ကရီဗာႏမွိုးဖါစွꩻခွင်ꩻ
"အနုညာတောသိ မာတာပိတူဟိ-မွိုးရင်ꩻဖါရင်ꩻ အွဉ်ႏစွꩻခွင်ꩻနေဟောင်း"ကရီဗာႏအခရာႏ
အွိုႏခꩻတရောဝ်ꩻ နီဗွေႏဘုရာꩻနဝ်ꩻ ကျွꩻသဲင်ꩻတကာႏဖါ (ခွန်တန်သုဒ္ဓေါဒန)ဟော်ကို၊ နင်ꩻယသောႏဓရာႏနဝ်ꩻ ထွဉ်ႏအပိုခို ခွန်ပေႏရာဟုလာႏ လွေꩻကွီအမွေႏ ဗွေႏဘုရာꩻထျꩻ။ ဗွေႏဘုရာꩻ ထွိုင်ႏကျွꩻသဲင်ꩻနဝ်ꩻ ရာဟုလာႏတဲ့ သဲင်ꩻလွဉ်ꩻဗွေႏဘုရာꩻ၊ ဗွေႏဘုရာꩻထွဉ်ႏ ဗွေႏသာရိပုတ္တရာႏ အွဉ်ႏဗုဲင်သျင်ႏ၊ ဗွေႏသာရိပုတ္တရာႏ လောဝ်းရီ- "အီႏအွဉ်ႏဗုဲင်ဗာႏ နုဲင်းမုဲင်ꩻအီဗွေႏ" "ကြော့ꩻရီးကတူႏ၊ ထူးသင်္ကန်ꩻအွဉ်ႏဗုဲင်၊ ထွဉ်ႏရွစ်သွော့- - ဗုဒ္ဓံ သရဏံ ဂစ္ဆာမိ - ခွေသွဉ်းဆယ်ꩻကပ် ဘုရာꩻဗွေႏဩ၊ - ဓမ္မံ သရဏံ ဂစ္ဆာမိ - ခွေသွဉ်းဆယ်ꩻကပ် တရာꩻဗွေႏဩ၊ - သံဃံ သရဏံ ဂစ္ဆာမိ - ခွေသွဉ်းဆယ်ꩻကပ် သံဃာႏဗွေႏဩ၊ ( ဒုတိယမ္ပိ၊ တတိယမ္ပိ ) နေးတွမ်ႏ သရဏဂုံႏသွံပါꩻ အွဉ်ႏဗုဲင်ဖေႏသျင်ႏ နုဲင်းနောဝ်ꩻဟုဲင်း" "ခွန်ပေႏရာဟုလာႏနဝ်ꩻတဲ့ ဗုဲင်ထိုꩻလဲဉ်းသျင်ႏ-တဲ့" သတင်ꩻထူꩻယိုနဝ်ꩻ တလဲင်ႏချင်ꩻ တွိုႏသဲင်ꩻစွဉ်ႏဟော်၊ သဲစ်ကဟွုန် သတင်ꩻနောဝ်ꩻတဲင် ခွန်သုဒ္ဓေါဒနနဝ်ꩻ တလဲင်ႏချင်ꩻ နက်ထင်ႏထေ့စွဉ်ႏ ဗွေႏဘုရာꩻ၊ နုဲင်းစွဉ်ႏအီႏငွိုးငွိုးထာꩻ၊ လောင်ႏလွိုးပေႏသꩻ၊ ပသီႏပအွောင်ႏ လောဝ်းနီဗွေႏဘုရာꩻနုဲင်းယို- "ဩဗွေႏ- နီဗွေႏနဝ်ꩻ ခွေသွဉ်းရေႏအွဉ်ႏထွာခွန်၊ နီဗွေႏထန်ႏခေ့ꩻ၊ လွေꩻဗုဲင်တေ့ꩻထိုꩻဒျာႏရဟန်ꩻ၊ နဝ်ꩻတလဲင်ႏတဲ့ ခွေသွဉ်းသꩻဒုက္ခဗာႏဖိုလဲဉ်း၊ ပိုခိုတန်သီႏထတ်နဝ်ꩻ ဗုဲင်ထိုꩻခန်းရဟန်ꩻတဲ့ယဝ်း ပိုခိုပေႏနန္ဒ အဝ်ႏနေက ခွေသွဉ်းဖြေႏသꩻယင်းနုဲင်းနဝ်ꩻ။ ပိုခိုပေႏနန္ဒ ကပ်သွမ်ꩻမင်္ဂလာႏရောဝ်ꩻနဝ်ꩻ နီဗွေႏကိန်းထွဉ်ႏခန်း အီသဲင်ꩻသပိတ်၊ တွိုႏကျောင်ꩻတွော့ꩻ အွဉ်ႏဗုဲင်နွိုင်ႏစွော့ꩻစင်ꩻ၊ ဝင်ꩻတဲ့ တမဉ်ဗုဲင်တဝ်း၊ အလဲင်ႏနဝ်ꩻတဲ့ မဲ့ထီဟူႏလ-သꩻဒုက္ခဖျင်တလဲင်ႏ၊ လီꩻပေႏရာႏဟုလာႏ အဝ်ႏနေက၊ သꩻဒုက္ခနဝ်ꩻ အဝ်ႏလွမ်ꩻလာꩻအီတွမ်ႏ လီꩻပေႏရာႏဟုလာႏ။ ယိုနဝ်ꩻ လီꩻပေႏတဲ့ ဗုဲင်ထိုꩻဖျင်လဲဉ်းသျင်ႏ၊ သာႏကီႏဝင်ႏခွန်ခွိုꩻ သွတ်ꩻထိုꩻလဲဉ်းသွူဗွေႏ၊ ယိုတလဲင်ႏနဝ်ꩻ ခွေသွဉ်းသꩻ ယိန်းဒုက္ခမွေးမုဲင်းစွဉ်ႏထာꩻ၊ မွိုးဖါသီးကရက်ပို မွိုးဖြားဖါဖြားသီး ကရက်လီꩻပေႏယိုနဝ်ꩻ တွိုႏဗꩻစွဉ်ႏ ဆွတ်ꩻခီးသူꩻဗွေႏ၊ ကွပ်နဝ်ꩻမꩻ ပေါႏတလꩻတဝ်း ဝင်ꩻမွိုးဝင်ꩻဖါအခွင်ꩻနဝ်ꩻ အွဉ်ႏဗုဲင်မွုန်း သျင်ႏစင်ꩻဗွေႏဩ" လောဝ်းဆွာꩻတရွားစွဉ်ႏ နီဗွေႏဘုရာꩻနုဲင်းနောဝ်ꩻသွူ။ နီဗွေႏဘုရာꩻတဲ့ မိန်းစွဉ်ႏနုဲင်းယို- "ရဟန်ꩻသီးဖုံႏဟွေး- မွိုးရင်ꩻဖါရင်ꩻ ပေါႏတအွဉ်ႏစွꩻတောဝ်း အခွင်ꩻနဝ်ꩻ အွဉ်ႏဗုဲင်သျင်ႏစင်ꩻ လꩻတဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်'ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)[၁][၂]