ကွပ်ရွဉ်စာႏရင်ꩻ

"ကွပ်ရွဉ်စာႏရင်ꩻ လိုꩻချင်ꩻပꩻလီဝင်ꩻ" ကတဲမ်းဗာႏ ကွပ်ရွဉ်စာႏရင်ꩻ လိုꩻချင်ꩻပꩻလီဝင်ꩻ ရွမ်ဖြုဲင်ꩻယိုနောဝ်ꩻ ကွပ်စွဉ်ႏဒျာႏ တဲမ်းလိတ်သား အောဝ်ႏထီႏဗာႏဖို၊ အောဝ်ႏမော့ꩻဗာႏဖို၊ အောဝ်ႏခွဲတလူႏဗာႏဖို ဒုံတဒုံ၊ ဗွေႏဗွန်တွမ်ႏတကာႏ၊ ဖြားဒုံတွမ်ႏလိုꩻအမျာꩻ၊ အွိုင်ႏသားတွမ်ႏဒုံသား၊ ခိုဗင်ႏမူႏနံꩻတွမ်ႏ ခိုဗင်ႏတန်၊ ပွိုးစွဉ်ႏအစွိုꩻအဗူႏ ရွဉ်တောင်ꩻကိစ္စဖုံႏတဲင် ပွိုင်းဝွို့တွမ်ႏ ရွဉ်တဖူꩻကိစ္စတဲင်၊ ကွပ်စွဉ်ႏရွဉ်ကျောင်ꩻတသာတာႏတဲင်၊ ပွိုးစွဉ်ႏရွဉ်အမျာꩻတာႏတဲင်၊ ပွိုင်းဝွို့တွမ်ႏ ရွဉ်ပွယ်ꩻတာႏတဲင် တအွဉ်ႏနယ်နွောင်ꩻတေားရွဉ်၊ အွဉ်ႏနယ်နွောင်ꩻတောဝ်း စာႏရင်ꩻဖုံႏတွော့ꩻ ခတ်ꩻလို့ဝင်ꩻ၊ အွဉ်ႏနွောင်ꩻတောဝ်း သျင်ꩻတန်ꩻတွော့ꩻ ခွန်းထွမ်အီလို့ဝင်ꩻ၊ တခြုဲင်းဖြောင်တောဝ်းဝင်ꩻတွော့ꩻ ထင်းမာႏလို့ဝင်ꩻ၊ ကွပ်တသျင်ꩻနယ်နွောင်ꩻတောဝ်း ရွဉ်စာႏရင်ꩻတဲင် လိုꩻချင်ꩻပꩻလီစွဉ်ႏလို့ဝင်ꩻနောဝ်ꩻသွူ။ ဒုံနောဝ်တွမ်ႏဒုံထင်ꩻ ကလꩻအီဗာႏဝင်ꩻ၊ ကျောင်ꩻနင်းဗွေႏဗွန်တွမ်ႏတကာႏ စေႏတနာႏကုဲင်ဗာႏဝင်ꩻ၊ သဒ္ဓါႏကပြင်ꩻလီဗာႏဝင်ꩻ၊ အစွိုꩻအဗူႏကို ကလွꩻထီႏထိုꩻဗာႏဝင်ꩻ၊ လိုꩻချင်ꩻချင်ꩻ ကတယွုမ်းတောဝ်းလို့ဝင်ꩻ၊ လိုꩻမျိုꩻချင်ꩻချင်ꩻ ကတွိုက်ꩻခꩻချာဗာႏလို့ဝင်ꩻ၊ ပꩻလီလာလင်ꩻခွိုင်းမုဲင်ꩻခေါဝ်ခေါဝ်၊ ခွိုင်းမုဲင်ꩻစွိုꩻစွိုꩻယိုနောဝ်ꩻ ကွပ်စွဉ်ႏဒျာႏ ခွုမ်ရွဉ်သား/ခွုမ်စာႏရင်ꩻသားဖုံႏ တကျတောဝ်း/ တမဲဉ်ႏတောဝ်း၊ တလွူးတောဝ်း သွိုန်ႏသꩻစွဉ်ႏ၊ တအွဉ်ႏနယ်နွောင်ꩻတောဝ်းရွဉ်၊ တအွဉ်ႏနယ်နွောင်ꩻတောဝ်းစာႏရင်ꩻ၊ ရွဉ်တွမ်ႏစာႏရင်ꩻ တမဲဉ်ႏလို့တောဝ်းလို့ဝင်ꩻ၊ တအွဉ်ႏနယ်နွောင်ꩻတောဝ်း ရွဉ်တွမ်ႏစာႏရင်ꩻမꩻ ပꩻလီဗာႏ၊ သꩻကွယ်ꩻဗာႏလို့ဝင်ꩻနောဝ်ꩻသွူ။ ဒုံတဒုံကို ဖြားဒုံခွုမ်ရွဉ် မဉ်ႏတအွဉ်ႏနယ်နွောင်ꩻတောဝ်း ရွဉ်စာႏရင်ꩻနောဝ်ꩻ ဝင်ꩻရိုꩻဖြားဒုံ အံႏထိုꩻအမျာꩻရွဉ်တဲ့၊ ဗွေႏဗွန်တွမ်ႏတကာႏ၊ ကျောင်ꩻတကျောင်ꩻကို ကျောင်ꩻနင်းဗွေႏဗွန် မဉ်ႏတအွဉ်ႏနယ်နွောင်ꩻတောဝ်း စာႏရင်ꩻတွမ်ႏရွဉ်နောဝ်ꩻ ဝင်ꩻရိုꩻဗွေႏဗွန်အံႏထိုꩻ တကာႏအမျာꩻရွဉ်တဲ့၊ ဒုံကိုခိုဗင်ႏတန်တဖြာꩻ မဉ်ႏတမွေးတောဝ်း ခိုဗင်ႏမူႏနံꩻ ရွဉ်စာႏရင်ꩻတွမ်ႏရွဉ်ဖုံႏနောဝ်ꩻ ဝင်ꩻရိုꩻခိုဗင်ႏတန်အံႏထိုꩻ မူႏနံꩻခိုဗင်ႏအမျာꩻပဲင်ႏရွဉ်တဲ့၊ အစွိုꩻအဗူႏကို ခွုမ်ရွဉ်တွမ်ႏစာႏရင်ꩻသား မဉ်ႏအွဉ်ႏ(နယ်)နွောင်ꩻတောဝ်း ရွဉ်တွမ်ႏစာႏရင်ꩻဖုံႏတဲ့ ဆဲင်ꩻရာꩻပုဂ္ဂိုလ်ႏ ကလက်ခံႏထူႏခါꩻဒါႏ တာႏဝွန်ႏအောဝ်ႏပုဂ္ဂိုလ်ႏ အဖြာꩻမုဲင်ꩻတရိုꩻတောဝ်း မဉ်ႏတအွဉ်ႏနယ်နွောင်ꩻတောဝ်း (ရွဉ်လို့သျင်ꩻတန်ꩻ)၊ မဉ်ႏတအွဉ်ႏနယ်နွောင်ꩻတောဝ်း ရွဉ်တွမ်ႏရွဉ်စာႏရင်ꩻဖုံႏနောဝ်ꩻ ထွာအံႏထိုꩻလဲဉ်း၊ သွုံꩻစုဲင်ႏထိုꩻလဲဉ်း စွိုးခွိုꩻ လိုꩻမျိုꩻတာႏရွဉ်နောဝ်ꩻသွူ။ ကွပ်စွဉ်ႏဒျာႏ နမ်းတမာꩻဒါႏတောဝ်းစာႏရင်ꩻ၊ နမ်းတပဲင်ႏတောဝ်းစားရင်ꩻ၊ နမ်းမာꩻစာႏရင်ꩻ တသူႏသေတောဝ်းတဲင် ဒေါ့ꩻထန်ႏနယ်ဝင်ꩻဗွိုန်ႏတောဝ်း၊ ခြုဲင်းထန်ႏနယ်ဝာင်ꩻဗွိုန်ႏတောဝ်း၊ အုံသေသူႏ အုံတူႏတေ့ꩻတောထာꩻတွော့ꩻ ဝင်ꩻမဉ်ႏရီ သမ်းတခံႏဒေါ့ꩻတောဝ်း၊ ဝင်ꩻမဉ်ႏဝွေႏဖန်ႏ အမာန်ႏသမ်းထန်ႏ၊ သမ်းထေတော အသꩻဒုန်းဒုန်း၊ ဒေါ့ꩻရီတဲ့ တလꩻတောဝ်း၊ ဒေါ့ꩻတောႏ တဖြောင်တောဝ်း၊ ဝွေꩻနမ်းတဲ့ သမ်းတသျင်ꩻနယ်တောဝ်း၊ ထွာအီထာꩻရန်ႏစင်ꩻ ထီႏသျင်ꩻဒွုမ်လို့ဝင်ꩻ ထွာလွဉ်စွဉ်ႏ ထာꩻထေင်ညင်ꩻနောဝ်ꩻသွူ။ ကွပ်တသျင်ꩻတောဝ်းတဲင် မဲဉ်စွော့ꩻမဲဉ်ခွဲဒွုမ်လို့ဝင်ꩻ၊ မဲဉ်ထီႏဒွုမ်လို့ဝင်ꩻလွုမ်းတွော့ꩻ ဖခန်းဒျာႏပဉ်ခေါဝ်ခေါဝ်၊ ပꩻခန်းဒျာႏခွိုင်းမုဲင်ꩻစွိုꩻစွိုꩻ၊ လွောင်ႏဗူႏလꩻဒွုမ်၊ ဖြွမ်းညီႏလꩻဒွုမ်၊ အစွိုꩻအဗူႏ ပꩻပြုဲင်လီလာထိုꩻခန်းဒျာႏ အကွို့ꩻကွို့ꩻအခေါဝ်ခေါဝ်နောဝ်ꩻသွူ။ ကွပ်နောဝ်ꩻမꩻ ဒုံတဒုံကို လိုꩻဒုံဖုံႏ ဖေႏကလွောင်ႏဗူႏဝင်ꩻ၊ ဗွေႏဗွန်တွမ်ႏတကာႏ ဖေႏကဖြွမ်းညီႏဝင်ꩻ၊ အစွိုꩻအဗူႏ ဖေႏကတဉ်ႏခွေါင်ညဆွာꩻ မူႏနံꩻခိုဗင်ႏဖုံႏ ဖေႏကညီႏညွတ်ꩻဝင်ꩻ၊ လိုꩻချင်ꩻချင်ꩻ ဖေႏနေးသွီႏကခွဲဒျာႏလို့ဝင်ꩻ၊ လိုꩻမျိုꩻချင်ꩻချင်ꩻ ဖေႏကထီꩻသင်ꩻ အွီႏနွို့ထေ့လို့ဝင်ꩻ၊ ကွပ်ရွဉ်တဖူꩻတာႏ၊ ကွပ်ရွဉ်ပွယ်ꩻတာႏ၊ ကွပ်စွဉ်ႏဒျာႏ အမျာꩻတာႏတဲင် ဖေႏနေးကရွို့ꩻရန်ႏထေင်ညင်ꩻဗာႏမွိုန်းလို့ဝင်ꩻနောဝ်ꩻ အောဝ်ႏလိုႏမာꩻသျင်ꩻသျင်ꩻ ရွဉ်စာႏရင်ꩻ၊ မဉ်ႏသျင်ꩻပါတွမ်ႏ စာႏရင်ꩻလောင်ႏလင်နောဝ်ꩻ ယိန်းယံယံနောဝ်ꩻသွူ။ အထွောင်းမုဲင်ꩻတရိုꩻတောဝ်း ရွဉ်ခွုမ်သား (ခွုမ်ရွဉ်သား)စာႏရင်ꩻခွုမ်သား (ခွုမ်စာႏရင်ꩻသား)ယို အရေꩻတန်ငါႏနောဝ်ꩻမꩻ အောဝ်ႏလိုႏလွိုက်ဒါႏဒါႏ၊ အောဝ်ႏလိုႏလွိုက်သေႏသေႏချာႏချာႏ၊ ဖေႏကလွစ်အမာႏ၊ ဖေႏကလွစ်ထာꩻတမွာႏ၊ ဖေႏကလွစ် အခတ်ꩻအကတ်ꩻနောဝ်ꩻ လွိုက်ရွေꩻသားတဲ့ အောဝ်ႏလိုႏလွိုက်ဒါႏဒါႏဒျာႏ၊ ကခံႏထူႏဒါႏ ဝင်ꩻလွိုက်သားတဲ့ အောဝ်ႏလိုႏသေနာႏဖေႏဒါႏ ခွုမ်ရွဉ်ခွုမ်စာႏရင်ꩻ၊ အောဝ်ႏလိုႏမာꩻတဲပ်နဲပ်၊ အောဝ်ႏလိုႏမာꩻလဲပ်လဲပ်၊ အောဝ်ႏလိုႏမာꩻဟောဝ်ဟောဝ်၊ အောဝ်ႏလိုႏမာꩻစွို့ꩻစွို့ꩻ၊ အောဝ်ႏလိုႏလွူးသꩻစွဉ်ႏစွဉ်ႏ ခွုမ်မာꩻဖေႏငါႏ နီရပ်တာႏ၊ နီဒုံတာႏ၊ နီကျောင်ꩻတာႏ၊ နီလိုꩻမျိုꩻတာႏ အကျိုꩻဖုံႏဒျာႏနောဝ်ꩻသွူ။ နီခွုမ်မာꩻဖေႏဝင်ꩻအမျာꩻတာႏ ခွုမ်ရွဉ်ခွုမ်စာႏရင်ꩻ မဉ်ႏစဲင်းမဉ်ႏသျင်ꩻ၊ မဉ်ႏတဲပ်မဉ်ႏလျင်ႏနောတ်ꩻ နီနမ်းတဲ့ သꩻချမ်ꩻသာႏ၊ အမျာꩻတာႏတဲ့ အကျိုꩻအောဝ်ႏ၊ ကွပ်နီတဲင် အမျာꩻထာꩻမာꩻထွူထွာအီ၊ ကွပ်နီတဲင် ဝင်ꩻထာꩻမာꩻ အောင်ႏလꩻအီ၊ တရေꩻညီꩻလို့ဝင်ꩻ၊ သꩻချမ်ꩻသာႏညီꩻအီဝင်ꩻ၊ ပယွုမ်းဗာႏညီꩻအီဝင်ꩻ၊ ထာꩻထီႏတဲ့သျင်ꩻ ရန်ႏတဲ့ကင်ꩻ၊ လမ်းထင်ꩻတဲ့ ထီႏဟောဝ်၊ နမ်းနောဝ်တဲ့ ထီႏစွို့ꩻ၊ လမ်းတွို့ꩻတဲ့ ထီႏစွဉ်ႏ၊ လမ်းကွဉ်ႏတဲ့ ဟွိုန်ရက်၊ လွေꩻမုဲင်ꩻတဲ့ မဲ့ငါဗန်လောင်ႏလွိုးဗန်၊ လူꩻတနံသီးတဲ့ မဉ်စွဲကမ်း၊ မဉ်မꩻစꩻဖေႏ၊ နမ်းတာႏအကျိုꩻအဲဉ်ထောဝ်းနောဝ်ꩻ တွမ်ႏယူႏမွိုန်းလာꩻလာꩻ၊ လိုꩻတထီႏတောဝ်းတဲ့ လူꩻတနံသီးအောဝ်ႏထီႏ၊ သိကျာꩻသီးအောဝ်ႏထီႏ၊ လဲဉ်လိုꩻနောဝ်ꩻလꩻတဲ့ လဲဉ်လူꩻတနံသီး တလꩻနွောင်ꩻတောဝ်း၊ အောဝ်ႏလိုႏလွူးငါႏ သꩻစေႏတနာႏဗွာဗွာ ခွုမ်မာꩻဆောင်ႏရွက်ဖေႏနောဝ်ꩻသွူ။