ငါသူꩻတခီႏ လိုႏဖြွမ်းညီႏ

"ငါသူꩻတခီႏ လိုႏဖြွမ်းညီႏ" ၂၀၁၅-ပွယ်ꩻလွိုက်ရွေꩻလဲ့ ထွူသွတ်ꩻသောဝ်ꩻ၊ အနွောင်ꩻအသွုမ်ꩻနောဝ်ꩻလဲ့ သေစဲင်းအဖြေႏပေါႏလဲဉ်းဒျာႏ၊ အစိုႏရလီꩻနောဝ်ꩻ (၅)နေင်ႏသက်တန်ꩻ ဗွေထိုꩻလဲဉ်းတဲင် အစိုႏရတသာအနေႏ အီႏလုဲင်ႏပြေင်၊ အီႏထေင်းထမ်ႏလွေꩻသွူ ခမ်းထီတာႏဝွန်ႏနောဝ်ꩻသွူ။ နောဝ်ꩻမꩻ ၂၀၁၅-ပါတီစွုမ်ႏ ပွယ်ꩻလွိုက်ရွေꩻအကို နီသွဉ်းသီး ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသ (၃)ဝေင်ꩻနယ်ႏနောဝ်ꩻ နွောင်ꩻလို့ဒျာႏအကျောင်ꩻ သေထွꩻဗာႏတဲင် သꩻရေꩻထူႏဂုဏ်ႏငါႏနောဝ်ꩻသွူ။ ပွိုးတမုဲင်ꩻနဲတဲင် ခွိုꩻတွမ်ႏခွိုꩻ၊ မျိုꩻတွမ်ႏမျိုꩻ မဉ်ႏထွားဖေႏချာဒျာႏ နီအကယ်ႏ နီအတန်မꩻ နီလိုႏရာꩻဆန္ဒဖုံႏယို အီႏသေနွောင်ꩻ၊ အီႏထီႏထွꩻနွောင်ꩻတဲင် နေးတွမ်ႏသꩻရက်ခွိုꩻမဲ တဗီႏတွော့ꩻ ကပသာဒင်ႏငါဖေႏလဲဉ်း ခမ်းသားသီး"ခွန်"တဲ့မွေးမွေး၊ ခမ်းသားထီသား ထာꩻကွီကော့ꩻချက်ယို ကအီႏထဲမ်ဗွေဖေႏဒါႏပုဂ္ဂိုလ်ႏတဲ့မွေးမွေးနောဝ်ꩻသွူ။ မဉ်ႏဒေါ့ꩻဗာႏလဲ့ ခမ်းသားမွိုးဖါသီးနောဝ်ꩻ တာႏဝွန်ႏဝွတ္တရာꩻကေႏလဲဉ်း၊ အောဝ်ႏကုဲင်ဒျာႏ ထာꩻကော့ꩻမောင်ꩻချက် အီႏဗွေစွုမ်ႏအလဲင်ႏနောဝ်ꩻသွူ။ ၂၀၁၅-ပွယ်ꩻလွိုက်ရွေꩻအကို နီသွဉ်းသီး ပအိုဝ်ႏတောင်ႏကီꩻနောဝ်ꩻ လွောင်ႏဗူႏမုꩻ အောဝ်ႏဟောဝ်ဒျာႏလဲ့ ကွပ်စွဉ်ႏဒျာႏ မဲကိစ္စထာꩻသေတရာꩻ အာႏပေႏငါႏဒျာႏမကောင်၊ အွဉ်ႏရေꩻမုꩻ အာႏပေႏထိုꩻဒျာႏမကောင်၊ ထီႏဒျာႏအပြောင်ꩻအလုဲင်ႏတမျိုꩻလွုမ်ꩻမကောင်၊ မဉ်ႏတွက်ထွားဒျာႏတွမ်ႏ လိုꩻအဖြာꩻပေါင်ꩻဆေ့ꩻအာနောဝ်ꩻ အာကယ်ꩻလဲဉ်းဒျာႏ ခမ်းရင်ꩻသားအလောင်ႏအလင်လဲ့ ကလꩻထွိုက်ကလꩻသင်ꩻဒါႏ အခွင်ꩻအရေꩻ ယိုတလဲင်ႏနောဝ်ꩻ လꩻထွာတောဝ်းဒွိုန်းနောဝ်ꩻသွူ။ နီခွိုꩻ၊ နီမျိုꩻ၊ နီလိုꩻယို အောဝ်ႏလွဉ်ဒျာႏတွမ်ႏ သမဲင်ꩻအခွေါင်ခံႏတဲင် နီပအိုဝ်ႏကံႏကျမ္မာႏ နီပအိုဝ်ႏဖန်ဆင်ꩻခွင်ꩻ မဉ်ႏလꩻချာမꩻ နီပအိုဝ်ႏအနာႏဂတ် အီႏတရေꩻလွဉ်သွူတကာႏတောဝ်း လိုꩻမျိုꩻလင်အခါႏ တရျားငီႏတွာ အီႏအုံတဉ်ႏခြွော့နွောင်ꩻနောဝ်ꩻသွူ။ နောဝ်ꩻမꩻ ခေတ်အပြောင်ꩻအလုဲင်ႏအကို နီသွဉ်းသီးပအိုဝ်ႏယိုလဲ့ နေးတွမ်ႏထာꩻသေတရာꩻ တန်တန်အာအာတဲင် အသွုမ်ꩻကို အမျတ်ဖေႏကလꩻချာနောဝ်ꩻ မဉ်ႏတွိုႏလွေꩻယင်း နီရေင်နီဆီငါသူꩻ အမာႏကို အမဲဉ်ႏထူႏသွဉ်ခန်ꩻထွူ အမာႏအောဝ်ႏမꩻ အမဲဉ်ႏအောဝ်ႏအတွိုင်ꩻ မဲဉ်ႏလဲဉ်းတဲ့ ဖေႏကတဲပ်ထဲင်းထဲင်းနောဝ်ꩻ နီနမ်း၊ နီခမ်း နီထာꩻအင်းဖုံႏ ဖေႏကလꩻဗွေဗွေ၊ ကရေႏလွေꩻဒါႏ ကဝ်ႏထွန်ႏထျꩻအတွိုင်ꩻ ခင်ႏကာယို မဉ်ႏငီႏ၊ စူသီႏယို မဉ်ႏအောဝ်ႏခြေင်ဒျာႏနောဝ်ꩻ ကမ္ဘာႏအောဝ်ႏအတွိုင်ꩻ ပအိုဝ်ႏယို မုဲင်ꩻခါစွဉ်ႏလဲ့ တဖေ့သူႏနွောင်ꩻတောဝ်းသွူ။ နောဝ်ꩻမꩻ ခမ်းထီကို ပါꩻအဖြာꩻယို ပါꩻအဖြာꩻနောဝ်ꩻ နီမဉ်ႏမဉ်အွဉ်ႏထွာ နီလိုꩻတန်နောဝ်ꩻ နေးတွမ်ႏရွဉ်ဖြေꩻထူႏတလꩻတောဝ်းတဲင် နေးတွမ်ႏဒျာႏ ခမ်းသားမွိုးဖါသီး မဲတဗီႏဒင်ႏကီဖေႏနောဝ်ꩻမꩻ အီႏထွာလꩻနောဝ်ꩻသွူ။ နုဲင်းမုဲင်ꩻမုဲင်ꩻဝယောဝ်း ပအိုဝ်ႏနမ်းပဲင်ႏအုပ်ချွုတ်ခွင်ꩻ (၃)ဝေင်ꩻနယ်ႏကို အောဝ်ႏသော့ꩻစွူစွူဒျာႏ နီလိုꩻမျိုꩻစူကို၊ နီခွိုꩻစူကိုနောဝ်ꩻ ထူႏဂွုဏ်ႏခရာႏ ဟောဝ်ငါႏနောဝ်ꩻသွူ။ ခေတ်အောဝ်ႏပြောင်ꩻလွေꩻလဲဉ်းတဲင် ကအောဝ်ႏပြောင်ꩻလုဲင်ႏလွေꩻဒါႏ ခေတ်အခေႏအနေႏအကို နီပအိုဝ်ႏလိုꩻမျိုꩻဖုံႏ နေးတွမ်ႏသꩻရက်စွိုးခွိုꩻတွော့ꩻ လွောင်ႏဗူႏမုꩻ ဖေႏကကုဲင်ဗာႏမွိုန်းနောဝ်ꩻ နီအောဝ်ႏလိုႏထိန်ꩻသိမ်ꩻဟောဝ်ဟောဝ်ငါႏသွူ။ ငါသူꩻတခီႏ ပွယ်ꩻလွိုက်ရွေꩻကိုသူꩻ နီပအိုဝ်ႏလိုꩻမျိုꩻဖုံႏ နေးတွမ်ႏသꩻရက်စွိုးရက်ခွိုꩻ လွောင်ႏဗူႏမုꩻအဗွေတဗာႏတဲင် နီပအိုဝ်ႏလိုꩻမျိုꩻ ကလꩻထွိုက်လꩻသင်ꩻဒါႏ အခွင်ꩻအရေꩻဖုံႏ အီႏလꩻထဲင်းထဲင်းဒျာႏကရိုꩻနောဝ်ꩻ မောင်းမွူးခံꩻလိတ်လွီးလယ်ႏအနေႏ အောဝ်ႏယွုမ်းအံႏ ကော့ꩻမောင်ꩻလွေꩻဒျာႏအကျောင်ꩻ-