ပုဂ္ဂိုလ်ႏလစ်ꩻမျိုꩻ

"ပုဂ္ဂလသုတ် (ပုဂ္ဂိုလ်ႏလစ်ꩻမျိုꩻ-လိုꩻလစ်ꩻစား)"

ဗွေႏဘုရာꩻရိုꩻ- "တကာႏခွန်တန်ကောသလ လောကကိုယို လိုꩻအဝ်ႏလစ်ꩻစား- ၁။ တမောတမ ပရာယနော - အဝ်ႏအခေ့ꩻလွဉ် - လွေꩻအခေ့ꩻ ၂။ တမောဇောတိ ပရာယနော - အဝ်ႏအခေ့ꩻလွဉ် - လွေꩻအလေ ၃။ ဇောတိတမ ပရာယနော - အဝ်ႏအလေလွဉ် - လွေꩻအခေ့ꩻ ၄။ ဇောတိဇောတိ ပရာယနော - အဝ်ႏအလေလွဉ် - လွေꩻအလေ ၁။ 'အဝ်ႏအခေ့ꩻလွဉ်-လွေꩻအခေ့ꩻ'ကရိုꩻနဝ်ꩻ အဝ်ႏဘွုံႏဘဝကုဲင် (ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ-အပါယ်ႏခမ်း)လွဉ်တဲင် တွိုႏသဲင်ꩻဘဝယိုနဝ်ꩻ ခြောဒုက္ခ၊ လွူးဗာႏနမ်း တွမ်ႏထာꩻမာꩻအညမ်းစား၊ အယပ်ꩻစား၊ ကွဉ်ကꩻဗာႏအညမ်းစား၊ အံႏအွꩻဗာႏအညမ်းစား၊ အင်္ဂါႏချို့ꩻယွင်ꩻ ယောင်ꩻဆင်ꩻတရေꩻတဝ်းနဝ်ꩻသွူ။ ၂။ 'အဝ်ႏအခေ့ꩻလွဉ်-လွေꩻအလေ'ကရိုꩻနဝ်ꩻ အဝ်ႏဘွုံႏဘဝကုဲင်လွဉ်တဲင် ခြောဒုက္ခတဲ့ယဝ်း၊ ဆယ်ꩻကပ်ရတနာႏသွံပါꩻ၊ ကားကတတ်နွိုင်ႏ မာꩻဒါႏန၊ မာꩻသီလ၊ မာꩻဘာႏဝနာႏတွော့ꩻ ဝွေꩻကတိန်ႏသီနဝ်ꩻ လွေꩻဗာႏဘွုံႏဘဝဟောဝ် (လိုꩻခမ်း၊ လူꩻခမ်း၊ ဗျဟ္မာႏခမ်း)နောဝ်ꩻသွူ။ ၃။ 'အဝ်ႏအလေလွဉ်-လွေꩻအခေ့ꩻ'ကရိုꩻနဝ်ꩻ အဝ်ႏဘွုံႏဘဝဟောဝ်ကိုလွဉ်တဲင် ခြွေခြာႏချမ်ꩻသာႏ၊ အုံဗာႏလမ်းဟောဝ်၊ ကွဉ်ကꩻဗာႏဟောဝ်၊ ကွဲႏတွော့ꩻ ဝွေꩻနဝ်ꩻ ဆယ်ꩻကပ်တဝ်း ရတနာႏသွံပါꩻ၊ မာꩻတဝ်းကုသိုလ်ႏ၊ လိုꩻဒျာႏထာꩻမွိုက်၊ ကျွိုက်ဒျာႏဒုစရဲက်တွော့ꩻ ဝွေꩻကတိန်ႏသီနဝ်ꩻ လွေꩻဗာႏဘွုံႏဘဝကုဲင်(ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ-အပါယ်ႏလစ်ꩻခမ်း)သူꩻသွူ။ ၄။ 'အဝ်ႏအလေလွဉ်-လွေꩻအလေ'ကရိုꩻနဝ်ꩻ အဝ်ႏဘွုံႏဘဝဟောဝ်ကိုလွဉ်တဲင် ခြွေခြာႏချမ်ꩻသာႏ၊ အုံဗာႏလမ်းဟောဝ်၊ ကွဉ်ကꩻဗာႏဟောဝ်၊ အံႏဗာႏဟဝ်၊ အင်္ဂါႏဗွေညီꩻ သွီႏယာႏဟဝ်ယောင်ꩻရေꩻ၊ မာꩻဗာႏဒျာႏထာꩻမာꩻအပဲစ်ကင်ꩻကင်ꩻစား၊ မာꩻဗာႏဒျာႏ ထာꩻမာꩻအရန်းထိုထိုစားတွော့ꩻ ယိန်းခြွေခြာႏ၊ ယိန်းချမ်ꩻသာႏနဝ်ꩻသွူ။ ဝွေꩻနဝ်ꩻ ခြွေခြွေခြာႏ၊ စေႏတနာႏတဲ့ဟဝ်၊ မာꩻမွေးဒါႏနကုသိုလ်ႏ၊ သီႏလကုသိုလ်ႏ၊ ဘာႏဝနာႏကုသိုလ်ႏနဝ်ꩻမꩻ ခန္ဓာႏကုဲင်လီ ထွိုင်ႏသီသူꩻနဝ်ꩻ တွိုႏလွေꩻဗာႏ ဘွုံႏဘဝဟောဝ်နောဝ်ꩻသွူ။

ပုဂ္ဂိုလ်ႏလစ်ꩻမျိုꩻ-လိုꩻလစ်ꩻစား ငေါဝ်းလင်္ကာႏ (ပအိုဝ်ႏ+မန်း) ၁။ စိုးရီးကုဲင်ငါႏ ၊ ယိုကုဲင်ဒျာႏ ၊ လွေꩻဗာႏ ဘွုံႏကုဲင်ခြာ ။ ၂။ စိုးရီးကုဲင်ငါႏ ၊ ယိုဟောဝ်ဒျာႏ ၊ လွေꩻဗာႏ ဘွုံႏဟောဝ်ခြာ ။ ၃။ စိုးရီးဟောဝ်ဒျာႏ ၊ ယိုကုဲင်ငါႏ ၊ လွေꩻဗာႏ ဘွုံႏကုဲင်ခြာ ။ ၄။ စိုးရီးဟောဝ်ဒျာႏ ၊ ယိုဟောဝ်ငါႏ ၊ လွေꩻဗာႏ ဘွုံႏဟောဝ်ခြာ ။ ၁။ ရှေးကဆိုးလာ ၊ ခုဆိုးဒါ ၊ ဆိုးရာ သွားရမယ် ။ ၂။ ရှေးကဆိုးလာ ၊ ခုကောင်းဒါ ၊ ကောင်းရာ သွားရမယ် ။ ၃။ ရှေးကကောင်းလာ ၊ ခုဆိုးဒါ ၊ ဆိုးရာ သွားရမယ် ။ ၄။ ရှေးကကောင်းလာ ၊ ခုကောင်းဒါ ၊ ကောင်းရာ သွားရမယ်။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ပုဂ္ဂလသုတ်)

"အပ္ပဿုတသုတ် (ပုဂ္ဂိုလ်ႏလစ်ꩻမျိုꩻ လိုꩻလစ်ꩻစား)" ရဟန်ꩻသီးဖုံႏဟွေး- လောကကိုယိုနဝ်ꩻ ပုဂ္ဂိုလ်ႏအဝ်ႏလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ အပ္ပဿုတော သုတေန အနုပပန္နော- တရာꩻတဲ့ နာႏဗာႏဆေ့ꩻ၊ သေဆေ့ꩻ၊ ကျင်ꩻလွဉ်ꩻတဝ်း။ ၂။ အပ္ပဿုတော သုတေန ဥပပန္နော- တရာꩻနဝ်ꩻ နာႏဗာႏဆေ့ꩻ၊ သေဆေ့ꩻတဲ့ ကျင်ꩻလွဉ်ꩻ။ ၃။ ဗဟုဿုတော သုတေန အနုပပန္နော- တရာꩻနဝ်ꩻ နာႏဗာႏအာ၊ သေအာဒျာႏ၊ ကွဲႏတွော့ꩻကျင်ꩻလွဉ်ꩻတောဝ်း။ ၄။ ဗဟုဿုတော သုတေန ဥပပန္နော- တရာꩻတဲ့ နာႏဗာႏအာ၊ သေတဲ့သေအာ၊ ကျင်ꩻတဲ့ကျင်ꩻလွဉ်ꩻ။ ပုဂ္ဂိုလ်ႏအောဝ်ႏလစ်ꩻမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- လောကကိုယို လိုꩻယင်ဟန်ႏနဝ်ꩻ ဗွေႏဘုရာꩻကဟော်ꩻဒါႏ သွံဘွုံႏပိဋကတ် တရာꩻမျတ်ဖုံႏနဝ်ꩻ နာႏဗာႏဆေ့ꩻပေႏ၊ သေနာႏဆေ့ꩻပေႏလွုမ်ꩻ၊ ထွုင်းစင်ကနာႏဗာႏဆေ့ꩻ၊ ကသေဆေ့ꩻတဲ့ ဖေႏကလꩻမဂ်ဖိုလ်ႏနိဗ္ဗာန်ႏနဝ်ꩻ သမ်းတကျံႏတဝ်း၊ တကျိုꩻစာꩻတဝ်း၊ ကျင်ꩻလွဉ်ꩻတဝ်း၊ လွောက်ꩻနာႏလွဉ်ꩻတောဝ်း။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ သွံဘွုံႏပိဋကတ် တရာꩻမျတ်နဝ်ꩻတဲး နာႏဗာႏဆေ့ꩻပေႏလွုမ်ꩻ၊ သေနာႏဆေ့ꩻပေႏလွုမ်ꩻ၊ ကွဲႏတွော့ꩻ ဖေႏကလꩻမဂ်ဖိုလ်ႏနိဗ္ဗာန်ႏနဝ်ꩻ အဝ်ႏကျံႏ၊ အဝ်ႏကျိုꩻစာꩻ၊ ကျင်ꩻလွဉ်ꩻ၊ လွောက်ꩻနာႏလွဉ်ꩻဒျာႏ။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ သွံဘွုံႏပိဋကတ် တရာꩻမျတ်နဝ်ꩻ အာႏဗာႏအာတန်၊ သေနာႏအာတန်ဒျာႏ၊ ကွဲႏတွော့ꩻ ဖေႏကလꩻမဂ်ဖိုလ်ႏနိဗ္ဗာန်ႏနဝ်ꩻ သမ်းတကျံႏတဝ်း၊ တကျိုꩻစာꩻတဝ်း၊ ကျင်ꩻလွဉ်ꩻတဝ်း၊ လွောက်ꩻနာႏလွဉ်ꩻတဝ်း။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ သွံဘွုံႏပိဋကတ် တရာꩻမျတ်နဝ်ꩻတဲ့ နာႏဗာႏအာတန်၊ သေတဲ့သေနာႏအာတန်၊ ယံဖေႏကလꩻ မဂ်ဖိုလ်ႏနိဗ္ဗာန်ႏနဝ်ꩻတဲ့ အဝ်ႏကျံႏဒျာႏ၊ အဝ်ႏကျိုꩻစာꩻဒျာႏ၊ အဝ်ႏလွောက်ꩻနာႏလွဉ်ꩻဒျာႏနဝ်ꩻသွူ။ ရဟန်ꩻသီးဖုံႏဟွေး- သီႏလတဲ့အဲဉ်ထဝ်း၊ တရာꩻဗဟုသုတတဲ့ အဲဉ်ထဝ်းနဝ်ꩻ ခံႏဗာႏဝင်ꩻသဲ့ꩻသွမ်ꩻနီမျိုꩻ၊ တရာꩻဗဟုသုတ အဲဉ်ထဝ်းတဲ့ယဝ်း ပေါႏသီႏလအဝ်ႏနဝ်ꩻ ဝင်ꩻတကဲ့ꩻရဲ့ꩻတဝ်း၊ တရာꩻဗဟုသုတ အဝ်ႏခန်းတဲ့ယဝ်း ပေါႏသီႏလတအဲဉ်ထဝ်းနဝ်ꩻ ဝင်ꩻအဝ်ႏကဲ့ꩻရဲ့ꩻ သဲ့ꩻသွမ်ꩻဒျာႏ၊ 'တရာꩻဗဟုသုတတဲ့အဝ်ႏ၊ ကျင်ꩻတဲ့ကျင်ꩻလွဉ်ꩻ၊ သီႏလတဲ့အဝ်ႏမွိုင်ဟ တသီးသွနုဲင်းခံꩻတူႏ၊ ခိုမူႏလွုမ်ꩻမကာႏ၊ လူꩻဗျဟ္မာႏသီးတဲ့ အံႏဖြာႏဗာႏစွဉ်ႏ'နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ အပ္ပဿုတသုတ်)