ဗွေႏရဟန်ꩻသွံပါꩻ
"နီဗွေႏဘုရာꩻ ကျွꩻလွေꩻဝါႏခြာကွဉ်ႏ၊ (ဗွေႏရဟန်ꩻသွံပါꩻထျꩻ၊ သွံပါꩻတသꩻ အုံညီꩻခွꩻ)"
အတွင်ꩻနဝ်ꩻခါ "ဗွေႏအနုရုဒ္ဓါႏ၊ ဗွေႏနန္ဒိယ၊ ဗွေႏကိမိလ" ဗွေႏသီးသွံပါꩻ အဝ်ႏအုံဝါႏခြာကွဉ်ႏ၊ ဗွေႏဘုရာꩻကျွꩻလွဉ်တဲင် သꩻရောင်းသꩻရေꩻ ဝွေꩻဗွေႏသီးကျိုႏဆွုမ်ႏ ဗွေႏဘုရာꩻ၊ ဗွေႏဘုရာꩻရီနုဲင်းယို- "တပဲ့ꩻအနုရုဒ္ဓါႏ- သမဂ္ဂါ-လွောင်ႏလွောင်ႏဗူႏဗူႏ သီအုံညီꩻရျူႏလို့ဝင်ꩻနုဲင်းမုဲင်ꩻ" "ဆရာႏဘုရာꩻဗွေႏဩ- ခွေသွဉ်းယူႏသꩻကို အုံညီꩻဗာႏ 'သွꩻဟောဝ်"နုဲင်းယိုနဝ်ꩻ 'ယံမွေး'စွဉ်ႏထာꩻဟွေး၊ စူꩻတဝ်းခွေသꩻ စူꩻဒျာႏဝွေꩻဗွေႏသီးသꩻ၊ ဖြွမ်းလွဉ်ꩻဒျာႏဝွေꩻဗွေႏသီး၊ တွုံꩻသွမ်ꩻ ပါꩻမုဲင်ꩻဖျော်ရီးတဲ့ ဒါဖေႏခင်ႏလမ်း၊ တွောင်သေꩻဖေႏထီ၊ အွဉ်ႏတံꩻသေꩻဖေႏဝန်ႏ-စတဲင်မာꩻနုဲင်းနဝ်ꩻ၊ နီသွဉ်းသီးနမ်းနဝ်ꩻ အဝ်ႏသွံပါꩻတဲ့ သꩻအဝ်ႏသꩻမေတ္တာႏ တသꩻလွုမ်ꩻဒျာႏ ဗွေႏဩ၊ 'ဖေႏကလꩻမဂ်'တဲ့ အောဝ်ႏကျိုꩻစာꩻကျပ်ဒျာႏ ဗွေႏဩ" လောဝ်းစတဲင်နုဲင်းနောဝ်ꩻသွူ။ "တပဲ့ꩻနန္ဒိယ- သမ္မောဒမာနာ- သꩻရောင်းသꩻရေꩻ သီအုံညီꩻလွေꩻလို့ဝင်ꩻနုဲင်းမုဲင်ꩻ" "ဆရာႏဘုရာꩻဗွေႏဩ- ခွေသွဉ်းယူႏသꩻကို အုံညီꩻဗာႏ 'သွꩻရက်'နုဲင်းယိုနဝ်ꩻ 'ကျမွေး'စွဉ်ႏထာꩻဟွေး၊ စူꩻတဝ်းခွေသꩻ၊ စူꩻဒျာႏဝွေꩻဗွေႏသီးသꩻ၊ ဖြွမ်းလွဉ်ꩻဒျာႏဝွေꩻဗွေႏသီး၊ တွုံꩻသွမ်ꩻ ပါꩻမုဲင်ꩻဖျော်ဆုဲင်ꩻတဲ့ ပသေဝန်ႏ၊ ခေါက်ဟောဝ်ထာꩻဒါ၊ ဖွစ်ꩻထာꩻ-စတဲင်မာꩻနုဲင်းနဝ်ꩻ၊ နီသွဉ်းသီးနမ်းနဝ်ꩻ အဝ်ႏသွံပါꩻတဲ့ သꩻအဝ်ႏ သꩻမေတ္တာႏ တသꩻလွုမ်ꩻဒျာႏဗွေႏဩ၊ 'ဖေႏကလꩻဖိုလ်ႏ'တဲ့ အောဝ်ႏကျိုꩻလိုꩻဒျာႏဗွေႏဩ"လောဝ်းစတဲင်နုဲင်းနောဝ်ꩻသွူ။ "တပဲ့ꩻကိမိလ- အဝိဝဒမာနာ- လွစ်ထေင်လွစ်ညင်ꩻ သီအုံညီꩻလို့ဝင်ꩻနုဲင်းမုဲင်ꩻ" "ဆရာႏဘုရာꩻဗွေႏဩ- ခွေသွဉ်းယူႏသꩻကို အုံညီꩻဗာႏ 'သွꩻခေါဝ်း'နုဲင်းယိုနဝ်ꩻ 'ဟောဝ်မွေး'စွဉ်ႏထာꩻဟွေး၊ စူꩻတဝ်းခွေသꩻ၊ စူꩻဒျာႏဝွေꩻဗွေႏသီးသꩻ၊ ဖြွမ်းလွဉ်ꩻဒျာႏဝွေꩻဗွေႏသီး၊ ရော့ꩻတွောင်ထီတဲ့ သေတွောင်ဒျာႏ၊ ရော့ꩻဖွစ်ꩻထာꩻတဲ့ သေဖွစ်ꩻဒျာႏ၊ နီသွဉ်းသီးနဝ်ꩻ နမ်းအဝ်ႏသွံပါꩻတဲ့ သꩻအဝ်ႏ သꩻမေတ္တာႏ တသꩻလွုမ်ꩻဗွေႏဩ၊ ထေင်ညင်ꩻဖိုတဝ်းလို့ဝင်ꩻ၊ ယိုနဝ်ꩻနီကျောင်ꩻ၊ ကျောင်ꩻကိုထာꩻမာꩻနဝ်ꩻ နီအဗာႏမာꩻလွဉ်းလွဉ်း၊ ခွေတာႏဝွန်ႏဒျာႏ၊ နာꩻတာႏဝွန်ႏဒျာႏ အွဉ်ႏတဝ်းသꩻနုဲင်းနဝ်ꩻ၊ နီကျောင်ꩻဖေႏကတိုꩻတက်၊ သꩻရက်ကျောင်ꩻအဝ်ႏသေႏသေႏ၊ 'ဖေႏကလꩻနိဗ္ဗာန်ႏ'အဝ်ႏကျံႏအဝ်ႏကျိုꩻစာꩻဒျာႏ ဗွေႏဩ" လောဝ်းစတဲင်နုဲင်းနောဝ်ꩻသွူ။ နီဗွေႏဘုရာꩻရိုꩻ- "တပဲ့ꩻသီးဖုံႏဟွေး- သီအုံညိꩻလို့ဝင်ꩻ လွောင်ႏလွောင်ႏဗူႏဗူႏ၊ ရောင်းရောင်းရျူႏရျူႏ၊ တဲ့ꩻတဲ့ꩻခေါဝ်းခေါဝ်း၊ နမ်းအဝ်ႏသွံပါꩻတဲ့ သꩻအွဉ်ႏတသꩻလွုမ်ꩻ၊ ယံကလꩻ မဂ်ဖိုလ်ႏနိဗ္ဗာန်ႏ သီအဝ်ႏကျံႏကျိုꩻစာꩻနုဲင်းယိုနဝ်ꩻ ယံမွေးကျမွေးဟောဝ်မွေးထာꩻ"နီဗွေႏဘုရာꩻအံႏဖြာႏ စတဲင်နုဲင်းနဝ်ꩻထွူခါ ဟော်ꩻပါတရာꩻ၊ ကျွꩻညာꩻလွေꩻခန်းဒျာႏ "ပါလိလေယျက" လွေꩻအုံခွꩻ တခြာကိုနောဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ ကောသမ္ဗကက္ခန္ဓက)[၁][၂]