ပအိုဝ်ႏတစွိုးခွိုꩻလုမ်းနဲင်ႏငံႏရေꩻ

"ပအိုဝ်ႏတစွိုးခွိုꩻလုမ်း နဲင်ႏငံႏရေꩻမဟာဗျူဟာ တအဝ်ႏတဝ်းနဝ်ꩻ ကောပ်စွောန်ႏပအိုဝ်ႏတစွိုးခွိုꩻလုမ်းအွောန်ငါယံ တအဲန်ထဝ်းဒွုန်း" မြန်မာခမ်းထီ ပြောင်ꩻလုဲင်ႏကျင်ꩻသုင်ꩻလွောန် ဒီမိုကရေသီစနစ်နဝ်ꩻ ထွာလဲန်းအနေင်ႏတဆီ အစိုႏရသက်တန်ꩻနီဗာႏလဲန်းနဝ်ꩻသွူ၊ ဟန်ႏနေင်ႏ ၂၀၂၀-ယိုနဝ်ꩻ အစိုႏရဒုတိယသက်တန်ꩻလို့ထွူ တတိယအစိုႏရသက်တန်ꩻတာႏ အီႏမာꩻလွေꩻဗာႏ ခမ်းထီလွိုက်ရွေꩻပွယ်ꩻနဝ်ꩻသွူ၊ လွိုက်ရွေꩻပွယ်ꩻနဝ်ꩻ အီႏမာꩻလွေꩻ ၂၀၂၀-ဗာႏနေင်ႏ၊ နိုဝင်ဘာလာ ၈-နီꩻတဲ့ ခမ်းခြွောန်းဗူႏလွိုက်ရွေꩻပွယ်ꩻကောမသျဉ် ကျေႏညာႏလွေꩻခါꩻနုဲင်းနဝ်ꩻသွူ။ ၂၀၂၀-လွိုက်ရွေꩻပွယ်ꩻယိုနဝ်ꩻ လွိုက်ရွေꩻပွယ်ꩻကောမသျဉ်တရာꩻဝင်ႏခွင်ꩻဖေႏခါꩻ နဲင်ႏငံႏရေꩻပါတီ အဝ်ႏ ၉၆-ပါတီထွူ ကအီႏနွို့ခေးလွေꩻ ခမ်းထီတရွေꩻလုမ်းနဝ်ꩻ အဝ်ႏ ၇၈-ပါတီ၊ နွို့ခေးတွိုင်ႏဒေႏသတန်တောမ်ႏ ခမ်းနယ်ႏကို ခမ်းရင်ꩻသားပါတီဖုံႏနဝ်ꩻ အဝ်ႏ ၁၈-ပါတီနဝ်ꩻသွူ။ နဝ်ꩻအကို ပအိုဝ်ႏစွိုးခွိုꩻ ပအိုဝ်ႏလိုꩻမျိုꩻခမ်းရင်ꩻသားနဝ်ꩻ အုံအဝ်ႏလွေꩻဖြောဝ်ꩻခမ်းနယ်ႏခဝ်နဝ်၊ စောက်ꩻခမ်းနယ်ႏ၊ စောက်ꩻတနျာႏခမ်းနယ်ႏ၊ မဲင်ꩻခမ်းနယ်ႏတောမ်ႏ ပဂိုꩻတွိုင်ႏဒေႏသတန်ကိုဖုံႏသွူ၊ နဝ်ꩻအကို ကထွာပအိုဝ်ႏနဲင်ႏငံႏရေꩻပါတီ ပအိုဝ်ႏစွိုးခွိုꩻအစွိုꩻချုက်(ပီအဲန်အိုပါတီ)တောမ်ႏ ခမ်းခြွောန်းဗူႏပအိုဝ်ႏစွိုးခွိုꩻအစွိုꩻချုက်(ပအမဖပါတီ)ယို အီႏနွို့ခေးပြဲင်ႏလွေꩻလို့နဲ့၊ နွို့ခေးလို့တဝ်းနဲ့နဝ်ꩻ အထျꩻအဝ်ႏလွေꩻဒျာႏ ပအိုဝ်ႏနဲင်ႏငံႏရေꩻပါတီနီဗာႏ ဆုင်ꩻဖျတ်ချက်အလောင်းနဝ်ꩻသွူ။ နဝ်ꩻမꩻ မြန်မာခမ်းထီ ခင်ႏလမ်းစွောတ်ꩻစဲစ်ꩻကို ကအုံအဝ်ႏလွေꩻဒါႏ ပအိုဝ်ႏခမ်းသားသီးအတာႏ ပွိုင်းဝွို့တောမ်ႏ ၂၀၂၀-လွိုက်ရွေꩻပွယ်ꩻယိုတွော့ꩻ ပအိုဝ်ႏခမ်းသားတောမ်ႏ နဲင်ႏငံႏရေꩻအခွင်ꩻအရေꩻ ဖေႏကသုမ်ꩻခြေင်ထိုꩻဗာႏမွုန်းနဝ်ꩻ ကထွာပအိုဝ်ႏနဲင်ႏငံႏရေꩻပါတီနီဗာႏယို အဝ်ႏလိုႏဖန်ဆင်ꩻဖေႏနဝ်ꩻသွူ။ ယရပ်ရပ်နဝ်ꩻ ထွာဒျာႏပအိုဝ်ႏလိုꩻမျိုꩻလဲ့ မိဉ်သော့ꩻချာငါႏ ပအိုဝ်ႏနဲင်ႏငံႏရေꩻပါတီတာႏ ဆန္ဒမဲးငါတဲ့ သော့ꩻခရာႏ ပအိုဝ်ႏပါတီဖုံႏ တနွို့ခေးတဝ်း၊ တအဝ်ႏတဝ်းနဝ်ꩻသွူ။ တယ်ႏ ၂၀၁၅-မာꩻလွောန်ယိုနဝ်ꩻ ပအိုဝ်ႏနဲင်ႏငံႏရေꩻပါတီ အဝ်ႏလွောန်လဲန်းနီဗာႏလဲ့ မိဉ်ႏနွို့ခေးနုဲင်းနုဲင်းဝင်ꩻ ခင်ႏလမ်းကိုလဲ့ နွို့နုဲင်းနုဲင်း၊ ပအိုဝ်ႏပါတီဖုံႏ မိဉ်ႏတအဲန်ထဝ်း ခင်ႏလမ်းလဲ့ ပအိုဝ်ႏပါတီတဗာႏဗာႏငါတဲ့ နွို့ခေးတဝ်း၊ ဥပမာႏ- ၂၀၁၅-ခိန်ႏ ညောင်ႏရွီႏဝေင်ꩻနယ်ႏ၊ ရောက်ꩻစောက်ꩻဝေင်ꩻနယ်ႏ၊ လွယ်လဲမ်ဝေင်ꩻနယ်ႏ၊ နမ့်စန်ဝေင်ꩻနယ်ႏဖုံႏနဝ်ꩻသွူ။ ပအိုဝ်ႏလိုꩻမျိုꩻကို နဲင်ႏငံႏရေꩻပါတီ အဝ်ႏလွောန်နီသိုမ်ဗာႏယို ယဟန်ႏသားနဝ်ꩻ ထီႏအဟဝ်ဖဲ့ꩻတဲ့ အဝ်ႏဒျာႏ၊ ယဟန်ႏသားနဝ်ꩻ ထီႏအဟဝ်တဝ်းဖဲ့ꩻတဲ့ အဝ်ႏဒျာႏနဝ်ꩻသွူ၊ ပါတီအဝ်ႏလွောန်နီဗာႏယို မိဉ်းထွားခမ်းသားအတာႏ၊ မိဉ်ႏယူႏခမ်းသားဖဲ့ꩻနဝ်ꩻ ဟဝ်သွူ၊ ပွိုးနုဲင်းမုဲင်ꩻနဲးတဲင် ခမ်းသားသီးအတာႏ လွိုက်ရွေꩻခရာႏအဝ်ႏလွောန်၊ ဒီမိုကရေသီနစ်အလꩻ ခမ်းသားသီးနမ်းခြောင်ꩻတင်ယို အယံမုဲင်ꩻရာꩻ လွိုက်ရွေꩻခွင်ꩻလꩻနဝ်ꩻသွူ။ မိဉ်းထွားယင်း ပအိုဝ်ႏနဲင်ႏငံႏရေꩻအတာႏ ခင်ႏလမ်းတဗာႏချင်ႏ ပါတီနီဗာႏ မိဉ်ႏနွို့နုဲင်းနုဲင်းဝင်ꩻ ခမ်းသားကဖေႏမဲးယို ပြုဲင်လီထိုꩻတဲင် ပအိုဝ်ႏနဲင်ႏငံႏရေꩻ အခွင်ꩻအရေꩻသုမ်ꩻထိုꩻအီဒါႏနဝ်ꩻသွူ၊ ကောပ်မဲးဖုံႏ လွေꩻပါတီတဗာႏတစိꩻစိꩻတဲင် ပအိုဝ်ႏပါတီနီဗာႏလုမ်း ထဲ့သုမ်ꩻအီနွောင်ꩻဒါႏနဝ်ꩻသွူ။ ပအိုဝ်ႏပါတီအဝ်ႏနီဗာႏယို မိဉ်းထွားတဝ်းတောမ်ႏအစွိုꩻမဲ့ဖြုံႏ၊ မိဉ်းထွားတဝ်းတောမ်ႏ နမ်းအကျိုꩻမဲ့ဖြုံႏ၊ မိဉ်းထွားတဝ်း တောမ်ႏအစွိုꩻအကျိုꩻမဲ့ဖြုံႏတွော့ꩻ မိဉ်းထွားဒျာႏ တောမ်ႏပအိုဝ်ႏတစွိုးခွိုꩻလုမ်းမဲ့ဖြုံႏ၊ မိဉ်းထွားဒျာႏတောမ်ႏ ပအိုဝ်ႏတစွိုးခွိုꩻလုမ်း နဲင်ႏငံႏရေꩻအကျိုꩻမဲ့ဖြုံႏနဝ်ꩻ ပအိုဝ်ႏလိုꩻမျိုꩻအတာႏ အကျိုꩻအဝ်ႏအီမွေးငါႏသွူ၊ ယိုကိုနဝ်ꩻ တောမ်ႏပအိုဝ်ႏတစွိုးခွိုꩻလုမ်း နဲင်ႏငံႏရေꩻမဟာဗျူဟာဖုံႏတဲ့ အီႏတဲက်ဆဲင်ႏနွောင်ꩻဝင်ꩻနဝ်ꩻသွူ။ နုဲင်းယိုခါ ဝေင်ꩻတဝေင်ꩻ၊ ခင်ႏလမ်းတထွောင်းယို ပီအဲန်အိုပါတီအနေႏ မိဉ်နွို့ခေးတဲ့ နွို့ခေးဒျာႏ၊ ပအမဖပါတီအနေႏ မိဉ်နွို့ခေးတဲ့ နွို့ခေးဒျာႏ၊ နဝ်ꩻနဝ်ꩻ ပါတီတဗာႏစီႏ လွောတ်တခြင်ခွင်ꩻ ရိုꩻနုဲင်းနဝ်ꩻလꩻလဲ့ မိဉ်းထွားတောမ်ႏ ပအိုဝ်ႏတစွိုးခွိုꩻလုမ်း အခေႏအနေႏနဝ်ꩻ လွောင်ႏဗူႏမုꩻအဲန်ထဝ်း၊ ပအိုဝ်ႏတစွိုးခွိုꩻလုမ်းနဲင်ႏငံႏရေꩻ မဟာဗျူဟာအဲန်ထဝ်းနဝ်ꩻသွူ၊ ပအိုဝ်ႏတစွိုးခွိုꩻလုမ်းနဲင်ႏငံႏရေꩻ ရေႏမိုးချက်ဖေႏကတွိုႏနဝ်ꩻ ပအိုဝ်ႏတစွိုးလုမ်းနဲင်ႏငံႏရေꩻ မဟာဗျူဟာယို လွေꩻသင်ꩻနုဲင်းမုဲင်ꩻ တဲမ်းထွို့ꩻထွူ ပအိုဝ်ႏကို ကရုဲင်ꩻတသွိုးဒါႏနဲင်ႏငံႏရေꩻအစွိုꩻအဗူႏတွိုင်ꩻ လွေꩻဗာႏပအိုဝ်ႏတစွိုးခွိုꩻလုမ်းနဲင်ႏငံႏရေꩻ မဟာဗျူဟာဆꩻလနုဲင်းနဝ်ꩻနဝ်ꩻ အဝ်ႏလိုႏငါႏသွူ။ ပအိုဝ်ႏလိုꩻမျိုꩻအတာႏ ပအိုဝ်ႏနဲင်ႏငံႏရေꩻ အစွိုꩻအဗူႏဖုံႏ၊ နဲင်ႏငံႏရေꩻပါတီဖုံႏယို မိဉ်းတလွေꩻနွောင်ꩻတဝ်း တောမ်ႏပအိုဝ်ႏတစွိုးခွိုꩻလုမ်း နဲင်ႏငံႏရေꩻမဟာဗျူဟာ တဗာႏချင်ႏဆꩻလနဝ်ꩻ ထွာဒျာႏလိန်ႏလဲန်အမ်ႏခြေင်ခြေင် ပအိုဝ်ႏခမ်းသားရိုꩻရိုꩻလုမ်ꩻနဝ်ꩻသွူ၊ ပအိုဝ်ႏကိုကအဝ်ႏ နဲင်ႏငံႏရေꩻအစွိုꩻဖုံႏ၊ နဲင်ႏငံႏရေꩻပါတီဖုံႏယို မိဉ်းပွိုင်းဝွို့လွောန်တောမ်ႏ ပအိုဝ်ႏစွိုးခွိုꩻနဲင်ႏငံႏရေꩻအတာႏနဝ်ꩻ တဗာႏတောမ်ႏတဗာႏယို ခြိꩻထူႏလူႏလုဲင်ႏသွူဝင်ꩻတွော့ꩻ ခုမ်မာꩻလွေꩻငီꩻဝင်ꩻ ပအိုဝ်ႏတစွိုးခွိုꩻလုမ်း နဲင်ႏငံႏရေꩻမဟာဗျူဟာတဗာႏချင်ႏဆꩻလနဝ်ꩻ အရေꩻတန်ငါႏသွူ။ မိဉ်းတမွေးတဝ်းနဝ်ꩻ ပီအဲန်အိုပါတီလဲ့ ကခြီခြောဝ်ဒါႏ ပအိုဝ်ႏစွိုးခွိုꩻအရေꩻယို ထွာဒျာႏခြီခြောဝ်ခြေင်လုမ်ꩻထာꩻနဝ်ꩻသွူ၊ ပအမဖပါတီ ကတဲမ်းထန်ႏဒါႏ ပအိုဝ်ႏစွိုးခွိုꩻအရေꩻဖုံႏယိုလဲ့ ထွာဒျာႏတဲမ်းခြေင်လုမ်ꩻထာꩻ လိတ်လာႏကိုနဝ်ꩻသွူ။ ပအိုဝ်ႏဒေႏသကို ကအီႏနွို့ခေးဒါႏ ပအိုဝ်ႏလွတ်တောႏအမတ်ဖုံႏလဲ့ လွိုက်ရွေꩻတဝ်း ပါတီတဗာႏစီႏ၊ လွိုက်ရွေꩻဒျာႏတောမ်ႏ ပအိုဝ်ႏတစွိုးခွိုꩻလုမ်းမ၊ လိုꩻဒါႏလိုꩻသေဖုံႏ၊ ဥပဒေႏပညာႏသားဖုံႏ၊ နဲင်ႏငံႏရေꩻထာꩻထီႏအဝ်ႏသားဖုံႏနဝ်ꩻမꩻ မိဉ်းထင်ႏလွတ်တောႏလဲ့ ထင်ႏအုံလင်ꩻ၊ သဲင်ꩻမာꩻချာဒေႏသပြွူႏဖြိုရေꩻလုမ်ꩻမွေးတဝ်း၊ တဲက်ဆဲင်ႏတောမ်ႏပအိုဝ်ႏလိုꩻမျိုꩻ၊ စွိုးခွိုꩻနဲင်ႏငံႏရေꩻယို လွတ်တောႏကို မာꩻတမုဲင်ꩻလꩻ၊ မာꩻနုဲင်းမုဲင်ꩻလꩻနဝ်ꩻ ထိုမ်ႏအနယ်ꩻမာꩻလွေꩻပါ ပအိုဝ်ႏလိုꩻမျိုꩻအတာႏ စွိုးခွိုꩻအခွင်ꩻအရေꩻဖုံႏ၊ ထူႏလွေꩻပါလိုꩻမျိုꩻနဲင်ႏငံႏရေꩻ အမျတ်ဖုံႏနုဲင်းနဝ်ꩻ လꩻအီနွောင်ꩻနဝ်ꩻသွူ။ ပအိုဝ်ႏကိုယို ကောပ်စွောန်ႏပအိုဝ်ႏတစွိုးခွိုꩻလုမ်းအွောန်ငါအဲန်ထဝ်းတဲင် ပအိုဝ်ႏလိုꩻမျိုꩻအတာႏ ပအိုဝ်ႏတစွိုးခွိုꩻလုမ်းနဲင်ႏငံႏရေꩻ ခံႏထူႏချက်ဖုံႏ၊ ပအိုဝ်ႏတစွိုးခွိုꩻလုမ်းနဲင်ႏငံႏရေꩻ ရေႏမိုးချက်ဖုံႏ အဲန်ထဝ်းဗာႏထွူ ပအိုဝ်ႏတစွိုးခွိုꩻလုမ်း နဲင်ႏငံႏရေꩻ မဟာဗျူဟာတဲ့ တအဝ်ႏနွောင်ꩻတဝ်းနဝ်ꩻသွူ၊ ကောပ်ပအိုဝ်ႏတစွိုးခွိုꩻလုမ်း နဲင်ႏငံႏရေꩻ မဟာဗျူဟာအဲန်ထဝ်းတဲင် ပအိုဝ်ႏနဲင်ႏငံႏရေꩻပါတီဖုံႏတဲ့တောမ်ႏ အနယ်ꩻယံယံ တခုမ်မာꩻနွောင်ꩻတဝ်း၊ ပအိုဝ်ႏလိုꩻမျိုꩻအတာႏ အနာႏဂတ် မျိုꩻသွုပ်တသာအွောန်ငါဖုံႏလဲ့ တလွူးထန်ႏနွောင်ꩻတဝ်းသွူ။ ပအိုဝ်ႏလိုꩻမျိုꩻယို ထာဝရမဲ့ꩻအဝ်ႏထွာလွေꩻဗာႏဒျာႏ ဝင်ꩻတောက်ꩻလေးရာႏနဝ်ꩻသွူ၊ ဝင်ꩻထွောန်ႏကျူႏတွိုင်ꩻတဲ့ ကျူႏဗာႏ၊ ဝင်ꩻထွောန်ႏဗျာႏတွိုင်ꩻတဲ့ဗျာႏဗာႏ ပအိုဝ်ႏလိုꩻမျိုꩻဖဝယို အီႏညဆွာꩻကတခွုန်းမုဲင်ꩻဟောင်းကရိုꩻနဝ်ꩻ။