မဉ်ႏငမ်းမွေးမွေးနဝ်ꩻ
"အာပတ္တိဘေဒသုတ် (မဉ်ႏငမ်းမွေးမွေးနဝ်ꩻ အာပတ်သင်ꩻတဝ်း)" ရဟန်ꩻသီးဖုံႏဟွေး- ပွိုင်းဝွို့တွမ်ႏအာပတ် (အပဲ့စ်)တဲင် ဟောဝ်ငမ်းခရာႏ ဘေꩻအဝ်းလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ ခါန်လိုꩻဖုံႏဆွမ်ꩻလွဉ် ပါꩻအပဲ့စ်တန်တဖြာꩻ၊ ဝင်ꩻကြော့ꩻကြေင်းအကတူႏ၊ စွိုင်တဗန်ႏအစူ၊ ဝင်ꩻစွီႏလွေꩻဝေင်ꩻဆနဝ် သင်ႏခဲင်ꩻကို၊ ဝင်ꩻဗက်ꩻတပစ်ꩻအငွဉ်ꩻ၊ ဝင်ꩻမာꩻသီထိုꩻ၊ ပါꩻတဖြာꩻထီႏ၊ ဝွေꩻယူႏနုဲင်းယို- 'ခွေမဉ်ႏမာꩻ ထာꩻမာꩻမာႏ အမျိုꩻနဝ်ꩻနဝ်ꩻ ဝင်ꩻအီႏမာꩻသီခွေ နုဲင်းပါꩻသူꩻ၊ ထာꩻမာꩻအပဲ့စ်တန် အမျိုꩻနဝ်ꩻနဝ်ꩻ ခွေခံႏမာꩻတဝ်းလာꩻလာꩻ' ဝွေꩻစဉ်ꩻစာꩻ ဝွေꩻငမ်းမွေးမုဲင်းစွဉ်ႏ နုဲင်းနောဝ်ꩻသွူ။ ရဟန်ꩻခိုတရိုꩻတဝ်း (ရဟန်ꩻမူႏတရိုꩻတဝ်း) မဉ်ႏငမ်းနုဲင်း ပါꩻကငမ်းထာꩻသီနဝ်ꩻ ပါရာဇိကအာပတ် တသင်ꩻတဝ်းဒွိုန်းသားတဲ့ အမျိုꩻသင်ꩻဒွုမ်မွေးတဝ်း၊ မဉ်ႏသင်ꩻလဲဉ်းတဲ့ အအုံ(လဲဉ်)ထာꩻနုဲင်းနဝ်ꩻ အမျိုꩻဗွုန်ႏဒွုမ်မွေးတဝ်း၊ ကွပ်ငမ်းအာပတ် (ပွိုးငမ်းအပဲ့စ်)တဲင် အာပတ်ကြောင်းစင်ရာꩻ (အုံသျင်ႏနေး၊ ထွက်ထိုꩻနေး)တမျိုꩻမျိုꩻနဝ်ꩻ ဝွေꩻမာꩻဗာႏ သေႏချာႏနောဝ်ꩻသွူ။ ရဟန်ꩻသီးဖုံႏဟွေး- ၂။ ပါꩻအပဲ့စ်သားတဖြာꩻ ဝင်ꩻအွဉ်ႏကꩻ ခွမ်ꩻလာꩻဖြေင်း၊ အွဉ်ႏတဖြွူအကလူꩻ၊ ထွဉ်ႏထမ်ႏတဆူ၊ 'ခွေယိုနဝ်ꩻ မာꩻမာႏထာꩻ၊ ထွာအပဲ့စ်သား၊ အဗာႏဗွုမ်တွမ်ႏတဆူ၊ နီဗွေႏသီး ကေႏနပ်နုဲင်းမုဲင်ꩻတဲ့ ဗွုမ်သွော့ဟုဲင်း၊ ခွေသွဉ်းခံႏဖေႏဒျာႏ'ဆောႏဗာႏထာꩻ လိုꩻခြာနုဲင်းနဝ်ꩻ။ ပါꩻတဖြာꩻနဝ်ꩻ ငမ်းဝင်ꩻမာꩻနုဲင်းနဝ်ꩻတဲင် ခံႏမာꩻတဝ်း ထာꩻမာꩻမာႏအမျိုꩻနဝ်ꩻꩻ ရဟန်ꩻသီးတဲ့ မဉ်ႏငမ်းနုဲင်း ပါꩻကငမ်း(တဆူ)နဝ်ꩻ 'သံဃာဒိသေသ်အာပတ်'မဉ်ႏသင်ꩻတဝ်းဒွိုန်းတဲ့ အမျိုꩻသင်ꩻဒွုမ်မွေးတောဝ်း၊ မဉ်ႏသင်ꩻလဲဉ်းတဲ့ ဆဲင်ႏရာꩻမာꩻ၊ ဝွေꩻလွမ်ꩻလာꩻစွဉ်ႏ(ဆောက်တယ်ႏစွဉ်ႏပေါင်၊ ပရိဝါသ်)သနယ်။ ရဟန်ꩻသီးဖုံႏဟွေး- ၃။ ပါꩻအပဲစ်သားတဖြာꩻနောဝ်ꩻ ထမ်ႏတွမ်ႏဖါႏပုံႏ၊ ထွဉ်ႏဝင်ꩻဖုတ်ꩻရောင် ဝွေꩻကတူႏ၊ လယ်ႏဒေါ့ꩻဗာႏဝင်ꩻနုဲင်းနဝ်ꩻ၊ ယူႏယူႏငမ်းနုဲင်းနဝ်ꩻတဲင် ခံႏမာꩻမာႏတဝ်း ထာꩻမာꩻနဝ်ꩻ၊ ရဟန်ꩻသီးတဲ့ မဉ်ႏငမ်း(ပါꩻဖုတ်ꩻအကတူႏတွမ်ႏဖါႏ)နုဲင်းနဝ်ꩻနဝ်ꩻ 'ပါစိတ်အာပတ်'မဉ်ႏသင်ꩻဒွိုန်းတဲ့ သင်ꩻထွာတဝ်းဒွုမ်၊ မဉ်ႏသင်ꩻလဲဉ်းတဲ့ တလဲင်ႏချင်ꩻလွမ်ꩻလာꩻ၊ 'ကျာꩻစွဉ်ႏဒေႏသနာႏ'သနယ်။ ရဟန်ꩻသီးဖုံႏဟွေး- ၄။ ပါꩻအပဲ့စ်သားတဖြာꩻနောဝ်ꩻ လွေꩻထေ့လိုꩻအာခြာ၊ ထွဉ်ႏဝင်ꩻသွမ်ꩻသဲ့ꩻ ကဲ့ꩻရဲ့ꩻရောင်ဝွေꩻ၊ ထွဉ်ႏဝင်ꩻခွန်းရောင်ဝွေꩻ၊ ပါꩻတဖြာꩻနဝ်ꩻ ငမ်းနုဲင်းနဝ်ꩻတဲင် ခံႏမာꩻမာႏတဝ်းနုဲင်းနဝ်ꩻ၊ ရဟန်ꩻသီးတဲ့ မဉ်ႏငမ်းနုဲင်း ပါꩻကငမ်းဝင်ꩻသဲ့ꩻသွမ်ꩻနဝ်ꩻ 'ပါဋိဒေသနီအာပတ်'မဉ်ႏသင်ꩻဒွိုန်းတဲ့ တသင်ꩻဒွုမ်ဒျာႏရင်ꩻ၊ မဉ်ႏသင်ꩻလဲဉ်းတဲ့ အနယ်ꩻဆဲင်ႏရာꩻ လွမ်ꩻလာꩻစွဉ်ႏသနယ်။ နီဗွေႏဘုရာꩻ ဟော်ꩻကျာꩻနယ် နုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ အာပတ္တိဘေဒသုတ်)[၁][၂]