အဇာတသတ်ဆယ်ꩻကပ်ဘုရာꩻ
"တထိန်ႏလာဗွေဟာ အဇာတသတ် လွေꩻဆယ်ꩻကပ်ဗွေႏဘုရာꩻ"
ခွန်အဇာတသတ်ရိုꩻ- 'တထိန်ႏလာဗွေဟာ လာလေ ကသာႏယာႏတဲ့ ခွေသꩻရာႏယို ချမ်ꩻသာႏတောဝ်းဟွေး၊ ပါꩻမုဲင်ꩻ အီႏမာꩻချမ်ꩻသာႏဖေႏဒါႏ ခွေသꩻယိုဟွေး" ခွန်ကထင်ႏရိုꩻနုဲင်းနဝ်ꩻတဲင် တိတ္ထိတက္ကတွဉ်ꩻ တပဲ့ꩻဖုံႏနဝ်ꩻရိုꩻ- "ဆယ်ꩻကပ် 'ပူရဏကဿပ'လုဲင်း၊ ဆယ်ꩻကပ် 'မက္ခလိဂေါသာလ'ဟုဲင်း၊ ဆယ်ꩻကပ် 'အဇိတကေသကမ္ဗလ'လုဲင်း၊ ဆယ်ꩻကပ် 'ပကုဓကစ္စာယန'ဟုဲင်း၊ ဆယ်ꩻကပ် 'သဉ္စယဗေလဋ္ဌပုတ္တ'လုဲင်း၊ ဆယ်ꩻကပ် 'နိဂဏ္ဌနာဋပုတ္တ'ဟုဲင်း" လောဝ်းခွန်အဇာတသတ်၊ ထွဉ်ႏလွေꩻဆယ်ꩻကပ် အဆရာႏပငါပရာꩻ၊ ခွန်အဇာတသတ် တမာꩻငေါဝ်းတဝ်း အုံဒျာႏတေ့ꩻတေ့ꩻ၊ ခွန်အဇာတသတ်ရိုꩻ- "ဆရာႏဇီ၀က- တွိုႏဆရာႏဟ မလောဝ်းတဝ်းနုဲင်းဝင်ꩻအီ၊ ပွိုးထမုဲင်ꩻ အုံတေ့ꩻထာꩻဟောင်း"ခွန်ရီနုဲင်းနဝ်ꩻ။ "ခွန်မျတ်ဗွေႏဩ- အီႏမာꩻရောင်းဖေႏဒါႏ နီဗွေႏသꩻ၊ အီႏမာꩻခွꩻဖေႏဒါႏ နီဗွေႏသွုန်ႏနဝ်ꩻ အဝ်ႏဒျာႏ ဗွေႏဘုရာꩻလွုမ်ꩻဗွေႏဩ" "ဆရာႏဇီ၀က- ဗုဒ္ဓဗွေႏဘုရာꩻ အဝ်ႏညာꩻတန်နဲ့၊ အဝ်ႏမုဲင်ꩻကိုယိုခါ" သꩻရောင်းသꩻရေꩻ ရီစွဉ်ႏဒျာႏနုဲင်းနဝ်ꩻ။ "အဝ်ႏဗော့ꩻပေႏဗွေႏ- တွမ်ႏတပဲ့ꩻသံဃာႏ တရေင်နီရျာꩻငတ်ꩻဆီ အဝ်ႏဗော့ꩻခွေသွဉ်း တခေါ့ꩻဥယျာဉ်ႏခြံကိုသူꩻ ဗွေႏဩ" "ဆရာႏဇီ၀က - ပေါႏနဝ်ꩻတဲ့ လွေꩻစွဉ်ႏယိုခါခါ၊ စီႏစဲဉ်ႏနေး ဆင်ဖုံႏနဝ်ꩻဟုဲင်း" အဇာတသတ် ကထွိုင်ႏလွေꩻထီႏဗာႏ ဗွေႏမျတ်ဘုရာꩻတွမ်ႏ တပဲ့ꩻသံဃာႏ ယေန်ႏယေန်ႏကေႏကေႏ ဣန္ဒြေႏဟောဝ်ဟောဝ်နဝ်ꩻ ယူႏလꩻသဲင်ꩻစွဉ်ႏ အပိုခိုပေႏ၊ "ခွေပိုခိုပေႏ ဥဒယဘဒ္ဒနောဝ်ꩻ မဉ်ႏယေန်ႏကေႏနုဲင်းဗွေႏသံဃာႏဖုံႏသူꩻနဝ်ꩻ ယံငါႏမွော့ဟွေး"အဝ်ႏယူႏစွေးတေ့ꩻ နုဲင်းနဝ်ꩻတွင်ꩻ နီဗွေႏဘုရာꩻရီ- "တကာႏခွန် အဇာတသတ်- နာꩻသꩻရက်တွိုႏစွဉ်ႏ နာꩻပိုပေႏလောင်းမွေးနေး၊ မွိုးဖါသီးနဝ်ꩻ ရက်မွေးမုဲင်းပို နုဲင်းနဝ်ꩻလွဉ်းလွဉ်း" နီဗွေႏဘုရာꩻတိန်ႏရိုꩻနုဲင်းနဝ်ꩻတွော့ꩻ အဇာတသတ် ငွိုးစွော့ꩻစွဉ်ႏထာꩻ၊ ဝွေꩻနဝ်ꩻ နာႏမာႏထိုꩻ ဒေဝဒတ်ငေါဝ်းတဲင် 'မာꩻသီမာႏထိုꩻအဖါ'၊ ကွပ်ပွိုးနဝ်ꩻမꩻ ကန်းတော့ꩻအဖါ ဗွေႏဘုရာꩻ၊ ဗွေႏဘုရာꩻ ဟော်ꩻဖေႏတရာꩻ၊ ခွန်ကထွိုင်ႏသဲင်ꩻထိုꩻထွူနဝ်ꩻ ဗွေႏဘုရာꩻရိုꩻ- "ဝွေꩻမဉ်ႏတမာꩻသီတဝ်း အဖါနဝ်ꩻ လꩻစွဉ်ႏတမဂ်တဖိုလ်ႏ၊ ယိုခါဟန်ႏ၊ ကွပ်မာꩻသီဖါ-ယားမာႏချာအနမ်းတဲင် အီႏလင်ꩻဗာႏတောဒျာႏ ငါးရုဲင်ꩻခမ်းသူꩻ" ဗွေႏဘုရာꩻရိုꩻနုဲင်းနောဝ်ꩻသွူ။ (သုတ္တန်ႏပိဋကတ်၊ သီလက္ခန္ဓပါဠိတောႏ၊ သာမညဖလသုတ်)[၁][၂]