ဂါႏထာႏဖိုꩻတန်ႏ

"ဂါႏထာႏဖိုꩻတန်ႏ" ဝေင်ꩻတောင်ႏကီꩻကို ကအောဝ်ႏဒါႏ ပွယ်ꩻစာꩻတန်တဖြာꩻ ပွယ်ꩻစာꩻပျာꩻနောဝ်ꩻ လိုꩻဇာႏတိနီဒုံသွူ၊ ပွယ်ꩻစာꩻပျာꩻနဝ်ꩻ လိုꩻကျင်ꩻဟောဝ်၊ လိုꩻသꩻစွဉ်ႏ၊ လိုꩻချွေတာရေꩻဟောဝ်တဲင် ထွာဗာႏပွယ်ꩻစာꩻတန်တဖြာꩻနုဲင်းနောဝ်ꩻ ခွေဟွိုန်ထူꩻဆန်ꩻငါႏတောဝ်းသွူ၊ ခွေကဟွိုန်ထူꩻဆန်ꩻငါႏနောဝ်ꩻ အမပွယ်ꩻစာꩻထွန်းအကျောင်ꩻသွူ။ ပွယ်ꩻစာꩻထွန်းနောဝ်ꩻ လိုꩻနီဒုံနေနေ၊ ပွယ်ꩻစာꩻထွန်းမွိုးဖါနောဝ်ꩻ ရွဉ်လွိုင်ႏငါႏတောဝ်း၊ အံႏလွိုမ်းအွꩻလွိုမ်း နေင်ႏလွော်နေင်ႏနန်းလွုမ်ꩻ၊ တောင်ꩻကီꩻလဲ့ တအုံနွောင်ꩻတောဝ်း၊ တွိုႏယိုခါ အောဝ်ႏအုံဒျာႏဒုံကိုသွူ။ အပိုပွယ်ꩻစာꩻထွန်းနောဝ်ꩻ လꩻပွယ်ꩻစာꩻပျာꩻပိုမူႏတဲင် ယိုခါနောဝ်ꩻ မာꩻခေါ်လဲဉ်းလမ်း၊ ဗွောင်ခေါ်လဲဉ်း ပွယ်ꩻစာꩻယွုံႏသွူ၊ တနေင်ႏနီနေင်ႏယို မဉ်ႏထွားနုဲင်းကသောꩻသေင်ႏလာႏဖုံႏနောဝ်ꩻ ဟံးပေါင်းသော့ꩻဖေႏအာဒျာႏ အမပွယ်ꩻစာꩻထွန်းသွူ၊ ကွပ်နောဝ်ꩻမꩻ ပွယ်ꩻစာꩻထွန်းကလꩻဒါႏ ပွယ်ꩻစာꩻပျာꩻပိုမူႏနောဝ်ꩻ စီꩻပွာꩻရေꩻ ထင်ႏထိုဗာႏအကျောင်ꩻယို ခွေမဲဉ်သေမွေး၊ နီဖါဒင်ႏထင်ႏဖေႏ ပွယ်ꩻစာꩻထွန်းသေင်ႏလာႏ အလဲင်ႏယိုနောဝ်ꩻ နီဖါထွဉ်ႏခွေထင်ႏလွဉ်ꩻတဲင် သမ်းစွမ်စွဉ်ႏတောဝ်းတွော့ꩻ ဗေင်ႏဗာႏပွယ်ꩻစာꩻထွန်းလမ်းသွူ။ အံႏအွꩻထွူဒဲဉ်ဟာနောဝ်ꩻ ဒေါ့ꩻရီအုံကွံခန်းလို့ဝင်ꩻ၊ အဟာနော၀်ꩻနော၀်ꩻ ထဉ်ႏလင်လဲ့ သမ်းအဲဉ်ထောဝ်း၊ အောဝ်ႏခွေသွꩻ ခွန်တဗွာ ဝင်ꩻနီဒျာႏသွူ၊ ခွေနောဝ်ꩻ ယွိုန်းတလꩻတော၀်းတဲင် ရီထန်ႏခန်း ပွယ်ꩻစာꩻထွန်းနုဲင်းယို- "ပွယ်ꩻစာꩻနောဝ်ꩻ လိုꩻဇာႏတိ နီဒုံနော်" "ချီး- နာꩻတန်တဲ့ အောဝ်ႏသေသေ၊ ကဉ်းရီနောဝ်ꩻက" "ယိုနောဝ်ꩻ ငေါဝ်းပလင်ႏခံႏဒျာႏပွယ်ꩻစာꩻ၊ ခွေကမဲဉ်သေနောဝ်ꩻ ယိုမွေးတောဝ်းဒွိုန်း" "ငေါဝ်းပလင်ႏခံႏ ငေါဝ်းနိဒါန်းနောဝ်ꩻ ဒေါ့ꩻပုဲင်ႏဒွုမ်၊ ရီစွဉ်ႏစွဉ်ႏဗော့ꩻနောဝ်ꩻ" "ဟဲ-ဟဲ နုဲင်းနောဝ်ꩻလဲ့ အီႏမွေးနဲ့ပွယ်ꩻစာꩻ၊ ခိုဗင်ႏဒေါ့ꩻရီမူႏနံꩻမဉ်ႏတဲ့ ဟန်ႏနီꩻသီလွေꩻမုဲင်ꩻ၊ သီအံႏဟန်ႏအိုမုဲင်ꩻ-ဝင်ꩻရီအွဉ်ဒွိုန်းနုဲင်းနောဝ်ꩻ မွေးတဝ်းနဲ့?" ခွေနောဝ်ꩻ မဉ်ႏရီစွဉ်ႏငါႏလဲ့ မဲ့ꩻအမာဖြား စင်ꩻမွိုးဗိုမွံꩻ ဝင်ꩻသꩻငါႏဝင်ꩻမကောင်းတဲင် ထွားစင်ꩻမွိုးဗိုမွံꩻလွိုးတွော့ꩻ ခတ်ကယ်ꩻဗာႏဒွိုန်း အခေႏနေႏသွူ၊ စင်ꩻမွိုးဗိုမွံꩻလဲ့ အောဝ်ႏငပယွုမ်းဒျာႏထာꩻ၊ အလွိုးသꩻဆွာꩻဒျာႏ၊ အလွိုးရိုꩻသာꩻဒျာႏတဲင် ရီစွဉ်ႏခန်းပွယ်ꩻစာꩻထွန်းနုဲင်းယိုသွူ။ "ပွယ်ꩻစာꩻကလꩻဒါႏ စင်ꩻမွိုးဗိုမွံꩻနုဲင်းယိုနောဝ်ꩻ အလွိုးရိုꩻရိုꩻသာꩻသာꩻ မွေးတောဝ်းနဲး" ပွယ်ꩻစာꩻထွန်းနောဝ်ꩻ ထွားတေ့ꩻအမာ စင်ꩻမွိုးဗိုမွံꩻထွူတွော့ꩻ ငပယွုမ်းသွူထာꩻတဲင်- "ခွေနောဝ်ꩻ အလွိုႏတန်ႏတောဝ်းတွမ်ႏ စင်ꩻမွိုးဗိုမွံꩻတွော့ꩻ ကလꩻဒါႏ စင်ꩻမွိုးဗိုမွံꩻနုဲင်းယိုနောဝ်ꩻ နာꩻထင်းခွေသျိုႏနေးနဲ့ရိုꩻ" "နုဲင်းနောဝ်ꩻတဲ့ တမွေးတောတ်းပွယ်ꩻစာꩻ၊ ရိုꩻရိုꩻသာꩻသာꩻမွေးတောဝ်းကရိုꩻနောဝ်ꩻ သျိုႏနေးနုဲင်းနောဝ်ꩻ မွေးတောဝ်း၊ ပွယ်ꩻစာꩻနမ်းလောင်း၊ ပွယ်ꩻစာꩻကနောက်ꩻခီးကိုနောဝ်ꩻ စီꩻပွါꩻထင်ႏထိုနွောင်ꩻအီအကျောင်ꩻ ထူꩻချာꩻချက် တစွိုးစွိုးအောဝ်ႏ-ခွေယူႏနုဲင်းနောဝ်ꩻဒျာႏ" "အွူ-- ထူꩻချာꩻတထူꩻချာꩻတောဝ်းနောဝ်ꩻ ခွေသေတောဝ်း၊ ထူꩻချာꩻချက် အောဝ်ႏနုဲင်းမုဲင်ꩻကရိုꩻလဲ့ ဒေါ့ꩻနယ်ဖေႏနာꩻလဲ့ တဒါႏတောဝ်း၊ ကွဲႏတွော့ꩻ ခွေဘဝဇာတ်ရဲဉ်ႏ အအဲဉ်ႏပေႏယို အီႏခြုဲင်းနယ်ဖေႏနာꩻ၊ နာႏစဲင်းစဲင်းဒျာႏသွော့လုဲင်း" "နာႏဒျာႏဩ၊ နာႏဒျာႏ၊ ခြုဲင်းနယ်သွော့ဩ" "နီဖါသီးနောဝ်ꩻ တွိုႏယိုခါ နာꩻအောဝ်ႏသေဒျာႏအတွိုင်ꩻ ထာꩻလွုပ်ꩻတပေါႏအာတောဝ်း၊ ကလွုပ်ꩻသေင်ႏလာႏယိုနောဝ်ꩻ တလွိုမ်းတောဝ်း နားဟွိုန်ꩻတွော့ꩻ ထိုမ်ႏထဲမ်ဗာႏ ယဟူးယဟန်ႏသနဲ့၊ ထိုမ်ႏထဲမ်ကရိုꩻနဝ်ꩻ ရော့ꩻအံႏစင်းနမ်းတဲ့ အံႏစင်း၊ ရော့ꩻဖြေꩻစာဗောက်ꩻဗောက်ꩻဗဲက်ꩻဗဲက်ꩻထာꩻလဲ့ ဖြေꩻစာသနဲ့၊ နီဖါနောဝ်ꩻ ပေါႏသေင်ႏလာႏငိုးထွူလဲ့ စာလို့စွဉ်ႏတလဲင်ႏချင်ႏ၊ ကလꩻဒါႏ သေင်ႏလာႏငိုꩻယိုနောဝ်ꩻ ဖြေꩻရွမ်ရဲမ်လုဲင်ႏ ဝင်ꩻသေင်ႏလာႏတဲင် လင်ꩻစာဖေႏ စင်ꩻမွိုးဗိုမွံꩻသီးဖါသနဲ့" "အောႏ- မွေးသွူ၊ ခြုဲင်းနယ်ထဲင်းဩ" "ခွေနောဝ်ꩻ ထွာသျင်ႏခါ အုံဗာႏမန်းခမ်း နီသွံနေင်ႏ သွဉ်တကြီႏတကြွိꩻဗာႏ လိတ်လိုꩻကျောင်ꩻတဲင် မန်းငေါဝ်းပေႏတဲ့ တူႏတူႏတန်ႏတန်ႏ အောဝ်ႏဒါႏဒျာႏ" "အော်- နောဝ်ꩻနောဝ်ꩻ ဝင်ꩻအောဝ်ႏခြုဲင်းနယ်သွူအော်" "ခွေထွိုင်ႏသဲင်ꩻအောဝ်ႏလမ်းနောဝ်ꩻ နီဖါဒင်ႏလင်ꩻသေင်ႏလာႏ ယလဲင်ႏလဲင်ႏနောဝ်ꩻ ခွေလဲ့လင်ꩻလွဉ်ꩻ၊ ခွေကလင်ꩻလွဉ်ꩻဒါႏ နီဖါနောဝ်ꩻ နီဖါဟဲ့ꩻလင်ꩻမွေးတောဝ်း၊ ခွေကွီလင်ꩻလွဉ်ꩻနေးဒျာႏ" "မဲဉ်ထီႏပွယ်ꩻစာꩻပိုမူႏ နုဲင်းနဝ်ꩻမတဝ်းအော်" "ချီး- ဒေါ့ꩻဗားပုဲင်ႏထာꩻ၊ ခွေကကွီလင်ꩻလွဉ်ꩻနီဖါနောဝ်ꩻ ပျောႏရာႏအနေႏမွေးတောဝ်း၊ ဝင်ꩻဖြေꩻနုဲင်းမုဲင်ꩻ၊ စာနုဲင်းမုဲင်ꩻ ဖေႏကသေနာႏ၊ ဆုဲင်ꩻဆုဲင်ꩻ ဖြေꩻနုဲင်းဖေႏနေးကထွာ စာနုဲင်းဖေႏနေးကဒါႏ၊ ယံကထီႏဗာႏသေဗာႏနုဲင်းနောဝ်ꩻတွော့ꩻ ကွီလင်ꩻလွဉ်ꩻဒျာႏ" "အောႏ- မွေးသွူ၊ နောဝ်ꩻထွူတွော့ꩻ" "နောဝ်ꩻထွူတွော့ꩻ ခွေမဉ်ႏလင်ꩻလွဉ်ꩻဗာႏ နီဖါလဲ့ နီဖူထျꩻနောဝ်ꩻ ခွေဒေါ့ꩻခါꩻ- ဖါပွယ်ꩻစာꩻ၊ လိုႏထွဉ်ႏထာꩻမုဲင်ꩻလဲ့ ထွဉ်ႏလꩻဒျာႏ၊ အာႏနာႏဗာႏတောဝ်း'နုဲင်းနောဝ်ꩻတဲင် နီဖူလဲ့ လိုႏပြောင်ꩻချာငါသေင်ႏလာႏ၊ လိုႏအွဉ်ႏတရွို့ꩻ သေင်ႏလာႏဖုံႏ၊ တွိုက်သေင်ႏလာႏဖုံႏနုဲင်းနောဝ်ꩻနောဝ်ꩻ အာႏခꩻလဲ့ ခွေတထူႏတောဝ်း" "အောဝ်ႏထီႏတောႏ ဝင်ꩻပိုမူႏယင်" "ဟီး- အတွင်ꩻနောဝ်ꩻက အီႏလꩻပွယ်ꩻစာꩻပိုမူႏတွမ်ႏရိုꩻပုဲင်ႏ ထွားတောက်ꩻ ပွယ်ꩻစာꩻပိုမူႏလွိုးငါတဲ့ တဗွိုန်ႏတောဝ်း" ပွယ်ꩻစာꩻထွန်းထင်ႏရိုꩻနုဲင်းနောဝ်ꩻနောဝ်ꩻ အမာစင်ꩻမွိုးဗိုမွံꩻ အောဝ်ႏအေသာင် ငပယွုမ်းခန်းထာꩻသွူ။ "အွူ- ခြုဲင်းထဲင်းဟုဲင်း ပွယ်ꩻစာꩻ" "ခြုဲင်းအီ ခုဲင်ႏထာႏဝတောဝ်းဒွိုန်း စအထျꩻလွုမ်ꩻ၊ ခွေလင်ꩻလွဉ်ꩻနီဖါ အွိုးတလဲင်ႏနောဝ်ꩻ နီဖူတွမ်ႏနီဖီ ဒေါ့ꩻရီလို့ဝင်ꩻနုဲင်းမုဲင်ꩻမကောင်း နီဖူဟဲ့ꩻအုံညီꩻခန်းဒျာႏခွေ၊ နီဖါလဲ့ဖေႏအအာႏတွော့ꩻ ခွေလဲ့အုံညီꩻခန်းဒျာႏသွူ။ ++++++++++ အောဝ်ႏစက္ကန့် ထွာမိနေစ်၊ အောဝ်ႏမိနေစ် ထွာနားရီႏ၊ အောဝ်ႏနားရီႏ ထွာအနီꩻ၊ အောဝ်ႏအနီꩻ ထွာအလာ၊ တွိုႏတလာတီꩻတရောဝ်ꩻကိုနောဝ်ꩻ- "ထွန်း" "ဪ" "ယို- လွေꩻဖေႏ ပွယ်ꩻစာꩻသွင်ႏ ရွဉ်ယို နီသောင်ႏ" ခွေလဲ့ ထူႏရွဉ် စငါရေႏတွက်စံꩻနေးလွုမ်ꩻ- "တွက်ပုဲင်ႏဒုမ် ခွေတွက်သေꩻခါꩻလဲဉ်း သေႏသေႏချာႏချာႏ၊ အအီႏသဲင်ꩻဖြေꩻ သေင်ႏလာႏကောင်ကွဉ်ႏတဲ့ (၈)နားရီႏ ဖေႏကဖျော်ရိုꩻနောဝ်ꩻ၊ မဲ့ꩻအပွေါးည၊ လွေꩻခန်းဟုဲင်း" "ဩေား" ခွေလဲ့ နဲစ်ထူႏစက်ꩻခန်းရွဉ် လွေꩻဖေႏခန်းဒျာႏ ပွယ်ꩻစာꩻသွင်ႏသွူ၊ အောဝ်ႏပွယ်ꩻစာꩻသွင်ႏလမ်း ကထွိုင်ႏဖျော်သဲင်ꩻနောဝ်ꩻ- "နီဖါဖေႏ ရွဉ်ယိုဟွဉ် လွိုတရေင်ဪ" "ခွေတွက်ထွားလဲဉ်း သေႏသေႏချာႏချာႏမွော့ အောဝ်ႏလွိုလꩻကနုဲင်းမုဲင်ꩻအီ၊ နာꩻတွက်မာႏဒျာႏယင်" "မာႏတောဝ်းဩ၊ ခွေလဲ့တွက် ပွယ်ꩻစာꩻလဲ့တွက်၊ လွိုတရေင်ဒျာႏရင်ꩻဩ" "အွူ- နောဝ်ꩻလဲ့ ခွေတွက်မာႏဒျာႏနဝ်ꩻသနဲ့၊ နေးခန်းနာꩻနောဝ်ꩻ ခွေထူႏတောဝ်းဒွုမ်၊ နာꩻမဉ်ႏအွဉ်ႏဒေါ့ꩻတောဝ်းလဲ့ ခွေတသေတောဝ်းဒျာႏရင်ꩻ" "နေးတွမ်ႏဖါပွယ်ꩻစာꩻ၊ ရွဉ်ပဉ်ခွိုင်းယိုနောဝ်ꩻ" "ထူႏဟုဲင်း၊ နာꩻမွော့နီးနွာငါႏနောဝ်ꩻ၊ ဝင်ꩻဖေႏက ထူႏတေ့ꩻတေ့ꩻမွိုင်" ခွေနောဝ်ꩻ တမဲဉ်ထူႏတောဝ်းလဲ့ နီဖူသမ်းဖေႏနွိုင်ႏနွိုင်ႏတွော့ꩻ ထူႏသိမ်ခန်း ရွဉ်တရေင်နောဝ်ꩻသွူ။ အောဝ်ႏခါႏသွံလာရပ်- "ထွန်း" "ဩေား" "လွေꩻဖေႏ ပွယ်ꩻစာꩻရွဉ်ယို သွံသောင်ႏ" "ဩေား" "ထူႏရွဉ်ထွုက် စငါရေႏတွက်ထွားလွုမ်ꩻ" "တွက်ပုဲင်ႏဒွုမ်၊ ခွေတွက်ထွူလဲဉ်း၊ မဉ်ႏလွိုတဲ့ နာꩻလꩻ၊ မဉ်ႏဗွေတောဝ်းလဲ့ မဲ့ꩻသဲင်ꩻကွီယင်း၊ ခွေအီႏလင်ꩻဟိုပုံꩻ၊ နာꩻလင်ꩻလွဉ်ꩻဗာႏခွေ၊ လွေꩻခန်းဟုဲင်း" "ဩေား" ခွေလဲ့ထူႏရွဉ်ထွုတ် လွေꩻဖေႏဗာႏ ပွယ်ꩻစာာꩻမောင် မင်္ဂလာဦးရပ်ကွက်ကိုသွူ၊ ခွေထင်ႏလွေꩻတွက်ထွား ပွယ်ꩻစာꩻမောင်လမ်းနောဝ်ꩻ လိုႏရွဉ်တရေင်၊ ပွယ်ꩻစာꩻမောင်တွက်ထွားလဲ့ လိုႏတရေင်နေနေသွူ၊ ကလိုႏရွဉ်တရေင်နောဝ်ꩻ စဲက်သော့ꩻဖေႏဗော့ꩻ တွမ်ႏခွေရွဉ်သွူ၊ ကစဲက်ဗာႏတရေင်ယိုနောဝ်ꩻ ခွေတအွဉ်ႏဒေါ့ꩻချာတောဝ်းနီဖူ၊ မတ်ဗော့ꩻ ဝွေꩻကဖေႏရွဉ်တရေင်ကရီးနောဝ်ꩻတဲင် အုံဗော့ꩻတေ့ꩻတေ့ꩻသွူ။ နုဲင်းတရူꩻ ပွယ်ꩻစာꩻမောင် ထင်ႏလွဉ်လယ်ႏနောဝ်ꩻ- "ခွေအွဉ်ႏတထွန်း လွေꩻဖေႏရွဉ် မစာႏရောဝ်ꩻနောဝ်ꩻ လိုႏတရေင်စောင်းမꩻမွေးနဲ့မောင်ႏ" "မွေးမွော့၊ လိုႏလဲ့ ဝွေꩻစဲက်ဗွေဖေႏထွူဒျာႏ၊ အသဲင်ꩻဒေါ့ꩻနုဲင်းနောဝ်ꩻနဲ့" "အွူ" ခွေလဲ့ တသဲင်ꩻဒေါ့ꩻဗာႏတောဝ်း ရွဉ်တရေင်နောဝ်ꩻ အစွော်စွော်တွက်ယောမ်ꩻဒျာႏ၊ ခွေဆဲစ်နဲစ် တဆဲစ်နဲစ်တောဝ်းအကျောင်ꩻယို ဖေႏကသေတဲင် စံꩻဒျာႏခွေအကျောင်ꩻနောဝ်ꩻ ဝွေꩻသီးဒေါ့ꩻရီလို့ဝင်ꩻတွင် ခွေအောဝ်ႏအံႏဒဲဉ် ဆောင်ဖုဲင်ꩻကို အောဝ်ႏဟွိုန်လွေꩻတဲင် သေထွꩻချာဗာႏနုဲင်းနောဝ်ꩻသွူ။ နောဝ်ꩻသွူတကာႏတောဝ်း ခွေစဲက်သော့ꩻဗာႏတရေင်ယို ခွေသမ်းသဲင်ꩻကွီချာတောဝ်းတဲင် နီဖူနောဝ်ꩻ အလွိုးယိန်းဟွိုန်ဟောဝ် ယွုမ်းအံႏခွေသွူ။ "နီဖူနောဝ်ꩻ နုဲင်းယိုအတွိုင်ꩻ စံꩻထွားခွေအလဲင်ႏလဲင်ႏထွူတဲင် မဉ်ႏဒေါ့ꩻယိုꩻယိုꩻနောဝ်ꩻ အသဘော်ꩻကျခန်းခွေတွော့ꩻ ဖေႏခန်းဒျာႏ အပိုမူႏနောဝ်ꩻသွူနယ်" "နောဝ်ꩻတွော့ꩻ" "နောဝ်ꩻတွော့ꩻ ခွေတွမ်ႏသီမွိုး စင်ꩻမွိုးဗိုမွံꩻယိုနောဝ်ꩻ ထွာခန်းဒျာႏ တမာဝါꩻနောဝ်ꩻသွူ၊ ယိုခါနောဝ်ꩻ ထွာခန်းဒျာႏ ပွယ်ꩻစာꩻထွန်းနောဝ်ꩻသွူ။" ခွေနောဝ်ꩻ ဟွိုန်ဗာႏသွူ ပွယ်ꩻစာꩻထွန်းအကျောင်ꩻနုဲင်းယိုတဲ့ ခုဲင်ႏကေႏနပ်တောဝ်းဒွိုန်းတဲင် ရီထင်ႏချာယင်းနုဲင်းယိုသွူ။ "နီဖါပွယ်ꩻစာꩻ ကလꩻဒါႏ နီမွိုးစင်ꩻမွိုးဗိုမွံꩻနုဲင်းယိုနောဝ်ꩻ ပွိုးထာꩻမုဲင်ꩻကရိုꩻနောဝ်ꩻ တိတိကျကျဒေါ့ꩻတလꩻတောဝ်းသနဲ့" "ဒေါ့ꩻလꩻတောဝ်းဗာႏ၊ အရိုꩻခွေနောဝ်ꩻ သꩻစွဉ်ႏနုဲင်းနောဝ်ꩻမကောင်း" "မဉ်ႏကွပ်သꩻစွဉ်ႏ တစွိုးပေႏနောဝ်ꩻ နေႏတန်ႏရာႏ တဖေႏနွောင်ꩻတောဝ်း ပိုမူႏမတောဝ်း၊ ပွယ်ꩻစာꩻယို အဆောင်ႏဟောဝ်တစွိုးစွီုး အောဝ်ႏမတောဝ်း" "အောဝ်ႏတောဝ်းဗာႏ၊ မဉ်ႏရိုꩻအောဝ်ႏတောဝ်းတဲ့ အောဝ်ႏတစွိုးပေႏကွေး" "ထာꩻမုဲင်ꩻအီ ဖါပွယ်ꩻစာꩻ၊ တသီႏဆောင်ႏနဲ့၊ ဂါႏထာႏနဲ့" "တသီႏဆောင်ႏတဲး တမွေးတောဝ်း၊ မဉ်ႏရိုꩻဂါႏထာႏတဲးလဲ့ အောဝ်ႏသေန်ႏနေနေကွေး" "ဖါပွယ်ꩻစာꩻ ဂါႏထာႏယို မဉ်ႏကွီသွဉ်နောဝ်ꩻ လꩻနေဟောင်း" "မာꩻအီထာꩻမုဲင်ꩻ" "မာꩻအီထာꩻမုဲင်ꩻလဲ့ နုဲင်းဖါပွယ်ꩻစာꩻ ကမာꩻအီနောဝ်ꩻသနဲ့၊ ခိုဗင်ႏတလိုႏတောဝ်း အီႏအဝ်ႏနဲ့" ပွယ်ꩻစာꩻထွန်းနဝ်ꩻ စဉ်ꩻစာꩻပသာႏထွူတဲင်- "နာꩻမဲဉ်ဒါႏမွေးနဲ့" "မဲဉ်ဒါႏမွေးအီ၊ မဉ်ႏတမဲဉ်ဒါႏတောဝ်းက ပါꩻမုဲင်ꩻအီႏရီနွိုင်ႏ" "နီဖူ ပိုမူႏမူႏနံꩻ မဉ်ႏအဲဉ်ထောဝ်းဒွုမ်နောဝ်ꩻ" "ဟီး- ဂါႏထာႏတပွုတ်ချင်ႏ ကျံႏအီစွဉ်ႏ ပါꩻပိုမူႏ တဖူးဝေးနောဝ်ꩻ အမျိုꩻမွေးငါႏနဲ့၊ အလင်ဒျာႏပွယ်ꩻစာꩻ" "ပေါႏနောဝ်ꩻတဲ့ တင်ႏဆရာႏတင်ႏ ငတ်ꩻစွဲးဟုဲင်း၊ တင်ႏဟန်ႏဟာယို" "ရဲဉ်ႏဗာႏနေး ဆရာႏတင်ႏနဲ့ပွယ်ꩻစာꩻ၊ လိုႏထာꩻမုဲင်ꩻမုဲင်ꩻအီ" ခွေနောဝ်ꩻ သꩻရေꩻငါႏတဲင် နဲစ်လောႏရီသော့ꩻစွဉ်ႏနုဲင်းနောဝ်ꩻသွူ၊ ပွယ်ꩻစာꩻလဲ့ ငပယွုမ်းသွူထာꩻတဲင် ဒေါ့ꩻယွယွသာႏသာႏခန်းနုဲင်းယို- "နာႏသွတ်ꩻသွတ်ꩻက ခွေငေါဝ်းယို" "အော်- အော်- ဒေါ့ꩻဟုဲင်းအော်" "ဂါႏထာႏနောဝ်ꩻ သွဉ်အွံဗာႏထွူဟန်ႏဟာမွေးတောဝ်း၊ ခွေတဲမ်းသော့ꩻဖေႏနေး စေးလာႏတွော့ꩻ သော့ꩻလိတ်ခြုံ၊ ပေ့ꩻဟောဝ်ဟောဝ်ခါꩻဒျာႏ၊ တွိုႏလမ်းမꩻ သဲင်ꩻဗွောင်နုဲင်းနောဝ်ꩻ" "လꩻဒျာႏပွယ်ꩻစာꩻ၊ တောႏငါဖေႏဒါႏငါ၊ မဲဉ်လို့ခွိုင်းမုဲင်ꩻလို့၊ ကွဲႏတွော့ꩻ ခွေမဉ်ႏလꩻ လိုꩻမူႏနောဝ်ꩻ တွမ်ႏရိုꩻပုဲင်ႏ ခွေသျိုႏနေးနေား" "ရိုꩻတောဝ်းအီ၊ ခွေမဉ်ႏရိုꩻလဲ့ တွမ်ႏကရိုꩻချာခွေနမ်းနောဝ်ꩻ ပီပီဝင်ꩻနောဝ်ꩻနဲ့" "မွေးတန်ဟနော်ႏ- ပွယ်ꩻစာꩻကလꩻ စင်ꩻမွိုးဗိုမွံꩻ-လဲ----" ခွေငေါဝ်းကျံႏပလွတ်ꩻထန်ႏသွူနုဲင်းနောဝ်ꩻ သမ်းယူႏလꩻယင်း စင်ꩻမွိုးဗိုမွံꩻတဲင် ထွိုင်ႏလောႏထွား အလွိုးသမ်းအောဝ်ႏ ပယွုမ်းယွုမ်းတွော့ꩻ သꩻပေါင်းချမ်ꩻသာႏယင်းသွူ။ ပွယ်ꩻစာꩻနောဝ်ꩻ သꩻတဆွာꩻဒွုမ်တဲင် ရိုꩻဖေႏခန်းခွေနုဲင်းယို- "ယိုယို ခွေအွဉ်ႏဒေါ့ꩻဖေႏနာꩻ၊ နာꩻအောဝ်ႏဒေါ့ꩻဗားပုဲင်ႏထာꩻနောဝ်ꩻ ဂါႏထာႏသျိုႏတမွေးတောဝ်း၊ သျိုႏကရိုꩻနောဝ်ꩻ သျိုꩻပါꩻမူႏနောဝ်ꩻလဲ့ ကျွိုက်ပါꩻမူႏနောဝ်ꩻလွုမ်ꩻ၊ ညလဲ့ လွꩻထီႏယင်းဒျာႏ၊ ဂါႏထာႏယိုနောဝ်ꩻ နုဲင်းနောဝ်ꩻမွေးတောဝ်း၊ တဖြာꩻလွုမ်ꩻတကာႏတောဝ်း" "မူႏနံꩻကားကအောဝ်ႏ ကျွိုက်လို့နဲ့ပွယ်ꩻစာꩻ" "အွူ-အော် မွေးတောဝ်း၊ မူႏနံꩻလွုမ်ꩻတကာႏတောဝ်း၊ ပိုမွိုးဖုံႏလဲ့ကျွိုက်၊ လိုꩻခိုဖုံႏလဲ့ ကျွိုက်၊ ကားကအောဝ်ႏကျွိုက်လို့" "နောင်ꩻငါႏလဲ့ သမ်းလွဉ်ꩻမတဝ် ပွယ်ꩻစာꩻ" ခွေနောဝ်ꩻ မဲဉ်အွဉ်ႏကျွိုက်ဒျာႏ မူႏနံꩻလွုမ်ꩻလဲ့ ပွယ်ꩻစာꩻသမ်းရိုꩻ ကားကအောဝ်ႏကျွိုက်လို့တဲင် ခွေသဘော်ꩻပေါႏကျတောဝ်းတွော့ꩻ ဒေါ့ꩻချာခန်းနုဲင်းနောဝ်ꩻသွူ။ "လွဉ်ꩻတောဝ်း-လွဉ်ꩻတောဝ်း၊ အလွဉ်ꩻအဲဉ်ထောဝ်း၊ မဲ့ꩻနာꩻသေနာႏယွယွဒျာႏ၊ ခွေလွꩻခြုဲင်းလို့လို့ငါႏ" "ဩော်- လွꩻခြုဲင်းလဲ့ လꩻဒျာႏပွယ်ꩻစာꩻ၊ ခွေကေႏနပ်ဒျာႏ" "ယို- ဒေါ့ꩻဒွေါင်ႏဒွေါင်ႏငါ၊ ထူႏနဲ့ ထူႏတောဝ်းနဲ့" "ထူႏဩ" ခွေထင်ႏရိုꩻထူႏနောဝ်ꩻ ပွယ်ꩻစာꩻလဲ့ ထွိုင်ႏဗွောင်ခန်းတီဗီတဲင်- "သီထွားပအိုဝ်းယိုလုဲင်း၊ ခွေလွေꩻတဲမ်းဖေႏနာꩻ" ရိုꩻထွူနုဲင်းနောဝ်ꩻတွော့ꩻ နွို့လွေꩻခန်းဒျာႏ အခန်ꩻကိုသွူ။ အောဝ်ႏတဆင်ႏ ပွယ်ꩻစာꩻထွန်း အောဝ်ႏခန်ꩻကို ထန်ႏလွဉ်ချာ၊ ထွဉ်ႏခန်းစင်ꩻမွိုးဗိုမွံꩻ ထူႏလွဉ်တကောက်ꩻရွဉ် အွဉ်ႏသော့ꩻတွမ်ႏ ကောဝ်ႏဟူဖေါင်းထွူမꩻ ထွဉ်ႏခွေသော့ꩻ ရွဉ်ငတ်ꩻစွဲး၊ ထွဉ်ႏကပ်နေး သေႏခေါင်းသေႏချာႏသွူ။ ခွေကပ်ထင်ႏထွူနောဝ်ꩻ ထူႏဂါႏထာႏ ကအောဝ်ႏသော့ꩻဒါႏ လိတ်ခြုံနောဝ်ꩻတဲင် သော့ꩻငါလင်ꩻလခန်း တကောက်ꩻကိုတွော့ꩻ- "ဝုဲင်ႏ-ရွဉ်လွဉ်ꩻဟုဲင်း" "ဩ" "ဆရာႏပွယ်ꩻစာꩻဩ-(ဆရာႏပွယ်ꩻစာꩻဩ)" "ခွေထွာလဲဉ်း နာꩻဆရာႏနေား" "ဩ" "တဲႏစဟန်ႏဟာ-(တဲႏစဟန်ႏဟာ)" "မာꩻတငါယိုနောဝ်ꩻ-(မာꩻတငါယိုနောဝ်ꩻ)" "ခွေသွဉ်းကုဝေရယို-(ခွေသွဉ်းကုဝေရယို)" "ထူႏလဲဉ်းပွယ်ꩻစာꩻထွန်းခြေင်ႏတဲင်-(ထူႏလဲဉ်းပွယ်ꩻစာꩻထွန်းခြေင်ႏတဲင်)" "သီႏလငတ်ꩻပါꩻယို-(သီႏလငတ်ꩻပါꩻယို)" "တလွဉ်ꩻမာႏတဝ်း-(တလွဉ်ꩻမာႏတဝ်း)" "တပဲစ်မာႏတောဝ်း-(တပဲစ်မာႏတောဝ်း)" "သျောင်ႏကံဒျာႏဩ-(သျောင်ႏကံဒျာႏဩ)" "ခွေသွဉ်းငေါဝ်းယို-(ခွေသွဉ်းငေါဝ်းယို)" "မဉ်ႏမွေးမဲဉ်ႏနောဝ်ꩻ(မဉ်ႏမွေးမဲဉ်ႏနောဝ်ꩻ)" "(၇)မွူးနီꩻသာꩻ-(၇-မွူးနီꩻသာꩻ)" "မေတ္တာႏယံတွိုႏ-(မေတ္တာႏယံတွိုႏ)" "ယံခြွေယံခြာႏ-(ယံခြွေယံခြာႏ)" "ယံချမ်ꩻသာႏဩ-(ယံချမ်ꩻသာႏဩ)" "ခွေသွဉ်းငေါဝ်းယို-(ခွေသွဉ်းငေါဝ်းယို)" "မဉ်ႏမဲဉ်ႏတဝ်းနဝ်ꩻ-(မဉ်ႏမဲဉ်ႏတဝ်းနဝ်ꩻ)" "ယံကေန်ꩻ ယံမွ-(ယံကေန်ꩻ ယံမွ)" "ယံဒုက္ခဩ-(ယံဒုက္ခဩ)" "သာႏဓုသွံလဲင်ႏဟုဲင်း" "ဩ-သာႏဓု-သာႏဓု-သာႏဓု" ပွယ်ꩻစာꩻထွန်းနောဝ်ꩻ ထူႏလိတ်ခြုံတကောက်ꩻကို ဖေႏအပ်လင်ꩻခန်းခွေထွူတဲင် ထူႏရွဉ်ဆရာႏတင်ႏ သဲမ်ခန်းဒျာႏသွူ။ "အွူ-ထွူလဲဉ်းတွော့ꩻ ပွိုင်းဝွို့တွမ်ႏဂါႏထာႏယို ခွေအောဝ်ႏမဲဉ်ခြုဲင်းဖေႏနေနာꩻ" "ဩ- ခြုဲင်းဩ၊ အောဝ်ႏလိုႏသေစဲင်း အကျိုꩻဟော်ꩻဩ" "ဂါႏထာႏယိုနောဝ်ꩻ ဆရာႏတင်ႏငတ်ꩻစွဲး ရိုꩻနောဝ်ꩻလဲ့ အမဲဉ်ႏတဗာႏနောဝ်ꩻ တန်ႏငတ်ꩻစွဲးတကာႏတောဝ်း၊ မဉ်ႏရိုꩻငတ်ꩻရေင်လဲ့ ငတ်ꩻရေင်၊ မဉ်ႏရိုꩻငတ်ꩻသောင်ꩻတဲ့ ငတ်ꩻသောင်ꩻသနဲ့၊ ပွိုးနုဲင်းမုဲင်ꩻနဲးတဲင် လိုꩻကဆောင်ႏဒါႏ ဂါႏထာႏယိုနောဝ်ꩻ အကျိုꩻအောဝ်ႏဘဝယိုလွုမ်ꩻတကာႏတောဝ်း၊ ပါတွမ်ႏဘဝ ဆꩻငါငါလꩻအီနွောင်ꩻပါတွမ်ႏနိဗ္ဗာန်ႏ" "ဩော- မွေးငါႏဩ" "မွေးလဲ့ ယွယွရိုꩻပုဲင်ႏ" "ဩော- ခြုဲင်းလို့လို့ဩ" "ဂါႏထာႏယိုနဝ်ꩻ မဉ်ႏရိုꩻဘုရာꩻဟော်ꩻလဲ့ မွေးမွေး၊ တကမ္ဘာႏလွုမ်းကအဝ်ႏဒါႏ လောကီဝိဇ္ဇာႏ၊ လောကုတ္တရာႏဝိဇ္ဇာႏသီးငေါဝ်းလဲ့မွေးမွေး၊ တကမ္ဘာႏလွုမ်းကအဝ်ႏဒါႏ ဗုဒ္ဓဘာႏသာႏ' အိန္ဒိယဆွာမိသီး' ဟိန္ဒူဆာဒူးသီး' တိဘက်လားမားသီးငေါဝ်းတဲ့မွေးမွေး" "ဩော" "ကွယ်ႏတွော့ꩻ အထျꩻအောဝ်ႏထာꩻယွုမ်းအံႏမုꩻ၊ ထာꩻယွုမ်းအံႏယို အွဉ်ႏသွူသꩻကိုတဲင် မဉ်ႏအုံအောဝ်ႏကျင်ꩻသွုံꩻလွဉ်ꩻနောဝ်ꩻမꩻ အတံꩻခိုꩻသန်" "ဩော-ယွုမ်းအံႏဒျာႏဩ" "ခွေကဖေႏနာꩻ လိတ်ခြုံယိုနောဝ်ꩻ မဉ်ႏတွိုႏသဲင်ꩻလမ်းမꩻ ဗွောင်ထွားနော" "ဩော" "ခွေဖေႏနာꩻဂါႏထာႏယို မွေးတမွေးတောဝ်း၊ သေန်ႏတသေန်ႏတောဝ်း စဉ်ꩻစာꩻယွယွ၊ စဉ်ꩻစာꩻစဲင်းစဲင်းနော" "ဩော" "ခွေကထူႏဒါႏ ဆရာႏတင်ႏငတ်ꩻစွဲးယိုနောဝ်ꩻ နာꩻဖေႏကအွဉ်ႏတန်ႏဖိုꩻတွော့ꩻ ခွေထူႏဒျာႏ၊ အီႏလွူးအီခွေပိုမာမွေးတောဝ်း၊ ဘာႏသာႏ သာႏသနာႏအကျိုꩻဖေႏကအောဝ်ႏ ဝေင်ꩻတောင်ႏကီꩻကို ကအောဝ်ႏဒါႏ ပအိုဝ်ႏနိကာယလိတ်သွဉ်တွိုက်အတွက်တာႏ ခွေအီႏလူႏတေား တကျောင်ꩻတစွဲးစွဲး" "ဩော" ခွေနောဝ်ꩻ မဲဉ်လꩻမွေးလဲဉ်း ပွယ်ꩻစာꩻထွန်းဂါႏထာႏတဲင် ပွယ်ꩻစာꩻထွန်း ကဒေါ့ꩻအတွိုင်ꩻ၊ ကခြုဲင်းအတွိုင်ꩻ ဒေါ့ꩻချာခရာႏ ငေါဝ်းတအဲဉ်ထောဝ်းတွော့ꩻ 'ဩ'လွဉ်ꩻဗာႏတိက်ꩻတိက်ꩻလွုမ်ꩻသွူ။ ထင်ႏအောဝ်ႏတောင်ႏကီꩻသဲင်ꩻ တဖူꩻလောင်းနောဝ်ꩻ ခွေသွꩻကပါလင်ꩻလွဉ်ꩻခွေ ခွန်တဗွာနောဝ်ꩻ ကွီသွဉ်တေားခန်းခွေသွူ။ "ပွယ်ꩻစာꩻကဖေႏနာꩻ ဂါႏထာႏနောဝ်ꩻ မဲ့ꩻသွဉ်ဖေႏတေားခွေနော၊ ခွေတင်ႏလုဲင်ႏနာꩻတကွံꩻ" "တင်ႏဗွေဗွေငတ်ꩻစွဲး နုဲင်းခွေကတင်ႏနောဝ်ꩻမွိုင်အီ" "ခွေမဉ်ႏတင်ႏငတ်ꩻစွဲးနောဝ်ꩻ နာꩻထွာတောဝ်း အလꩻခြေင်နဲ့ကား" "လꩻခြေင်နောဝ်ꩻထွာမုဲင်ꩻအီ၊ ခွေမဉ်ႏတမွေးတောဝ်း စောင်းမꩻနာꩻအီႏသေကွီနဲ့၊ ခွေထွာလုဲင်ႏ နာꩻဆရာႏသွူဟွေး" "အွူ- နောဝ်ꩻလဲ့ မဲ့ꩻခွေတင်ႏလုဲင်ႏနာꩻသွံစွဲး၊ ဆဲစ်နာꩻလဲ့ တမွေးတောဝ်း၊ ခွေခြေားလဲဉ်းနာꩻနောဝ်ꩻ နာꩻအောဝ်ႏသေဒျာႏနောဝ်ꩻကား" "အွူ- နောဝ်ꩻလဲ့ မဲ့ꩻခွေစဉ်ꩻစာꩻစံꩻ" "စဉ်ꩻစာꩻဗာႏကနုဲင်းမုဲင်ꩻ၊ လိုꩻသွꩻပေႏလို့ဝင်ꩻက၊ မဉ်ႏလꩻပွယ်ꩻစာꩻပိုမူႏ နုဲင်းပွယ်ꩻစားထွန်းနောဝ်ꩻလဲ့ လꩻနုဲင်းနုဲင်းဝင်ꩻ၊ အုံဗာႏတောင်ႏကီꩻနုဲင်းနုဲင်းဝင်ꩻနဝ်ꩻ ဟဝ်တဝ်းနဲ့" "အွူ- မဲ့ꩻခွေချင်းဒျာႏ၊ နာꩻတန်လဲ့ တွိုႏဂါႏထာႏနောဝ်ꩻမဲဉ်လꩻ၊ တွိုႏရွဉ်နောဝ်ꩻ ငမ်းအလို့က" "ဟဲ-ဟဲ မဲဉ်လꩻသနဲ့သွꩻ၊ စာႏနာႏမွိုင်နာꩻနောဝ်ꩻ" အဟာနောဝ်ꩻ အောဝ်ႏဝေင်ꩻသဲင်ꩻ ဟမ်းတရွော့ꩻတဖဲ့ꩻ၊ မဲဉ်ဟော်ꩻထွားသန်လဲဉ်း ဂါႏထာႏနောဝ်ꩻတဖဲ့ꩻတဲင် လယ်ႏဒွုမ်ထာꩻ၊ အံႏအွꩻထွူလဲ့ ထျစူ အွꩻနေင်းတဝန်ႏနီဝန်ႏထွူနောဝ်ꩻ နွို့ခင်ႏလမ်းဗေင်ႏ ဗွောင်ဟော်ꩻထွားခန်းဒျာႏသွူ။ "ဂါႏထာႏတန်ႏဖိုꩻ" + စဉ်ꩻစဉ်ꩻစာꩻစာꩻ ရိုꩻရိုꩻသာꩻသာꩻ ကျိုꩻစာꩻသွော့။ ဟော်ꩻလဲင်ꩻသွတ်ꩻသွူလဲ့ "ဥံ"လဲ့ သမ်းတပါတဝ်း၊ "ဩောင်း"လဲ့ သမ်းတပါတဝ်းတွော့ꩻ ဂါႏထာႏမွေးကျောင်ꩻ၊ မွေးတောဝ်းကျောင်ꩻ သမ်းတစဲင်းတောဝ်းတဲင် ချာႏစေးလာႏ၊ ထွားလုဲင်ႏတေားအငင်းဖဲ့ꩻသွူ၊ အငင်းဖဲ့ꩻလဲ့ ထာꩻမုဲင်ꩻမုဲင်ꩻလဲ့ သမ်းတအဲဉ်ထောဝ်းတဲင် ဂါႏထာႏနောဝ်ꩻ ယိုသွူအကျောင်ꩻ ကွဲးစဲင်းငါႏသွူ။ ဟော်ꩻထွားသွူ နီသွံပြန်ႏ ထင်ႏသေစဲင်းအခရာႏ၊ ထင်ႏသေစဲင်း ဂါႏထာႏအဓိပ္ပါယ်ႏနောဝ်ꩻ တယွို့လွိုႏလွိုႏ၊ ကဲဉ်းလွိုႏလွိုႏ၊ ဝင်ꩻသꩻဝင်ꩻလွိုႏလွိုႏ၊ မဉ်ႏကွီချာယင်းရွဉ်ငတ်ႏစွဲးနောဝ်ꩻ မွေးလွိုႏလွိုႏ၊ မွေးတောဝ်းလွိုႏလွိုႏတဲင် ငပယွုမ်းတေ့ꩻသွူထာꩻ တဖြာꩻတန်ဒျာႏတွော့ꩻ သꩻကိုဆွုံꩻဖျတ်ပါခန်းနဒဲင်းယိုသွူ။ "အွူ- စာဖေႏမွေးခန်း တဗွာသွံစွဲးမꩻ" တောင်ꩻသေꩻ- လိတ်ထွားသားဖုံႏဟွေး- ခွေထင်ႏသေစဲင်း ဂါႏထာႏအဓိပ္ပါယ်ႏနောဝ်ꩻ တယွို့လွိုႏလွိုႏ၊ ကဲဉ်းလွိုႏလွိုႏ၊ ဝင်ꩻသꩻဝင်ꩻလွိုႏလွိုႏ၊ မွော့ယူႏတွိုႏနုဲင်းနောဝ်ꩻဟောင်း၊ မဉ်ႏကွီချာရွဉ်ငတ်ꩻစွဲးနောဝ်ꩻ မွေးလွိုႏလွိုႏ၊ မွေးတောဝ်းလွိုႏလွိုႏ၊ မွော့ယူႏတွိုးနုဲင်းနောဝ်ꩻဟောင်း အွိုးချာနောဝ်ꩻဟွဉ်ႏနောဝ်ꩻ "မဲ့ꩻစဉ်ꩻစာꩻစံꩻ"ရိုꩻသွူနုဲင်းနောဝ်ꩻက တွိုႏယိုခါမွော့ အင်းစာဖေႏမွေးတွိုႏ အဗွာဟောင်း၊ ပွယ်ꩻစာꩻထွန်း လဲဉ်လꩻလဲဉ်းခွေနဲ့၊ ဝါလွော်တွော့ꩻ ဂါႏထာႏယိုနောဝ်ꩻ အဖိုꩻတန်ႏမွေးဒျာႏနဲ့-ကရိုꩻနောဝ်ꩻ ဟော်ꩻထွားလိတ်သား ဆွုံꩻဖျတ်ဝွေႏဖန်ႏဒျာႏသွော့ဝင်ꩻ ပငါပရာꩻ နေား။