အွဉ်ငါယံတွမ်ႏ
"အွဉ်ငါယံတွမ်ႏ အွဉ်ငါညမ်း"
အစွိုꩻအဗူႏတစွိုꩻ တိုꩻတက်'တတိုꩻတက်တဝ်း၊ ထဲ့ဖွိုႏတထဲ့ဖွိုႏတောဝ်းဖုံႏ ကားကအောဝ်ႏနောဝ်ꩻ အဓိကလဲဉ်း အွဉ်ငါသားအလောင်းကရိုꩻနောဝ်ꩻ အွဉ်ငါယံ "ဂျွန်မက်ဝဲလ်"ရိုꩻနောဝ်ꩻသွူ။ အစွိုꩻအဗူႏအတွိုင်ꩻအတာႏ အဓိကအရေꩻကီꩻချက်နောဝ်ꩻ (ခေါင်းဆောင်)အွဉ်ငါတူႏနောဝ်ꩻသွူ။ အွဉ်ငါယံမဉ်ႏအောဝ်ႏလဲ့ ထောင်လွဉ်ꩻယံသားလဲ့ ပေါႏထန်ႏသွူ။ အွဉ်ငါယံတွမ်ႏ ထောင်လွဉ်ꩻသားကျ မဉ်ႏအောဝ်ႏသော့ꩻအစွိုꩻ တစွိုꩻစွိုꩻကိုနောဝ်ꩻ ထင်ႏထိုတိုꩻတက်မွိုင်သွူတကာႏတောဝ်း မာꩻတွိုင်ꩻရော့ꩻ ဒေါ့ꩻတွိုင်ꩻထွာနောဝ်ꩻသွူ။ အစွိုꩻအဗူႏတွိုင်ꩻ အွဉ်ငါနွောင်ꩻသားလဲ့အောဝ်ႏ၊ တအွဉ်ငါနွောင်ꩻတောဝ်း ခံႏထူႏဒျာႏမဉ်ꩻလွုမ်ꩻလဲ့ အောဝ်ႏဒါႏနောဝ်ꩻသွူ။ အစွိုꩻအဗူႏအကို ပေါႏအရာႏ (ရာထူး)အောဝ်ႏတွိုင်ꩻလဲ့ တဟဲ့ꩻနွောင်ꩻတောဝ်း အွဉ်ငါယံသွူ။ နီစူဆꩻလ လိုꩻအောဝ်ႏတွိုင်ꩻ၊ ထွဉ်ႏခရာႏလိုꩻအောဝ်ႏတွိုင်ꩻလဲ့ တဟဲ့ꩻနွောင်ꩻတောဝ်းအွဉ်ငါ၊ အွဉ်ငါကရိုꩻဒါႏ အထီအသွီႏယို မဉ်ႏဗွေ၊ မဉ်ႏလွုမ်းကွုမ်ႏ အစွိုꩻအဗူႏဖေႏကတွိုႏလꩻနွောင်ꩻ ကောဝ်ႏထွန်ႏအွဉ်ငါနောဝ်ꩻမꩻ ဟဲ့ꩻထွိုက် အွဉ်ငါယံနောဝ်ꩻသွူ။
အွဉ်ငါယံ (ခေါင်းဆောင်)ကရိုꩻနောဝ်ꩻ အောဝ်ႏလွုမ်ꩻအာႏဏာႏ (ပါဝါ)လဲ့ တထွာတောဝ်းအွဉ်ငါသွူ။ "ဩဇာႏ(ပါဝါ)မဉ်ႏအောဝ်ႏမꩻ ဟဲ့ꩻနွောင်ꩻအွဉ်ငါယံ (ခေါင်းဆောင်)သွူ။ အောဝ်ႏဒျာႏ အာႏဏာႏ(ပါဝါ)လွုမ်ꩻတွော့ꩻ ဩဇာႏ(ပါဝါ)မဉ်ႏအောဝ်ႏတောဝ်းနောဝ်ꩻ အွဉ်ငါယံအစဲစ် ဟဲ့ꩻနွောင်ꩻတောဝ်း၊ ထွာဒျာႏ ထာꩻမာꩻတဗာႏဗာႏကို အစွိုꩻအကဲႏလွုမ်ꩻသွူ။ မဉ်ႏလꩻလွဉ်အာႏဏာႏ ခင်ႏလမ်း(ရာထူး)နောဝ်ꩻ မဲဉ်တမုဲင်ꩻမုဲင်ꩻ ထွာလွဉ်အစွိုꩻအကဲႏနောဝ်ꩻသွူ။ ကွဲႏတွော့ꩻ ကအီႏထွာဗာႏ အွဉ်ငါယံနောဝ်ꩻ အာႏဏာႏ ခင်ႏလမ်း(ရာထူး)ယို အရေꩻတန်ထွꩻတောဝ်း အွဉ်ငါယံသီး အထီအသွီႏဗွေ၊ သꩻရင်ꩻဗွာစင်အလောင်းသွူ။ အွဉ်ငါယံ မဉ်ႏမဲဉ်ႏမွေးနောဝ်ꩻ ထူႏတာႏဝွန်ႏမုꩻ အဗွေတဗာႏအောဝ်ႏဒျာႏသွူ။ အွဉ်ငါသားယဟန်ႏ ကထူႏတာႏဝွန်ႏတွမ်ႏ အခွင်ꩻအရေꩻယို ထူႏအာဒျာႏ အခွင်ꩻအရေꩻ၊ နုဲင်းယိုစား အွဉ်ငါမွေးတောဝ်း၊ အွဉ်ချာဒျာႏ၊ ထိုꩻဖုဲင်းဒျာႏတာႏဝွန်ႏ၊ ထူႏတေားဒျာႏ အခွင်ꩻအရေꩻလွုမ်ꩻတွော့ꩻ ဟဲ့ꩻဗာႏ"အွဉ်ချာ"လိုꩻသျောင်ႏတာႏဝွန်ႏသွူ။ ယိုနောဝ်ꩻ "အွဉ်ငါ"တွမ်ႏ"အွဉ်ချာ"အကွာႏလို့ဝင်ꩻနုဲင်းမုဲင်ꩻကရိုꩻနောဝ်ꩻ အောဝ်ႏလိုႏသေသွူ။
"အွဉ်ငါ"ကရိုꩻနောဝ်ꩻ သေတာႏဝွန်ႏ သေအခိန်ႏ၊ "အွဉ်ချာ"ကရိုꩻနောဝ်ꩻ ထူႏအခွင်ꩻအရေꩻ၊ လဲ့ꩻထာꩻမာꩻ၊ သျောင်ႏထာꩻမာꩻသွူ။ နောဝ်ꩻမꩻ ဝင်ꩻကရိုꩻ "တမွန်ႏတွမ်ႏ တခါꩻ"နောဝ်ꩻသနဲ့၊ အစွိုꩻအဗူႏမဉ်ႏအောင်ႏမျင်ႏထင်ႏထိုနောဝ်ꩻ "အွဉ်ချာ"သားနောဝ်ꩻ ထွားတမွန်ႏတဲ့၊ ပေါႏမဉ်ႏထွားတမွန်ႏတဲ့ ဝွေꩻထီႏချာဝွေꩻလွိုးတဲင် "အစွိုꩻအဗူႏကတိုꩻတက်ဗာႏယိုနောဝ်ꩻ ကွပ်ခွေ"ရိုꩻနောဝ်ꩻစား၊ ဝွေꩻနောဝ်ꩻ အစွိုꩻအဗူႏကမော့ꩻ အယပ်ꩻအခုဲင်ႏခိန်ႏနောဝ်ꩻ ဝွေꩻမဲဉ်ထူႏတောဝ်းတာႏဝွန်ႏ၊ ထိုꩻလဲ့ꩻညာꩻဒျာႏ၊ ယိုတလဲင်ႏနောဝ်ꩻ ဝွေꩻထွားတောဝ်းဒွုမ် "တမွန်ႏ"၊ ထွားတခါႏခါႏလုဲင်ႏ တခါꩻငွါ ဝွေꩻကထီႏဒါႏလိုꩻယို ဒင်ႏဝင်ꩻအပဲစ်၊ ရိုꩻတေားပါꩻ တာႏဝွန်ႏကေႏတောဝ်းနောဝ်ꩻသွူ။ ပေါႏရိုꩻ အွဉ်ငါ(ခေါင်းဆောင်)နောဝ်ꩻ တွမ်ႏဝွေꩻယို ထွာဒျာႏသွံတွမ်ႏလစ်ꩻ၊ အွဉ်ငါ (ခေါင်းဆောင်)ယံကရိုꩻနောဝ်ꩻ အစွိုꩻအဗူႏ တိုꩻတက်ခိန်ႏယို ထွာဒျာႏတခါꩻငွါသွူ။ ဖေႏအာႏဒျာႏ လိုꩻဆꩻလ၊ ကတိုꩻတက် ထင်ႏထိုဗာႏနုဲင်းယိုနောဝ်ꩻ 'ကွပ်စွဉ်ႏသီတွော့ꩻ အောင်ႏမျင်ႏဗာႏ"ဖေႏအာႏဒျာႏငေါဝ်းသွူ။
အစွိုꩻအဗူႏ မဉ်ႏမော့ꩻလွဉ် အယပ်ꩻအခုဲင်ႏ ပျဿနာႏနောဝ်ꩻ ထွားဒျာႏတမွန်ႏနေနေ၊ ကွဲႏတွော့ꩻ ခံႏထူႏချက်တဗွုန်တောဝ်းလို့ဝင်ꩻ၊ ကွပ်ပွိုးတမုဲင်ꩻဗွုန်တောဝ်းလို့ဝင်ꩻဟောင်း "ယိုနောဝ်ꩻ တာႏဝွန်ႏအောဝ်ႏခွေလောင်း"ကရိုꩻဒါႏ ထာꩻသေနွို့လွဉ်ဒျာႏ၊ ယိုစာမꩻ ဟဲ့ꩻ'အွဉ်ငါ(ခေါင်းဆောင်)ယံ၊ အွဉ်ငါ(ခေါင်းဆောင်)စဲစ်နောဝ်ꩻသွူ။ မဉ်ႏမော့ꩻလွဉ် အယပ်ꩻအခုဲင်ႏ ပျဿနာႏတမျိုꩻမျိုꩻခိန်ႏ ခွဲႏတရွို့ꩻဒျာႏထိုꩻ၊ တာႏဝွန်ႏကားကအောဝ်ႏ အွဉ်ႏဒင်ႏလင်ꩻဝင်ꩻလောင်းနောဝ်ꩻ "အွဉ်ချာ"သီး ကုဲင်းမာꩻဒါႏထာꩻမာꩻ အွဉ်ငါညံးတဲင် ဟဲ့ꩻဗာႏ "အွဉ်ချာ"နောဝ်ꩻသွူ။ အစွိုꩻအဗူႏ ကအွဉ်ငါဒါႏခင်ႏလမ်းနောဝ်ꩻ အွဉ်ငါမုꩻပွုံႏစံႏ အမျိုꩻမျိုꩻအောဝ်ႏသွူ။ မဉ်ႏတဲမ်းဗာႏတွမ်ႏ အင်္ဂလိပ်ငေါဝ်းလဲ့ (Leadership Style)သွူ။ အွဉ်ငါယံတွိုင်ꩻသီးနောဝ်ꩻ နီအစွိုꩻအဗူႏယို နီအီႏအွဉ်ငါဗာႏ (Style)နုဲင်းမုဲင်ꩻကရိုꩻလဲ့ အောဝ်ႏလိုႏသေသွူ။ အုံငါတွော့ꩻ အွဉ်ဖေႏ၊ အုံအထာႏဝအွဉ်ဖေႏ၊ အုံဆꩻချာသွတ်ꩻတွော့ꩻ အွဉ်ဖေႏကရိုꩻဒါႏ အကျမ်ꩻသဖော်ꩻယို သေနာႏခါꩻဗာႏသွူ။
နီအစွိုꩻအဗူႏ တသွောင်းထိုခိန်ႏ အကျိုꩻတရာꩻ အမျတ်အောဝ်ႏလွဉ်ခိန်ႏနောဝ်ꩻ အုံဒျာႏဆꩻချာ၊ အစွိုꩻအဗူႏ မဉ်ႏမော့ꩻလွဉ်အယပ်ꩻအခုဲင်ႏ ပျဿနာႏခိန်ႏနောဝ်ꩻ ထင်ႏငါတနွောင်း၊ အွဉ်တသွောင်းဗာႏနောဝ်ꩻသွူ။ ထွိုင်ႏတွိုႏအွဉ်ချာသားနောဝ်ꩻ အစွိုꩻအဗူႏ ထင်ႏထိုခိန်ႏယို ထင်ႏငါအွဉ်ႏကျွားနမ်း ရိုꩻဒျာႏ"ဝွေꩻယံ"၊ မဉ်ႏမော့ꩻအယပ်ꩻအခုဲင်ႏခိန်ႏနောဝ်ꩻ အုံဆꩻချာ၊ အုံဗဉ်ႏအုံဗꩻဒျာႏထာꩻနောဝ်ꩻ ဟဲ့ꩻဗာႏ"အွဉ်ငါ(ခေါင်းဆောင်)ညံး"နောဝ်ꩻသွူ။ ကွပ်ပွိုတမုဲင်ꩻနဲးတဲင် ကအီႏစေသျင်ꩻဖေႏ ပျဿနာႏယို သတိꩻအဲဉ်ထောဝ်းနောဝ်ꩻသွူ။ အစွိုꩻအဗူႏအလောင်း ကအီႏစွဉ်ꩻဒါႏသွီႏသက် ခံႏဗွုန်ႏတောဝ်း အနစ်နာႏ၊ သꩻရက်ခွိုꩻအဲဉ်ထောဝ်း ရိုꩻဗာႏနုဲင်းနောဝ်ꩻ၊ အွဉ်ငါယံသားနောဝ်ꩻ အစွိုꩻအဗူႏ ဖေႏကသာႏယာႏတဲင် ခံႏအနစ်နာႏ မာꩻထာꩻမာꩻ၊ ထွိုင်ႏတွိုႏအွဉ်ချာသားနောဝ်ꩻ မာꩻနစ်နာႏအစွိုꩻအဗူႏ၊ ယူႏဒျာႏဝွေꩻနမ်းတာႏနောဝ်ꩻသွူ။ ပေါႏတထူႏတောဝ်းတာႏဝွန်ႏ၊ ပေါႏသျောင်ႏဒျာႏတာႏဝွန်ႏ၊ ထွားဒျာႏနမ်းတာႏအကျိုꩻနောဝ်ꩻ ဒင်ႏထွိုက်တောဝ်း အတန်အကဲႏသွူ။ ပေါႏလိုꩻယိုစား ထွာအွဉ်ငါ (ခေါင်းဆောင်)နောဝ်ꩻ ဆꩻချာသားလဲ့ မဲ့ꩻထွာနုဲင်းဒါႏ "အွဉ်ချာ"တဲင် လွိုင်ႏကွုန်ꩻသာႏယာႏရေꩻ ကအီႏတိုꩻတက်လဲ့ မဲ့ꩻအထဲ့ဖွိုႏထဲင်းထဲင်းနောဝ်ꩻသွူ။
ကွပ်နောဝ်ꩻမꩻ ခံႏထူႏလွုမ်ꩻမဉ်ꩻ အွဉ်ငါ(ခေါင်းဆောင်) ပေါႏတထူႏဒါႏတောဝ်းတာႏဝွန်ႏ၊ တသေတောဝ်းတာႏဝွန်ႏ ဖေႏကထွာဗာႏမွုန်းနောဝ်ꩻ အွဉ်ငါယံသီး ကလိုႏကျင်ꩻလွောက်ꩻနာႏဒါႏ အချက်ဖုံႏနုဲင်းဆꩻလယိုသွူ။
- ၁။ အွဉ်ငါယံသီးကထူႏထွိုက် ကထူႏသင်ꩻဒါႏ တာႏဝွန်ႏတွမ်ႏ ပျဿနာႏတွိုင်ꩻ မဉ်ႏပေါႏလွဉ် တွမ်ႏသတ္တိအောဝ်ႏ(အောဝ်ႏ)ထူႏတာႏဝွန်ႏသွော့၊ "အစွိုꩻအဗူႏ အဟောဝ်အကုဲင်ကရိုꩻနောဝ်ꩻ အောဝ်ႏလို့ခွေလောင်း"ခံႏထူႏသွော့နုဲင်းနောဝ်ꩻ။
- ၂။ အစွိုꩻအဗူႏ ဖေႏကတွိုႏနွောင်ꩻ ကောဝ်ႏထွန်ႏထျꩻလွုမ်ꩻတကာႏတောဝ်း ကအီႏထောင်လွဉ်ꩻဒါႏ လိုꩻပေႏဆꩻချာသီး လိုႏအပ်ချက်ဖုံႏလဲ့ ထူႏတာႏဝွန်ႏ ဖေႏကဖြေႏသျင်ꩻနွောင်ꩻဒါႏလိုꩻတဖြာꩻ သွဉ်သင်ဖေႏဗာႏ၊ နောဝ်ꩻမꩻ ကထောင်လွဉ်ꩻသား လိုႏပေႏဆꩻချာယို အီႏယွုမ်းအံႏ အီႏရိုႏသေႏနောဝ်ꩻသွူ။
- ၃။ လိုꩻကသျောင်ႏဒါႏ တာႏဝွန်ႏနောဝ်ꩻ အွဉ်ငါသား (ခေါင်းဆောင်)မုꩻ ထဲ့သွုမ်ꩻအီတဖူꩻကရိုꩻနောဝ်ꩻ အွဉ်ႏသော့ꩻသေႏသေႏသွော့ ကတူႏခီးကို။
- ၄။ ဖေႏကအုံတနွောင်းနွောင်း အစွိုꩻအဗူႏသီးဆꩻငါ၊ ဖေႏကထွာသွော့ ယံနယ်ပုဂ္ဂိုလ်ႏတန်တဖြာꩻ။
- ၅။ တပဲ့ꩻဟောဝ်တောဝ်းလဲ့ အထျꩻဆရာႏ၊ ပိုလီꩻမဉ်ႏတဟောဝ်တောဝ်းလဲ့ အထျꩻအောဝ်ႏမွိုးဖါ-ကရိုꩻဒါႏအတွိုင်ꩻ အစွိုꩻအဗူႏမဉ်ႏတဟောဝ်တောဝ်း၊ မဉ်ꩻမဉ်ႏကုဲင်လဲ့ အထျꩻအောဝ်ႏ အွဉ်ငါ (ခေါင်းဆောင်)ကရိုꩻနောဝ်ꩻ ယူႏလꩻသေႏသေႏတဲင် အစွိုꩻအဗူႏအတာႏ ခံႏအနစ်နာႏတဲင် ဖေႏကထွာသွော့ အွဉ်ငါ (ခေါင်းဆောင်)ယံတဖြာꩻအကျောင်ꩻ-[၁]
အာႏကွိုꩻ
[မွဉ်းဖျင် | မွဉ်းဖျင်အရွီးခိုႏ]- ↑ အယ်ဒီတာ၊ မောင်းမွူးခံꩻ အမုဲင်-၃၂