ကွပ်ပွိုးသꩻလျားထာꩻတဲင်တွော့ꩻ

"ကောဓနသုတ် (ကွပ်ပွိုးသꩻလျားထာꩻတဲင်တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏထာꩻလိုႏနွုတ်ꩻစား)" ရဟန်ꩻသီးဖုံႏဟွေး- ကွပ်ပွိုးသꩻလျားထာꩻတဲင်တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏထာꩻလိုႏနွုတ်ꩻစား၊ နွုတ်ꩻစားကရိုꩻနဝ်ꩻ- ၁။ ရန်ႏသူႏရိုꩻ- ပါꩻတတဲ့ꩻတဝ်းခွေသူꩻနဝ်ꩻ 'အလောင်းလွိုး မဉ်ႏတရေꩻတဝ်းနဝ်ꩻ ဟောဝ်ငါႏမွော့ဟွေး' ရန်ႏသူႏသꩻကိုနဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်ထွာအတွိုင်ꩻ ပါꩻတတဲ့ꩻတဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ လူးထီခြွိုင်းနမ်း မာꩻခန်းနုဲင်းနဝ်ꩻတဲ့ယောဝ်း 'အလောင်ႏလွိုး အဝ်ႏတကုဲင်ဒျာႏ'စွူစွူ၊ ကွပ်ပွိုးသꩻလျားထာꩻတဲင်တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (ပထမ)ထာꩻလိုႏအတွိုင်ꩻ (လောင်ႏလွိုးတရေꩻတဝ်း)နောဝ်ꩻသွူ။ ၂။ ရန်ႏသူႏရိုꩻ- ပါꩻတတဲ့ꩻတဝ်းခွေသူꩻနဝ်ꩻ 'အဗေင်ႏထာꩻ မဉ်လꩻတဝ်းနဝ်ꩻ ဟောဝ်ငါႏမွော့ဟွေး'ရန်ႏသူႏသꩻကိုနဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်အွဉ်ႏထွာအတွိုင်ꩻ ပါꩻတထဲ့တဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ဗေင်ႏသော့ꩻသွူ ထာꩻဒါတေင် ကောဇော်ꩻပြေချော်ꩻဆွဉ်ႏသား၊ ခင်ႏလမ်းဗေင်ႏသား အယံစားသွူတဲ့ မဲ့တဗေင်ႏတဝ်း၊ ဗင်ႏထာꩻလꩻတဝ်း၊ ကွပ်ပွိုးသꩻလျားထာꩻတဲင်တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ(ဒုတိယ)ထာꩻလိုႏအတွိုင်ꩻ (ဗေင်ႏထာꩻလꩻတဝ်း)နောဝ်ꩻသွူ။ ၃။ ရန်ႏသူႏရိုꩻ- ပါꩻတထဲ့တဝ်းခွေနဝ်ꩻ 'အစီꩻပွါꩻ မဉ်ႏတထွာတဝ်းနဝ်ꩻ ဟောဝ်ငါႏမွော့ဟွေး'၊ ရန်ႏသူႏသꩻကိုနောဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်အွဉ်ႏထွာအတွိုင်ꩻ 'အစီꩻပွါꩻ မဉ်ႏတထွာတဝ်းနဝ်ꩻ ဟောဝ်ငါႏမွော့ဟွေး'ရန်ႏသူꩻကိုနောဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်အွဉ်ႏထွာအတွိုင်ꩻ ပါꩻတထဲ့တဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ကွပ်သꩻလျားထာꩻတဲင် မာꩻသွူထာꩻမာꩻ အကျိုꩻတအဲဉ်ထဝ်းမျိုꩻတဲ့ ယူႏဒျာႏထာꩻမာꩻအကျိုꩻအဝ်ႏ၊ မာꩻသွူထာꩻမာꩻ အကျိုꩻအဝ်ႏတဲ့ ယူႏဒျာႏ ထာꩻမာꩻအကျိုꩻအဲဉ်ထဝ်း၊ ကွင်ကွင်ကယ်ကယ် စီꩻပွါꩻထွာတဝ်း၊ ကွပ်ပွိုးသꩻလျားထာꩻတဲင်တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (တတိယ)ထာꩻလိုႏအတွိုင်ꩻ (စီꩻပွါꩻထွာတဝ်း)နောဝ်ꩻသွူ။ ၄။ ရန်ႏသူႏရိုꩻ- ပါꩻတထဲ့တဝ်းခွေသူꩻနဝ်ꩻ 'အတခြိုꩻဥစ္စာႏ မဉ်ႏသွုမ်ꩻခြေင်ထိုꩻနဝ်ꩻ ဟောဝ်ငါႏမွော့ဟွေး'ရန်ႏသူႏသꩻကိုနဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်ထွာအတွိုင်ꩻ ပါꩻတထဲ့တဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ကွပ်သꩻလျား ထာꩻမာꩻမာႏတဲင် သိုꩻလီးသိုꩻလူး နေးတွမ်ႏထာꩻတရာꩻ ခွုမ်မာꩻကလꩻ တခြိုꩻဥစ္စာႏဖုံႏနောဝ်ꩻ ခွန်ထူႏသီမ်ꩻခြေင်ထိုꩻခန်းဒျာႏတွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (စတုတ္ထ)ထာꩻလိုႏအတွိုင်ꩻ (တခြိုꩻဥစ္စာႏသွုမ်ꩻခြေင်)နောဝ်ꩻသွူ။ ၅။ ရန်ႏသူႏရိုꩻ- ပါꩻတတဲ့တဝ်းခွေသူꩻနဝ်ꩻ 'အချွေႏအရံႏ မဉ်ႏအဲဉ်ထဝ်းနောဝ်ꩻ ဟောဝ်ငါႏမွော့ဟွေး'ရန်ႏသူႏသꩻကိုနဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်အွဉ်ႏထွာအတွိုင်ꩻ ပါꩻတတဲ့ꩻတဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ကွပ်သꩻလျားထာꩻတဲင် (ထꩻထာꩻ၊ ဒိုႏပါꩻ၊ ခွန်းပါꩻ၊ ရိုꩻလျားပါꩻ၊ အချွေႏအရံႏ ထန်ႏထိုꩻလို့တွော့ꩻ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (ပဉ္စမ)ထာꩻလိုႏအတွိုင်ꩻ (အချွေႏအရံႏအဲဉ်ထောဝ်း)နောဝ်ꩻသွူ။ ၆။ ရန်ႏသူႏရိုꩻ- ပါꩻတတဲ့ꩻတဝ်းခွေသူꩻနဝ်ꩻ 'အသွꩻအခွမဉ်ႏအဲဉ်ထဝ်း၊ အဖူးအဝေး မဉ်ႏလဲ့ꩻဖုဲင်း မဉ်ႏသျောင်ႏညာꩻထိုꩻနောဝ်ꩻ ဟောဝ်ငါႏမွော့ဟွေး' ရန်ႏသူႏသꩻကိုနဝ်ꩻ မဉ်အွဉ်ႏထွာနုဲင်းနဝ်ꩻ။ ရန်ႏသူႏကမဉ်အွဉ်ႏထွာအတွိုင်ꩻ ပါꩻတထဲ့ꩻတဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ကွပ်သꩻလျားထꩻတဲင် (ထꩻထာꩻ၊ ဒိုႏပါꩻ၊ ခွန်းပါꩻ၊ ရိုꩻလျားပါꩻ၊ အသွꩻအခွထိုꩻညာꩻ၊ အဖူးအဝေး လဲ့ꩻဖုဲင်းသျောင်ႏညာꩻတွော့ꩻ) မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (ပဉ္စမ) ထာꩻလိုႏအတွိုင်ꩻ (သွꩻခွအဲဉ်ထဝ်း၊ ဖူးဝေးလဲ့ꩻညာꩻထိုꩻ)နောဝ်ꩻသွူ။ ၇။ ရန်ႏသူႏရိုꩻ- ပါꩻတတဲ့ꩻတဝ်းခွေသူꩻနဝ်ꩻ 'ဝွေꩻခန္ဓာႏကုဲင်လီ အမဉ်ႏသီတွိုႏဆုဲင်ꩻ အမဉ်ႏလင်ꩻထဲ့ငါးရုဲင်ꩻနဝ်ꩻ ဟောဝ်ငါႏမွော့ဟွေး' ရန်ႏသူႏသꩻကိုနောဝ်ꩻ မဉ်အွဉ်ႏထွာနုဲင်းနဝ်ꩻ၊ ရန်ႏသူႏကမဉ်အွဉ်ႏထွာအတွိုင်ꩻ ပါꩻတထဲ့တဝ်းဝွေꩻနဝ်ꩻ (မတော်မကာ) ဒေါႏသꩻနွို့ယား အသꩻလျားထာꩻ၊ ကွပ်သꩻလျားထာꩻတဲင် (မာꩻသီဝင်ꩻသက်၊ ထူႏတခွန်ꩻဝင်ꩻခြိုꩻ၊ ပဲစ်မာႏဝင်ꩻပိုမာ) မာꩻမာႏစွဉ်ႏဒျာႏ ကာယဒုစရဲက်သွံပါꩻ၊ ပွိုးဒေါႏသꩻနိစ္စက်တွော့ꩻ (ဒေါ့ꩻလဲဉ်ထာꩻ၊ ဒေါ့ꩻလျားပါꩻ၊ အံႏစာဝင်ꩻမဉ်ꩻ၊ ဒေါ့ꩻငါငီထာꩻ) ဒေါ့ꩻမာႏစွဉ်ႏဒျာႏ ဝစီဒုစရဲက်နဝ်ꩻလစ်ꩻပါꩻ၊ ကွပ်ပွိုးဒေါႏသအဲင်ႏစောက်ꩻ သꩻအောက်ꩻထာꩻတဲင်တွော့ꩻ (ကျံႏသိမ်ꩻခြေင်စွဉ်ႏ ဝင်ꩻတခြိုꩻ၊ ကျံႏမာꩻသီစွဉ်ႏပါꩻ၊ ကျံႏနက် ကျံႏနိစ္စက်စွဉ်ႏပါꩻ) မနော်ꩻဒုစရဲက် သိုမ်ပါꩻဖုံႏနဝ်ꩻ ထွာစွဉ်ႏဒျာႏအသꩻကို၊ ယူႏမာႏစွဉ်ႏဒျာႏထာꩻ။ ကွပ်သꩻလျားထာꩻတဲင် နမ်းမာꩻမာႏ ကာယဒုစရဲက်၊ ဖြောင်းဒေါ့ꩻမာႏ ဝစီꩻဒုစရဲက်၊ သꩻယူႏမာႏ မနော်ꩻဒုစရဲက်၊ ပွိုးဒုစရဲက်တွော့ꩻ လင်ꩻထဲ့ငါးရုဲင်ꩻ၊ မဲဉ်ႏတနꩻသော့ꩻစွဉ်ႏဒျာႏ ရန်ႏသူႏ (သတ္တမ)ထာꩻလိုႏအတွိုင်ꩻ (ဖေႏကထဲ့ငါးရုဲင်ꩻ)နောဝ်ꩻသွူ။ အမူႏတရိုꩻတဝ်း၊ အခိုတရိုꩻတဝ်း ပေါႏသꩻလျားထာꩻနဝ်ꩻ မာမာႏ၊ ဒေါ့ꩻမာႏ၊ ကျံႏမာႏတဲင်တွော့ꩻ မဲဉ်ႏတနꩻသော့ꩻစွဉ်ႏ ရန်ႏသူႏထာꩻလိုႏ နွုတ်ꩻမျိုꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ကောဓနသုတ်)