ကာႏလသွံပါꩻထွာအီဝွဋ်ဒုက္ခ
"ဒုတိယနိဒါနသုတ် (ကာႏလသွံပါꩻ ထာꩻမာꩻထွာအီ ဝွဋ်ဒုက္ခအထျꩻအထောင်ꩻ)"
ရဟန်ꩻသီးဖုံႏဟွေး- သꩻယူႏချာ ကခံႏစာꩻဗာႏဖို (အတိတ်-ကာႏမဂွုဏ်ႏ)နဝ်ꩻတဲင် 'ဆန္ဒရာဂ'ထွာ၊ ဆန္ဒရာႏဂနဝ်ꩻ ထွာအထျꩻ၊ ဆန္ဒရာႏဂနဝ်ꩻ အွဉ်ငါ၊ ကထွာလွဉ်ထာꩻမာꩻဖုံႏနဝ်ꩻ ဟဲ့ꩻ'အကုသိုလ်ႏ'ထာꩻမာꩻ၊ ထွာ 'သံယော်ꩻဇဉ်ႏ'တပါꩻ၊ ထွာတဖြွီꩻ အဝ်ႏစွိုင်ခါꩻတလီး၊ ပေါႏသံယော်ꩻဇဉ်ႏတဖြွီꩻနဝ်ꩻ အဝ်ႏစွိုင်ခါꩻနဝ်ꩻ တလꩻနွောင်ꩻတဝ်း မဂ်ဖိုလ်ႏနိဗ္ဗာန်ႏ၊ တထန်ႏနွောင်ꩻတဝ်း ဝွဋ်ဒုက္ခနောဝ်ꩻသွူ။ ရဟန်ꩻသီးဖုံႏဟွေး- သꩻယူႏငါလွေꩻ တွိုႏဆုဲင်ꩻဆုဲင်ꩻ၊ မဉ်ခံႏစာꩻထဲင်းယင်း (အနာႏဂတ်-ကာႏမဂွုဏ်ႏ)နဝ်ꩻတဲင် 'ဆန္ဒရာဂ'ထွာ၊ ဆန္ဒရာႏဂနဝ်ꩻ ထွာအထျꩻ၊ ဆန္ဒရာႏဂနဝ်ꩻအွဉ်ငါ၊ ကထွာလွဉ်ထာꩻမာꩻဖုံႏနဝ်ꩻ ဟဲ့ꩻ'အကုသိုလ်ႏ'ထာꩻမာꩻ၊ ထွာ'သံယော်ꩻဇဉ်ႏ'တပါꩻ၊ ထွာတဖြွီꩻ အောဝ်ႏစွိုင်ခါꩻတလီး၊ ပေါႏသံယော်ꩻဇဉ်ႏတဖြွီꩻနဝ်ꩻ အဝ်ႏစွိုင်ခါꩻနဝ်ꩻ တလꩻနွောင်ꩻတဝ်း မဂ်ဖိုလ်ႏနိဗ္ဗာန်ႏ၊ တထန်ႏနွောင်ꩻတဝ်း ဝွဋ်ဒုက္ခနောဝ်ꩻသွူ။ ရဟန်ꩻသီးဖုံႏဟွေး- သꩻယူႏကအဝ်ႏစာꩻ (ပစ္စုပ္ပန်ႏ-ကာႏမဂွုဏ်ႏ)ယိုခါတဲင် 'ဆန္ဒရာဂ'ထွာ၊ ဆန္ဒရာႏဂနဝ်ꩻ ထွာအထျꩻ၊ ဆန္ဒရာႏဂနဝ်ꩻအွဉ်ငါ၊ ကထွာလွဉ်ထာꩻမာꩻဖုံႏနဝ်ꩻ ဟဲ့ꩻ'အကုသိုလ်ႏ'ထာꩻမာꩻ၊ ထွာ'သံယော်ꩻဇဉ်ႏ'တပါꩻ၊ ထွာတဖြွီꩻ အဝ်ႏစွိုင်ခါꩻတလီး၊ ပေါႏသံယော်ꩻဇဉ်ႏတဖြွီꩻနဝ်ꩻ အဝ်ႏစွိုင်ခါꩻနဝ်ꩻ တလꩻနွောင်ꩻတဝ်း မဂ်ဖိုလ်ႏနိဗ္ဗာန်ႏ၊ တထန်ႏနွောင်ꩻတဝ်း ဝွဋ်ဒုက္ခနောဝ်ꩻသွူ။ ရဟန်ꩻသီးဖုံႏဟွေး- သꩻယူႏချာ ကခံႏစာꩻဗာႏဖို (အတိတ်-ကာႏမဂွုဏ်ႏ)နဝ်ꩻတဲင် ထွာဆန္ဒရာႏဂ၊ ထွာအကုသိုလ်ႏ၊ အီႏခံႏဗာႏအပဲ့စ်၊ သေယူႏလꩻနုဲင်းနဝ်ꩻတွော့ꩻ ဖေႏကခံႏဗာႏမွုန်း အပဲ့စ်နဝ်ꩻ မဉ်ခံႏစာꩻတဝ်း ကာႏမဂွုဏ်ႏ၊ ဆန္ဒရာႏဂထွာတောဝ်း။ သꩻယူႏငါလွေꩻ မဉ်ခံႏစာꩻထဲင်းယင်း (အနာဂတ်-ကာႏမဂွုဏ်ႏ)နဝ်ꩻတဲင် ထွာဆန္ဒရာႏဂ၊ ထွာအကုသိုလ်ႏ၊ အီႏခံႏဗာႏအပဲ့စ်၊ သေယူႏလꩻနုဲင်းနဝ်ꩻတွော့ꩻ ဖေႏကခံႏဗာႏမွုန်း အပဲစ်နောဝ်ꩻ မဉ်ခံႏစာꩻတဝ်းကာႏမဂွုဏ်ႏ၊ ဆန္ဒရာႏဂထွာတောဝ်း။ သꩻယူႏကအဝ်ႏခံႏစာꩻ (ပစ္စုပ္ပန်ႏ-ကာႏမဂွုဏ်ႏ)ယိုခါတဲင် ထွာဆန္ဒရာႏဂ၊ ထွာအကုသိုလ်ႏ၊ အီႏခံႏဗာႏအပဲ့စ်၊ သေယူႏလꩻနုဲင်းနဝ်ꩻတွော့ꩻ ဖေႏကခံႏဗာႏမွုန်းအပဲ့စ်နဝ်ꩻ မဉ်ခံႏစာꩻတဝ်း ကာႏမဂွုဏ်ႏ၊ ဆန္ဒရာႏဂ ထွာတောဝ်းနောဝ်ꩻသွူ။ ရဟန်ꩻသီးဖုံႏဟွေး- အတိတ်ဆန္ဒရာႏဂတဲ့ ထွာတဝ်း၊ အနာႏဂတ်ဆန္ဒရာႏဂတဲ့ ထွာတဝ်း၊ ပစ္စုပ္ပန်ႏဆန္ဒရာႏဂတဲ့ ထွာတဝ်း၊ သꩻဆန္ဒရာႏဂမွေးတဝ်း၊ ထွာဒျာႏ သꩻကြောင်းသꩻဗွာ၊ သꩻကြောင်းအွဉ်ငါ၊ သꩻဗွာထွာအထျꩻ၊ ကထွာလွဉ် ထာꩻမာꩻဖုံႏနဝ်ꩻ ဟဲ့ꩻ'ကုသိုလ်ႏ'ထာꩻမာꩻ၊ ထွာတဝ်း သံယော်ꩻဇဉ်ႏတပါꩻပါꩻ၊ ထွာတဝ်းတဖြွီꩻ အဝ်ႏစွိုင်ခါꩻတလီးလီး ပေါႏသံယော်ꩻဇဉ်ႏတဖြွီꩻ တအဝ်ႏစွိုင်ခါꩻတဝ်းနဝ်ꩻ လꩻနွောင်ꩻဒျာႏ မဂ်ဖိုလ်ႏနိဗ္ဗာန်ႏ၊ ထန်ႏနွောင်ꩻဒျာႏ ဝွဋ်ဒုက္ခနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ဒုတိယနိဒါနသုတ်)[၁][၂]