ကရီဗာႏနီးခန်ခရာႏ
"အဏဏောသိ-နီးခန်ကင်ꩻနေဟောင်း"ကရီဗာႏနုဲင်းနဝ်ꩻအကျောင်ꩻ(အခရာႏ)
အွိုးခꩻတလဲင်ႏ ပါꩻခိုတဖြာꩻနဝ်ꩻ "နီးတန်-ခန်အာ" ဖြော်ချာဝင်ꩻနွောင်ꩻတဝ်းဒွုမ်၊ ပါꩻသမ်းအဝ်ႏလွဉ်ကွီခွိုꩻခွိုꩻ၊ ဝွေꩻယူႏထာꩻ သူႏသေသူႏသာဒွုမ်၊ ကွပ်နောဝ်ꩻမꩻ လွင်းထင်ႏထေ့ ရဟန်ꩻသီးဖုံႏထျꩻ၊ ကွီဗုဲင်စင်ꩻ၊ ဗွေႏရဟန်ꩻသီးဖုံႏတဲ့ တရီတရာတဝ်း၊ ယိုꩻယိုꩻမာꩻမာꩻ အွဉ်ႏဗုဲင်ဖေႏခန်းဒျာႏ ပါꩻနီးတန်နဝ်ꩻသွူ။ ကလိုႏလꩻချာသားဖုံႏနဝ်ꩻ ထိုမ်ႏလွဉ်ꩻပါꩻနီးတန်နဝ်ꩻတွော့ꩻ ကထွိုင်ႏလွေꩻမော့ꩻနဝ်ꩻ အဝ်ႏထွာထိုꩻလဲဉ်းစင်ꩻ၊ ထွာစင်ꩻတဲ့ယဝ်း ကလိုႏလꩻသားနဝ်ꩻရိုꩻ- "ဝွေꩻဗွေႏယိုနဝ်ꩻ အဝ်ႏလိုႏဖြော်နီညလဲဉ်း၊ ထိုꩻလဲ့ꩻနီး မာꩻနုဲင်းယို အမျိုꩻလꩻနဲ့၊ နီပြွꩻထိုꩻစွဉ်ႏ အသင်္ကန်ꩻ၊ နီဆွမ်ꩻသဲင်ꩻစွဉ်ႏ ရဟန်ꩻယို" ဒေါ့ꩻလွနုဲင်းနဝ်ꩻ။ ကဟွုန်သား လိုꩻအသောင်အရင်ꩻဖုံႏနဝ်ꩻရိုꩻ- "အဝ်ႏလိုႏလꩻတဲ့ယဝ်း၊ ဝွေꩻဗွေႏယို အဝ်ႏလိုႏဖေႏသီတဲ့ယဝ်း သီမာꩻကြွို့ꩻကြꩻလꩻတဝ်းကွေး၊ ပေါႏထွာသွူရဟန်ꩻ သာႏကီႏဝင်ႏမျိုꩻ ဘုရာꩻခွိုꩻနဝ်ꩻ ဖေႏကဟော်ꩻဟောဝ်ဟောဝ်ဗာႏတရာꩻ၊ ဖေႏအားထွုတ်ဗာႏဟောဝ်တရာꩻတဲင် ရဟန်ꩻဖုံႏနဝ်ꩻနဝ်ꩻ ပါꩻမုဲင်ꩻခန်းတဲ့ယဝ်း ဖေႏပဲ့စ်တဗာႏဗာႏ-မာꩻမာႏတမျိုꩻမျိုꩻလꩻတဝ်း၊ ခွန်တန်ဗိမ္ဗိသာရ ချꩻခါꩻအမိန်းနုဲင်းနဝ်ꩻ မွေးတောဝ်းနဲ့" ကလိုႏလꩻချာသားရိုꩻ- "ဝွေꩻဗွေႏယိုနဝ်ꩻ အဝ်ႏလိုႏဖေႏနီ အာတန်မွော့ယို၊ တွိုႏကကွီငါးခါနဝ်ꩻ အွဉ်ႏအွီႏအငေါဝ်း၊ အွဉ်ႏဗန်အလွိုး၊ 'တညတဝ်း မဲ့ꩻဖြော်ချာမွေးမွေးဒျာႏ'ရိုꩻနုဲင်းနဝ်ꩻ၊ ဝွေꩻရိုꩻညတဝ်းတဲ့ ယိုခါနဝ်ꩻ ညငါႏလဲဉ်း၊ လွေꩻကွီစစနဝ်ꩻ အွိုအွိုမဲ့ꩻဖြော်ဒျာႏတဲ့၊ ကွဲညညတွော့ꩻ အွဉ်ႏတကုဲင်အလွိုး ဒေါ့ꩻဆွော့ꩻတောစွဉ်ႏထာꩻ၊ ဝွေꩻဒေါ့ꩻဆွော့ꩻရီးဟ။ နီတဲ့ အဗာႏလꩻချာတွော့ꩻ နီတငမ်းတဝ်း၊ နီဒေါ့ꩻဆွော့ꩻချာနုဲင်းနုဲင်းစွဉ်ႏ။ သီယူႏစံꩻမွိုင်၊ ပေါႏနီးအာအာ၊ ပေါႏထင်ႏထွာရဟန်ꩻနဝ်ꩻ ဖြော်တဝ်းနီးတဲ့ လꩻဒျာႏနဲ့၊ သီဖြော်ဖေႏနဲ့၊ ခွန်တန်အီႏဖြော်ဖေႏနဲ့၊ သီဒေါ့ꩻစံꩻမွိုင်၊ ရဟန်ꩻသီးဖုံႏတဲ့ လိုꩻခြောငါႏနဲ့၊ လိုꩻအောဝ်ႏဒျာႏ နီးသားယိုလွုမ်ꩻနဲ့၊ မထွားဗဲင်းတဝ်း၊ မရီချာချာငါငါဗဲင်းတဝ်း၊ အွဉ်ႏဗုဲင်လိုꩻထိုꩻနီးနုဲင်းယိုနဝ်ꩻ ဝင်ꩻစောင်းအီႏကေႏညိုႏနဲ့၊ ရဟန်ꩻသီးဖုံႏနဝ်ꩻ မအွဉ်ႏဗုဲင်ငါငီတွိုး ပါꩻနီးတန်ယိုဟောင်း" သꩻဟမ်းပေါင်းလျားလျား၊ ဒေါ့ꩻဆွာꩻတရွားစွဉ်ႏထာꩻနုဲင်းနဝ်ꩻ၊ ထီႏဖွီသွမ်ꩻသဲ့ꩻ ကဲ့ꩻရဲ့ꩻမွေးစွဉ်ႏ ရဟန်ꩻသီးဖုံႏ၊ အပဲစ်နယ်ပျꩻ-ဒေါ့ꩻတေက်ꩻနျꩻမွေးစွဉ်ႏ ရဟန်ꩻသီးဖုံႏနုဲင်းနဝ်ꩻသွူ။ ဗွေႏရဟန်ꩻသီးဖုံႏ သꩻချမ်ꩻသားတဝ်း၊ လွေꩻလောဝ်းနယ် ဗွေႏဘုရာꩻ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- ပေါႏလိုꩻနီးခန်အဝ်ႏနဝ်ꩻ အွဉ်ႏဗုဲင်ဖေႏစင်ꩻ လꩻတဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)[၁][၂]