စွိုးခွိုꩻထင်ႏထိုရေꩻ

"စွိုးခွိုꩻထင်ႏထိုရေꩻတာႏ ကျိုꩻစာꩻဗာႏပညာႏ" "ပညာႏကရိုꩻ လိုꩻတန်ႏဖို၊ ပညာႏအောဝ်ႏမꩻ လိုႏတွိုင်ꩻလꩻ၊ ရွဉ်ပါတောဝ်းလဲ့ ပညာႏမဉ်ႏအောဝ်ႏနောဝ်ꩻ မဉ်လွေꩻမုဲင်ꩻလွေꩻ အံႏမတောဝ်း"စတဲင် ပညာႏငေါဝ်းတွိုင်ꩻ အောဝ်ႏအမျိုꩻမျိုꩻနောဝ်ꩻသွူ။ ဘဝယိုတာႏ အုံအောဝ်ႏရေꩻနောဝ်ꩻ အရေꩻတန်ပညာႏ၊ ဘဝငါတာႏ ယံချံꩻသာႏလဲ့ အရေꩻတန်ယင်းဒျာႏ၊ ပညာႏရေꩻနောဝ်ꩻ နီလိုꩻသီးတန်ႏဖို၊ နီကသဲင်ꩻအောဝ်ႏလိုꩻဒုံ၊ နီကသဲင်ꩻအုံသော့ꩻ နီဒေႏသ၊ မဉ်ႏမဲဉ်လꩻအထင်ႏထိုနောဝ်ꩻ ခိုခိုမူႏမူႏ သွဉ်ထူႏသွော့ပညာႏ၊ မဉ်ႏမဲဉ်လꩻ အထင်ႏထိုလဲ့ ကျိုꩻစာꩻဗာႏဝင်ꩻလိတ်လုဲင်ꩻနောဝ်ꩻသွူ။ လိုꩻတဖြာꩻစီႏ ထင်ႏထိုရေꩻလဲ့နောဝ်ꩻ၊ လိုꩻတလမ်းလွုမ်း ထင်ႏထိုရေꩻလဲ့နောဝ်ꩻ၊ လိုꩻတဒုံ၊ တအွိုင်ႏ၊ တနယ်ႏထင်ႏထိုရေꩻလဲ့နောဝ်ꩻ အရေꩻတန်သွတ်ꩻ ပထမ အဓိကနောဝ်ꩻ ထွာဒျာႏစွိုးခွိုꩻပညာႏရေꩻနောဝ်ꩻသွူ။ ပညာႏကရိုꩻယို သေနွောင်ꩻ အဟောဝ်အကုဲင်၊ ထီႏနွောင်ꩻ အနာႏဂတ်လွုမ်ꩻတကာႏတောဝ်း လွူးနမ်းမွီးသက်တာႏလဲ့သင်၊ အုံအောဝ်ႏရေꩻတာႏလဲ့သင်၊ လုမ်းဗဉ်ႏရေꩻတာႏလဲ့သင်၊ လွိုင်ႏကွိုန်ꩻရေꩻတာႏလဲ့သင်၊ ခြွေခြာႏချံꩻသာႏရေꩻတာႏလဲ့သင်၊ စွိုးခွိုꩻလိုꩻမျိုꩻဘာႏသာႏ သာႏသနာႏ ထင်ႏထိုရေꩻတာႏလဲ့သင် ပညာႏရေꩻနောဝ်ꩻ အောဝ်ႏလိုႏငါႏ အရေꩻတန်ငါႏ ရတနာႏတပါꩻဒျာႏနောဝ်ꩻသွူ။ အရေꩻကတန်ဒါႏ ပညာႏယိုနောဝ်ꩻ သွဉ်ထူႏဗာႏ၊ လွောက်ꩻလွူꩻဗာႏ၊ ကျင်ꩻသွုံꩻဗာႏ၊ လိုꩻသေလိုꩻဒါႏသီး ကအွဉ်ႏနယ်အတွိုင်ꩻ ကကျင်ꩻသုံꩻအတွိုင်ꩻနောဝ်ꩻသွူ။ ခေတ်ယိုတဗာႏ ပညာႏရေꩻနောဝ်ꩻ ထွာအထျꩻကရိုꩻယို စွိုးခွိုꩻအွဉ်ငါ ခေါင်းဆောင်တန်ဖုံႏနောဝ်ꩻ အောဝ်ႏသေထွꩻတဲင် ပအိုဝ်ႏရပ်ရာႏစွုမ်ႏဒုံဆောင်ႏ ဖေႏကအွဉ်ႏနွောင်ꩻ အခေႏခံႏပညာႏ သွဉ်လိတ်ကျောင်ꩻနောဝ်ꩻ အောဝ်ႏကျိုꩻစာꩻခွုမ်မာꩻလွေꩻဖေႏလဲဉ်းနောဝ်ꩻသွူ။ နေးရွဉ်ထေအာႏ ဖေႏဗာႏအခိန်ႏမꩻ နီကမဲဉ်လꩻဒါႏ ပညာႏဘွဲ့ဒီဂရီဖုံႏယို နီလꩻလွဉ်ဗာႏနောဝ်ꩻသွူ။ ၂၁-ရျာꩻဗူႏကို ပညာႏရေꩻဖုံႏယိုနောဝ်ꩻ အမျိုꩻအောဝ်ႏအာတန်နောဝ်ꩻသွူ။ ခေတ်ယိုတဗာႏ ခွန်နင်ꩻသီး အောင်ႏအတန်ꩻတဆီ လꩻဘွဲ့လွုမ်ꩻနောဝ်ꩻ တထွူထွာတောဝ်းဒွုမ်တဲင် ကွန်ပျူတာပညာႏ၊ စဲစ်စာႏရင်ꩻပညာႏ၊ တဲမ်းလိတ်ပညာႏ၊ ဒေါ့ꩻဝင်ꩻငေါဝ်းပညာႏ၊ ဖျင်စက်၊ ဖျက်ကာꩻ၊ ဖျင်မေႏပညာႏဖုံႏလဲ့ နမ်းဝါႏသနာႏရာꩻအလွောက်ꩻ လွူးနမ်းမွီးသက်တာႏ အရေꩻတန် ကျိုꩻစာꩻသွဉ်ထူႏဗာႏနောဝ်ꩻသွူ။ ထင်ႏတက္ကသိုလ်ႏ လꩻဘွဲ့လွုမ်ꩻ တထွူထွာတောဝ်း၊ ခေတ်ယိုနောဝ်ꩻ ပညာႏအမျိုꩻမုဲင်ꩻတယောဝ်း လိုႏသေလိုႏဒါႏလိုႏသွဉ်ငါႏနောဝ်ꩻသွူ။ ဖေႏကလꩻလွဉ်အဟောဝ်နောဝ်ꩻ သွဉ်ထူႏဗာႏပညာႏအတွိုင်ꩻ၊ ဖေႏကလဲ့ꩻဒါႏ အကုဲင်ပျဿနာႏအမျိုꩻမျိုꩻဖုံႏလဲ့ သွဉ်ပညာႏမꩻလꩻသွူ။ ပညာႏရေꩻအခန်ꩻကဏ္ဍယို မဉ်ႏဒေါ့ꩻဗာႏနောဝ်ꩻ စင်္ကာပူခမ်းယို တယ်ႏထောင်ႏဒျာႏတွမ်ႏပညာႏ၊ အမေႏရိကန်ႏခမ်းသူꩻလဲ့ အုပ်ချွုတ်ဒျာႏ တွမ်ႏပညာႏနောဝ်ꩻသွူ။ အရမေႏရိကန်ႏသမ္မတတဖြာꩻ ကထင်ႏမော့ꩻခွဲး ခမ်းသားမွိုးဖါခိန်ႏ ဝွေꩻကဒေါ့ꩻဖေႏငေါဝ်းနောဝ်ꩻ အမေႏရိကန်ႏခမ်းထင်ႏထိုရေꩻယို ပထမနောဝ်ꩻ ထွာဒျာႏပညာႏရေꩻ၊ အမေႏရိကန်ႏခမ်း လွိုင်ႏကွိုန်ꩻရေꩻတာႏ ပထမနောဝ်ꩻ ပညာႏရေꩻ၊ အမေႏရိကန်ႏခမ်း ဖေႏကခံႏဗာႏမွိုန်းဝင်ꩻတိတ်ꩻနျꩻနောဝ်ꩻ အထျꩻထွာဒျာႏ ပညာႏရေꩻအကျောင်ꩻ ဒေါ့ꩻခြုဲင်းနယ်ဖိုနုဲင်းနောဝ်ꩻအကျောင်ꩻ လိတ်စောင်ႏကို အောဝ်ႏထီႏဗာႏဖိုနောဝ်ꩻသွူ။ ကွပ်ပွိုးနောဝ်ꩻမꩻ တဒုံတွမ်ႏတဒုံ၊ တနယ်ႏတွမ်ႏတနယ်ႏ ထင်ႏထိုရေꩻတာႏ ပညာႏကရိုꩻယို အဖိုꩻတန်ႏအရေꩻတန်ငါႏတဲင် ကထွာမွိုးဖါလဲ့ ဖေႏအာႏ၊ ကထွာဒါႏပိုလီꩻဖုံႏလဲ့ ကျိုꩻစာꩻသွဉ်ထူႏသွော့ဝင်ꩻ၊ ကကျိုꩻစာꩻသွဉ်ထူႏအတွိုင်ꩻ ပင်ႏတသွောင်းခွုမ်မာꩻ ကျိုꩻစာꩻဖေႏသွော့ စွိုးခွိုꩻဘာႏသာႏ၊ သာႏသနာႏအကျိုꩻအကျောင်ꩻ နိုꩻဆောႏတမာဗာႏ လိတ်ထွားဗွေႏခွန်နင်ꩻသီးနုဲင်းယိုသွူ။