စဲ့ꩻအမော့ꩻအကျုံႏ(၆)

အဝ်ႏ ဝီခီပီးဒီးယား ကို

"စဲ့ꩻပွယ်ꩻအမော့ꩻအကျွုံႏ (၆)" "စဲ့ꩻပွယ်ꩻအမော့ꩻအကျွုံႏ"ကရိုꩻနဝ်ꩻ စဲ့ꩻသားတဖြာꩻအနေႏ အမော့ꩻအကျွုံႏ တမွေးတဝ်း၊ ပွိုင်းဝွို့တွမ်ႏစဲ့ꩻပွယ်ꩻတဲင် ခမ်းသားထံꩻသာꩻတဖြာꩻအနေႏ အမော့ꩻအကျွုံႏဒျာႏသွူ။ "စဲ့ꩻပွယ်ꩻ"ကရိုꩻနဝ်ꩻ ပအိုႏဗွာ ပအိုဝ်ႏတနျာႏ ပꩻထွူလွဝင်ꩻ ပအိုႏဗွာ ခါးလားကထူႏညိမ်ꩻချမ်ꩻရေꩻအခိန်ႏ၊ ပအိုႏဗွာ ပအိုႏတနျာႏတောမ်ႏ နဲင်ႏငံႏတောႏစဲ့ꩻ ယိုသိုမ်စွိုꩻသိုမ်မျိုꩻ တတဲ့ꩻတဝ်းလွဝင်ꩻ၊ အဝ်ႏထိုမ်ႏ အဝ်ႏကျံႏ အဝ်ႏရန်ႏ အဝ်ႏလွꩻထီႏလွဝင်ꩻခိန်ႏနဝ်ꩻသွူ။ အခိန်ႏယိုနဝ်ꩻ ခွေသွဉ်းခွန်ကုဝေ အဝ်ႏအုံသတင်ꩻသုံꩻ ဝေင်ꩻနယ်ႏဟိုပုံꩻ၊ အွိုင်ႏနောင်လဲင်၊ ကျောင်ꩻလဲင်းခါႏကိုတဲင် အဝ်ႏမာꩻဖေႏဝင်ꩻဗွေႏဗွန်သွူ။ အခိန်ႏယိုနဝ်ꩻ စဲ့ꩻတနျာႏဖုံႏ ဒေါင်မွေးစွဉ်ႏဗုံးတဲင် ဆင်ႏဆင်ႏဟွုန် ဗုံးဗာႏလိုꩻ၊ ဗာႏဖိုးပနား၊ သေဖုံႏသွူ။ လိုꩻ၊ ဖိုး၊ ပနား၊ သေဖုံႏ ကယမ်းဗာႏဗုံးနဝ်ꩻ ယဟန်ႏလဲ့သီထိုꩻ၊ ယဟန်ႏလဲ့ ခင်ႏတပွတ်ꩻထိုꩻတဲင် ထွာထိုꩻဒုက္ခိတသားနဝ်ꩻသွူ။ နေင်ႏ လာ အခိန်ႏ မွူးနီꩻတောင်ꩻတဝ်း ခꩻတနီꩻနဝ်ꩻ တကာႏတဖြာꩻ ထင်ႏခြုဲင်းနယ်- "ဆရာႏတေတ်+နင်ႏအောင်ႏ ဒုံလီꩻတန်ပိုမူႏ နင်ꩻဒုတ်နဝ်ꩻ အဝ်ႏဆေꩻမွိုင်ꩻပွဉ်သဲင်ꩻ၊ တွိုႏဖက်ꩻယန်ꩻထျꩻ ဖက်ꩻယန်ꩻတွမ်ႏ ဒုံလီꩻတန်အခါႏကို တထွောင်းနဝ်ꩻ ယမ်းဗာႏစဲ့ꩻတနျာႏဗုံးတဲင် ခင်ႏတပွတ်ꩻထိုꩻတပင်"ရိုꩻနဝ်ꩻသွူ။ ဆရာႏတေတ်+နင်ꩻအောင်ႏသီးနဝ်ꩻ တောမ်ႏခွန်ကုဝေယို အွိုးမွိုးဖါနီဖဲ့ꩻစိုးကာႏ အဝ်ႏဖဉ်းမွိုတ်သေꩻငါꩻတဲင် ထင်ႏဟွုန်သတင်ꩻနုဲင်းယိုနဝ်ꩻ သꩻလဲ့တဟဝ်တဝ်းသွူ။ ဟွုန်ထွူနုဲးယို တညတဝ်း အဝ်ႏခါႏလစ်ꩻငတ်ꩻနီꩻရပ်နဝ်ꩻ ကိစ္စအစွိုးစွိုးအဝ်ႏတွော့ꩻ ခွန်ကုဝေ အဝ်ႏကျောင်ꩻလဲင်းခါႏ ကျွꩻထင်ႏလယ်ႏခန်းဒျာႏ တောင်ႏကီꩻသွူ။ တွိုႏတောင်ႏကီꩻဆေꩻထျꩻနဝ်ꩻ ခွဲးတောမ်ႏဗွေႏစင်ꩻဖြား ဗွေႏစန္ဒိမာႏ ကျောင်ꩻဒုံလီꩻတန်တဲင် စင်ꩻဖြားစန္ဒိမာႏ ဟဲ့ꩻခန်းခွန်ကုဝေ လွေꩻလယ်ႏနင်ႏဒုတ် အွိုးစဝ်းစံထွန်း တသီႏယုံႏကိုသွူ။ ထွိုင်ႏတွိုႏလွေꩻ စဝ်းစံထွန်း တသီႏယုံႏကိုနဝ်ꩻ ဗုံးကဗာႏတပစ်ꩻဒါႏ နင်ႏဒုတ်ခင်ႏတပင်နဝ်ꩻ အဝ်ႏပိုမ်းအဝ်ႏပတ်ခါꩻဒျာႏ တောမ်ႏပတ်တီးတွော့ꩻ အဆာအကဲင်နဝ်ꩻ ထီႏဗာႏတဝ်းသွူ။ နင်ႏဒုတ်သီးမွိုး နင်ႏအောင်ႏနဝ်ꩻ အဝ်ႏအုံပွေါးအပိုမူႏနင်ႏဒုတ် တသီႏယုံႏကိုသွူ။ ခွန်ကုဝေတွမ်ႏ စင်ꩻဖြားစန္ဒိမာႏ အဝ်ႏတသီႏယုံႏကိုတွင်ꩻ ဒေါ့ꩻရီဗာႏတွမ်ႏ နင်ႏဒုတ်သီးမွိုးတွော့ꩻ နင်ႏဒုတ်သီးမွိုး ဒေါ့ꩻငဝ်းတငွါနဝ်ꩻ ဗꩻတွိုႏယိုခါ တအဝ်ႏတဖေင်ꩻတဝ်းသွူ။ နင်ႏအောင်ႏနဝ်ꩻ သက် ၁၇၊ ၁၈ အခိန်ႏ၊ မူႏနံꩻရွယ်ႏမဲန်ႏ အပိုမူႏ နင်ႏဒုတ်အတာႏ လွူးနမ်းကမ်းကြိုအတွက် အနာႏဂတ်ဆꩻငါ စဉ်ꩻစာꩻလွေꩻဖေႏနဝ်ꩻ တဖြောင်တဝ်း၊ ထာꩻယူႏပစ်ꩻငါႏ၊ ထာꩻယူႏတွိုက်ငါႏတဲင် ဒေါ့ꩻရိုꩻလွေꩻငဝ်းနုဲးယိုသွူ။ "ဝင်ꩻရိုꩻ ဟန်ႏလုဲင်ꩻသꩻဗွူနဝ်ꩻ အကင်ဖွိုꩻငါႏတဲင် သဲစ်ကဗို့ꩻ သဲစ်ကစံႏလဲ့ တွိုက်စွဉ်ႏအကင်လဲ့ ပိုမူႏအတာႏ အနာႏဂတ်ဆꩻငါ ခွေသွဉ်းထာꩻယူႏနဝ်ꩻ ဖွိုꩻထဲင်းတွိုက်ထဲင်းက ပါꩻဗို့ꩻလုဲင်ꩻနဝ်ꩻသနယ်ဗွေႏ" ခွန်ကုဝေတောမ်ႏ စင်ꩻဖြားစန္ဒိမာႏနဝ်ꩻ ဟွုန်သွူနင်ႏအောင်ႏဒေါ့ꩻငဝ်းနုဲးနဝ်ꩻလဲ့ စင်းဒေါ့ꩻချာတဝ်း နုဲးမုဲင်ꩻမုဲင်ꩻတွော့ꩻ အုံဗာႏဒျာႏတေ့ꩻတေ့ꩻနဝ်ꩻသွူ။ ခွန်ကုဝေ အဝ်ႏတောင်ႏကီꩻသဲင်ꩻတညတဝ်း မွူးနီꩻတဆီဆီရပ်နဝ်ꩻ တကာႏဒုံလီꩻတန် ၂-ဖြာꩻ သဲင်ꩻပင်ꩻမသာႏတဲင် ထွားဟောꩻထွားလိတ်ပင်ꩻနဝ်ꩻ လဲင်ꩻတယွုမ်းနွောင်ꩻတဝ်းသွူ။ ပွိုးနုဲးမုဲင်ꩻနဲးတဲင် ကလဲန်းလဲန်း မွူးနီꩻတဆီရပ် ကထင်ႏမော့ꩻခွဲးဒါႏ တသီႏယုံႏ၊ ကအဝ်ႏပွေါးဒါႏ အပိုမူႏခင်ႏတပွတ်ꩻ နင်ႏအောင်ႏနဝ်ꩻ တွိုႏလွေꩻတေားလဲန်းသွူ ခန္ဓာႏအနိစ္စ မရဏထာꩻသီအကျောင်ꩻသွူ။ ခွန်ကုဝေနဝ်ꩻ တစဲင်းတဝ်း တသျင်ꩻတဝ်းတဲင် ရီစဲင်းခန်း ကေားပင်ꩻသားသွူ။ "အထွာမုဲꩻ၊ လဲင်ꩻတွိုႏခန်းထာꩻသီနုဲးယိုနဝ်ꩻ" "ဆော့ထာꩻတဲ့ဩ" "အဝ်ႏပွေါးသွူ အပိုမူႏ တသီႏယုံႏကိုက မွော့အဝ်ႏဆော့လꩻဒျာႏထာꩻနုဲးမုဲꩻ၊ အွဉ်ႏဒေါ့ꩻတဝ်း ဆရာႏဝွန်ႏနဲ့အီ" "မီႏအွဉ်ႏဒေါ့ꩻဆရာႏဝွန်ႏလဲ့ ငမ်းဝင်ꩻဖေႏပွေါးတဝ်း၊ ငမ်းဝင်ꩻအွဉ်ႏအုံခေါ်တွော့ꩻ အွဉ်ႏဒေါ့ꩻတဝ်း၊ ခံႏဗော့ꩻတေ့ꩻတေ့ꩻတဲ့၊ ထွိုင်ႏဟံးပေါင်းတဝ်သွူမꩻ သေနန်းငါႏအပိုရိုꩻနဝ်ꩻတဲင် ကွဲးအွဉ်ႏဝင်ꩻလုဲင်ႏဖေႏ၊ ကွဲးသဲင်ꩻလိုမ်ꩻလာꩻအွိုးလံးတဲ့၊ လိုမ်ꩻလာꩻတဲ့ တနွောင်ꩻတဝ်း၊ ဟဝ်လꩻတဝ်းတွော့ꩻ သီထိုꩻခန်းဒျာႏသနဲ့ဗွေႏ" တောင်ꩻသေꩻ= နင်ႏအောင်ႏနဝ်ꩻ သက်လꩻ(၃)နေင်ႏ၊ အပိုခိုပေႏအဝ်ႏကုဲင်သေꩻအွိုးလံး အဝ်ႏတဖြာꩻသွူ။ အပိုခိုပေႏနဝ်ꩻနဝ်ꩻ အမဉ်ꩻ ခွန်ထွန်းလေးသွူ။ "နဝ်ꩻက အီႏမာꩻနုဲးမုဲꩻ လင်ꩻအွဉ်ႏဒေါ့ꩻချာ အပိုမူႏ အွိုးတသီႏယိုကိုနဝ်ꩻအီး" "နင်ႏအောင်ႏ- နင်ႏအောင်ႏ တလွိုး တလွိုး၊ ငွိုး-ငွိုးတွော့ꩻ လဲင်ꩻတွိုႏလွေꩻခန်းနဝ်ꩻဟွေး" ခွန်ကုဝေနဝ်ꩻ သꩻကိုယူႏတေ့ꩻလွေꩻခန်းနုဲးနဝ်ꩻသွူ။ ဆရာႏတေတ်+နင်ႏအောင်ႏသီး တမာဝါꩻ၊ နင်ႏအောင်ႏ နင်ႏဒုတ်သီးတမွိုးပို ကမော့ꩻဗာႏ ကကျွုံႏဗာႏ သောကပရိဒေဝ၊ နမ်းကဒုက္ခ သꩻကဆင်ꩻရယ်ꩻဗာႏနုဲးယိုနဝ်ꩻ ပွိုင်းဝွို့တောမ်ႏစဲ့ꩻပွယ်ꩻတွော့ꩻ မော့ꩻဗာႏကျုံႏဗာႏ ရိုꩻဗာႏနုဲးနဝ်ꩻသွူ။ ခွန်ကုဝေလဲ့ ကောပ်တအဝ်ႏညာꩻတဝ်း၊ ကောပ်တကင်ꩻလွစ်တဝ်းတဲင် ထီႏဗာႏ၊ ဟွုန်ဗာႏ၊ မော့ꩻကျွုံႏဗာႏရိုမ်း စဲ့ꩻပွယ်ꩻအမော့ꩻအကျွုံႏနုဲးယိုတွော့ꩻ သꩻဒုက္ခ သꩻဆင်ꩻရယ်ꩻမုꩻယို တလွစ်ကင်ꩻလꩻတဝ်းနေနေသွူ။ နင်ႏအောင်ႏကရိုꩻယိုနဝ်ꩻ ဗွေႏဗွန်ကောဝိဒ (ဗွေႏဗွန်ကုံႏရ) ဗွေႏဗွန်ဒုံလီꩻတန်ယိုခါ အဖူးမူႏသွူ။ "စဲ့ꩻပွယ်ꩻအမော့ꩻအကျွုံႏ (၇)" "စဲ့ꩻပွယ်ꩻအမော့ꩻအကျွုံႏ"ကရိုꩻနဝ်ꩻ စဲ့ꩻသားတဖြာꩻအနေႏ အမော့ꩻအကျွုံႏ တမွေးတဝ်း၊ ပွိုင်းဝွို့တွမ်ႏစဲ့ꩻပွယ်ꩻတဲင် ခမ်းသားထံꩻသာꩻတဖြာꩻအနေႏ အမော့ꩻအကျွုံႏဒျာႏသွူ။ "စဲ့ꩻပွယ်ꩻ"ကရိုꩻနဝ်ꩻ ပအိုႏဗွာ ပအိုႏတနျာႏ ပꩻထွူလွဝင်ꩻ ပအိုႏဗွာ ခါးလားကထူႏညိမ်ꩻချမ်ꩻရေꩻအခိန်ႏ၊ ပအိုႏဗွာ ပအိုႏတနျာႏတောမ်ႏ နဲင်ႏငံႏတောႏစဲ့ꩻ ယိုသိုမ်စွိုꩻသိုမ်မျိုꩻ တတဲ့ꩻတဝ်းလွဝင်ꩻ၊ အဝ်ႏထိုမ်ႏ အဝ်ႏကျံႏ အဝ်ႏရန်ႏ အဝ်ႏလွꩻထီႏလွဝင်ꩻခိန်ႏနဝ်ꩻသွူ။ အခိန်ႏအခါႏကရိုꩻဒါႏယိုနဝ်ꩻ ခွေသွဉ်း ခွန်ကုဝေယို အဝ်ႏထွာဖေႏဝင်ꩻဗွေႏဗွန် ဝေင်ꩻနယ်ႏဟိုပုံꩻ၊ အွိုင်ႏနောင်လဲင်၊ ကျောင်ꩻလဲင်းခါႏ (ပါခဲတ်)ကိုသွူ။ ခုနစ်သက္ကရာဇ်နေင်ႏနဝ်ꩻ တတောင်ꩻတဝ်း၊ လာနဝ်ꩻ တင်ꩻကျွစ်လာဆန်ꩻ (၁၃)နီꩻသွူ။ ကျောင်ꩻလဲင်းခါႏ ဓလေ့ꩻထုံꩻစံႏနဝ်ꩻ စွုမ်ႏနေင်ႏနေင်ႏ ပေါႏတွိုႏတင်ꩻကျွစ်ဗွေရဝ်ꩻနဝ်ꩻ ကျောင်ꩻလဲင်းခါႏတကာႏ၊ လဲင်းခါႏပင်ကလာꩻ လိုꩻယွဲးစုမ်ꩻစွိုꩻနဝ်ꩻ စုပေါင်ꩻလွဝင်ꩻတဲင် အဝ်ႏရဲန်ꩻလူႏလွေꩻဘုရာꩻ (၂၈)ဆူႏသွမ်ꩻတောႏတန်သွူ။ သွမ်ꩻတောႏတန်ကရိုꩻနဝ်ꩻ ဒဲန်သွမ်ꩻ (၂၈)ဝန်ႏ၊ ဟန်ႏအိုသွမ်ꩻ (၂၈)ဝန်ႏ၊ ပါတွမ်ႏသေင်ႏရောင်ꩻသေင်ႏရာႏ ပြူးမောက်ꩻမူး ခဲဘွယ်ဘောဇဉ် အစွိုးစွိုးအမျိုꩻမျိုꩻဖုံႏသွူ။ ကွပ်နဝ်ꩻမꩻ ပေါႏအိႏတွိုႏ တင်ꩻကျွစ်ဗွေ၊ တင်ꩻကျွစ်ဆန်ꩻ (၁၃) (၁၄)နီꩻနဝ်ꩻ ရဲန်ꩻသေꩻခါꩻ၊ ဖျင်သေꩻခါꩻဗာႏ သွမ်ꩻတောႏခြေင်ႏသွူ။ ကရဲန်ꩻကကပ်လူႏနုဲင်းယိုနဝ်ꩻ ရပ်ရာႏဒေႏသ ဓလေ့ꩻထုံꩻစံႏဒျာႏတဲင် တဲႏစပါꩻမုဲင်ꩻစိုး၊ တဲႏစ ခုနှစ်သက္ကရာဇ်နေင်ႏမုဲင်ꩻနဝ်ꩻ ဒေါ့ꩻတဒါႏတဝ်း၊ ခွန်ကုဝေ ကထင်ႏအုံကျောင်ꩻ၊ ကထွာကပ္ပီႏနဝ်ꩻ ဝင်ꩻအဝ်ႏရဲန်ꩻလူႏလွေꩻလဲန်းဒျာႏ စွုမ်ႏနေင်ႏနေင်ႏသွူ။ ဟန်ႏနေင်ႏယိုလဲ့ တင်ꩻကျွစ်ဆန်ꩻ(၁၃)နီꩻနဝ်ꩻ ခွန်ကုဝေတကာႏ လိုꩻယွဲးဖုံႏနဝ်ꩻ ထင်ႏလွကျောင်ꩻ၊ ထင်ႏဖျင်ထင်ႏဆင်သေꩻခါꩻ သွမ်ꩻတောႏခြေင်ႏဖုံႏသွူ။ ဖျင်သေꩻခါꩻ သွမ်ꩻတောႏခြေင်ႏ တခုဲင်ႏထွူတဝ်းဒွိုန်း နာရီႏ (၁၂)ရပ်နဝ်ꩻ တကာႏတဖြာꩻ ထင်ႏအွဉ်ႏဒေါ့ꩻ စဲ့ꩻမန်းဖျော်ဒုံကိုရိုꩻနဝ်ꩻတဲင် တကာႏလိုꩻယွဲးဖုံႏနဝ်ꩻ ငမ်းစဲ့ꩻမန်းဟဲ့ꩻပေါ်တာတွော့ꩻ နဲစ်ဖင်းအုံဗဉ်ႏလွခန်းဒျာႏထာꩻဖုံႏသွူ။ အတွင်ꩻနဝ်ꩻနဝ်ꩻ ဒုံကို ပေါ်တာလဲ့ꩻကုဲင်ထိုꩻတဲင် ပေါႏစဲ့ꩻမန်းဖျော်ဖျော်လဲ့ ဖြားဒုံ တထူႏတာႏဝွန်ႏတဝ်းဟဲ့ꩻဖေႏတဝ်းပေါ်တာ၊ စဲ့ꩻမန်းမော့ꩻပါꩻမုဲင်ꩻလဲ့ ပါꩻမုဲင်ꩻလွေꩻဗာႏဒျာႏ၊ ပေါႏစဲ့ꩻမန်းဖျော်ဖျော်နဝ်ꩻ လိုꩻခိုဖုံႏ ဖင်းလွဗာႏဒျာႏထာꩻသေႏသေႏသွူ။ သွမ်ꩻတောႏတန် ရဲန်ꩻသား လိုꩻယွဲးဖုံႏ ဖင်းထိုꩻထွူ အဝ်ႏခါႏဆီငတ်ꩻမိနစ်ရပ်နဝ်ꩻ သက်တဆီငတ်ꩻနေင်ႏ ပါꩻမူႏပေႏတဖြာꩻ ဖျော်ထင်ႏလွဉ်ကျောင်ꩻတဲင် ထင်ႏဒေါ့ꩻနုဲင်းယိုသွူ။ "အွိုးဒုံအခဝ်နဝ် ထီကတူႏ ဆရာႏလဲင်းလမ်းသူꩻနဝ်ꩻ စဲ့ꩻမန်းသောက်ပေါ်တာ ထူႏထိုꩻဝင်ꩻတခြိုꩻဖုံႏတဲင်ႏ ဆရာႏလဲင်းရိုꩻ အွဉ်ႏဗွေႏစင်ꩻကျွꩻသဲင်ꩻရိုꩻနဝ်ꩻဩ" "ဟွူး နုဲင်းနဝ်ꩻနဲ့ရိုႏ၊ အွူ-သဲင်ꩻအွဉ်ဟုဲင်း မဲ့ꩻခွေသဲင်ꩻ" "ဆရာႏလဲင်းရိုꩻ သဲင်ꩻမွိုင်မွိုင်တဲ့ ဩ" "အွူ- သဲင်ꩻမွိုင်မွိုင်လဲ့လꩻဒျာႏ၊ သဲင်ꩻသွူယိုခါ၊ နာꩻသဲင်ꩻခန်းလုဲင်း" ရိုꩻဖေႏထွူပါꩻမူႏပေႏနဝ်ꩻ နုဲင်းနဝ်ꩻတွော့ꩻ ပေါႏပါꩻမူႏပေႏနဝ်ꩻ သဲင်ꩻပြေ့ꩻလဲ့ ခွန်ကုဝေ ထွိုင်ႏသဲင်ꩻနုဲင်းနုဲင်းခန်းဒျာႏနဝ်ꩻသွူ။ သဲင်ꩻတွိုႏဆရာႏလဲင် လမ်းထျꩻငါနဝ်ꩻ ဆရာႏလဲင်းမာ နင်ႏဆယ် အဝ်ႏလမ်းကီတခါꩻငွါ- "ရေဒီယိုပေႏနဝ်ꩻ လꩻချာလဲဉ်းဗွေႏစင်ꩻ၊ အဝ်ႏကုဲင်မေႏဓာတ်တဖြုံႏလွုမ်ꩻဩ၊ ဝန်ႏနေင်းထီ (၃)ဗီႏနဝ်ꩻလဲ့ လွဉ်ပသာချာလဲန်း" ဒေါ့ꩻလင်ꩻခန်းနုဲင်းနဝ်ꩻသွူ။ လံးထျꩻငါနဝ်ꩻ စဲ့ꩻပိုႏအရန်း ဗိုလ်ကြီးလဲ့ အဝ်ႏတဖြာꩻတဲင် အွဉ်ႏနင်ႏဆယ်အီလင်ꩻ ကုလာꩻထဲင်တွော့ꩻ အုံဒေါ့ꩻရီတယ်ꩻစွဉ်ႏ စဲ့ꩻပိုႏနဝ်ꩻသွူ။ စဲ့ꩻပိုႏနဝ်ꩻလဲ့ ဒေါ့ꩻနုဲင်းခန်း နင်ႏဆယ်ကဒေါ့ꩻနဝ်ꩻ- "ရေဒီယို ခါးရေပန်းကန်တော့ ပြန်ရပြီ၊ ဓာတ်မီးတစ်လက် လိုနေတယ်လို့ပြောတယ်၊ ဓာတ်မီးတော့ တပည့်တော်လိုက်မေးလည်း ဘယ်သူမှ မယူရဘူးလို့ပြောကြတယ်၊ အဲဒီတော့ ဓာတ်မီးတစ်လက်တန်ဖိုး ဘယ်လောက်လဲလို့ အရှင်ဘုရားပဲ မေးပေးလိုက်ပါ၊ တပည့်တော်ဘဲ လျော်ပေးလိုက်မယ်" စဲ့ꩻပိုႏနဝ်ꩻ ထွိုင်ႏရိုꩻနုဲင်းနဝ်ꩻ ရီနင်ႏဆယ်လဲ့ နင်ႏဆယ်သမ်းရိုꩻဒျာႏ "မေႏဓာတ်နဝ်ꩻ ဖြေꩻခွိုင်းမုဲင်ꩻ တောင်ꩻတဝ်း"တဲင် မေႏဓာတ်တဖြုံႏကိစ္စနဝ်ꩻ ထွာထိုꩻဒျာႏ ထာꩻခံခွိုတန်သွူ။ ခွေဒေါ့ꩻရီချာချာငါငါတွမ်ႏ ဗိုလ်ကြီးနဝ်ꩻ ထွိုင်ႏည (၁၅)မိနစ်ရပ်နဝ်ꩻ ဗိုလ်ကြီးနဝ်ꩻရိုꩻခန်း "ဒီဓာတ်မီးတလက်ကိစ္စ အိမ်ရှင်မကျေနပ်ရင် ရွာမြောက်ပိုင်းမှာ စစ်ကြောင်းမှူး ဗိုလ်မှူးရှိတယ်။ အရှင်ဘုရားကနေပြီးတော့ ဗိုလ်မှူးကို သွားတိုင်ပါလား"နုဲင်းနဝ်ꩻသွူ။ နဝ်ꩻတွော့ ခွန်ကုဝေလဲ့ လွေꩻထေ့မွေးစွဉ်ႏ ဗိုလ်မှူး အွိုးဒုံတန်ခဝ်ထင်ꩻကိုသွူ။ ထွိုင်ႏမော့ꩻခွဲးဗိုလ်မှူး ထွိုင်ႏခြုဲင်းနယ် အခရာႏနဝ်ꩻ ဗိုလ်မှူးနဝ်ꩻ- "အဲဒီမှာ ဗိုလ်မှူးကြီးရန်မင်းအောင်ဆိုတာရှိတယ်၊ သူ့ကိုရှာခိုင်းလိုက်၊ ပစ္စည်းတွေ အကုန်ပြန်မရမချင်း ခရီးရှေ့ဆက်မသွားဘူးလို့ပြောလိုက်"ဒေါ့ꩻချာခန်းနုဲင်းနဝ်ꩻသွူ။ အဝ်ႏဒုံခဝ်ထင်ꩻ ထွိုင်ႏသဲင်ꩻနဝ်ချာ တဖူꩻလောင်း ခွဲးဖျင်ပါꩻမူႏပေႏတဖြာꩻ၊ ပါꩻမူႏပေႏနဝ်ꩻ ရိုꩻစဲ့ꩻမန်း အွိုးဆရာႏလဲင်းလံးငါဒေါ့ꩻ- "ပါꩻလံးယိုနဝ်ꩻ ရိုꩻနီထူႏတခွန်ꩻတခြိုꩻတဲင် ထင်ႏဒေါ့ꩻနယ်စွဉ်ႏ အဗွေႏဗွန်၊ ပါꩻပေႏယိုနဝ်ꩻ အွဉ်ႏလယ်အွဉ်ႏဒါႏအနမ်း ဟဲ့ꩻလွေꩻခန်းပေါ်တာနဝ်ꩻမꩻ"နုဲင်းနဝ်ꩻသွူ။ ထွိုင်ႏဟွုန်ငဝ်းနုဲင်းယိုနဝ်ꩻ ခွန်ကုဝေလဲ့ "အွူ- ဒေါ့ꩻတဲ့ယဝ်းဟုဲင်း၊ ဆင်ႏမဲ့ꩻ ခွေချင်းဒျာႏ"ဒေါ့ꩻချာခန်းပါꩻမူႏပေႏနဝ်ꩻ နုဲင်းနဝ်ꩻသွူ။ ထွိုင်ႏတွိုႏသဲင်ꩻချာ ဆရာႏလဲင်းလံးငါနဝ်ꩻ ဗိုလ်မှူးကဒေါ့ꩻဒါႏငဝ်းယို ဒေါ့ꩻနယ်ခန်းစဲ့ꩻပိုႏ ကအဝ်ႏဆရာႏလဲင်းလံးငါနဝ်ꩻသွူ။ "ဗိုလ်မှူးကပြောတယ် ဒီအဖွဲ့မှာ ဗိုလ်ကြီးရန်မင်းအောင် ဆိုတာရှိတယ်၊ လိုသေးသောပစ္စည်းကို သူ့ကိုရှာခိုင်း၊ ပစ္စည်း အကုန်ပြန်မရမချင်း ရှေ့ဆက်မသွားဘူးလို့ပြောတယ်၊ ဗိုလ်ကြီးရန်မင်းအောင်ဆိုတာ ဘယ်သူလဲ အခုဘယ်မှာလဲ" ခွန်ကုဝေ ထွိုင်ႏရိုꩻနုဲင်းနဝ်ꩻနဝ်ꩻ- "ဗိုလ်ကြီးရန်မင်းအောင်ဆိုတာ တပည့်တော်ဘဲ၊ တပည့်တော် ရဲဘော်တွေကို အကုန်မေးပြီးပြီ၊ ဘယ်သူမှ မယူရဘူးဆိုတာ ခက်နေတယ်၊ အဲဒီတော့ အဲဒီဓာတ်မီးဖိုးကို တပည့်တော်ကပဲ တစ်ထောင်လျော်ပေးလိုက်မယ်၊ ကိစ္စမြန်မြန်ပြီးသွားအောင် လက်ခံမလားလို့ အရှင်ဘုရားက အိမ်ရှင်ကို မေးပေးပါ" စဲ့ꩻပိုႏနဝ်ꩻငဝ်းအတွိုင်ꩻ ထွိုင်ႏရီထွားလံးသား နင်ႏဆယ်နဝ်ꩻ "လꩻဒျာႏ"ရိုꩻနဝ်ꩻတဲင် မေႏဓာတ်တဖြုံႏပျဿနာႏနဝ်ꩻ ထွူလွေꩻခန်းဒျာႏနဝ်ꩻသွူ။ ခွန်ကုဝေနဝ်ꩻ ပျဿနာႏသျင်ꩻလဲန်းလဲ့ တထင်ႏစွဉ်ႏတဝ်းကျောင်ꩻတွော့ꩻ ဒေါ့ꩻရီအုံကိုမ်ဒွိုန်း တွမ်ႏစဲ့ꩻဗိုလ်ကြီးနဝ်ꩻသွူ။ ဗိုလ်ကြီးနဝ်ꩻ ကဒေါ့ꩻဒါႏငဝ်းနဝ်ꩻ- "တပည့်တော်တို့ စစ်သားတွေဟာ နောက်တန်းမှာရှိနေရင် အရပ်သားလိုဘဲ စိတ်ပုံမှန်ဖြစ်ပေမယ့် ရှေ့တန်းထွက်တာကြာရင် စိတ်ကြမ်း၊ ကိုယ်ကြမ်းဖြစ်သွားတယ်" ငဝ်းနုဲင်းယိုလဲ့ပါသွူ။ ခွန်ကုဝေ ဒေါ့ꩻရီတွမ်ႏစဲ့ꩻပိုႏနဝ်ꩻ ထွိုင်ႏညတခွဲꩻရပ်နဝ်ꩻ ဟဲ့ꩻသွူဆရာႏလဲင်းတွော့ꩻ- "နာꩻအုံစွူစွူလံးနဝ်ꩻ ဖေႏတကင်ꩻတဝ်း၊ ထင်ႏလွဉ်ꩻခွေအွိုးကျောင်ꩻ၊ ထင်ႏမာꩻကိုဗော့ꩻ သွမ်ꩻတောႏခြေင်ႏဟုဲင်း"ရိုꩻဖေႏထွူ ဆရာႏလဲင်းနုဲင်းနဝ်ꩻတွော့ꩻ ပါꩻစဲ့ꩻပိုႏနဝ်ꩻ ဖေႏကသေနာႏ ဒေါ့ꩻသမ်းလွေꩻခန်းနုဲင်းယိုသွူ။ "ကဲ-သွားအုံးမယ် တကာဗိုလ်ကြီး၊ ကျေးဇူးတင်ပါတယ်၊ ကျောင်းမှာခိုင်းစရာရှိလို့ ဒီတကာလေးကို ခေါ်သွားမယ်" ထွိုင်ႏဟဲ့ꩻထင်ႏပါလံးသား ဆရာႏလဲင်းနုဲင်းယိုနဝ်ꩻ ကအင်းဟဲ့ꩻလွေꩻဒါႏ ပေါ်တာကိစ္စနဝ်ꩻလဲ့ လွစ်ကင်ꩻသျင်ꩻထိုꩻခန်းဒျာႏနဝ်ꩻသွူ။ ခွန်ကုဝေ ကအဝ်ႏမာꩻဖေႏဝင်ꩻဗွေႏဗွန်တွင်ꩻနဝ်ꩻ ပွိုင်းဝွို့တွမ်ႏခမ်းကို စဲ့ꩻပွယ်ꩻတဲင် ကိစ္စပျဿနာႏနုဲင်းယိုလဲ့ မော့ꩻဗာႏကျွုံႏဗာႏဖိုသွူ။ ယိုနဝ်ꩻ ခွန်ကုဝေ "စဲ့ꩻပွယ်ꩻအမော့ꩻအကျွုံႏ"တလဲင်ႏတခြွိုက်အကျောင်ꩻအခရာႏသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကုဝေ-မုဲင်းကောင်
  2. ခမ်းသားငဝ်း အမုဲင်-၄၊ အစဲဉ်ႏ-၁၀/၁၁