ဗိဠာရပဒကသဌေꩻ
"ဗိဠာရပဒကသဌေꩻဝတ္ထု" လိုꩻလစ်ꩻမျိုꩻ (၁) လိုꩻယင်ဟန်ႏနဝ်ꩻ လူႏဒျာႏအနမ်းလွုမ်ꩻ၊ တွိုႏနဝ်ꩻနောဝ်ꩻခါ တမာပါတဝ်း၊ ပါꩻနဝ်ꩻနဝ်ꩻ ထွာဘဝမုဲင်ꩻဘဝမုဲင်ꩻတဲ့ယဝ်း ခြွေခြာႏဒျာႏ၊ ကွဲႏတွော့ꩻ သွꩻခွအဲဉ်ထောဝ်း၊ (၂) လိုꩻယင်ဟန်ႏနဝ်ꩻ နမ်းနဝ်ꩻ တလူႏတဝ်းထာꩻ၊ တမာဒျာႏပါꩻလွုမ်ꩻ၊ ပါꩻနောဝ်ꩻနောဝ်ꩻ ထွာဘဝမုဲင်ꩻဘဝမုဲင်ꩻတဲ့ယောဝ်း ကေန်ꩻခြောဒုက္ခ၊ ကွဲႏတွော့ꩻ သွꩻခွအာဒျာႏ၊ (၃) လိုꩻယင်ဟန်ႏနဝ်ꩻ နမ်းတဲ့တလူႏတဝ်း၊ ဝင်ꩻတဲ့ တတမာတဝ်း၊ ပါꩻနဝ်ꩻနဝ်ꩻ ထွာဘဝမုဲင်ꩻဘဝမုဲင်ꩻတဲ့ယဝ်း ကေန်ꩻခြောဒုက္ခ၊ သွꩻခွအဲဉ်ထောဝ်း၊ ကွပ်ကေန်ꩻခြောတဲင် လယ်ႏကွီအံႏဗာႏဝင်ꩻ၊ ထွာထာꩻကွီအံႏသား၊ (၄) လိုꩻယင်ဟန်ႏနဝ်ꩻ နမ်းတဲ့လူႏတန်ꩻ၊ ဝင်ꩻတဲ့ ဝွေꩻတမာပါ၊ ပါꩻနဝ်ꩻနဝ်ꩻ ဘဝမုဲင်ꩻဘဝမုဲင်ꩻတဲ့ယဝ်း ခြွေတဲ့ခြွေခြာႏ၊ သွꩻခွတဲ့အာငါႏ။
၁၂၂။ ဂါႏထာႏပြန်ႏပအိုဝ်ႏခြေင်ခြေင်- ကမာꩻဒါႏ (ထာꩻဟောဝ်) ကုသိုလ်ႏကံႏယိုနဝ်ꩻ တစိꩻပေႏဒျာႏ ဆေ့ꩻပေႏလွုမ်ꩻဟ ကုသိုလ်ႏအကျိုꩻ အဟောဝ်မျိုꩻ တရတွိုႏလွဉ်နွောင်ꩻနွောင်ꩻတဝ်း ယူႏနုဲင်းနဝ်ꩻတဲင် ထာꩻဟောဝ်ကုသိုလ်ႏယို၊ ထီႏဖွီမွုန်းသေႏသေႏ ထင်းပေႏမွုန်းလာꩻလာꩻ၊ တလဲင်ႏတစဲက် ထဲ့ဗဲက်သော့ꩻဒါႏ ခမ်းရာႏနဝ်ꩻနဝ်ꩻ ဗွေလွန်းစွဉ်ႏဖွိုင်ꩻ တဲ့က်တွိုင်ꩻနယ်ဗာႏ ဥပမာႏနုဲင်းနောဝ်ꩻနေနေ၊ ထာꩻဟောဝ်မွန်းပျောႏ ပါꩻသူႏတောႏလိုꩻဒါႏနဝ်ꩻ တလဲင်ႏတစိꩻစိꩻပေႏလွုမ်ꩻတဲ့ အစိꩻပေါင်ꩻအာ ခွပ်လာညနေင်ႏ ဆုဲင်ꩻချိန်ႏသူꩻနဝ်ꩻ ကုသိုလ်ႏဟဝ်ဒါႏ ဗွေဗိတ်စွဉ်ႏဒျာႏ ခန္ဓာႏအနမ်း(ဖွိုင်ꩻ)နောဝ်ꩻသွူ။
ဟော်ꩻထွားသွဉ်ဗာႏ "ဗိဠာလပဒကသဌေꩻ"ဝတ္ထုယိုတဲင် "လꩻဗဟုသုတ၊ လꩻသတိꩻနုဲင်းယို"
၁။ ပေါႏနာႏတရာꩻနဝ်ꩻ သꩻမဉ်မာꩻကုသိုလ်ႏပေါႏလွဉ်-
၂။ ပေါႏသေနာႏ ကုသိုလ်ႏအကျိုꩻနောဝ်ꩻ သꩻမဉ်မာꩻကုသိုလ်ႏ ယိန်းတလာလာ၊ နိုꩻဆောႏတမာပါဝင်ꩻ-
၃။ ပေါႏဝင်ꩻမာꩻ ထာꩻဟောဝ်ထာꩻဒါႏနောဝ်ꩻ ဟောဝ်ထင်းမာႏတဝ်းဝင်ꩻ-
၄။ လိုꩻဟောဝ်သူႏတောႏကောင်ꩻသီး သꩻရင်ꩻနဝ်ꩻ ထီႏဟောဝ်ဒျာႏဝင်ꩻလွဉ်းလွဉ်း-
၅။ ပေါႏပဲစ်မာႏဝင်ꩻနဝ်ꩻ ကန်းတော့ꩻချာနဝ်ꩻ အဟောဝ်သွတ်ꩻ-စတဲင်နုဲင်းနဝ်ꩻ သေထွꩻ လꩻအီသတိꩻအာတန်သွူ။[၁][၂][၃]