ခွန်ရက်ခမ်းနင်ꩻရက်ခွိုꩻ

"ခွန်ရက်ခမ်းတွမ်ႏ နင်ႏရက်ခွိုꩻ မော့ꩻခွဲးအုံကွံဝင်ꩻ" "နင်ႏရက်ခွိုꩻ" "အွေး- ဝေးရက်ခမ်း မဲ့ဗန်ႏဖျော်လွဉ်ခါႏခါႏသွူ၊ လွဉ်လယ်ႏပွယ်ꩻမွူးနီꩻခွိုꩻပအိုဝ်ႏနဲ့၊ ကားကားနဲ့ပွယ်ꩻဒဲဉ်သီႏအောဝ်ႏ၊ မဉ်ႏမွေးတောဝ်းနောဝ်ꩻ ခွဲးဗာႏဒွုမ်လို့ဝင်ꩻ၊ ကေꩻဇူႏတင်ႏဗာႏပွယ်ꩻသနဲ့ယို၊ နီဝေးတွမ်ႏဖူႏမူႏနောဝ်ꩻ တဲႏစွဉ်ႏ"ဝါႏသနာႏမွံတုဲင်"မာꩻလွဉ်ယို စမော့ꩻခွဲးဟန်ႏနေင်ႏ "လိုꩻယွဲးအာႏရဲင်ꩻ"ကိုလွုမ်ꩻနော်" "ခွန်ရက်ခမ်း" "မွေး- မွေးဖူးမူႏ၊ ပွယ်ꩻဟန်ႏနေင်ႏ ကသမ်းကွိုန်ꩻဟောဝ်၊ လွေꩻသော့ꩻလဲင်ꩻတဖုဲင်ႏတောဝ်းဒွုမ်၊ ဒေါဝ်လွီးတဲ့နွမ်ꩻဟေ့ꩻစော့ ကတူႏလဲင်ꩻဆာပါနေးစွဉ်ႏဒျာႏ" "နင်ꩻ" "ဝင်ꩻရိုꩻပွယ်ꩻဟ အောဝ်ႏနေနေမတောဝ်၊ ဖေႏကလွစ်လျော်နေးနောဝ်ꩻ အီႏအောဝ်ႏဒါႏနေဟောင်း၊ မွေးတောဝ်းနဲ့ဝေး" "ခွန်" "မွေးနောဝ်ꩻ မွေးဒျာႏ၊ ကွဲႏတွော့ꩻ ယိုခါနောဝ်ꩻ တစွိုးခွိုꩻလွုမ်းပွယ်ꩻ၊ ပွယ်ꩻမွူးနီꩻခွိုꩻပအိုဝ်ႏကိုယို ခွိုꩻပအိုဝ်ႏဖုံႏ အောဝ်ႏလိုႏပင်ႏထိုနီစွိုးခွိုꩻ ဂွုဏ်ႏသိက္ခာႏ၊ အောဝ်ႏလိုႏပျꩻဒျာႏ နီယေန်ႏငဲမု ဓလေ့ꩻထွုံꩻစံႏဖုံႏ၊ လိုꩻမျိုꩻလောင်ႏလင် တွမ်ႏခမ်းတန်သားဖုံႏ ဖေႏကထီႏဖွီဗာႏမွိုန်း၊ ထွူႏတွုမ်မုꩻ ဖေႏကအောဝ်ႏအီတွက် တမျိုꩻသာꩻလွုမ်း မဲ့ငါတရေႏ ဂွုဏ်ႏသိက္ခာႏ ကထဲ့ဖွိုႏအီဒါႏ အအုံအအောဝ်ႏ အဒေါ့ꩻအဖြောဝ်ႏ ထာꩻမာꩻမျိုꩻယို ဖေႏကအောဝ်ႏဗာႏမွိုန်းနောဝ်ꩻ ခွန်နင်ꩻပအိုဝ်ႏစွုမ်ႏဖြာꩻ တာႏဝွန်ႏအောဝ်ႏ ပငါပရာꩻသွူနဲ့ ဖူးမူႏ" "နင်ꩻ" "မဉ်ႏရိုꩻနုဲင်းနောဝ်ꩻလဲ့ ဒေါ့ꩻတစွိုး တွိုႏစောက်တွော့ꩻ တယ်ႏဟန်ႏနေင်ႏ ၁၉၉၆-ဗာႏယိုနောဝ်ꩻ (VISIT MYANMAR YEAR)နေင်ႏဒျာႏနောဝ်ꩻမꩻ နီဝေးကရိုꩻဒါႏ စွိုးခွိုꩻယေန်ႏငဲးမုꩻ ထွုံꩻဓလေ့ꩻဖုံႏနောဝ်ꩻ အောဝ်ႏလိုႏစဲင်းနဲင်းငါႏမွေးနောႏ၊ နုဲင်းနဲင်ႏငံႏတောႏကရိုꩻလဲ့ စွိုးခွိုꩻရေꩻယို အွဉ်ႏနေးအထျꩻအထောင်ꩻတဲင် ဖူးမူႏသီးနောဝ်ꩻလဲ့ လွူးနေးသꩻရက်ခွိုꩻတွော့ꩻ လိုႏတဲႏဆို့ꩻလဲဉ်း စွိုးခွိုꩻလွောင်ႏဗူႏရေꩻနော် ဝေးရက်ခမ်း" "ခွန်" "'သꩻရက်ခွိုꩻ'ကရိုꩻဒါႏ ငေါဝ်းတငွါယို ဒေါ့ꩻနဝ်ꩻယိုꩻကီလဲ့ မာꩻယပ်ꩻသနဲ့ ဖူးမူႏ" "နင်ꩻ" "ယပ်ꩻကဲနုဲင်းမုဲင်ꩻ ဝေးရက်ခမ်း၊ သꩻရက်ခွိုꩻကရိုꩻနောဝ်ꩻ စွိုးခွိုꩻရေꩻ၊ ပအိုဝ်ႏမန်ႏသမျ ဖေႏကရက်ပဲင်ꩻလို့ဝင်ꩻနောဝ်ꩻ မွေးတောဝ်းနဲ့ကားဝေး" "ခွန်" "ဖူးမူႏကရိုꩻနောဝ်ꩻ ယေဘုယျသဘော်ꩻလွုမ်ꩻ၊ သꩻရက်ခွိုꩻကရိုꩻနောဝ်ꩻ စွိုးခွိုꩻရေꩻဝါႏဒဒျာႏ" "နင်ꩻ" "ဝေးရက်ခမ်း ကဒေါ့ꩻဒါႏ ဝါႏဒဖုံႏနောဝ်ꩻ ဖူးမူႏလွစ်သေနာႏ၊ နားလဲင်ꩻကွင်နေးစွဉ်ႏ" "ခွန်" "နုဲင်းယိုဒျာႏ ဖူးမူႏ၊ နီနာꩻအစွိုꩻအဗူႏဖုံႏ ကအောဝ်ႏမာꩻစွိုးခွိုꩻရေꩻနောဝ်ꩻ ထာꩻထီႏအဲဉ်ႏဝါႏဒမွေးတောဝ်း၊ အမဲဉ်ႏတဗာႏနောဝ်ꩻ နီရက်ချာနီစွိုးခွိုꩻယို အမဲဉ်ႏတရာꩻဒျာႏ၊ တနယ်ꩻမဉ်ႏဒေါ့ꩻဗာႏနောဝ်ꩻ ဆျာမွူးခို့ꩻဆျာပေႏ၊ ဆျာမွူးထွုမ်ႏအဆာႏ၊ အွဉ်ႏအံႏမိုꩻချာ အပေႏနောဝ်ꩻ တရာꩻဒျာႏ၊ ပိုမွိုးတဖြာꩻ အွဉ်ႏနဲဉ်းချာ အပိုပေႏနောဝ်ꩻလဲ့ အမဲဉ်ႏတရာꩻဒျာႏ၊ တဲႏ ၁၉၃၀-ဗꩻတွိုႏ ၁၉၃၇-ဗာႏနေင်ႏအယံတွင်ꩻ မန်းခမ်း 'ဒို့ဗမာအစည်းအရုံး'ကခြီခြောဝ်ဒါႏ 'မန်းခမ်းယို နီခမ်း၊ လိတ်မန်းယို နီလိတ်၊ မန်းငေါဝ်းယို နီငေါဝ်း၊ နီခမ်းယို နီရက်လွဝင်ꩻ၊ နီလိတ်ယို ပင်ႏထိုလွ၊ နီငေါဝ်းယို အွဉ်ႏရေꩻဗာႏ'စတဲင်နုဲင်းယိုဖုံႏနောတ်ꩻ 'ဝံသာနုရက္ခိတ'သꩻဓာတ်ဒျာႏတဲင် အမန်ႏတရာꩻဒျာႏသနဲ့ ဖူးမူႏ" "နင်ꩻ" "သေန်ႏလျောႏငါႏ ဝေးရက်ခမ်း၊ ဖူးမူႏကသွဉ်ထူႏဒါႏ ရာႏဇဝင်ႏတစောင်ႏကိုလဲ့ ၁၇-ရျာꩻဗူႏအယံတွင်ꩻ ကေတုမတီႏ(တောင်ႏအူ)နောဝ်ꩻ ဟံႏသာႏဝတီႏ(ပကိုꩻ)မဲင်ꩻဖုံႏ လွဉ်တွိုက်ꩻတဲင် ဝေင်ꩻကိုမန်းမူႏတဖြာꩻ အပိုအောဝ်ႏဝေင်ꩻ အမွိုးထွဉ်ႏလွေꩻတွိုက်ꩻမဲင်ꩻဖုံႏတွော့ꩻ အဖူးခိုနောဝ်ꩻ ထဲ့ထိုꩻစဲ့ꩻပွယ်ꩻကို၊ အဝေးနောဝ်ꩻ သဲင်ꩻထေ့ချာအမွိုး၊ ဒေါ့ꩻငွိုးနေးပါ 'မွိုး- မွိုး ဖူးပေႏနောဝ်ꩻ ထဲ့ထိုꩻလဲဉ်း စဲ့ꩻကိုမွိုး'တဲ့၊ အမွိုးမန်းမူႏနောဝ်ꩻ ထွားစဲင်းချာအပိုခိုတန်တွော့ꩻ 'နာꩻမလဲင်ꩻ လောက်ꩻကာႏငါႏ နာꩻဖူးပေႏနောဝ်ꩻ၊ လွေꩻတွိုက်ꩻချာယင်း မဲင်ꩻဖုံႏသူꩻဟုဲင်း၊ ခွေဟို့ꩻကို နာꩻဖူးပေႏလွဉ်းလွဉ်း'အမွိုးနောဝ်ꩻ ဒေါ့ꩻထွူနုဲင်းယိုတွော့ꩻ တဗꩻနယ်ပါတွမ်ႏအဟို့ꩻတဲ့ ဝေးရက်ခမ်း" "ခွန်" "အူး-လူး-လူး ဖူးမူႏကဒေါ့ꩻဒါႏ ငေါဝ်းအုံကွံပေႏယိုနောဝ်ꩻ ယံမွေး ကျမွေးငါႏ၊ မန်းမူႏဖြားနောဝ်ꩻလဲ့ သꩻရက်ခွိုꩻ အဗွေတဗာႏတွော့ꩻ လဲင်ꩻဒေါ့ꩻထန်ႏပါစွဉ်ႏ ငေါဝ်းအသွတ်ꩻနောဝ်ꩻမꩻ နီနာꩻဖုံႏယိုလဲ့ လဲင်ꩻလိုႏသေနာႏချာဒျာႏနမ်း ပငါပရာꩻသနဲ့ ဖူးမူႏ" "နင်ꩻ" "ဖူးမူႏသီး ပအိုဝ်ႏကိုလဲ့ ဖြားတန်ကောင်ခယ်ႏ ကအောဝ်ႏတွိုက်ꩻ ပဒေႏသရာဇ်အယံတွင်ꩻ ဖြားတန်ရိုꩻ'ပဒေႏသရာဇ်စနစ်ယို ခွေစိုးကို မဉ်ႏတခုဲင်ႏဝုဲင်ꩻတောဝ်းဒွိုန်းလဲ့ မဉ်ႏတွိုႏဘဝငါ ခွေမဉ်ႏကွိုတ်ဗာႏခန်းထွီႏလဲ့ ခွေအီႏအူႏချာဒျာႏ'ငေါဝ်းနောဝ်ꩻလဲ့ ပအိုဝ်ႏခေါင်းဆောင်တန် တဖြာꩻအနေႏ ပဒေႏသရာဇ်လွိုဆန်ရေꩻ သꩻဓာတ်ကလာဒါႏ ခွိုင်းကားမုဲင်ကရိုꩻနောဝ်ꩻ စေနယ်သေꩻခါꩻတဲင် ခတ်လဲင်ႏခါ ဖူးမူႏသီးလိုꩻယွဲး လိုꩻရွယ်ႏမဲဉ်ႏဖုံႏအတွက် တန်ႏဖိုတဖျတ်နွောင်ꩻတောဝ်း ငေါဝ်းဩဝါဒဒျာႏသနဲ့ ဝေးရက်ခမ်း" "ခွန်" "မွေးငါႏ မရေႏမရာႏဖူးမူႏ၊ ဖူးမူႏအုံကွံဒေါ့ꩻခြုဲင်းဒါႏ မန်းမူႏဖြားတွမ်ႏဖြားတန်ကောင်ခယ်ႏ အခရာႏနောဝ်ꩻ သꩻရက်ခွိုꩻ ခင်ႏမွဉ်ဒျာႏလွဉ်းလွဉ်းတဲင် အမဲဉ်ႏတရာꩻဒျာႏသနဲ့ ဖူးမူႏ၊ နီဝေးသွꩻ'ချင်ꩻ'လိုꩻမျိုꩻအောဝ်ႏတဖြာꩻ၊ အမဉ်ꩻ'ဝန်ႏသူႏ'တဲ့၊ ဝွေꩻနောဝ်ꩻ အုံဒျာႏဂျပန်ခမ်း ဝေင်ꩻတိုကျို တသီႏယွုံႏတန်ကို၊ လူးဖေႏထီ လိုꩻသီတနီꩻအဖြာꩻ(၇၀)လွို၊ လိုꩻသီတဖြာꩻလောင်းကို လꩻအငိုꩻရွဉ်ဒေါ်လာ ၅-ဗီႏတဲ့၊ ဆုဲင်ꩻဝုဲင်ꩻယို တောႏလမ်းတွမ်ႏ ဆွစ်ဇာလန်မူႏ (နာ့စ်)ထွူနောဝ်ꩻ လွေꩻအုံကွူႏအမာ ဆွစ်ဇာလန်ခမ်းကိုတဲ့ ပိုပေႏအောဝ်ႏဝင်ꩻနီ၊ ငမ်းသꩻ'ချင်ꩻ'ခွိုꩻတပစ်ꩻထိုꩻတဲင် ဝွေꩻလမ်းကိုနောဝ်ꩻ ဝွေꩻလိုꩻမူႏတွမ်ႏ ပိုပေႏဖုံႏ သွဉ်ဖေႏလိတ်'ချင်ꩻ'၊ လမ်းကိုတလမ်းလွုမ်း ဒေါ့ꩻဗာႏငေါဝ်း'ချင်ꩻ'၊ မဉ်ႏထန်ႏလမ်းဝဲင်ꩻမꩻ ဒေါ့ꩻနေးတငေါဝ်းအင်္ဂလိပ်နုဲင်းနောဝ်ꩻတဲ့၊ 'ဝန်ႏသူႏ'သꩻရက်ခွိုꩻယိုနောဝ်ꩻတဲ့ နီနာꩻဖုံႏ ဟောဝ်ထွားနုဲင်းငါႏသနဲ့၊ တနီꩻစဝ်းစဝ်းကို နီမဉ်ႏဒဲ့ꩻထူႏနွောင်ꩻဒါႏ နီနာꩻအပွိုင်အခင်နောဝ်ꩻလဲ့သင်၊ မဉ်ႏအုံဗာႏဝင်ꩻခမ်းဝင်ꩻထီ ဝင်ꩻဒေႏသ ဝင်ꩻရပ်ရာႏကိုဖုံႏနောဝ်ꩻလဲ့သင် အောဝ်ႏလိုႏထွားနုဲင်း နီဝေးသွꩻပေႏ'ချင်ꩻ'လိုꩻမျိုꩻ'ဝန်ႏသူႏ'နောဝ်ꩻသနဲ့ ဖူးမူႏ" "နင်ꩻ" "အွူး- သꩻရက်ခွိုꩻကရိုꩻဒါႏ ငေါဝ်းပေႏယိုလဲ့ တွမ်ႏနီဝေးကရိုꩻ ဒေါ့ꩻယိုꩻမာꩻယပ်ꩻမွေးဒျာႏရင်ꩻနော်၊ နီဝေးသွꩻပေႏ 'ချင်ꩻ'လိုꩻမျိုꩻ'ဝန်ႏသူႏ'နောဝ်ꩻ အုံဒျာႏဝင်ꩻခမ်းဝင်ꩻထီရိုꩻကီလဲ့ စွိုးခွိုꩻယိုꩻယာႏအလောင်း ကအီႏလွူးသꩻရက်ခွိုꩻ ထုဲင်ႏပီဝွေꩻနောဝ်ꩻ တလွဉ်ꩻအဲဉ်ထောဝ်းဒျာႏရင်ꩻ ဝေးနော်ႏ အံႏဖြာႏငါႏခွေ" "ခွန်" "နောဝ်ꩻမꩻ သꩻရက်ခွိုꩻ ခင်ႏမွဉ်နောဝ်ꩻ လွောင်ႏဗူႏရေꩻဒျာႏ၊ လွောင်ႏဗူႏရေꩻ ခင်ႏမွဉ်နောဝ်ꩻလဲ့ သꩻရက်ခွိုꩻဒျာႏ၊ နောဝ်ꩻနောဝ်ꩻ စွိုးခွိုꩻရေꩻဒျာႏသနဲ့ ဖူးမူႏ၊ နီနာꩻပအိုဝ်ႏစွိုးခွိုꩻယို တဲႏစသုဝဏ္ဏဘူမိခမ်း ပြုဲင်ပြင်ꩻထွူမာꩻလွဉ်ယို ခေတ်ယိုဟံႏနယ်ႏ အွဉ်ႏထွော့မုꩻအလꩻ စောက်ꩻခမ်းနယ်ႏ မဲင်ꩻဟံႏနယ်ႏ တနင်္သာရီတွိုင်ꩻ ပကိုꩻတွိုင်ꩻတွမ်ႏ မန္တလေꩻတွိုင်ꩻကို ကအောဝ်ႏဒါႏ ပအိုဝ်ႏဖုံႏနောဝ်ꩻ ဟဲ့ꩻဒျာႏ ပအိုဝ်ႏခမ်းဒွမ်၊ ကောင်ရွေꩻလောင်းတွမ်ႏ စောက်ꩻတနျာႏခမ်းနယ်ႏကို ပအိုဝ်ႏဖုံႏနောဝ်ꩻ ဟဲ့ꩻဒျာႏ ပအိုဝ်ႏခမ်းကောင်နုဲင်းနောဝ်ꩻသနဲ့ ဖူးမူႏ" "နင်ꩻ" "မွေးနော်ႏ- ဖူးမူႏသီးပအိုဝ်ႏဖုံႏ မဉ်ႏအဝ်ႏဒါႏ တထွောင်းချင်ႏနောဝ်ꩻ လဲင်ꩻအီႏတတွာနေးစွဉ်ႏ 'ချင်ꩻ-ခင်'ခမ်းနယ်ႏတဲင် စောက်ꩻနျာႏခမ်းနောဝ်ꩻ အီႏဆေ့ꩻလဲဉ်း နီပအိုဝ်ႏ ဝေးရက်ခမ်းနော" "ခွန်" "မွေးငါႏသနဲ့ ဖူးမူႏ၊ ကွပ်နီပအိုဝ်ႏဖုံႏယို အောဝ်ႏဒျာႏဖြာꩻထွောင်းထွောင်းနဝ်ꩻမꩻ နီနာꩻခေါင်းဆောင်တန် စောဝ်းခွန်စီ၊ ဖြားဗွာဦးဖျူ၊ ခွန်လှဖေသီး မော့ꩻခွဲးလို့ဝင်ꩻ ဝေင်ꩻရန်ႏကွုန်ႏတွော့ꩻ ပအိုဝ်ႏဒွမ်တွမ်ႏ ခမ်းကောင်နောဝ်ꩻ ခွိုင်းယိုမာꩻငါ ဖေႏကခွဲးတောႏလို့ဝင်ꩻတဲင် စွိုးခွိုꩻလွောင်ႏဗူႏရေꩻနဝ်ꩻ ဝွေꩻသီးဗွေႏဖုံႏ ထီႏတောႏနေးထာꩻဆꩻငါမꩻ ကျိုꩻဆောင်ႏလွဉ်မွေးတောဝ်းနဲ့အီ" "နင်ꩻ" "အေား- နဝ်ꩻမꩻ ယိုခါဖူးမူႏသီး ပအိုဝ်ႏဒွမ်တွမ်ႏခမ်းကောင် ကသွုပ်မော့ꩻခွဲးတောႏချာဗာႏနုဲင်းယိုခါနောဝ်ꩻ ကွပ်စွဉ်ႏခေါင်းဆောင်တန်သွံဖြာꩻ ကေꩻဇူꩻဒျာႏ ဝေးရက်ခမ်းနော်ႏ" "ခွန်" "မွေးသွူ ဖူးမူႏ၊ ကွပ်ခေါင်းဆောင်တန်ဖုံႏ ကကျိုꩻဆောင်ႏသေꩻခါꩻ စွိုးခွိုꩻလွောင်ႏဗူႏမုꩻယို အနမ်းအခြုံ ဖေႏကပေါႏထန်ႏနောဝ်ꩻ လိတ်လုဲင်ꩻတွမ်ႏ ကအောဝ်ႏကုဲင်ဒါႏ အပွိုင်းအဝွို့ ယဟူးယဟန်ႏ နေးတွမ်ႏ'လွောင်ႏဗူႏရေꩻခင်ႏမွဉ်တွော့ꩻ မဉ်ႏခြုဲင်းဗာႏလို့ဝင်ꩻနောဝ်ꩻ ရမွော့အကျိုꩻသွုပ်အနေႏ အီႏအောဝ်ႏလꩻသနဲ့ ဖူးမူႏ" "နင်ꩻ" "ပအိုဝ်ႏတစွိုးခွိုꩻလွုမ်း'လွောင်ႏဗူႏရေꩻယို ဖူးမူႏသꩻဝင်ႏစာꩻငါႏတွော့ꩻ ကဉ်းသွုပ်ဒေါ့ꩻခြုဲင်းစံꩻယင်းမွိုင် ဝေးရက်ခမ်း" "ခွန်" "ဖူးမူႏမဉ်ႏကုဲင်းနာႏလဲ့ နီဝေးသွုပ်ဒေါ့ꩻလွေꩻယင်းနော၊ ဥပမာႏ- မဉ်ႏထွားချာ အခမ်းခမ်းဆဲင်ꩻရာꩻကိုလဲ့ လိုꩻမျိုꩻဗွိုန် ဘာႏသာႏငေါဝ်းငွါ လိတ်လုဲင်ꩻကဗွိုန်ဒါႏ ခမ်းဖုံႏနောဝ်ꩻ ဗီယဲက်နမ် ၂-ခမ်း ဗူႏချာတခမ်းချင်ႏ၊ ဂျာႏမနီႏ ၂-ခမ်း ဗူႏချာတခမ်းချင်ႏနောဝ်ꩻသနဲ့ ဖူးမူႏ" မဉ်ႏထွားချာ ခမ်းဒွမ်ဖဲ့ꩻသူꩻလဲ့ လိုꩻမျိုꩻလဲ့ဗွိုန်တောဝ်း၊ လိတ်လုဲင်ꩻတဲ့ ဗွိုန်တောဝ်း၊ ဟံႏသာႏဝတီႏ (ပကိုꩻ)သမိန်ဘရန်းတွမ်ႏ ကေတုမတီႏ(တောင်ႏအူ) မင်းရဲကျော်စွာသီးနောဝ်ꩻ ဖေႏကတွူႏတရန်နွောင်ꩻအီ ခမ်းထန်ႏသား မွန်ဂိုတာတာ(ဂါမဏိ)စဲ့ꩻပိုႏချုပ်တဲင် နေးတွမ်ႏသꩻရက်ခွိုꩻ သꩻရက်ခမ်း ခင်ႏမွဉ်တွော့ꩻ လဲင်ꩻလွောင်ႏဗူႏလꩻနွောင်ꩻအီမွော့ ဖူးမူႏရက်ခွိုꩻ" "နင်ꩻ" "ဖူးမူႏသဘော်ꩻဗွောင်လဲဉ်း ဝေးရက်ခမ်း၊ ဖူးမူႏသီး ပအိုဝ်ႏကရိုꩻလဲ့ လိတ်လုဲင်ꩻလိုꩻမျိုꩻငေါဝ်းငွါ ဘာႏသာႏတွမ်ႏ ယေန်ႏငဲမုꩻ ထွုံꩻဓလေ့ꩻဖုံႏ ဗွိုန်ပီဒျာႏလွဝင်ꩻတဲင် တစွိုးခွိုꩻလွုမ်း လွောင်ႏဗူႏရေꩻနောဝ်ꩻလဲ့ နေးတွမ်ႏသꩻရက်ခွိုꩻလွောင်ႏဗူႏရေꩻ ခင်ႏမွဉ်တွော့ꩻ မဉ်ႏထွို့ꩻဗူႏချာနောဝ်ꩻ ထွာဗာႏအမန်ႏသွူ" "ခွန်" "သေန်ႏလျာႏငါႏဖူးမူႏ၊ နီပအိုဝ်ႏချင်ꩻချင်ꩻ မဉ်ႏထွာလွဉ် တသွီႏယာႏချင်ႏ၊ သꩻတလီးချင်ႏနောဝ်ꩻ လွောင်ႏဗူႏရေꩻ ဖြွမ်းဗူႏရေꩻ အာႏရဲင်ꩻလဲ့ အီႏတန်ထိုလွဉ်၊ ဝင်ꩻလဲ့ အီႏထီႏဖွီဗွိုန်ႏတောဝ်း၊ နမ်းတွမ်ႏနမ်းလဲ့ ယွုမ်းအံႏနွောင်ꩻချာဒျာႏ ကစဒါႏအကျိုꩻသွုပ်ဖုံႏနောဝ်ꩻ အီႏပြွူႏထန်ႏဗာႏရင်ꩻရင်ꩻသနဲ့ ဖူးမူႏ" "နင်ꩻ" "(Good Idea)"နီဝေးရက်ခမ်း အယူႏအတွေꩻနောဝ်ꩻ ဟောဝ်ငါႏဝေး" "ခွန်" "နောဝ်ꩻမꩻ ပွယ်ꩻတန်မွူးနီꩻခွိုꩻပအိုဝ်ႏ ဟန်ႏနီꩻကိုယိုလဲ့ နေးတွမ်ႏသꩻရက်ခွိုꩻလွူးတဲင်ရေꩻ တစွိုးခွိုꩻလွုမ်း လွောင်ႏဗူႏရေꩻ လိတ်လုဲင်ꩻယေန်ႏငဲးရေꩻ တွမ်ႏထွုံꩻဓလေ့ꩻ ထိန်ꩻသိမ်ꩻရေꩻ ကစဒါႏ ရေႏမိုးချက် တန်တန်အာအာဖုံႏတွော့ꩻ နီဝေးတွမ်ႏဖူးမူႏ လွေꩻလယ်ႏညီꩻတွမ် ပွယ်ꩻကိုဟောင်း" "နင်ꩻ" "အွေး- နီဝေးလဲ့ သမ်းမဲဉ်အွဉ်ႏသွတ်ꩻတွမ်ႏ သꩻရာႏခံႏစာꩻချက်ပေႏကနောႏ၊ နီဝေးသꩻရာႏကို ကအီႏဒေါ့ꩻဒါႏ ငေါဝ်းအွီႏငွါနွိုးဖုံႏနောဝ်ꩻလဲ့ ဖူးမူႏအောဝ်ႏသေထွꩻလဲဉ်းဒျာႏ ခိစ် ခိစ် ခိစ်" "ခွန်" "နုဲင်းနောဝ်ꩻလဲ့ အနွိုးအဆျာႏ နီဝေးမဲဉ်သေလဲဉ်း" "နင်ꩻ" "ဒဲဉ်သီႏလာကို တသာႏနွိုးဖျောႏထီနောဝ်ꩻ အရွိုးပြေႏအီဒါႏမွော့ ဝေးရက်ခမ်း" "ခွန်+နင်ꩻ" "ခုတ်ꩻ - ခုတ်ꩻ - ခိစ် - ခိစ်"