ဘုရာꩻကယ်ႏချွစ်လွစ်လꩻဝဋ်
"အင်္ဂုလိမာလသုတ် (ဘုရာꩻကယ်ႏချွစ်-လွစ်လꩻဝဋ်ဒုက္ခ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ကောသလခမ်းကိုနဝ်ꩻ 'စောရအင်္ဂုလိမာလ'ပေါႏဖိုတဖြာꩻ၊ ဝွေꩻနဝ်ꩻ (အဆရာႏနဝ်ꩻ ယွုမ်းမာႏငေါဝ်းသွေꩻကုဲင်တဲင် ကျံႏဖေႏဝွေꩻကသီ၊ ဝွေꩻနာႏမာႏ အဆရာႏငေါဝ်းတွော့ꩻ) အုံခိုႏတခြာကို ပေါႏမာꩻသီလိုꩻ တဖြာꩻတဖြာꩻနဝ်ꩻ ထူႏအစူနုံ တလီးတလီးလွုမ်ꩻ၊ အဆရာႏထွဉ်ႏ ဖေႏကဗွေဗာႏ စူနုံတလီးတရေင်-တဲ့၊ (ပေါႏဝွေꩻမာꩻသီလိုꩻ တရေင်နဝ်ꩻ ပါꩻမာꩻသီချာဝွေꩻ အဝ်ႏဗာႏ အဆရာႏယူႏနုဲင်းနောဝ်ꩻ) စစနဝ်ꩻ မာꩻသီလိုꩻတခြာကို၊ တခြာကို ပါꩻလွေꩻဗွုန်ႏတဝ်း၊ သဲင်ꩻမာꩻသီနေး ဒုံပေႏပေႏကို၊ ဒုံပေႏပါꩻလွင်းလို့၊ မာꩻသီတော လိုꩻဒုံတန်ကို၊ လိုꩻဒုံတန်လွင်းလို့၊ နွို့တောစွဉ်ႏဝေင်ꩻ၊ မာꩻသီလိုꩻဝေင်ꩻ၊ လိုꩻဝေင်ꩻဖုံႏ၊ လိုꩻဒုံဖုံႏ (ပျꩻဆန္ဒ)လွေꩻရောင်ထာꩻ ခွန်ဟော်ငါ၊ တွိုႏနဝ်ꩻမꩻ ခွန်ပသေနဒီကောသလ ထွဉ်ႏအစဲ့ꩻမ လွေꩻဆွမ်ꩻ(ဆောꩻမ်) အင်္ဂုလိမာလနောဝ်ꩻသွူ။ အင်္ဂုလိမာလသီးမွိုး ထွဉ်ႏအဝါꩻ လွေꩻအွဉ်ႏဒေါ့ꩻရီးအပို ထွဉ်ႏထိုꩻညာꩻညာꩻ၊ အဝါꩻလွေꩻတောဝ်းတဲင် အင်္ဂုလိမာလသီးမွိုးနဝ်ꩻ ငွိုးငါးစွဉ်ႏထာꩻ၊ ငမ်းဒွုမ်ထာꩻရာꩻရာꩻ တဖြာꩻတန်ဒျာႏ နက်လွေꩻစွဉ်ႏတခြာကို လွေꩻထုမ်ႏ(ထိုႏမ်)အပို ထွဉ်ႏလွင်းထိုꩻညာꩻညာꩻနောဝ်ꩻသွူ။ အရောဝ်ꩻနဝ်ꩻ- နီဗွေႏဘုရာꩻတွုံꩻသွမ်ꩻထွူ၊ သွုံꩻသွမ်ꩻထွူ ကျွꩻလွေꩻအင်္ဂုလိမာ ကအဝ်ႏခိုႏဒါႏ တခြာကိုနဝ်ꩻတဲင် တီဖိုးသား၊ လုဲင်းသားဖုံႏရိုꩻ- "လွေꩻမွုန်းတဖူꩻယိုဗွေႏ၊ အင်္ဂုလိမာ မာꩻသီလိုꩻ၊ ထူႏထိုꩻအစူနုံ တလီးတလီးတွော့ꩻ လိုꩻသီကားမုဲင်ꩻဖြာꩻဖြာꩻလဲဉ်းသွူ ဗွေႏဩ၊ လိုꩻလွေꩻနေးသွူ တဆီနီဆီမဉ်ႏတဲ့ ဝွေꩻတငမ်းတဝ်း၊ ဝွေꩻအဝ်ႏယုဲင်ဗက်ꩻလꩻဒျာႏပါꩻ၊ ပါꩻအဝ်ႏလွင်းဗာႏဒျာႏ၊ နီဗွေႏတပါꩻဒျာႏဟ ဝွေꩻအမျိုꩻငမ်းနဲ့ဗွေႏ၊ ပါꩻသူꩻနဝ်ꩻ ဘုရာꩻသော ထမုဲင်ꩻသော သေနာႏသေနီႏတဝ်း၊ မဲ့ꩻအဗက်ꩻပါနီဗွေႏ၊ လွေꩻမွူးန်လာꩻလာꩻဗွေႏဩ" တောင်ꩻပြန်ႏဖေႏလွေꩻတဝ်း ဗွေႏစောဝ်းဘုရာꩻ ပငါပရာꩻ၊ နီဗွေႏဘုရာꩻနဝ်ꩻ တကာႏသီးဖုံႏ တောင်ꩻပြန်ႏသွူသွံလဲင်ႏတဲ့ အကျွꩻလွေꩻဒျာႏတေ့ꩻတေ့ꩻနောဝ်ꩻသွူ။ အင်္ဂုလိမာလ အဝ်ႏညာꩻထီႏလွေꩻလဲဉ်းဘုရာꩻ- အင်္ဂုလိမာလသꩻကို ယူႏတေ့ꩻနုဲင်းယို "ပါꩻရဟန်ꩻသူꩻနဝ်ꩻ အဟွူန်တောဝ်း ခွေသတင်ꩻဟောင်း၊ ဝင်ꩻလိုꩻလမ်း လွေꩻသွိုလို့ဝင်ꩻ နီဆီသိုမ်ဆီသွူမဉ်ႏတဲ့ အဝ်ႏငမ်းဗာႏခွေ၊ အဝ်ႏလွင်းဗာႏခွေ၊ တွိုႏရဟန်ꩻသူꩻနဝ်ꩻ အံႏသွင်ꩻတဝ်းခွေ၊ အငမ်းတဝ်းခွေ၊ လွေꩻဗွူႏန်တပါꩻဒျာႏ၊ ပါꩻရဟန်ꩻသူꩻနဝ်ꩻ အံႏသွင်ꩻတဝ်းခွေ၊ ငမ်းတဝ်းခွေဟ ခွေမာꩻသီပါစွဉ်ႏနဝ်ꩻ ရဟောဝ်နဲး"ယူႏတေ့ꩻနုဲင်းနောဝ်ꩻသွူ။ ဝွေꩻကယူႏတေ့ꩻအတွိုင်ꩻ ဝွေꩻအီႏမာꩻသီပါစွဉ်ႏဘုရာꩻ- ကွပ်နဝ်ꩻမꩻ ဆဲင်နꩻသန်လျက် ဆဲင်ပြာႏဗုတ်ꩻ(ဗိုႏက်) ခွုမ်ထာꩻရဲးနမ်း၊ ခူမ်ခြီႏထွူတဲင် ထောင်လွဉ်ꩻနီဗွေႏဘုရာꩻဆချာ၊ အင်္ဂုလိမာလ ဖေႏကထွꩻမွူန်း နီဗွေႏဘုရာꩻတွော့ꩻ နီဗွေႏဘုရာꩻ နေးတံꩻခိုꩻ ဖန်ဆင်ꩻခါꩻ၊ အင်္ဂုလိမာလနဝ်ꩻ ကွဲလွေꩻနဲ့စ်နဲ့စ်တဲ့ ကွဲအဝ်ႏကုဲင်ညာꩻညာꩻထိုꩻဒျာႏနောဝ်ꩻသွူ။ အင်္ဂုလိမာလ ယူႏတေ့ꩻသꩻကို- "ဆင်လွင်းထာꩻ မဉ်မွိုင်နုဲင်းမုဲင်ꩻမွိုင် ခွေယုဲင်ထွꩻ၊ ခွေဆွမ်ꩻလꩻ၊ သေလွင်းထာꩻ မဉ်မွိုင်နုဲင်းမုဲင်ꩻမွိုင် ခွေယုဲင်ထွꩻ ခွေဆွမ်ꩻလꩻ၊ ချို့ꩻဖင်းထာꩻ မီန်မွိုင်နုဲင်းမုဲင်ꩻမွိုင် ခွေယုဲင်လွဉ်ꩻထွꩻ ခွေဆွမ်ꩻ(ဆော်ꩻမ်)လꩻလွဉ်းလွဉ်း။ တွိုႏပါꩻရဟန်ꩻယို အလွေꩻပွုံႏမဲဉ်ႏ(မဲႏန်)အတွိုင်ꩻလွုမ်ꩻမွော့ ခွေယုဲင်နုဲင်းမုဲင်ꩻယုဲင် မွော့တထွꩻတဝ်းနဲး၊ ဆန်ꩻမွေးစွဉ်ႏထာꩻဗာႏ" ယူႏနုဲင်းနဝ်ꩻထွူတွော့ꩻ ဝွေꩻအုံထွိုင်ႏ၊ ခြောဝ်ငါလွေꩻဘုရာꩻနုဲင်းယို- "ရဟန်ꩻနဝ်ꩻ အုံဟုဲင်း၊ အုံထွိုင်ႏဗော့ꩻနဝ်ꩻကိုဟုဲင်း" ဒေါ့ꩻခြောဝ်လွေꩻနုဲင်းနဝ်ꩻတဲင် နီဗွေႏဘုရာꩻရိုꩻ- "အင်္ဂုလိမာလ- ခွေနဝ်ꩻ အဝ်ႏအုံဒျာႏ၊ တအုံတဝ်းနဝ်ꩻ (ကအဝ်ႏလောႏဗာႏထာꩻနဝ်ꩻ နာꩻတန်ဒျာႏ) နာꩻတဲ့အုံဟုဲင်း" နီဗွေႏဘုရာꩻ ဒေါ့ꩻချာနုဲင်းနဝ်ꩻတဲင် အင်္ဂုလိမာလနဝ်ꩻ (လိုꩻညမ်းမွေးတဝ်း လိုꩻပညာႏသားနဝ်ꩻမꩻ)ယူႏနုဲင်းယို- "ရဟန်ꩻသီးအမျိုꩻနဝ်ꩻ ဒေါ့ꩻလဲဉ်တဝ်းထာꩻ၊ ဒေါ့ꩻမွေးဒျာႏထာꩻ၊ 'ခွေအဝ်ႏအုံဒျာႏ၊ နာꩻတဲ့ အုံနုဲင်းနုဲင်းဟုဲင်း'ကရိုꩻနဝ်ꩻ အရေႏရွယ်ႏထမုဲင်ꩻနဲး၊ ခွေမီႏန်ရီချာနောဝ်ꩻ ရဟောဝ်မွော့ဟွေး"ယူႏစွေးနုဲင်းနောဝ်ꩻတဲင် ရီချာနီဗွေႏဘုရာꩻနုဲင်းယို- "ရဟန်ꩻဟွေး- နာꩻနဝ်ꩻ အဝ်ႏလွေꩻသွူထာꩻတဲ့ သမ်းရိုꩻ'ခွေအုံဒျာႏတဲ့၊ တအုံတဝ်းနဝ်ꩻ နာꩻဒျာႏ၊ နာꩻတဲ့အုံဟုဲင်း'ကရိုꩻနဝ်ꩻ ရေႏရွယ်ႏထမုဲင်ꩻဟောင်း" "အင်္ဂုလိမာလဟွေး- ခွေနဝ်ꩻ ထွာလဲဉ်းဘုရာꩻ၊ မာꩻသီတဝ်းဝင်ꩻသက်၊ မာꩻတဝ်းဒူမ်အကုသိုလ်ႏ၊ ခွေပယ်ႏလို့လဲဉ်း ကိလေႏသာႏ ခွေခန္ဓာႏထွူလဲဉ်း ယိုတလဲင်ႏလူꩻမ်၊ တကွုတ်ထဲင်းတဝ်းဒူမ်၊ အုံလဲဉ်း၊ တဝေ့ꩻတပန်ႏ (ကွုတ်သီ)ထဲင်းတဝ်းဒူမ်။ တွိုႏနာꩻနဝ်ꩻ မာꩻသီလိုꩻ တဖြာꩻထွူတဖြာꩻ၊ နာꩻအဝ်ႏမာꩻမွိုင်းဒျာႏ အကုသိုလ်ႏ၊ နာꩻအီႏခံႏဗာႏက အကုသိုလ်ႏအပဲ့စ်၊ သံႏသရာႏဝွဋ်ဒုက္ခကို နာꩻယို အီႏတဝေ့ꩻတပန်ႏ (အီႏကွုတ်သီဗာႏ) အာတန်နေက။ ကွပ်နဝ်ꩻမꩻ အွဉ်ႏထွူထိုꩻခန်း နာꩻအကုသိုလ်ႏနဝ်ꩻဟုဲင်း၊ နာꩻတဲ့ ဖေႏကလွစ်တဝေ့ꩻတပန်ႏ (ကွုတ်သီ)နဝ်ꩻ မာꩻသွော့နမ်းရဟန်ꩻ အားထွုတ်သွော့ ကမ္မဋ္ဌာန်ꩻဟုဲင်း" ခွေရေႏရွယ်ႏနုဲင်းနဝ်ꩻ ခွေမဉ်ဆွုံꩻမꩻနာꩻနုဲင်းနဝ်ꩻသွူ။ "ဩဗွေႏ ဘုရာꩻမျတ်ဗွေႏဩ- ခွေသွဉ်းနဝ်ꩻ မော့ꩻစောဝ်းစောဝ်းတဝ်း ဗွေႏဘုရာꩻဟနော၊ ဗွေႏဘုရာꩻ မဉ်ကယ်ႏချွစ်ငါႏ ခွေသွဉ်းမꩻ လဲင်ꩻကျွꩻလွဉ်စွဉ်ႏ တခြာကိုနုဲင်းယို၊ ခွေသွဉ်းသꩻရေꩻငါႏ ဗွေႏဩ။ ခွေသွဉ်းနဝ်ꩻ နာႏဗာႏလဲဉ်း နီဗွေႏဩဝါဒ၊ နာႏဗာႏလဲဉ်း နီဗွေႏငေါဝ်းသွဉ်သင်တဲင် အကုသိုလ်ႏထာꩻမာꩻယို ခွေသွဉ်းမာꩻတဝ်းဒွုမ် ဗွေႏဩ၊ အီႏလွောက်ꩻနာႏ ကံကျင်ꩻလွဉ်ꩻဒျာႏ နီဗွေႏဘုရာꩻ တရာꩻတောႏအတွိုင်ꩻ ဗွေႏဩ" အာႏမခံႏငေါဝ်း လောဝ်းချာနီဗွေႏဘုရာꩻ နုဲင်းနောဝ်ꩻသွူ။ အင်္ဂုလိမာလနဝ်ꩻ- လောဝ်းချာနီဗွေႏဘုရာꩻနုဲင်းနဝ်ꩻထွူတဲင် အွဉ်ႏလင်ꩻအနꩻ၊ အွဉ်ႏချꩻအခြီႏ၊ ကားတဲင်လက်နက်တဲ့နဝ်ꩻ (ကအဝ်ႏဟွဲခါꩻဒါႏ လိုꩻသီးစူနုံဖုံႏတဲ့နဝ်ꩻ) ဝေါင်းသော့ꩻလို့စွဉ်ႏ ခြောက်ꩻကို (ဒွုတ်ꩻထိုꩻအတသိုꩻ၊ ဖျင်တဲ့ပ်ပသာႏ အခွမ်ꩻလာꩻ)ထွူတဲင် လွေꩻထေ့နီဗွေႏဘုရာꩻထျꩻ၊ ဝုဲင်ႏရိုႏရိုႏသေႏသေႏ နီဗွေႏဘုရာꩻထွူတဲင် ကွီဗုဲင်စွဉ်ႏသျင်ႏ၊ ကွီခံႏစွဉ်ႏစင်ꩻ နီဗွေႏဘုရာꩻထျꩻနောဝ်ꩻသွူ။ တွိုႏနဝ်ꩻတွော့ꩻ နီဗွေႏဘုရာꩻထွား- - 'ကမ္မံ ဩလောကေသိ- အင်္ဂုလိမာ ကုသိုလ်ႏပန်ချာ၊ - အဋ္ဌပရိက္ခာရ ဘဏ္ဍကဿ ဒိန္နဘာဝံ- ဝွေꩻလူႏဗာႏဖို ပရိက္ခရာႏသွစ်ꩻပါꩻ၊ - ဧဟိ ဘိက္ခု- လွဉ်ယိုဟုဲင်းရဟန်ꩻ' သဲ့စ်နီဗွေႏဘုရာꩻ ကဟဲ့ꩻနုဲင်းနဝ်ꩻတဲင် တလဲင်ႏချင်ꩻ ထွာစွဉ်ႏရဟန်ꩻ (အဝ်ႏဗုဲင်ထွူစွဉ်ႏသင်္ကန်ꩻ)နဝ်ꩻသွူ။ (မာတာပိဿ အာဟိဏ္ဍိတွာ အပဿမာနာ ဧတ္တောဝ ဂတာ- အင်္ဂုလိမာလသီးမွိုးနဝ်ꩻ လယ်ႏထိုမ်ႏထွားအပို ထီႏတဝ်းတြင် အဝ်ႏနဝ်ꩻကိုသဲင်ꩻချာ၊ အဋ္ဌကထာ) နီဗွေႏဘုရာꩻနဝ်ꩻ အွဉ်သဲင်ꩻစင်ꩻအင်္ဂုလိမာလ၊ သဲင်ꩻအုံယင်း သာဝတ္ထိခမ်း၊ ကျောင်ꩻဇေႏတဝွန်ႏကိုနဝ်ꩻသွူ။ အတွင်ꩻနဝ်ꩻနဝ်ꩻ လိုꩻဒုံလိုꩻဝေင်ꩻဖုံႏ လွဉ်အဝ်ႏပြုံႏ ခွန်ဟော်တခါꩻငွါ၊ ထွဉ်ႏဆွမ်ꩻ (ဆော်ꩻမ်)လꩻလꩻ အင်္ဂုလိမာလ၊ ခြောဝ်အငေါဝ်း (ပျꩻဆန္ဒ)နုဲင်းနောဝ်ꩻဖုံႏသွူ။ ပသေနဒီကောသလနဝ်ꩻ- မွူးနွောင်းခိန်ႏတွင်ꩻ တွမ်ႏသေတပ်ငတ်ꩻရျာꩻ၊ အဝ်ႏသာဝတ္ထိဝေင်ꩻကိုထန်ႏလွေꩻ (ဘေꩻဖေႏကကင်ꩻတဲင်) နွို့မောဝ်ꩻကျောင်ꩻဇေႏတဝွန်ႏ၊ လွေꩻဝုဲင်ႏရီးရီးက ဗွေႏဘုရာꩻ၊ စင်ꩻအင်္ဂုလိမာလနောဝ်ꩻ နီဗွေႏဘုရာꩻ ရဲခါꩻတွမ်ႏတံꩻခိုꩻ၊ ဖေႏထီႏတဝ်း ခွန်ကောသလသီးနောဝ်ꩻသွူ။ ဗွေႏဘုရာꩻရီ ခွန်ကောသလနုဲင်းယို- "မွူးနွောင်းတိန်ႏတီႏင် အခိန်ႏ(အခီႏင်)ယိုနဝ်ꩻ သီအီႏလွေꩻမုဲင်ꩻကို၊ အီႏလွေꩻမာꩻထမုဲင်ꩻဟောင်း တကာႏ" "နီသွဉ်းသီး အီႏလွေꩻဆော်ꩻမ် ရန်ႏသူႏဗွေႏဩ" "အီႏလွေꩻဆွမ်ꩻ ခွန်ဗိမ္ဗိသာရ-နဲ့" "မွေးတဝ်း ဗွေႏအော်" "အီႏလွေꩻဆော်ꩻမ် ခွန်လိစ္ဆဝီႏသီးနဲ့" "မွေးတဝ်း ဗွေႏအော်" "နဝ်ꩻဟ သီအီႏလွေꩻဆော်ꩻမ် ရန်ႏသူႏပါꩻမုဲင်ꩻ" "နီသွဉ်းသီး အီႏလွေꩻဆွမ်ꩻရန်ႏသူႏ အင်္ဂုလိမာလ ဗွေႏအော်" "ယိုတကာႏခွန်တန်- လိုꩻသီးယိုနဝ်ꩻ အကုဲင်သေႏသေႏမွေးတဝ်း၊ လꩻနောင်ႏတ၊ လꩻသံႏဝွေႏဂတွော့ꩻ ထွာချာလိုꩻဟောဝ်နဝ်ꩻ အဝ်ႏနဲ့၊ အဲဉ်ထဝ်းနဲ့တကာႏ" "ထွာချာလိုꩻဟောဝ် အဝ်ႏဗောႏထာꩻဗွေႏအော်" "မွေးသွူ တကာႏ- အင်္ဂုလိမာလနဝ်ꩻ လꩻနောင်ႏတတရာꩻတဲင် အမဉ်ႏထင်ႏဗုဲင်စင်ꩻ၊ ကံကျင်ꩻဟဝ်ဒါႏ၊ အဝ်ႏတွမ်ႏသီႏလသိက္ခာႏတွော့ꩻ တကာႏမဉ်ႏထီႏစွော့ꩻ (မီႏန်မော့ꩻစွော့ꩻ)နဝ်ꩻ တကာႏသီး အီႏမာꩻနုဲင်းမုဲင်ꩻ" နီဗွေႏဘုရာꩻရီရီး နုဲင်းနောဝ်ꩻသွူ။ ခွန်ကောသလရိုꩻ- "ဝွေꩻဗွေႏနဝ်ꩻ လꩻလဲဉ်းနောင်ႏတတရာꩻ၊ ထင်ႏဗုဲင်လဲဉ်းစင်ꩻ၊ ကံကျင်ꩻဟောဝ်ဒါႏ၊ အဝ်ႏလဲဉ်းတွမ်ႏ သီႏလသိက္ခာႏတဲင် ဝုဲင်ႏလွဒျာႏဗွေႏအော်၊ ကျိုႏဆွုမ်ႏ(ဆူႏမ်)လွဒျာႏဗွေႏအော်၊ ဒါဖေႏဒျာႏ အခင်ႏလမ်း-ပင်ꩻအုံလင်ꩻသော့ꩻဒျာႏဗွေႏအော်၊ ခံႏလူႏဖေႏဒျာႏ ပစ္စေꩻလစ်ꩻပါꩻ(သင်္ကန်ꩻ၊ သွမ်ꩻ၊ ကျောင်ꩻ၊ တသီႏ)ဗွေႏအော်၊ ခံႏထူႏဖေႏဒျာႏ လုမ်းဗဉ်ႏရေꩻ(လိုးမ်ဗီႏန်ရေꩻ)ဗွေႏအော်၊ အင်္ဂုလိမာလနဝ်ꩻ လိုꩻမွိုက်တန်ဟ အမျိုꩻအီႏဗုဲင်နွောင်ꩻစင်ꩻ၊ အမျိုꩻအီႏကျင်ꩻနွောင်ꩻတရာꩻ၊ အမျိုꩻအီႏမာꩻကုသိုလ်ႏ တမွေးတဝ်းဗွေႏ"ခွန်လောဝ်းချာနုဲင်းနောဝ်ꩻသွူ။ အင်္ဂုလိမာလနဝ်ꩻ အဝ်းအုံလင်ꩻဗော့ꩻ နီဗွေႏဘုရာꩻထျꩻ၊ နီဗွေႏဘုရာꩻ ရဲခါꩻတွမ်ႏတံꩻခိုꩻတဲင် ခွန်တွမ်ႏအလိုꩻဖုံႏနဝ်ꩻ တထီႏတဝ်း ဗွေႏစောဝ်းအင်္ဂုလိမာလ၊ အင်္ဂုလိမာလနဝ်ꩻ ထီႏလို့ဒျာႏဝွေꩻသီး၊ ဗွေႏဘုရာရီနုဲင်းမုဲင်ꩻ၊ ခွန်ကောသလ လောဝ်းချာနုဲင်းမုဲင်ꩻနဝ်ꩻတဲ့ ဗွေႏအင်္ဂုလိမာလ အဝ်ႏဟွူန်လို့ဒျာႏနောဝ်ꩻသွူ။ နီဗွေႏဘုရာꩻနဝ်ꩻ- လꩻခါꩻလဲဉ်း ခွန်ကောသလ ငေါဝ်းအာႏမခံႏတဲင် ဒဲင်စူအပင်ထွေ ယီးလွေꩻဗွေႏအင်္ဂုလိမာလထွူခါ ဒေါ့ꩻပါနုဲင်းယို- "တကာႏခွန်တန် 'အင်္ဂုလိမာလ'ကရိုꩻနဝ်ꩻ ဝွေꩻဗွေႏနဝ်ꩻသနယ်" သဲ့စ်နီဗွေႏဘုရာꩻငေါဝ်းကသွတ်ꩻတဲ့ ခွန်တန်သီး ထီႏစွဉ်ႏဒျာႏ အင်္ဂုလိမာလ၊ သဲ့စ်ကထီႏတဲ့ ဟွူန်ငမ်းသꩻဝꩻ၊ နမ်းတစွူႏဆွော့ꩻဆꩻထိုꩻစွဉ်ႏ၊ တဒုမ်ႏ(တဒိုႏမ်)ထူနေးစွဉ်ႏနောဝ်ꩻသွူ။ ခွန်တွမ်ႏအလိုꩻ ကငမ်းနုဲင်းနဝ်ꩻနဝ်ꩻ နီဗွေႏဘုရာꩻ အဝ်ႏထီႏတွမ်ႏမဲ့တဲင် နီဗွေႏဘုရာꩻရိုꩻ- "တကာႏသီးဖုံႏဟွေး- သီတွမ်ႏငမ်းမွုန်း (သီတောႏမ်နန်းမွူးန်)ဒူမ်၊ စင်ꩻအင်္ဂုလိမာလနဝ်ꩻ ထွာလဲဥဉ်လိုꩻဟောဝ်တပါꩻ၊ တမာꩻတဝ်းသီ ထမုဲင်ꩻမုဲင်ꩻ၊ (ခွေထူႏတာႏဝွန်ႏဒျာႏ)"ဗွေႏဘုရာꩻ တိန်ႏအာႏမခံႏဖေႏနုဲင်းနောဝ်ꩻမꩻ ခွန်ကောသလ ဝုဲင်ႏလွေꩻ ဗွေႏအင်္ဂုလိမာလထွူခါ ရီပါနုဲင်းယို- "ဩဗွေႏ- နီဗွေႏနဝ်ꩻ 'အင်္ဂုလိမာလ'သွူနဲ့ ဗွေႏဩ" "မွေး တကာႏ၊ ဗွေႏစင်ꩻယိုနဝ်ꩻ 'အင်္ဂုလိမာလ'ကရိုꩻနဝ်ꩻသွူ" "နီဗွေႏတကာႏ မွိုးဖါနဝ်ꩻ 'ခွိုꩻနွယ်ႏ'မုဲင်ꩻ ဗွေႏအော်" "နီတကာႏဖါနဝ်ꩻ 'ဂဂ္ဂခွိုꩻနွယ်ႏ'၊ တကာႏမမွိုးနဝ်ꩻ 'ခွိုꩻနွယ်ႏ-မန္တာဏီ'သွူတကာႏ" "သေဗာႏနုဲင်းနဝ်ꩻတဲင် သꩻရေꩻငါႏဗွေႏအော်၊ နီဗွေႏအုံစွူစွူကျောင်ꩻဗွေႏနော၊ နီဗွေႏအတွက်တာႏ ကလိုႏအပ်ဒါႏ ပစ္စေꩻလစ်ꩻပါꩻဖုံႏနဝ်ꩻ ခွေသွဉ်းထူႏတာႏဝွန်ႏ လူႏလုမ်းလုမ်း(ကိုႏမ်ကိုႏမ်)ဒျာႏဗွေႏအော်" ခွန်တန်ကောသလ အာႏမခံႏနုဲင်းနဝ်ꩻသွူ။ ဗွေႏအင်္ဂုလိမာလရိုꩻ- "တကာႏခွန်တန်ဟွေး- ခွေနဝ်ꩻ အုံတောႏရꩻဒျာႏ တခြာကို၊ တွုံꩻနေးဒျာႏသွမ်ꩻ၊ တွမ်ဒျာႏသင်္ကန်ꩻ ပံသုကူႏ၊ အီသင်္ကန်ꩻသွံဖွူꩻလွုမ်ꩻတဲင် ခွေသင်္ကန်ꩻအဝ်ႏလဲဉ်း၊ လိုႏတဝ်းဒူမ်ထမုဲင်ꩻမုဲင်ꩻ"ဒေါ့ꩻချာခွန်နုဲင်းနောဝ်ꩻသွူ။ တွိုႏနောဝ်ꩻတွော့ꩻ- ခွန်တန်ကောသလလောဝ်း စောဝ်းဗုဒ္ဓဗွေႏဘုရာꩻနုဲင်းယို- "ဩဗွေႏ- ခွေသွဉ်းအံႏဖြာႏမွေးစွဉ်ႏ နီဗွေႏဘုရာꩻ၊ 'အနုတ္တရောပုရိသ ဒမ္မသာရထိ-ကရိုꩻဒါႏ ဘုရာꩻဂွုဏ်ႏတောႏနဝ်ꩻ မဲဉ်ႏမွေးငါႏထာꩻ'၊ သတ္တဝါႏဖေႏနေး ကယေန်ႏကေႏနဝ်ꩻ နီဗွေႏသွဉ်ဖေႏလꩻ၊ ဆွုံꩻမꩻနွောင်ꩻမွေး၊ ခွဉ်းဗင်မယꩻ-တနတ်နꩻမခူမ်၊ မဗူမ်မနက်၊ ယူႏပက်မမာꩻ၊ နေးတွမ်ႏမေတ္တာႏတရာꩻ ဆွုံꩻမꩻတွော့ꩻ တဗွီႏဗဲ့၊ ယေန်ႏကေႏ၊ ဣန္ဒြေႏစွူဖြွိုးစွဉ်ႏဒျာႏနဝ်ꩻဗွေႏ'ရိုႏသေႏခရာႏ ဟောဝ်ငါႏသွူဩ။ တကာႏလိုꩻလမ်း နီသွဉ်းသီးယိုနဝ်ꩻ ကိစ္စအာငါႏ၊ နီသွဉ်းသီး သဲင်ꩻတခါꩻက ဗွေႏဩ"။ လောဝ်းဗွေႏဘုရာꩻ နုဲင်းနဝ်ꩻထွူတဲင် အဝ်ႏနဝ်ꩻကို သဲင်ꩻချာခန်းဒျာႏနောဝ်ꩻသွူ။ တွိုႏတရောဝ်ꩻ- ဗွေႏအင်္ဂုလိမာလ လွေꩻတွုံꩻသွမ်ꩻ ဝေင်ꩻသာဝတ္ထိကို လွေꩻထီႏခန်း ပါꩻမူႏတဖြာꩻ လွူးပိုလꩻတောဝ်း၊ အဝ်ႏရွန်ꩻ(အဝ်ႏရူꩻန်)အဝ်ႏရန်ꩻ၊ အဝ်ႏငွိုးခန်းထာꩻ၊ အသွꩻမူႏဖုံႏ အဝ်ႏတဖေါ့ခါꩻ၊ ဗွေႏအင်္ဂုလိမာ တိန်ႏထီႏနုဲင်းနဝ်ꩻတဲင် သꩻကိုယူႏတေ့ꩻနုဲင်းယို- "အော်- တကာႏနင်ꩻမူႏ မဲ့ထီဟူႏသောင်ခြင်ꩻ၊ လွူးပိုလင်ꩻတဝ်း၊ မဒုက္ခငါႏနုဲင်းသူꩻဟွေး"သꩻကိုနဝ်ꩻရင်ꩻ သညင်ꩻမွေးစွဉ်ႏတဲ့ မာꩻဖေႏဒါႏတဝ်း။ တွိုႏသဲင်ꩻကျောင်ꩻ သဲင်ꩻလောဝ်းနယ် နီဗွေႏဘုရာꩻတွော့ꩻ နီဗွေႏဘုရာꩻသွဉ်ဖေႏ ပရိတ်တရာꩻတောႏ (အင်္ဂုလိမာလသုတ်)နဝ်ꩻထွူခါ လွေꩻထေ့ချာယင်း တကာႏနင်ꩻမူႏ၊ ရွစ်ဖေႏပရိတ်နဝ်ꩻထွူ သဲ့စ်ပရိတ်ကသွတ်ꩻတဲ့ မသောင်မခြင်ꩻ ပိုလင်ꩻစွဉ်ႏဒျာႏ၊ မွိုးမွိုးပိုပို ချမ်ꩻသာႏဘေꩻကင်ꩻ တဲႏနဝ်ꩻမာꩻငါ ရိုႏသေႏလူႏလွ ဗွေႏအင်္ဂုလိမာနောဝ်ꩻသွူ။ ဗွေႏအင်္ဂုလိမာလနဝ်ꩻ- အားထွုတ်မွေးတရာꩻ၊ မာꩻမွေးဝိပဿနာႏတဲင် ထွာစွဉ်ႏဒျာႏ ရဟန္တာႏတပါꩻနောဝ်ꩻသွူ၊ ကွဲႏတွော့ꩻ ကမာꩻသီဗာႏ လိုꩻအဖြာꩻတရေင်လွို (ပါဏာတိပါတ) အကုသိုလ်ႏကံႏနဝ်ꩻ အဝ်ႏခံႏဗာႏဒျာႏ။ ခံႏဗာႏနုဲင်းမုဲင်ꩻနဲတဲင်- လွေꩻတွုံꩻသွမ်ꩻတွင်ꩻ ဝင်ꩻဝေါင်းထိုꩻခွဉ်းကွို့ꩻဖုံႏ (တောင်ꩻဖွစ်ꩻယဖုံႏ) ဖွိုင်ꩻခေါဝ်ဖုံႏ၊ ဝန်ႏယဖုံႏ-စတဲင်နုဲင်းနဝ်ꩻ စွော်စွော်လွေꩻဗာႏမို့မို့ဒျာႏ ဝွေꩻဗွေႏမုနိ(ကတူႏ)၊ ပူႏပါႏ သွီႏလီစွဉ်ႏဒျာႏနောဝ်ꩻသွူ။ ကားကားနဲ့ အားထွုတ်တရာꩻ ထွာလꩻရဟန္တာႏ၊ ထဲ့ဗာႏတဝ်းငါးရုဲင်ꩻ၊ 'ဝွဋ်'ကရိုꩻနဝ်ꩻ လဲ့ꩻတလွစ်တဝ်းတဲင် ခံႏဗာႏကတူႏပူႏ၊ ကတူႏသွီႏနောဝ်ꩻသွူ။(သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ အင်္ဂုလိမာလသုတ်)[၁][၂]