၊ နွို့ဒိုဖြွဉ်နွောင်ꩻလဲဉ်းဝင်ꩻခမ်းဝင်ꩻထီဖုံႏလဲ့ သꩻဓာတ်ရက်ချာစွိုးခွိုꩻလိုꩻမျိုꩻယို အာႏပေႏငါႏတဲင် အောဝ်ႏဝင်ꩻခမ်းဝင်ꩻထီသဲင်ꩻသားဖုံႏ ယဟန်ႏနောဝ်ꩻ တွမ်ႏရိုꩻမွိုန်း အီႏသဲင်ꩻမာꩻချာကိုဖေႏ စွိုးခွိုꩻထာꩻမာꩻ၊ ထီႏမွိုးဖါဆရာႏ သံႏဃာႏလိုꩻကျောင်ꩻဖုံႏယို သဲင်ꩻအံႏသွမ်ꩻအံႏသဲ့ꩻထဲင်းသားလဲ့အောဝ်ႏ၊ မွိုးဖါထွုံꩻစံႏ လာဗွေလာမား ထင်ႏကျောင်ꩻကန်ႏပေႏငါလဲ့ တထင်ႏတောဝ်းသားလဲ့ အောဝ်ႏ၊ ကွုတ်တောဝင်ꩻဘာႏသာႏ ထွာချာတောနီဘာႏသာႏ အဆူႏအနာႏ ရန်ႏသူႏသားလဲ့ အောဝ်ႏနေနေနောဝ်ꩻသွူ။ မွိုးဖါထွဉ်ႏသွဉ်မို့ပညာႏ ဒါႏသဲင်ꩻလဲဉ်း မွိုးဖါသꩻယံချံꩻသာႏ နေးတွမ်ႏနီပညာႏစွန်ꩻအာႏတွော့ꩻ အောဝ်ႏလိုႏသဲင်ꩻအွဉ် သဲင်ꩻဗွောင်ဖေႏချာငါႏ နီပအိုဝ်ႏမဲ့နားဖုံႏ၊ ဝင်ꩻခမ်းပညာႏ၊ ဝင်ꩻခမ်းစီꩻပွာꩻ၊ ဝင်ꩻခမ်းထာꩻမာꩻနယ်ꩻ၊ ဝင်ꩻခမ်းအုံအောဝ်ႏအဆင်ႏရန်းဖုံႏယို သဲင်ꩻသွဉ်ဖေႏချာသွော့ဝင်ꩻ၊ သဲင်ꩻထွင်ႏနယ်ဖေႏချာသွော့ဝင်ꩻဖုံႏနောဝ်ꩻသွူ၊ (ဝင်ꩻခမ်းထွုံꩻစံႏ၊ တလီꩻတကြန်ဖုံႏနောဝ်ꩻ အွဉ်ႏထဲ့ဒင်ႏလူးမွိုန်း ပအိုဝ်ႏဟံႏလောင်းကရိုꩻနောဝ်ꩻလဲ့-) ပအိုဝ်ႏပေႏခွိုꩻစုပ်တသာ လိုꩻယွဲးသီးဖုံႏဩ- အနာႏဂတ် နီစွိုးခွိုꩻလိုꩻမျိုꩻအရေꩻယို သွီႏသက်အောဝ်ႏဒင်ႏလဲဉ်း နီပြေင်လောင်းတဲင် နီစွိုးခွိုꩻနီလိုꩻမျိုꩻသွီႏသက် ဖေႏကမွန်ဗန်၊ ရဲင်ꩻအာႏဖေႏကသန်၊ ရွဉ်အာႏဖေႏကတန်၊ စွန်ꩻအာႏဖေႏကယံ၊ စွုမ်ႏဖြာꩻဖေႏကရုဲင်းထင်နောဝ်ꩻ နီအီႏပွိုင်ဆင်ဖေႏဗာႏနုဲင်းမုဲင်ꩻ၊ ခွိုꩻအာႏကပေႏကို နီအီႏနွို့တွူႏဖါႏစွဲးကိုဗာႏနုဲင်းမုဲင်ꩻကရိုꩻနောဝ်ꩻ- ကလွေꩻသွဉ်ထူႏဒါႏပညာႏ ဝင်ꩻခမ်းဝင်ꩻထီသားလဲ့ သွဉ်ထူႏယံယံ၊ သွဉ်ထူႏဒါႏဒါႏ၊ သွဉ်ထူႏသွတ်ꩻသွတ်ꩻ၊ နီသွဉ်ပညာႏယို အစွန်ꩻဖေႏကုတ်ꩻခြေင်ပုဲင်ႏထာꩻနောဝ်ꩻ နေးတွမ်ႏနီပညာႏစွန်ꩻတွော့ꩻ ဖေႏကထွာအီဒျာႏ စွိုးခွိုꩻအာႏနောဝ်ꩻ အောဝ်ႏလိုႏငါႏ သꩻရက်ခွိုꩻတလာလာ၊ ရေႏမိုးချက်ယံယံနောဝ်ꩻသွူ။ ဒါႏသွူပညာႏ ဖေႏကထွာဗာႏမွိုန်း စွိုးခွိုꩻအစွူႏနောဝ်ꩻလဲ့ အရေꩻတန်ငါႏနောဝ်ꩻသွူ။ သွဉ်ပညာႏ ကဒါႏသဲင်ꩻလဲဉ်းသားလဲ့ တွက်မွိုန်းတောဝ်း နမ်းတဖြာꩻတာႏ၊ ထီႏဗဲင်းစွိုးခွိုꩻအရေꩻတွော့ꩻ နေးတွမ်ႏနီပညာႏစွန်ꩻအာႏတဲင် ဒါႏကကီးလဲ့ ထွဉ်ႏအံႏဗဲင်းကကီး၊ ဒါႏခခွေးလဲ့ ထွဉ်ႏအံႏဗဲင်းခခွေး၊ ဒါႏနငယ်လဲ့ ထွဉ်ႏအံႏဗဲင်းနငယ်၊ "ဒါႏတောဝ်း၊ သတောဝ်း၊ ထွာတောဝ်း၊ လꩻတောဝ်း"ကရိုꩻနောတ်ꩻ အောဝ်ႏဒျာႏလိုꩻလွꩻလွုမ်ꩻ၊ ဒါႏဗာႏ သေဗာႏ ထွာဗာႏ လꩻဗာႏ လွူးဒျာႏသွော့ သꩻအာႏဇာႏနီႏ ပငါပရာꩻနောဝ်ꩻသွူ။ နီပအိုဝ်ႏအနာႏဂတ် အခွင်ꩻအရေꩻ ဖေႏကအောဝ်ႏသော့ꩻစွူစွူဒျာႏ နီစူကိုနောဝ်ꩻ ဆဲင်ႏရာꩻလိုꩻယွဲးဖုံႏ အောဝ်ႏလိုႏငါႏဝင်ꩻပွုံႏတာႏ ပငါပရာꩻ၊ နီပအိုဝ်ႏပညာႏရေꩻ၊ စီꩻပွာꩻရေꩻ၊ ခြွိုင်ႏသန်ꩻရေꩻ နုဲင်းယိုခါ အခေႏအနေႏနောဝ်ꩻ အောဝ်ႏကုဲင်ဆုဲင်ꩻနေကဝင်ꩻ မဲင်ႏပေါင်ꩻသွစ်ꩻရျာꩻ၊ အောင်ႏလဲဉ်းတက္ကသိုလ်ႏလဲ့ အောဝ်ႏသိုလ်ႏအောဝ်ႏဖျင်ꩻလို့ဒျာႏထာꩻ၊ ထူႏခါꩻတောဝ်းဝင်ꩻပွုံႏတာႏ၊ သဲင်ꩻအုံခွꩻချာလို့ဒျာႏ ပငါပရာꩻဖုံႏနောဝ်ꩻသွူ။ ပွိုင်းဝွို့တွမ်ႏ နီပအိုဝ်ႏပညာႏရေꩻနုဲင်းယိုခါ လိုꩻပေႏထင်ႏသွုပ်ကျောင်ꩻ တနွောင်ꩻတောဝ်းသားလဲ့ အောဝ်ႏဗောႏဗာႏ၊ သွဉ်ဗာႏတောဝ်းထဲင်း ပညာႏသားလဲ့ အောဝ်ႏနေဒွိုန်းနောဝ်ꩻ အနာႏဂတ်ကို မာꩻနုဲင်းမုဲင်ꩻအီႏဒိုနွောင်ꩻဝင်ꩻခါႏဟောင်း။ ပအိုဝ်ႏအလွောင်ႏဗူႏ အစွုမ်ꩻစွိုꩻဖုံႏလဲ့ ပွိုင်းဝွို့တွမ်ႏ ရွဉ်တောင်ႏတာႏ တဉ်ႏတဉ်ႏခွေါင်ခွေါင်ဖုံႏ တထွင်ႏခါꩻလွတောဝ်းဝင်ꩻ၊ အုံပွေါဗော့ꩻဝင်ꩻလွဉ်စွဲကမ်း (ကူႏညီႏ)ရွဉ်လုမ်ꩻ၊ တာႏဆွာꩻကို အီႏမာꩻနေးမုဲင်ꩻအုံတဲင်တခြွော့နွောင်ꩻဝင်ꩻဟောင်း။ ပအိုဝ်ႏစီꩻပွာꩻရေꩻလဲ့ အခေတ်မုဲင်ꩻမုဲင်ꩻ အောဝ်ႏစွူစွူဗော့ꩻ ခေါက်ခယ်ႏ(ပြောင်ႏ၊ ဗေခြောင်၊ ဖက်ꩻခေါ်လွုမ်ꩻနောဝ်ꩻ မာꩻနုဲင်းမုဲင်ꩻ ခြေင်းခြူဝင်ꩻစီꩻပွာꩻထွꩻ၊ ဝင်ꩻသမ်းအောဝ်ႏတေက်ꩻနျꩻဒျာႏအခန်ꩻ စွုမ်ႏနေင်ႏနေင်ႏနောဝ်ꩻ မာꩻနုဲင်းမုဲင်ꩻခြေင်ႏဝင်ꩻစီꩻပွာꩻ ထွꩻနွောင်ꩻဟောင်း။ ခြွိုင်ႏသန်ꩻရေꩻလဲ့ပီပီ၊ အုပ်ချွုတ်ရေꩻလဲ့ပီပီ၊ ကာႏကွယ်ႏရေꩻ(စဲ့ꩻ)သားထဲင်းလေႏလေႏနောဝ်ꩻ တွမ်ႏခေတ်ယိုတဗာႏ ကွာႏညာꩻယော့တဝိစ်ꩻလဲဉ်းဝင်ꩻ-စတဲင်နုဲင်းအရေꩻဆꩻကီဖုံႏယို နီထွာလိုꩻယွဲး မဉ်ႏတနွို့စွဲထူႏကိုတောဝ်း ပွုံႏတာႏမွိုင် အနာႏဂတ်နီပအိုဝ်ႏယို ထွာစွဉ်ႏဝင်ꩻထာꩻထွဉ်ႏခရာႏဒျာႏရင်ꩻသွူ။ မွိုးဖါကတွိုးစာအံႏလို့လဲဉ်း နီဟံႏ ပိုသမ်းတသေထုမ်ႏတောဝ်းပညာႏဉာဏ်ႏနောဝ်ꩻ အနာႏဂတ်နီပိုလီꩻဖုံႏ လွူးနမ်း အီႏထုမ်ႏအံႏဗာႏနုဲင်းမုဲင်ꩻ၊ လိုꩻဝေင်ꩻပိုနောဝ်ꩻ အောဝ်ႏဒါႏကနေနေရိုꩻစွဉ်ႏနုဲင်းနောဝ်ꩻလဲ့ ထွားမွိုင်လိုꩻတော်ꩻပိုသူꩻ အီႏမာꩻနုဲင်းမုဲင်ꩻ လွူးနမ်းကမ်းကြိုဒါႏနွောင်ꩻဟောင်း။ ကွပ်နောဝ်ꩻမꩻ ကထွာဒါႏခွိုꩻစုပ်တသာ လိုꩻယွဲဖုံႏ ဖဲ့ꩻပေါင်ꩻစွုမ်ႏ အောဝ်ႏလိုႏနွို့ထူႏကိုငါႏ စွိုးခွိုꩻပွုံႏတာႏပငါပရာꩻ၊ နီသမဲင်ꩻ၊ နီစီꩻပွာꩻ၊ နီပညာႏရေꩻ စတဲင်အဖဲ့ꩻမုဲင်ꩻအာႏပေႏလဲ့ လွောင်ႏလွောင်ႏဗူႏဗူႏ တသွီႏချင်ႏ၊ တယာႏချင်ႏ၊ တသွိုန်ႏတသꩻချင်ႏတွော့ꩻ စွီႏစူခြူလွဉ်ꩻ တဖွူလွဉ်ꩻခန်း ခေတ်ITကရိုꩻနောဝ်ꩻ မဉ်တမာဟွိုန်ငါႏ ခွိုꩻစုပ်တသာလိုꩻယွဲးဖုံႏနုဲင်းနောဝ်ꩻသွူ။ နမ်းသꩻနီပါꩻ ယံချံꩻသာႏ နေးတွမ်ႏနီလိုꩻယွဲစွန်ꩻအာႏ ပညာႏထာꩻသေတဲင် ဗွောင်လေစေလုဲင်း ထူႏပွုံႏတာႏရုဲင်းရုဲင်းလွေꩻခန်းသွော့ စွိုးခွိုꩻပွုံႏတာႏကရိုꩻနောဝ်ꩻ- တွမ်ႏမေတ္တာႏတဲင်- [၁][၂]