ကွပ်ထာꩻအာႏနာႏ
"ကွပ်ထာꩻအာႏနာႏ သုမ်ꩻတိန်ꩻဗာႏ" နီပအိုဝ်ႏလိုꩻမျိုꩻနောဝ်ꩻ မာꩻထာꩻမာꩻအမျိုꩻမုဲင်ꩻမုဲင်ꩻခန်းတယဝ်း အာႏနာႏဒါႏငါႏပါꩻ၊ ဝင်ꩻသꩻဒါႏငါႏပါꩻ၊ ဟွုန်ငမ်းဒါႏငါႏပါꩻတဲင် နွို့ဝင်ꩻဖုံႏခြာ၊ နွို့ဝင်ꩻလိုꩻမျိုꩻခါႏဖုံႏနောဝ်ꩻ ဂွုဏ်ႏသိက္ခာႏထဲ့ဖွိုႏအီငါႏ၊ မဲ့ငါပေႏအီငါႏ၊ ဝင်ꩻထင်းဖွီထီႏပေႏအီငါႏနောဝ်ꩻသွူ။ ထာꩻအာႏနာႏ၊ ထာꩻဝင်ꩻသꩻ၊ ထာꩻငမ်းဖုံႏယို အခင်ႏလမ်းတွမ်ႏအခင်ႏလမ်းဒျာႏ၊ ထွားဗာႏအခေႏနေႏတဲင် အဗာႏအာႏနာႏကိုမꩻ အာႏနာႏဗာႏ၊ အခင်ႏလမ်းဝင်ꩻသꩻကိုမꩻ ဝင်ꩻသꩻဗာႏ၊ အထွောင်းငမ်းကိုမꩻ ငမ်းဗာႏ၊ ခင်ႏလမ်းတွိုင်ꩻကို တဖော့ဖင်ꩻစွူစွူဗော့ꩻ နီထာꩻအာႏနာႏ၊ ထာꩻဝင်ꩻသꩻ၊ ထာꩻငမ်းဖုံႏလဲ့ တလꩻတောဝ်း၊ မာꩻထဲ့ဖွိုႏအီငါႏ နီလိုꩻသီး အဆင်းအရန်းနောဝ်ꩻသွူ။ နီလိုꩻပေႏခေတ်ယိုခါနောဝ်ꩻ အထန်ႏတဗန်ႏတဗိဉ်ႏလို့လဲဉ်းထာꩻ၊ အမျိုꩻအာႏနာႏကိုနောဝ်ꩻ အာႏနာႏတောဝ်း၊ အမျိုꩻတအာႏနာႏတောဝ်းကိုနောဝ်ꩻ သမ်းအာႏနာႏတေားဒျာႏနောဝ်ꩻသွူ၊ ထွားဗော့ꩻ အမွိုးဆꩻငါ အဖါဆꩻခိုႏ ပုဂ္ဂိုလ်ႏလိုꩻကျောင်ꩻ ကတူႏထွောင်းဖဲ့ꩻနောဝ်ꩻ တဟောဝ်လွေꩻတောဝ်း၊ တဟောဝ်အုံတောဝ်း၊ တဟောဝ်စွဉ်ꩻဝွေႏသော့ꩻတောဝ်း အထွူႏအဖွီဖုံႏလဲ့ သမ်းမာꩻလုဲင်ႏ၊ သမ်းအာႏနာႏတောဝ်းလုဲင်ႏဒျာႏနောဝ်ꩻသွူ။ ထီႏဒျာႏ လိုꩻကျောင်ꩻသံႏဃာႏ လွေꩻတုံꩻသွမ်ꩻတရိုꩻတောဝ်း၊ အောဝ်ႏထောင်ခင်ႏထာꩻတရိုꩻတောဝ်း၊ အောဝ်ႏအုံလင်ꩻထာꩻတရိုꩻတောဝ်းနောဝ်ꩻ ဝါးလူႏကြုံႏကြင်ႏစွဉ်ႏအကာꩻ၊ အဆိုင်ကယ်ဖုံႏ၊ လွေꩻတရံꩻထံထိမ်စွဉ်ႏထာꩻ အဆꩻငါဖုံႏ၊ အမျိုꩻယိုနောဝ်ꩻ အောဝ်ႏလိုႏအာႏနာႏခင်ႏလမ်းကို သမ်းအာႏနာႏတောဝ်းလုဲင်ႏဒျာႏနောဝ်ꩻသွူ။ ပုဂ္ဂိုလ်ႏလိုꩻကျောင်ꩻ လိုꩻတန်ကအောဝ်ႏဟော်ꩻတရာꩻ၊ ကအောဝ်ႏအုံအစီꩻဝွေꩻအခိန်ႏခါႏဖုံႏနောဝ်ꩻ ဒေါ့ꩻဝေါက် ဒေါ့ꩻသင်ႏခြီခြောဝ်သန် သချင်ꩻအငေါဝ်းနုဲင်းယိုဖုံႏလဲ့ အောဝ်ႏလိုႏအာႏနာႏ၊ သမ်းအာႏနာႏတောဝ်းနောဝ်ꩻသွူ။ ဝင်ꩻလိုꩻဆာတန်ထာꩻသား လမ်းထျꩻလမ်းသောင်၊ ဒုံကိုဖုံႏ အောဝ်ႏတရိုꩻတောဝ်း၊ ဝင်ꩻမာꩻပွယ်ꩻပေႏပွယ်ꩻတန်တရိုꩻတောဝ်း၊ ဝင်ꩻထဉ်ႏတရတပါꩻ လိုꩻညာꩻလိုꩻသေ လိုꩻဒါႏအောဝ်ႏသော့ꩻဒုံကိုတရိုꩻတောဝ်း အွꩻမွန်ꩻဒေါဝ် ထေင်ညင်ꩻရွို့ꩻရန်ႏ ရွစ်သင်ႏငေါဝ်းသချင်ꩻနုဲင်းယိုနောဝ်ꩻ အောဝ်ႏလိုႏအာႏနာႏ၊ အောဝ်ႏလိုႏဝင်ꩻသꩻလဲ့ သမ်းတဝင်ꩻသꩻတောဝ်းလုဲင်ႏနောဝ်ꩻသွူ။ အမူႏဖဲ့ꩻလဲ့ လွေꩻဝုဲင်ႏဘုရာꩻတရိုꩻတောဝ်း၊ ထင်ႏကျောင်ꩻထင်ႏကန်ႏတရိုꩻတောဝ်း၊ နွို့အမျာꩻခြာတရိုꩻတောဝ်း တလိုႏကွဉ်ကꩻတောဝ်း နီႏဒွေါင်ႏနီႏပꩻ ကီႏအောဝ်ႏလိုစား သꩻအင်အောဝ်ႏထန်ႏ ပဒေအောဝ်ႏလန်စားဖုံႏနောဝ်ꩻ သမ်းခြွိုင်းကွဉ်ကꩻလုဲင်ႏတေားဒျာႏ၊ သမ်းဝင်ꩻသꩻတောဝ်းနောဝ်ꩻ အနယ်ꩻတမဲဉ်ႏတောဝ်းနောဝ်ꩻသွူ။ တွိုႏအမျိုꩻကအောဝ်ႏလိုႏငမ်းငါႏ နုဲင်းဆွဉ်းယာ၊ ကားယာ၊ ဆို့ꩻရုဲင်ယာ၊ တောႏလောင်ꩻထာꩻ၊ ဖို့ꩻဖိုးပနား၊ လိန်ႏလဲဉ်လိုꩻကျောင်ꩻ၊ ထူႏသဲင်ꩻလိုꩻကျောင်ꩻတခြိုꩻ၊ အံႏအွꩻဒဲဉ်ဒေါဝ်၊ ပဲစ်မာႏစောက်ကာꩻဝင်ꩻပိုမာစတဲင်နုဲင်းယိုဖုံႏနောဝ်ꩻ သမ်းငမ်းတောဝ်း၊ သမ်းအောဝ်ႏမာꩻတေားဒျာႏနောဝ်ꩻသွူ။ တွိုႏကအောဝ်ႏလိုႏ ဒေါ့ꩻသွဉ်ဖေႏဝင်ꩻ၊ အောဝ်ႏလိုႏနွို့ငါႏ အမျာꩻခြာဖုံႏနောဝ်ꩻ သမ်းငမ်းတေားဒျာႏ၊ တွိုႏဝင်ꩻလိုꩻမျိုꩻလွဉ်အံႏဆျာႏ၊ ဝင်ꩻဘာႏသာႏလွဉ်ထုမ်ႏသျုတ်တရေင်စတဲင် နုဲင်းယိုဖုံႏနောဝ်ꩻ တအောဝ်ႏလိုႏငမ်းတောဝ်း၊ အောဝ်ႏလိုႏဒေါ့ꩻရုဲင်းရုဲင်း၊ ခွုမ်စမ်ႏရုဲင်းရုဲင်း၊ မာꩻရုဲင်းရုဲင်း၊ တွူႏတရန်ရုဲင်းရုဲင်းဒျာႏနောဝ်ꩻ သမ်းငမ်းတေားဒျာႏနောဝ်ꩻသွူ။ အောဝ်ႏသေသေ ဝင်ꩻလွဉ်အံႏဆျာႏပျင်ႏလဲဉ်းနီ၊ ဝင်ꩻလွဉ်မာꩻနွောင်ꩻ နိက်စက်လဲဉ်းနီ၊ ဝင်ꩻလွဉ်တေက်ꩻနျꩻလဲဉ်းနီ၊ ဝင်ꩻလွဉ်ထူႏသိမ်ꩻခြေင်လဲဉ်း နီသွို့ꩻခြံလုဲင်းယာႏနောဝ်ꩻ သမ်းဒေါ့ꩻဗွိုန်ႏတောဝ်း၊ သမ်းလွိုဆန်ဗွိုန်ႏတောဝ်း၊ မာꩻဒျာႏနုဲင်းသေတောဝ်း၊ အုံတငွဉ်ႏကြွစ် အွူးဟွူတေားဒျာႏထာꩻနောဝ်ꩻ ဟွိုန်သုမ်ꩻတိန်ꩻငါႏ လိုꩻဖဝတန်ႏဖိုꩻနောဝ်ꩻသွူ။ တွိုႏနီလိုꩻချင်ꩻချင်ꩻ အပဲစ်မဉ်ႏအောဝ်ႏတစိꩻပေႏငါလဲ့ အွဉ်ဝင်ꩻအံႏဆျာႏရောင်၊ အွဉ်ဝင်ꩻဒေါ့ꩻအပွုံႏအမဉ်ꩻ တဗိꩻဗိꩻနေးတဲင် တွိုႏဝင်ꩻလိုꩻမျိုꩻဆꩻငါဖုံႏ လွဉ်အွဉ်ႏမွေးငါအနမ်း အလမ်းထျꩻပေႏငါလဲ့ တဗွိုန်ႏတောဝ်း၊ ထွားချောင်ꩻတေ့ꩻဗာႏနေး ထာꩻဆေင်ႏတိုကို၊ ကေ့ꩻအမေး ငမ်းတရူႏတူးနေးဝင်ꩻနောဝ်ꩻသွူ။ နီဒုံဆောင်ႏကို နီဖြားဒုံ၊ လိုꩻတန်အုပ်ချုပ်ရေꩻသားငါတဲ့ ဝင်ꩻတအွဉ်ႏဟွိုန်တောဝ်း၊ ဝင်ꩻတဖေႏသေတောဝ်းတဲင် ဝင်ꩻလွဉ်ဆွမ်ꩻစွိုင်ခေ့ꩻစွိုင်နာꩻ၊ လွဉ်တွဲႏဗွံခေ့ꩻ တွယ်ႏဗွံနာꩻနောဝ်ꩻ နီအောဝ်ႏလိုႏထူႏအရေꩻ၊ အောဝ်ႏလိုႏလွောင်ႏဗူႏဝင်ꩻ လွိုဆန်နုဲင်းနုဲင်းရောင်ဝင်ꩻလဲ့ ခွေထိုꩻနာꩻဖင်း၊ ခွေငမ်းနာꩻပြေ့ꩻ အုံတေ့ꩻတေ့ꩻ ငမ်းသီငမ်းပဲစ်ꩻတေားဒျာႏဝင်ꩻနောဝ်ꩻသွူ။ နီဒုံဆောင်ႏ ကပဲင်ႏဆဲင်ႏဒါႏ လိုꩻဖြားကဖေႏတုဲင်သေꩻဒါႏ နီသွို့ꩻခြံလုဲင်းယာႏ သေင်ႏဝါႏထီကတူႏဖုံႏလဲ့ ဝင်ꩻလွဉ်ထူႏသိမ်ꩻခြေင်၊ ဝင်ꩻလွဉ်ခူႏတေားထိုꩻလို့ဒျာႏ သဘာဝရတနာႏဖုံႏလဲ့ နုဲင်းဒျာႏတသေတောတ်း၊ ပါꩻလဲင်ꩻယမ်းသွူကတူႏလဲ့ အောဝ်ႏဒွူႏဗော့ꩻဒျာႏတေ့ꩻတေ့ꩻ၊ သမ်းငမ်းတေားဒျာႏပါꩻနောဝ်ꩻ အနယ်ꩻမဲဉ်ႏတောဝ်းနောဝ်ꩻသွူ။ ဝင်ꩻလိုꩻမျိုꩻဘာႏသာႏလင် လွဉ်ထူႏတခွန်ꩻတေ့ꩻ ပဲစ်မာႏစောက်ကာꩻတေ့ꩻသွူ အပိုမူႏ အမာဖုံႏလဲ့ ဒေါ့ꩻချာဝင်ꩻခုဲင်ႏဗွိုန်ႏတောဝ်း၊ အနျာႏနျာႏငါလဲ့ မဲဉ်ဖေႏလွဉ်ꩻပါကဝင်ꩻ၊ ငမ်းတေားဒျာႏ၊ အာႏနာႏတေားဒျာႏနောဝ်ꩻ အမျိုꩻတမွေးတောဝ်းနောဝ်ꩻသွူ။ အစခါ ဝင်ꩻလိုꩻမျိုꩻဘာႏသာႏလင် ဖေႏငါးရွဉ်၊ မာꩻမိတ်ဆွေႏသွꩻဟောဝ်၊ အောဝ်ႏလိုႏနုဲင်းမုဲင်ꩻ ဝင်ꩻဖေႏ၊ ဝင်ꩻတွက်တေ့ꩻ အအေႏအဆီႏတွော့ꩻ ဖေႏချာဝင်ꩻထွိုင်ႏဒါႏတောဝ်းနောဝ်ꩻ ဝင်ꩻကွီအပိုမူႏဖေႏ၊ ဝင်ꩻကွီအမာဖေႏ၊ ဝင်ꩻကွီအလမ်းပါႏ သွို့ꩻခြံ ဖေႏဗာႏဝင်ꩻနောဝ်ꩻ အောဝ်ႏရိုꩻနေက အမိတ်ဆွေႏဟောဝ်နောဝ်ꩻသွူ။ စိမ်စွဉ်ႏအဖြေꩻအစာကိုလဲ့ နုဲင်းနောဝ်ꩻနေနေ၊ တွိုႏနီလိုꩻချင်ꩻချင်ꩻ ကွီဖြေꩻနောဝ်ꩻ တမဉ်ဖေႏတောဝ်း၊ ဝင်ꩻဖေႏလွိုလေႏကြွို့ꩻ အငိုꩻအခန် တစူးတစိꩻပေႏငါလဲ့ စာဖေႏ၊ တွိုႏဆုဲင်ꩻချာ အီႏထွာလွဉ်နုဲင်းမုဲင်ꩻသေတောဝ်း၊ ယိုခါ ပါꩻမျောႏလꩻအဟံႏ၊ ဆုဲင်ꩻဆုဲင်ꩻ ပါꩻမျောႏလꩻပါ အကတူႏ၊ ဆုဲင်ꩻဆုဲင်ꩻ ပါꩻဖျိုးပါအပိုမူႏနောဝ်ꩻ သေတောဝ်း၊ ရိုꩻဒျာႏဝွေꩻသီးဆက်ဆံႏဒါႏတွော့ꩻ ဒေါ့ꩻရီနွောင်ꩻတွမ်ႏဝင်ꩻလိုꩻမျိုꩻတန်၊ အွဉ်ႏယံအီတေားထဲင်းအနမ်းနောဝ်ꩻသွူ။ အမျိုꩻနုဲင်းယိုဖုံႏနောဝ်ꩻ တအောဝ်ႏလိုႏအာႏနာႏတောဝ်း၊ တအောဝ်ႏလိုႏဝင်ꩻသꩻတောဝ်း၊ တအောဝ်ႏလိုႏငမ်းတောဝ်းတဲင် လွေꩻအောဝ်ႏအာႏနာႏတေား၊ ဝင်ꩻသꩻတေား၊ ငမ်းတေားနောဝ်ꩻ နီပအိုဝ်ႏဖဝသုမ်ꩻတိန်ꩻဗာႏအာငါႏ၊ ဝင်ꩻထင်းဖွီထီႏပေႏအီငါႏ နီစွိုးခွိုꩻလိုꩻမျိုꩻနောဝ်ꩻသွူ။ ကွပ်နောဝ်ꩻမꩻ ခွိုင်းယိုမာꩻငါ နီပအိုဝ်ႏစွုမ်ႏဖြာꩻ ပေါႏရိုꩻထာꩻမဲဉ်ႏတရာꩻဖဲ့ꩻ၊ ထာꩻမာꩻဟောဝ်ဖဲ့ꩻနောဝ်ꩻ အာႏနာႏခရာႏဝင်ꩻ၊ ဝင်ꩻသꩻခရာႏဝင်ꩻ၊ ငမ်းခရာႏဝင်ꩻ တလိုႏတောဝ်း၊ အောဝ်ႏလိုႏမာꩻရုဲင်းရုဲင်း၊ ခွုမ်စံႏရုဲင်းရုဲင်း၊ ထွိုင်ႏဒေါ့ꩻရုဲင်းရုဲင်းသွော့ဝင်ꩻအကျောင်ꩻ ခွေသွဉ်းတဲမ်းလိတ်သား မဲဉ်ရိုꩻဖေႏငါႏနုဲင်းနောဝ်ꩻသွူ။ ခွိုင်းယိုမာꩻငါ စိမ်စွဉ်ႏဝင်ꩻလိုꩻမျိုꩻဘာႏသာႏအလောင်းတဲ့နောဝ်ꩻ၊ ဝင်ꩻဒုံဆောင်ႏရပ်ရာႏ ထွုံꩻစံႏယိုꩻယာႏအလောင်းတဲ့နောဝ်ꩻ ကအောဝ်ႏလိုႏထူႏဂွုဏ်ႏကိုတဲ့ ထူႏဂွုဏ်ႏဖေႏဗာႏ၊ ကအောဝ်ႏလိုႏငမ်းကိုတဲ့ ငမ်းဗာႏ၊ တလိုႏထူႏဂွုဏ်ႏတောဝ်း၊ တလိုႏငမ်းတောဝ်းကိုလဲ့ ငမ်းခရာႏတလိုႏတောဝ်း၊ မဲဉ်ဒေါ့ꩻငါႏနုဲင်းနောဝ်ꩻသွူ။ လွူးဗဲင်းခန်းသွော့ဝင်ꩻ သွုန်ႏတသာ သꩻတသာ၊ သတ္တိဗျတ္တိတသာ၊ ခွိုꩻရက်သꩻတသာသာတဲင် ခွိုင်းယိုမာꩻငါ လွောင်ႏဗူႏစွီႏစူ၊ တယ်ႏဆို့ꩻညီꩻညီꩻခန်းဝင်ꩻ လွိုင်ႏကွိုန်ꩻသာႏယာႏရေꩻ၊ ထင်ႏထိုတိုꩻတက်ရေꩻထာꩻမာꩻတွော့ꩻ ပယ်ႏလꩻလꩻခန်းသွော့ဝင်ꩻ ထာꩻအာႏနာႏ၊ ထာꩻဝင်ꩻသꩻ၊ ထာꩻငမ်းကရိုꩻနောဝ်ꩻ တွမ်ႏမေတ္တာႏတဲင်-[၁][၂]