ပေါင်ꩻကွိုက်ꩻဗာႏ

ပေါင်ꩻကွိုက်ꩻဗာႏ ပညာႏအောဝ်ႏသား

နီဗွေႏဘုရာꩻ ကဟော်ꩻခါꩻဒါႏ တရာꩻမင်္ဂလာႏနောဝ်ꩻ ပါဠိဂါႏထာႏပေါင်ꩻ အောဝ်ႏ(၁၀)ဂါႏထာႏသွူ။ တဂါႏထာႏနောဝ်ꩻ မင်္ဂလာႏတရာꩻ (၃)ပါꩻအောဝ်ႏ၊ (၄)ပါꩻအောဝ်ႏ၊ (၅)ပါꩻအောဝ်ႏသွူ။ မင်္ဂလာႏတရာꩻ ဂါႏထာႏ(၁၀)အကို ပထမဂါႏထာႏနောဝ်ꩻ နုဲင်းလယိုအတွိုင်ꩻသွူ။ - အသေဝနာ စ ဗာလာနံ၊ ပဏ္ဍိတာနဉ္စ သေဝနာ။ ပူဇာ စ ပူဇနေယျာနံ၊ ဧတံ မင်္ဂလ မုတ္တမံ။

ပထမဂါႏထာႏ မင်္ဂလာႏတရာꩻ (၃)ပါꩻ

၁။ လိုꩻမွိုက်သီးယို မာꩻသွꩻပေါင်ꩻကွိုက်ꩻဗာႏတောဝ်း။ ၂။ မာꩻသွꩻပေါင်ꩻကွိုက်ꩻဗာႏ ပညာႏအောဝ်ႏ သူႏတောႏကောင်ꩻသီး။ ၃။ ပူႏဇောႏထွိုက်ဒါႏ ပုဂ္ဂိုလ်ႏသီးယို ပူႏဇောႏဗာႏ။ မင်္ဂလာႏတရာꩻ ယို(၃)ပါꩻအကို အမုဲင်(၂)မင်္ဂလာႏတရာꩻနောဝ်ꩻ "မာꩻသွꩻပေါင်ꩻကွိုက်ꩻဗာႏ ပညာႏအောဝ်ႏ သူႏတောႏကောင်ꩻနောဝ်ꩻ ထွာမင်္ဂလာႏ၊ မာꩻသွꩻပေါင်ꩻကွိုက်ꩻတောဝ်း သူႏတောႏကောင်ꩻတွော့ꩻ မဉ်ႏမာꩻသွꩻ ပေါင်ꩻကွိုက်ꩻဒျာႏလိုꩻမွိုက်နောဝ်ꩻ မင်္ဂလာႏတရာꩻကုဲင်သွူ။ ကွပ်နောဝ်ꩻမꩻ မာꩻသွꩻပေါင်ꩻကွိုက်ꩻ သူႏတောႏကောင်ꩻတဲင် မင်္ဂလာႏအောဝ်ႏ၊ လꩻဗာႏချံꩻသာႏအကျောင်ꩻယို ဖေႏကသေ ဖေႏကစဲင်းနောဝ်ꩻ အီႏတဲမ်းနယ်လွေꩻဖေႏ ဝတ္ထုသက်သေႏ "တိကနိပါတ်၊ ဝဍ္ဎကီသူကရဇာတ်"နုဲင်းငါယိုအတွိုင်ꩻသွူ။

ဝဍ္ဎကီသူကရဇာတ်ဝတ္ထု

ပွိုင်းလဲင်ႏစခါ ဗာႏရာႏဏသီႏခမ်းကိုနောဝ်ꩻ တွမ်ႏတပဲ့ꩻငတ်ꩻရျာꩻတွော့ꩻ ကအောဝ်ႏမာꩻဖေႏဒါႏဝင်ꩻလမ်းပါႏ ဝဍ္ဎကီအမဉ်ꩻကအောဝ်ႏဒါႏ ကွိုꩻစူသား (လက်သမား)ဆရာႏတန် အောဝ်ႏတဖြာꩻသွူ။ ဗွေႏဘုရာꩻလောင်ႏနောဝ်ꩻ အောဝ်ႏထွာထော့ꩻ ကွိုꩻစူသား ဆရာႏတန်လမ်းကိုနောဝ်ꩻသွူ။ ထော့ꩻယိုနဝ်ꩻ ဖန်ဖေႏအမဉ်ꩻ "ဝဍ္ဎကီသူကရ"နုဲင်းနောဝ်ꩻသွူ။ ကွိုꩻစူသားဆရာႏနောဝ်ꩻ လွူးဟောဝ်လွူးအွီႏဒျာႏ ဝဍ္ဎကီသူကရဘုရာꩻလောင်ꩻထော့ꩻနောဝ်ꩻသွူ။ ဝဍ္ဎကီသူကရ ထွိုင်ႏတန်ဖြိုနောဝ်ꩻ ကွိုꩻစူသားဆရာႏတန်နောဝ်ꩻ "ဝဍ္ဎကီသူကရဟွေး- အောဝ်ႏလိုꩻဒုံ အုံလိုꩻရပ်နောဝ်ꩻ ဘေꩻရန်ႏအန္တရာယ်ႏအာငါႏ၊ ထန်ႏလွေꩻတခြာကိုတွော့ꩻ လွေꩻထုမ်ႏဒျာႏသွော့နာꩻသွꩻ၊ လွေꩻအုံဒျာႏသွော့ တခြာတန်ကိုနေား"ဒေါ့ꩻဖေႏခန်းနုဲင်းနောဝ်ꩻသွူ။

လိုꩻမွိုက်ဆရာႏတပဲ့ꩻ

ဝဍ္ဎကီသူကရ ဘုရာꩻလောင်ꩻထော့ꩻနောဝ်ꩻ ကွိုꩻစူသားဆရာႏတန် ငေါဝ်းထွဉ်ႏအတွိုင်ꩻ ထန်ႏလွေꩻသွူတခြာတန်ကိုတွော့ꩻ လွေꩻထုမ်ႏခန်းဒျာႏ သွꩻထော့ꩻမီꩻဖုံႏနောဝ်ꩻသွူ။ တွိုႏတထွောင်း လွေꩻမော့ꩻခန်း ထော့ꩻမိꩻဖုံႏတန် တဖုံႏသွူ။ ထွိုင်ႏမော့ꩻထော့ꩻမီꩻဖုံႏနောဝ်ꩻ- "သွꩻသီးဟွေး- သွꩻသီးအုံယိုကိုနောဝ်ꩻ ချံꩻချံꩻသာႏသာႏ အုံဗာႏနေဟောင်း၊ အန္တရာယ်ႏရန်ႏစင်ꩻ လွစ်ကင်ꩻနေဟောင်း"ရီခန်းနုဲင်းနောဝ်ꩻသွူ။ တွိုႏနောဝ်ꩻတွော့ꩻ ထော့ꩻမီꩻကဲႏနောဝ်ꩻ- "သွꩻဟွေး- အုံယိုကိုနောဝ်ꩻ ခင်ႏလမ်းလဲ့သာႏယာႏ၊ ထီလဲ့လွိုင်ႏဒျာႏ၊ အံႏခရာႏ သေင်ႏဒီႏသေင်ႏရာႏဖုံႏလဲ့ လွိုင်ႏအာဒျာႏသွူ။ ကွဲတွော့ꩻ နန်းခရာႏ ငမ်းခရာႏ အောဝ်ႏတမျိုꩻ၊ စရဲက်ကျမ်ꩻထံꩻ ထာꩻသညင်ꩻဆေ့ꩻခြော ကေထီးတန်တဗာႏနောဝ်ꩻ အုံနောင်အာႏကွိုꩻ ရသေ့ꩻမွိုက်တပါꩻတဲင် အောဝ်ႏလွဉ်အဲင်ႏနီထော့ꩻ တနီꩻတဗာႏတွော့ꩻ နီထော့ꩻယိုနောဝ်ꩻ အုံထာꩻသꩻတချံꩻသာႏတောဝ်းသွူ။ အနီꩻမုဲင်ꩻ အီႏလွဉ်အဲင်ႏထော့ꩻအဗာႏမုဲင်ꩻကရိုꩻနောဝ်ꩻ အောဝ်ႏခိုးလျား အောဝ်ႏနန်းခီဗာႏသွူ"ဒေါ့ꩻချာခန်းနုဲင်းနောဝ်ꩻ။

ဆရာႏဟောဝ်တွမ်ႏ တပဲ့ꩻဟောဝ်

တွိုႏနောဝ်ꩻတွော့ꩻ ဘုရာꩻလောင်ꩻထော့ꩻနောဝ်ꩻ- "သွꩻဖုံႏဟွေး- နန်းမွော့ ခိုးလျားမွော့၊ နာႏနာႏခွေငေါဝ်းနော၊ နေးတွမ်ႏ ခွေထာꩻဒါႏပညာႏတဲင် ထော့ꩻကားကအောဝ်ႏ ဖေႏကလွစ်လို့ ကေဘေꩻရန်ႏနောဝ်ꩻ မဲ့ꩻခွေဝွေႏဖန်ႏဒျာႏသွူ"ဒေါ့ꩻဖေႏခန်း ထော့ꩻမီꩻဖုံႏနုဲင်းနောဝ်ꩻ၊ ထော့ꩻမီꩻဖုံႏတဲ့ လွဉ်စုလို့ထွူ ဘုရာꩻလောင်ꩻထျꩻတွော့ꩻ "ဖေႏကလွစ်ꩻ ကေဘေꩻရန်ႏနောဝ်ꩻ ရဲကာႏကွယ်ႏဖေႏသွော့အကျောင်ꩻ"တောင်ꩻပြန်ႏလွခန်း ဘုရာꩻလောင်ꩻသွူ။ ဘုရာꩻလောင်ꩻလဲ့ အီႏရဲဖေႏဒျာႏအကျောင်ꩻ ဝွန်ႏခံႏလွေꩻခန်းသွူ။ ဘုရာꩻလောင်ꩻနောဝ်ꩻ ဟဲ့ꩻလွဉ်စုလို့သွူ ထော့ꩻဖုံႏတွော့ꩻ ထော့ꩻပေႏဖုံႏနောဝ်ꩻ အွဉ်ႏအုံစုအကဲဉ်၊ ထော့ꩻပေႏမွိုးဖုံႏနောဝ်ꩻ အွဉ်ႏအုံဝဲင်ꩻလွဉ်ꩻထော့ꩻပေႏ၊ ထော့ꩻမွူးအသောင်ဖဲ့ꩻနောဝ်ꩻ ထော့ꩻဖြားဖုံႏအုံဝဲင်ꩻ၊ ထော့ꩻဖြားအထန်ႏဖဲ့ꩻနောဝ်ꩻ ထော့ꩻထီးတလောင်ꩻ စွယ်ႏစဒေါ့ꩻဖုံႏ အုံဝဲင်ꩻ၊ ထော့ꩻတအလောင်ꩻအထန်ႏနောဝ်ꩻ ထော့ꩻထီးရွယ်ႏမဲဉ်ႏဖုံႏ အုံဝဲင်ꩻ၊ နောဝ်ꩻထွူနောဝ်ꩻ ထော့ꩻဘုရာꩻလောင်ꩻ အုံရဲခါꩻသွူ။ ဘုရာꩻလောင်ꩻဆꩻငါနောဝ်ꩻ ခူႏခါꩻခန်း ထာꩻအောင်တလောင်ꩻတဖြုံႏ၊ ထာꩻအောင်တလောင်ꩻဆꩻငါနောဝ်ꩻ ခူႏခါꩻထာꩻအောင်တန် တဖြုံႏထွူတဲင်- "သွꩻဖုံႏဟွေး- ကေသꩻကဲင်ႏ မဉ်ႏဖျော်နောဝ်ꩻ အမာꩻနုဲင်းမုဲင်ꩻမုဲင်ꩻလဲ့ မာꩻနုဲင်းသွော့နော"ဖေႏထွူအချက်နုဲင်းနောဝ်ꩻတွော့ꩻ အုံပွေါးထွားဆွုမ်ႏလွခန်း ကေလွဉ်နောဝ်ꩻသွူ။ ကေသꩻကဲင်ႏနောဝ်ꩻ ပေါႏမွူးထန်ႏထိုပသာႏလဲ့ သေနာႏဟို့ꩻတခြင်တဲင် အောဝ်ႏဗေင်ႏထာꩻရသေ့ꩻကျောင်ꩻကို ထွိုင်ႏမွစ်ꩻသွူအနမ်းတွော့ꩻ မာꩻအငေါဝ်းသွံလဲင်ႏ၊ ပကျောက်ꩻချာငါသွူထာꩻတွော့ꩻ "လွေꩻတရွစ်ꩻသဲင်ꩻကထော့ꩻ တဗာႏငါမꩻ"သꩻယူႏနုဲင်းနောဝ်ꩻတွော့ꩻ ထန်ႏလွေꩻထေ့ခန်း ထော့ꩻဖုံႏနောဝ်ꩻသွူ။ တွိုႏထော့ꩻကအောဝ်ႏဖုံႏထာꩻ မဗော့ꩻမညာꩻအရပ်ကို ထော့ꩻဖုံႏထွိုင်ႏထီႏကေလွဉ်နောဝ်ꩻ ဘုရာꩻလောင်ꩻထော့ꩻ ကထွဉ်ႏသေꩻခါꩻဒါႏအတွိုင်ꩻ အခင်ႏလမ်းတွမ်ႏအခင်ႏလမ်း အုံစုအောဝ်ႏခါꩻလဲဉ်းနောဝ်ꩻသွူ။ ကေထွိုင်ႏထီႏ ထော့ꩻအုံဖုံႏဆန်ꩻလွဝင်ꩻနောဝ်ꩻ "ထော့ꩻဟန်ႏနီꩻမွော့ ဗွိုန်တောဝ်းကလဲဉ်းချာ၊ အုံစုမွေးစွဉ်ႏလို့ဝင်ꩻနဲ"သꩻကို ယူႏနုဲင်းနောဝ်ꩻတွော့ꩻ အဲ့ꩻမဲ့ထွားစဲင်းလွေꩻခန်းနောဝ်ꩻသွူ။ ထော့ꩻဖုံႏလဲ့ အဲ့ꩻနုဲင်းနုဲင်းမဲ့ ထွားစဲင်းနုဲင်းနုဲင်းခန်း ကေနောဝ်ꩻသွူ။ နောဝ်ꩻထွူနောဝ်ꩻ ကေထွားတခေင်ႏဖဲ့ꩻထွေလဲ့ ထော့ꩻထွားနုဲင်းနုဲင်း၊ ထွားတခေင်ႏဖဲ့ꩻစေႏလဲ့ ထော့ꩻထွားနုဲင်း၊ ကေဆွတ်ချာ တကာလဲ့ ထော့ꩻဆွတ်နုဲင်း၊ ကေလွေꩻငါတကာလဲ့ ထော့ꩻလွေꩻနုဲင်း၊ ကေဆီႏထာꩻလဲ့ ထော့ꩻဆီႏနုဲင်းနုဲင်းနောဝ်ꩻသွူ။

ရသေ့ꩻဆရာႏ မျောက်ဖေႏအာႏ

ကေနောဝ်ꩻ မာꩻထာꩻမုဲင်ꩻလဲ့ ထွိုင်ႏထီႏထော့ꩻမာꩻနုဲင်းနောဝ်ꩻ "ထော့ꩻဟန်ႏနီꩻမွော့ ထူꩻဆန်ꩻငါႏနဲး၊ ဗွိုန်တောဝ်းပွိုင်းနီꩻတန်နဲး၊ ထာꩻအာႏကွိုꩻသꩻဆွော့ꩻဆရာႏ ဆရာႏဟောဝ် အောဝ်ႏလဲဉ်းဟောင်း၊ မဲ့ꩻခြေင်ႏချာ ထောင်းသီဒါႏခွေဟောင်း၊ ရိုꩻရိုꩻတောဝ်းလဲ့ တစွိုးစွိုးလဲဉ်းဒျာႏရင်ꩻ၊ ဖင်းခန်းမꩻကယို"သꩻကိုယူႏနုဲင်းနောဝ်ꩻတွော့ꩻ ဆွတ်ချာဖင်းသဲင်ꩻထိုꩻခန်းဒျာႏနောဝ်ꩻသွူ။ ထွိုင်ႏသဲင်ꩻတွိုႏ ရသေ့ꩻကျောင်ꩻထျꩻနောဝ်ꩻ ကအုံပွေါးအံႏရုမ်းဒါႏ ကေဆာႏ ရေသ့ꩻကျင်ꩻကုဲင်နောဝ်ꩻ ထီႏဆွုမ်ႏခန်း ကေဖင်းသဲင်ꩻထာꩻတဲင် ရီဆွုမ်ႏခန်း အခရာႏသွူ။ ကေထွိုင်ႏခြုဲင်းနယ်အခရာႏနောဝ်ꩻ ရသေ့ꩻကျင်ꩻကုဲင်လဲ့ နုဲင်းစွဉ်ႏအရေꩻတတန်တောဝ်းစား၊ ငဖါးသွူထာꩻဟားဟားတွော့ꩻ "ကေဟွေး- နာꩻဗားနဲ့၊ တခြာကိုယို အာႏရဲင်ꩻတလာနုဲင်းနာꩻ တမုဲင်ꩻအောဝ်ႏဟောင်း၊ ငမ်းခရာႏတမုဲင်ꩻအောဝ်ႏ၊ နုဲင်းလေႏကြွို့ꩻထော့ꩻနောဝ်ꩻ လွေꩻခွိုန်ꩻယင်းဟုဲင်း၊ လွေꩻတရွစ်ꩻသဲင်ꩻ တလောင်ꩻလောင်ꩻနောဝ်ꩻ တဗာႏငါဟုဲင်း"မျောက်ပင်ႏဖေႏအာႏခန်းကေ နုဲင်းနောဝ်ꩻသွူ။

လိုꩻမွိုက်သီး တဖူꩻလွေꩻ

ကေသꩻကဲင်ႏနောဝ်ꩻ ဆရာႏရသေ့ꩻ ဖေႏအာႏအတွိုင်ꩻ ဖင်းလွေꩻချာထွူတွော့ꩻ သဲစ်ကတွိုႏဘုရာꩻလောင်ꩻဆꩻငါလဲ့ တဝဲဉ်နွို့ရုပ်စွဉ်ႏနောဝ်ꩻသွူ။ ကွဲတွော့ꩻ ဘုရာꩻလောင်ꩻနောဝ်ꩻ ကစီႏစဲဉ်ႏခြပ်ရဲဉ်ႏသေꩻခါꩻအတွိုင်ꩻ နဲစ်တဝဲဉ်သော့ꩻအွဉ်ခန်းဒျာႏ ထာꩻအောင်အဖြုံႏလုဲင်းနောဝ်ꩻသွူ။ ကေသꩻကဲင်ႏနောဝ်ꩻ အာႏလွဉ်ꩻငါထွူတွော့ꩻ စူဖဲ့ꩻငါနီပင်နောဝ်ꩻ အောဝ်ႏခံဆုံးတချသော့ꩻခန်းဒျာႏ ထာꩻအောင်အဖြုံႏအအဲဉ်ႏနောဝ်ꩻသွူ။ အခိန်ႏယိုတွင်ꩻ ဘုရာꩻလောင်ꩻထော့ꩻလဲ့ တအွဉ်ႏလွစ်တောဝ်း အခွင်ꩻအရေꩻတွော့ꩻ အောဝ်ႏထာꩻအောင်ကို နဲစ်တဝဲဉ်ထန်ႏထွူတဲင် တွမ်ႏအစွဲႏထောင်းသော့ꩻ ဝွေါက်ꩻသော့ꩻခန်းဒျာႏ ကေငွဉ်ꩻနောဝ်ꩻသွူ။ ယိုအတွင်ꩻ ထော့ꩻထီးလင်ဖုံႏလဲ့ ခွေလောႏနာꩻလောႏ၊ လောႏဝွေါက်ꩻရောင်ခန်းဒျာႏ ကေနောဝ်ꩻသွူ။ ထွူနောဝ်ꩻ ထော့ꩻကားကအောဝ်ႏ အွဉ်လွဝင်ꩻ ဝွေါက်ꩻအံႏငင်ႏလွစွဉ်ႏ ကေယာႏနောဝ်ꩻသွူ။ အံႏကေယာႏထွိုင်ႏထွူနောဝ်ꩻ ထော့ꩻထီးဖုံႏကားကအောဝ်ႏ နက်သဲင်ꩻထေ့ခန်းဒျာႏ ကေဆရာႏ ရသေ့ꩻကျင်ꩻဝါထျꩻနောဝ်ꩻသွူ။ ကေတဖျော်သဲင်ꩻတောဝ်းတွော့ꩻ ထော့ꩻဖုံႏဖျော်သဲင်ꩻပြုံႏပြင်ႏထာꩻယို ရသေ့ꩻထွိုင်ႏထီႏဆွုမ်ႏနောဝ်ꩻ သꩻဝꩻထွူတဲင် နဲစ်ဖင်းထင်ႏခန်းဗော့ꩻရာꩻ ကအောဝ်ႏဒါႏ ဖက်ꩻဒွိုႏမွူးနောဝ်ꩻသွူ။ ထော့ꩻထီးဖုံႏလဲ့ တွမ်ႏအစွယ်ႏထောင်းလွဉ်ꩻလွ ဖက်ꩻဒွိုႏမွူးတဲင် ဖက်ꩻဒွိုႏမွူးလဲ့ ဝꩻလင်ꩻအောဝ်ႏပြာႏ ရသေ့ꩻဟွေးလဲ့ သီဝါခန်းဒျာႏနောဝ်ꩻသွူ။

သွဉ်ꩻအဘိသိက် ဒင်ႏမျောက်အတန်

နောဝ်ꩻထွူတွော့ꩻ ကအောဝ်ႏကုဲင်ဒါႏ ထော့ꩻဖုံႏနောဝ်ꩻ ကကယ်ႏဒါႏဝွေꩻသီး ဘုရာꩻလောင်ꩻထော့ꩻထီးယို အွဉ်ႏအုံဒင်ႏ ဖက်ꩻဒွိုႏခြုံးတဲင် ထူႏတွမ်ႏရသေ့ꩻ ခရုသင်းငွီႏခြုံနောဝ်ꩻတွော့ꩻ ဒင်ႏမျောက်လွေꩻခန်းဒျာႏ ထော့ꩻခွန်ဟော်ခံꩻအရာႏနောဝ်ꩻသွူ။ တယ်ႏနောဝ်ꩻမာꩻငါ ဗꩻတွိုႏယိုခါ လိုꩻသီးတဲ့ ထွားနုဲင်းတွော့ꩻ ပေါင်ႏဒင်ႏမျောက်ခမ်းထီ ခွန်ဟော်ခံꩻနောဝ်ꩻ နေးတွမ်ႏခရုသင်းငွီႏခြုံ သွဉ်ꩻလွေꩻအဘိသိက်တွော့ꩻ ဒင်ႏမျောက်လွေꩻနုဲင်းယိုအတွိုင်ꩻနောဝ်ꩻသွူ။ ဇာတ်ဝတ္ထုနောဝ်ꩻ ထွူသွတ်ꩻလွေꩻလဲဉ်း တခွိုင်းယိုသွူ။

ဥပဒေသ

ဝတ္ထုယိုအကို ထော့ꩻဖုံႏနောဝ်ꩻ "ပဏ္ဍိတာနဉ္စ သေဝနာ"မင်္ဂလာႏတရာꩻအလꩻ မာꩻသွꩻပေါင်ꩻကွိုက်ꩻဗာႏ ဘုရာꩻလောင်ꩻထော့ꩻ ပညာႏအောဝ်ႏတဲင် လွစ်ကင်ꩻလွေꩻဗာႏ ကေအန္တရာယ်ႏသွူ။ ကေနောဝ်ꩻ တလိုႏပေါင်ꩻကွိုက်ꩻတောဝ်း ရသေ့ꩻမွိုက်ယို ဝွေꩻပေါင်ꩻကွိုက်ꩻတဲင် ထွာထိုꩻထော့ꩻဆာႏ သက်ဒွေါင်ႏဗာႏနောဝ်ꩻသွူ။ ကွပ်နောဝ်ꩻမꩻ လိုꩻသီးလဲ့ လိုႏပေါင်ꩻကွိုက်တောဝ်းလိုꩻမွိုက်၊ လိုႏပေါင်ꩻကွိုက်ꩻဒျာႏ ပညာႏအောဝ်ႏ သူႏတောႏကောင်ꩻသီးသွူ။ မဉ်ႏပေါင်ꩻကွိုက်ꩻပညာႏအောဝ်ႏ သူႏတောႏကောင်ꩻသီးနောဝ်ꩻ "ပဏ္ဍိတာနဉ္စ သေဝနာ"မင်္ဂလာႏသွူ။