စွယ်ꩻကျွိုက်သွတ်ꩻ ငဝ်းရာႏဖုံႏယဟန်ႏ

မိဉ်မဲဉ်လꩻ ထပေႏတန်တန်နဝ်ꩻ လွေꩻသွော့ ပင်ႏလယ်ႏကို။ ကွဲးတွော့ꩻ ခမ်းတန် တလီꩻသန်(မုန်တိုင်း)ဖုံႏ အဝ်ႏကွေးနေား။ အုံအဝ်ႏမွုန်းတဝ်း နုဲင်းဝါးကီႏဘဝ၊ မာꩻသွော့နုဲင်း လေ့ꩻတန်(သိန်းငှက်)အတွိုင်ꩻ။ ဝါးကီႏနဝ်ꩻ ဒေါ့ꩻငဝ်းဒါႏ နုဲင်းလိုꩻရိုꩻကီလဲ့ တကွင်ႏထို တယွိုꩻထိုနွောင်ꩻတဝ်းထာꩻ (နုဲင်းလေ့တန်)။ လေ့တန်(သိန်းငှက်)နဝ်ꩻ ဖြောင်းတေ့ꩻ(တဒေါ့ꩻဒါႏတဝ်းငဝ်း နုဲင်းလိုꩻ)ရိုꩻကီလဲ့ ကွင်ႏထိုနွောင်ꩻယွိုꩻထိုနွောင်ꩻထာꩻ အွိုးအာႏကာႏမို့ꩻနာသူꩻ။

လိုꩻတွိုင်ꩻစွုမ်ႏဖြာꩻ ကျိုꩻစာꩻသောင်ႏသာစွဉ်ႏကီလဲ့ လိုꩻတွိုင်ꩻစွုမ်ႏဖြာꩻ တအောင်ႏမျင်ႏတဝ်း။ ကွဲးတွော့ꩻ ကအောင်ႏမျင်ႏသားနဝ်ꩻ ထွာဒျာႏလိုꩻ ကျိုꩻစာꩻသောင်ႏသာသားလွဉ်းလွဉ်း။ တဖူꩻထိုꩻမား(ကွင်တဖူꩻတွော့ꩻ) သꩻဓာတ်တွမ်ႏထဲ့မွုန်း။ နီကထောင်ဒါႏတဖူꩻယို နီနမ်းဒိုချာ ဒါချာဗာႏဒျာႏရင်ꩻရင်ꩻကအီ။ လိုꩻသီးသက်တန်ꩻနဝ်ꩻ အဝ်ႏနေးဒျာႏတွမ်ႏအွဉ်ႏထွော့ချက်ယို မွေးမဲဉ်ႏငါႏရင်ꩻရင်ꩻ ကွဲးတွော့ꩻ နာꩻကျိုꩻစာꩻသောင်ႏသာမုꩻ အကျိုꩻတရာꩻဖုံႏနဝ်ꩻ အွဉ်ႏထွော့ချက်ကားယိုကားနဝ်ꩻ တအဲဉ်ထဝ်းသွူ။ အခဝ်ခဝ်ကပꩻထိုꩻခွူလဲဉ်းဒါႏဝန်ႏ ဒေါ့ꩻငဝ်းနုဲင်းယို "ထွာထွူလဲဉ်းက လꩻနောင်ႏတ ထာꩻကော့ꩻမာႏဆုဲင်ꩻနဝ်ꩻ တထူꩻချာꩻတဝ်း(ထူꩻကဲးတမုဲင်ꩻ)"တဲ့။

ကံလောင်(မွိုက်၊ကံ) ဒေါ့ꩻငဝ်းနုဲင်းယို "အထီမိဉ်ႏလို့နဝ်ꩻ နုဲင်ႏဝေါင်းထိုꩻခန်းသွော့ နာꩻအတာႏ သုင်ꩻလꩻခရာႏတအဲဉ်ထဝ်းဒွုမ်က သိမ်ꩻဟဝ်ခါꩻမွုန်းတဝ်းဒွုမ်"တဲ့။ တခါꩻ ဒေါ့ꩻငဝ်းနုဲင်းယို "ဗွောင်သွူခွေထွူ နာꩻထောင်လွေꩻတွိုႏတွိုႏသွော့ အောင်ႏမျင်ႏမုꩻတဖူꩻသွတ်ꩻ ကဝ်ႏထွန်ႏသူꩻနေား"တဲ့။ မေႏရာႏ ဒေါ့ꩻငဝ်းနုဲင်းယို "အုံအဝ်ႏ မွန်ဗန်လွေꩻဒျာႏသွော့ ဘဝလေလေလင်းလင်းစား"တဲ့။ အဝ်ႏပတဲင်ပေါက် ထီႏထင်ႏဒါႏ လာမဲင်းဗွာ ဒေါ့ꩻငဝ်းနုဲင်းယို "အွဉ်ႏသွော့ ရေႏမိုးချက်ထိုထို"တဲ့။ ပက္ခဒိန်ႏ ဒေါ့ꩻငဝ်းနုဲင်းယို "ကထွူသွတ်ꩻထိုꩻလဲဉ်းဒါႏ မွူးနီꩻစွယ်ꩻဖုံႏသူꩻနဝ်ꩻ သဲင်ꩻပြန်ႏချာယင်း တလꩻတဝ်း"တဲ့။ လိတ်စောင်ႏဖုံႏ ဒေါ့ꩻငဝ်းနုဲင်းယို "ဗဟုသုတဖုံႏယို ဖြေꩻနေးတလꩻတဝ်း၊ ဟော်ꩻဖတ်ထွူ မတ်ခါꩻမꩻ အီႏလꩻလွဉ်"တဲ့။

နꩻတဗာႏ ဒေါ့ꩻငဝ်းနုဲင်းယို "တထူႏသုင်ꩻတဝ်း မိဉ်အွဉ်ႏဗွော့ꩻနဝ်ꩻစားနဝ်ꩻ အရော်ခြေင်အပုက်ꩻခြေင်လွုမ်ꩻ"တဲ့။ နားရီႏ ဒေါ့ꩻငဝ်းနုဲင်းယို "ကလို့ထိုꩻလဲဉ်းဒါႏ အခိန်ႏဖုံႏ တလꩻချာနွောင်ꩻတဝ်းဒွုမ်"တဲ့။ ထီကြောင်းဗူး ဒေါ့ꩻငဝ်းနုဲင်းယို "အွဉ်ႏဒျာႏသွော့ သꩻဗွာဗွာစင်စင်၊ အုံအဝ်ႏမွန်ဗန်လွေꩻသွော့ ဘဝသျင်ꩻသျင်ꩻ၊ အသျုက်အတရေင်ကင်ꩻကင်ꩻ"တဲ့။ ရွဉ်ဒေါ့ငဝ်းနုဲင်းယို "မိဉ်ႏမဲဉ်သုင်ꩻစုဲင်ႏအာအာနဝ်ꩻ ထိုမ်ႏအာအာသွော့"တဲ့။