ကရီဗာႏထွာတဝ်းခွန်လိုꩻ
"နသိ ရာဇဘဋော-ထွာတဝ်းခွန်သွဉ်ခွန်လိုꩻ မွေးနေဟောင်း"ကရီးဗာႏနုဲင်းနဝ်ꩻအကျောင်ꩻ(အခရာႏ)
အွိုးခꩻတလဲင်ႏ မဂဓခမ်းကူသူꩻ စွန်တခွန်ꩻ သျုတ်တရေင်ထာꩻတဲင် ခွန်တန်ဗိမ္ဗိသာရရို- "ယိုစဲ့ꩻပိုႏတန်၊ အမတ်တန်သီးဖုံႏဟွေး- ခမ်းကူသူꩻနဝ်ꩻ ခိုးလျားတရေင် စွန်တခွန်ꩻဖုံႏ၊ သီစုသီစဲ့ꩻ လွေꩻမာꩻငိမ်ꩻဟုဲင်း"ထွဉ်ႏနုဲင်းနဝ်ꩻ။ "ခွန်တန် ထွဉ်ႏလွေꩻတွိုက်ꩻစဲ့ꩻ-တဲ့" စဲ့ꩻသတင်ꩻနဝ်ꩻ တလဲင်ႏချင်ꩻ တိုးတားလို့စွဉ်ႏ၊ စဲ့ꩻပိုႏယံယံဖုံႏ ယူႏယော့တဝစ်ꩻနုဲင်းယို - "တွိုက်ꩻစဲ့ꩻကရိုꩻနဝ်ꩻ နီခꩻဝင်ꩻ၊ ဝင်ꩻခꩻနီ၊ နီသီဝင်ꩻသီ၊ ဒုံသားခိုးလျား၊ ရပ်သားဒုက္ခ၊ အံႏမလို့ထာꩻ၊ ထာꩻမာꩻအကုသိုလ်ႏတန်ဒျာႏ၊ ဖေႏနေးကလွစ်ခꩻ၊ ဖေႏနေးကလွစ်လꩻ၊ ဖေႏနေးကလွစ်လွေꩻနဝ်ꩻ လွင်းထင်ႏဒျာႏကျောင်ꩻ၊ အုံဒျာႏသူႏတောႏကောင်ꩻခြာ၊ ထွာဒျာႏရဟန်ꩻမꩻ"ချꩻသꩻနုဲင်းနဝ်ꩻထွူတဲင် ထင်းဗုဲင်တေ့ꩻလွခန်းဒျာႏ ရဟန်ꩻဖုံႏနောဝ်ꩻသွူ။ ခံႏတာႏဝွန်ႏသား ကထွိုင်ႏလယ်ႏထိုမ်ႏထွား စဲ့ꩻပိုႏတန်ဖုံႏနဝ်ꩻ ထီႏဒွုမ်၊ "ထင်ႏဗုဲင်လို့လဲဉ်း-စင်ꩻ"လꩻသတင်ꩻနုဲင်းနဝ်ꩻမꩻ သꩻလျားစွဉ်ႏထာꩻ။ "သာႏကီႏဝင်ႏမျိုꩻ ဘုရာꩻခွိုꩻဖုံႏနဝ်ꩻ လိုꩻခြောငါႏနဲ့၊ မအွဉ်ႏဗုဲင်ထိုꩻတွိုး နီစဲ့ꩻပိုႏ စဲ့ꩻသားဖုံႏနဝ်ꩻဟောင်း" ထီႏဖွီသွမ်ꩻသဲ့ꩻ ကဲ့ꩻရဲ့ꩻရဟန်ꩻသံဃာႏ၊ အပဲစ်နယ်ပျꩻ-ဒေါ့ꩻတေက်ꩻနျꩻ ရဟန်ꩻသံဃာႏဖုံႏ နုဲင်းနောဝ်ꩻသွူ။ ကဆွုံꩻဖျတ်တရာꩻသား အမတ်တန်တဲ့ဝါႏဖုံႏနဝ်ꩻ ခွန်တန်ဗိမ္ဗိသာရ ရီနုဲင်းယို- "ယိုအမတ်တန်ဖုံႏဟွေး- ဗွေႏရဟန်ꩻသီး ကအွဉ်ႏဗုဲင်ထိုꩻ နီလိုꩻနီစဲ့ꩻသားဖုံႏနဝ်ꩻ အပဲစ်တံႏ အီႏအွဉ်ႏခံႏဗာႏနုဲင်းမုဲင်ꩻ" "- ဥပဇ္ဈာယ်ႏဆရာႏနဝ်ꩻ သွို့ꩻထဲ့ထိုꩻဗာႏ အငွဉ်ꩻ၊ - ကဖတ်ဖေႏ ကမ္မဝါႏသားဖုံႏနဝ်ꩻ သွို့ꩻထဲ့ထိုꩻဗာႏ အဖြေꩻ၊ - တဖြွမ်းကို (ကာရက)သံဃာႏဖုံႏနဝ်ꩻ တွဲႏထို့ထိုꩻဗာႏ အရွို့ဆွတ်ꩻတဖဲ့ꩻ-ဗွေႏဩ" ခွန်တန်ဗိမ္ဗိသာရ ထင်းလောဝ်းနီဗွေႏဘုရာꩻနုဲင်းယို- "ဩဗွေႏ- ခွန်သဒ္ဓါႏတရာꩻ တအဲဉ်ထဝ်းဖုံႏနဝ်ꩻ သံဃာႏအပဲစ်ပေႏပေႏတဲ့ မဲ့ꩻအနိစ္စက် တမွိုꩻတမာꩻဒါႏသံဃာႏ၊ ခွန်သွဉ်းခွန်လိုꩻဖုံႏနဝ်ꩻ အွဉ်ႏဗုဲင်ထိုꩻမွုန်းစင်ꩻ ဗွေႏဩ"လဝ်းနုဲင်းနဝ်ꩻတဲင် နီဗွေႏဘုရာꩻရိုꩻ- "ရဟန်ꩻသီးဖုံႏဟွေး- ခွန်သွဉ်းခွန်လိုꩻနဝ်ꩻ အွဉ်ႏဗုဲင်ထိုꩻစင်ꩻလꩻတဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ မဟာခန္ဓက)[၁][၂]