ခမ်းသဲင်လာတွိုႏ

အဝ်ႏ ဝီခီပီးဒီးယား ကို

"ခမ်းသဲင်လာတွိုႏ လိုႏသတိꩻငါႏမေႏ" ဒဲဉ်သီႏလောင်း ဒဲဉ်ဟားဆန်ꩻ ထာꩻလျားလာ တွိုႏလွဉ်ချာယင်းလဲဉ်းသွူတဲင် သေင်ႏစော့ꩻဝါႏလာႏဖုံႏ ဟူႏလင်ꩻအာငါႏ၊ သေင်ႏသဲင်ဝါႏသဲင်ဖုံႏတဲ့ လွိုင်ႏအာငါႏနောဝ်ꩻမꩻ နီပအိုဝ်ႏရပ်ရာႏယို ကဲဉ်းအာအာ အောဝ်ႏဒျာႏကောင်လောင်း သေင်ႏခြာဖုံႏတွော့ꩻ နန်းတရျိုးဗာႏ မေႏတခြာ ခိုးလွဉ်ပါ နီရပ်ရာႏဒုံဆောင်ႏ နီသွို့ꩻခြံလုဲင်းယာႏဖုံႏသွူ။ မြန်မာခမ်းလွုမ်ꩻတကာႏတောဝ်း တကမ္ဘာႏလွုမ်း ယိုခါ ကွပ်စွဉ်ႏမေႏတခြာ ခိုးလွဉ်အာငါႏထာꩻတွော့ꩻ နီလိုꩻသီး အီႏနွုမ်ꩻတရေ့ꩻတာႏ တလီꩻကြောင်းစင်ငါလဲ့ ဖြေꩻဗာႏနေးခမ်းထန်ႏ၊ ခံႏလို့ဗာႏနေးရွဉ်ခံꩻမꩻ လꩻလွဉ်နွုမ်ꩻတရေ့ꩻလွဉ်ဗာႏ တလီꩻကြောင်းစင်၊ လိုꩻရွဉ်တအောဝ်ႏတောဝ်းသားဖုံႏနောဝ်ꩻ ခံႏဗာႏအသီ၊ ခံႏဗာႏအဆင်ꩻရယ်ꩻ၊ ခံႏဗာႏထာꩻဆာ ဝွေႏဒနာႏဖုံႏနောဝ်ꩻသွူ။ ပွေါ့ခမ်းသဲင်လာ တွိုႏလွဉ်သွူနောဝ်ꩻ စွုမ်ႏနေင်ႏနေင်ႏ မြန်မာခမ်းကို တဝေင်ꩻတောဝ်းလဲ့တဝေင်ꩻ၊ တနယ်ႏတောဝ်းလဲ့တနယ်ႏ၊ တထွောင်းတောဝ်းလဲ့ တထွောင်း အောဝ်ႏဟွိုန်စွဉ်ႏမေႏခိုးလမ်း၊ မေႏခိုးတခြိုꩻဥစ္စာႏရွဉ်ခံꩻ၊ လဲ့ꩻမေႏတွော့ꩻ မေႏခိုးထာꩻတမွေးတောဝ်း၊ ကွပ်စွဉ်ႏအွဉ်ႏသတိꩻတောဝ်းတွော့ꩻ မေႏခိုးလွဉ်ဗာႏနောဝ်ꩻသွူ။ နီပအိုဝ်ႏရပ်ကိုယိုခါ လိုꩻကွဲအာအာလွဉ်၊ ဒုံဆောင်ႏလဲ့ ကွဲတန်တန်လွဉ်လဲဉ်းနေနေတဲင် အောဝ်ႏဟွိုန်ဗာႏနုဲင်းလဲဉ်း မေႏခိုးဒုံဆောင်ႏရပ်ရာႏ လမ်းပါႏဖုံႏနောဝ်ꩻသွူ။ လိုꩻယဟန်ႏဖုံႏနောဝ်ꩻ လယ်ႏလွင်ꩻတခြာ၊ လဲ့ꩻလွင်ꩻဒါႏမေႏ၊ ခိုးကုဲင်ထိုꩻဝင်ꩻထာꩻမွူးထာꩻပေႏ၊ ယားကုဲင်အီနွောင်ꩻဒါႏ နီနာꩻသီးစီꩻပွါꩻ၊ အဆုဲင်ꩻသွတ်ꩻနောဝ်ꩻ တဖြာꩻတွမ်ႏတဖြာꩻ၊ တဒုံတွမ်ႏတဒုံ ထွာအီဘေꩻရန်ႏ၊ ထွာအီထာꩻလွꩻထီႏတဲင် နီပအိုဝ်ႏချင်ꩻချင်ꩻ ပꩻပြုဲင်နွောင်အီဒါႏနောဝ်ꩻသွူ။ ကွပ်ပွိုးနောဝ်ꩻမꩻ မေႏကရိုꩻယိုနောဝ်ꩻ တောင်ꩻပြန်ႏတလꩻတောဝ်း၊ ဗွိုန်ပီတောဝ်းရန်ႏသူႏ၊ ရန်ႏသူႏကရိုꩻနောဝ်ꩻ တောင်ꩻပြန်ႏလꩻ-ငေါဝ်းယိုအတွိုင်ꩻ နီဒုံဆောင်ႏ နီရပ်ရာႏ နီလမ်းပါႏ နီရွဉ်ခံꩻ ဖေႏကသွုမ်ꩻထိုꩻခြေင်ဗာႏမွိုန်းနောဝ်ꩻ ခမ်းသဲင်လာယို အွဉ်ႏသတိꩻဗာႏမေႏ၊ ဆွဉ်းလွင်ꩻမွိုန်းတောဝ်းယာလိတ် ဒုံဆောင်ႏကို၊ လဲ့ꩻလွင်ꩻမွိုန်း သေင်ႏတခြာ၊ အမဉ်ႏထွာလွဉ်တစွိုးတမျိုꩻနောဝ်ꩻ တောင်ꩻပြန်ႏတလꩻတောဝ်း၊ သွုမ်ꩻမရေႏမရာႏငါႏထာꩻ ထွူတကာႏတောဝ်း ကုဲင်းခံႏပါဗာႏဒါႏ ဝင်ꩻဆွမ်ꩻဝင်ꩻစွိုင်ကျꩻနောဝ်ꩻမꩻ နီအွဉ်ႏသတိꩻဗာႏမေႏ ခမ်းသဲင်လာနောဝ်ꩻသွူ။ မေႏခိုးထာꩻ ဒုံဆောင်ႏကို လိုꩻတွမ်ႏတခြိုꩻဥစ္စာႏ သွုမ်ꩻတိန်ꩻထိုꩻဗာႏအတွိုင်ꩻ မေႏခိုးထာꩻတခြာကိုလဲ့ နီထာꩻမွူးထာꩻပေႏ သွုမ်ꩻကုဲင်ထိုꩻသွူတကာႏတောဝ်း ကွပ်စွဉ်ႏသေင်ႏဝါႏပေႏဖုံႏ သီထိုꩻအာတဲင် နီထာꩻလုပ်ꩻယာႏဖုံႏတဲ့ ကွဲကုဲင်အာအာ၊ နိကအောဝ်ႏအုံနောင်ဒါႏ ရာႏသီႏဥတုဖုံႏလဲ့ ကွဲတဗန်ႏဗန်ႏ၊ ထီနောင်ထီအုံႏဖုံႏလဲ့ ကွဲပေႏပေႏ၊ ကွဲသေ့ꩻသေ့ꩻသဲင်ꩻလွဉ်တဲင် အဆုဲင်ꩻသွတ်ꩻ နီပအိုဝ်ႏရပ်ရာႏ မော့ꩻလွဉ်ဒါႏ ထီခြောတံႏ၊ အံႏမထီတံႏနောဝ်ꩻမꩻ ခမ်းသဲင်လာခိန်ႏခါႏကို အောဝ်ႏလိုႏသတိꩻရောင်ငါႏမေႏနောဝ်ꩻသွူ။ လိတ်ထွားသား ဗွေႏခွန်နင်ꩻသီးဖုံႏဟွေး- နီပအိုဝ်ႏလိုꩻမျိုꩻယိုနောဝ်ꩻ ကဲဉ်းအာအာ အုံနောင်ဒျာႏ ထာꩻလုပ်ꩻထာꩻမာꩻ သွို့ꩻခြံလုဲင်းယာႏ ကောင်ဆောင်ႏသေင်ႏတနွိုင်ဖုံႏဒျာႏတဲင် နီဟံႏယာႏ ဖေႏကဟောဝ်သေႏသေႏ၊ နီထီအုံႏ နီထီနောင် နီထီခြောင် ဖေႏနေးကလွိုင်ႏအာထွူတွော့ꩻ နီပအိုဝ်ႏ ထာꩻလုပ်ꩻသားဘဝဖုံႏလဲ့ ဖေႏကထင်ထိုခန်း တနီꩻတစိꩻစိꩻနောဝ်ꩻ တယ်ႏယိုမာꩻငါ လဲ့ꩻမွိုန်းမေႏတခြာ၊ အွဉ်ဝင်ꩻအွဉ်ႏသတိꩻခန်းသွော့မေႏ စွုမ်ႏဖြာꩻဖြာꩻကရိုꩻနောဝ်ꩻ ဖေႏသေလွေꩻဗာႏနုဲင်းယိုသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. အယ်ဒီတာ
  2. မောင်းမွူးခံꩻ အမုဲင်-၄၉