အီႏသဲင်ꩻလွဉ်ꩻဝါꩻဝွတ္တရာꩻ

"ဥဂ္ဂဟသုတ် (အီႏသဲင်ꩻလွဉ်ꩻဝါꩻ ဝွတ္တရာꩻ ယံမာꩻနုဲင်းယိုနော)"

အွိုးခꩻတလဲင်ႏ မေဏ္ဍကသဌေꩻလီꩻ တကာႏဥဂ္ဂဟနဝ်ꩻ ထင်ႏပင်ꩻဗွေႏဘုရာꩻ၊ မွူးရောဝ်ꩻ ဝွေꩻအီႏကပ်သွမ်ꩻ ဝွေꩻလမ်း၊ ဗွေႏဘုရာꩻတွမ်ႏ ရဟန်ꩻလစ်ꩻပါꩻ၊ ပင်ꩻငတ်ꩻပါꩻနောဝ်ꩻသွူ။ နုဲင်းမွူးရောဝ်ꩻ သွုံꩻသွမ်ꩻထွူ အီႏနာႏသွူတရာꩻအချိန်ႏနဝ်ꩻ ဥဂ္ဂဟလောဝ်း ဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ခွေသွဉ်းပို မူႏနံꩻဖုံႏယိုနဝ်ꩻ အီႏတောႏလမ်းသွူ၊ အီႏသဲင်ꩻလွဉ်ꩻသွူ အဝါꩻဖုံႏ၊ ကွပ်နဝ်ꩻမꩻ ဖေႏသွာ့ ပိုမူႏသီး ဩဝါဒ၊ နီဗွေႏဘုရာꩻ ငေါဝ်းအဆွုံꩻအမꩻ ဩဝါဒနဝ်ꩻ ပိုမူႏသီးအတွက်တာႏ ချမ်ꩻသာႏစီꩻပွာꩻ ညဆွာꩻနေင်ႏလာ အီႏထွာလွေꩻသနယ် ဗွေႏဩ"လောဝ်းဗွေႏဘုရာꩻနုဲင်းနောဝ်ꩻ။ ဗွေႏဘုရာꩻရိုꩻ- "နင်ꩻမူႏသီးဖုံႏဟွေး- ပွိုင်းဝွို့တွမ်ႏ တောႏလမ်းတောႏပါႏ မင်္ဂလာႏယိုအတွက် အီႏဖေႏဩဝါဒငတ်ꩻချက်၊ နစ်နစ်သက်သက် ခံႏထူႏလွသွော့နော။ နင်ꩻမူႏသီးဖုံႏဟွေး- ၁။ ထွိုင်ႏရီးသွော့ဝါꩻ၊ ဗေင်ႏဆုဲင်ꩻသွော့ဝါꩻ၊ ဝင်ꩻကဒေါ့ꩻဖေႏ ငေါဝ်းဟောဝ်ငွါဒျာႏနဝ်ꩻ နာႏသွော့၊ မာꩻဖေႏသွော့ ဝင်ꩻကကျွိုက်အတွိုင်ꩻ၊ အုံယေန်ႏကေႏတဗွီႏ၊ ဒေါ့ꩻသွော့ငေါဝ်းအွီႏအွီႏနော။ နင်ꩻမူႏသီးဖုံႏဟွေး- ၂။ ရိုႏသေႏသွော့ ဖူဖီနော၊ ဝွေꩻသီးကရိုႏသေႏဒါႏ ရဟန်ꩻသံဃာႏနဝ်ꩻ သီတဲ့ရိုႏသေႏသွော့နော၊ လူႏသွော့နော၊ ထဉ်ႏမဉ်ႏဖျော်တဲ့ ဒါဖေႏသွော့ခင်ႏလမ်း၊ အွဉ်ႏတံꩻဖေႏသွော့ထီ၊ ဒေါ့ꩻရီငေါဝ်းအွီႏအွီႏနော။ နင်ꩻမူႏသီးဖုံႏဟွေး- ၃။ ထာꩻမာꩻလမ်းကိုဖုံႏနဝ်ꩻ မာꩻဗာႏကုဲင်းကုဲင်း၊ လမ်းကိုယို လိုႏမာꩻအမျိုꩻမုဲင်ꩻကရိုꩻနဝ်ꩻ နေးတွမ်ႏဉာဏ်ႏ ဝွေႏဖန်ႏယံယံ၊ နမ်းထွိုင်ႏမာꩻသွော့နော။ နင်ꩻမူႏသီးဖုံႏဟွေး- ၄။ ဝါꩻခိုကဟဲ့ꩻခါꩻ ထာꩻမာꩻသားဖုံႏနဝ်ꩻ အမာꩻမွေးထာꩻမာꩻနဲ့၊ အမာꩻမွေးတဝ်းထာꩻမာꩻ အခိုႏမွိုင်းထာꩻနဲ့-နဝ်ꩻတဲ့ ထွားဗာႏ၊ ဝွေꩻသီးမဉ်ႏအုံဟောဝ်တဝ်းတဲ့ လွမ်ꩻလာꩻဗာႏ၊ ထာꩻအံႏထာꩻအွꩻဖေႏဗာႏ၊ မတ်နုဲင်းသွီႏယာႏ အွဉ်ႏရေꩻဗာႏနော။ နင်ꩻမူႏသီးဖုံႏဟွေး- ၅။ ဝါꩻခိုကထုမ်ႏ ကလꩻတရိုꩻတောဝ်း၊ နင်ꩻသီးကထိုမ်ႏ ကလꩻတရိုꩻတဝ်း၊ ကလꩻလွဉ်ဒါႏ ရွဉ်ခံꩻတခြိုꩻ အမျိုꩻမျိုꩻဖုံႏနဝ်ꩻ သီမ်ꩻဟောဝ်ဟောဝ်ဗာႏ၊ အံႏသိပ်ꩻမွုန်း၊ နေးထာꩻပျောႏ-လောႏထာꩻမွန်း ယားပျင်ႏမွုန်းရွဉ်ခံꩻ၊ အွꩻမွုန်းဒေါဝ်၊ တောႏလောင်ꩻမွုန်းထာꩻနော။ နင်ꩻသီးဖုံႏ (လမ်းသားမူႏ အလောင်ႏအလင်သီးဖုံႏ) မဉ်မာꩻလွဉ်ꩻ ယိုငတ်ꩻချက်နဝ်ꩻ တသက်ချမ်ꩻသာႏ ခန္ဓာႏကုဲင်လီ မဉ်ႏသီနင်ꩻနမ်း လူꩻခမ်းတွိုႏဗာႏနောဝ်ꩻသွူ။