စွိုးခွိုꩻအကျိုꩻတရာꩻ

"စွိုးခွိုꩻအကျိုꩻတရာꩻ အောဝ်ႏလိုႏမာꩻ" ခွိုင်းကားတဲင် သက်ကအောဝ်ႏဒါႏ သတ္တဝါႏလောကကို ယိုခါတရိုꩻတောဝ်း၊ ဆုဲင်ꩻချာတရိုꩻတောဝ်း ယူးတဲ့ယူးခွိုꩻ၊ ဝါးတဲ့ဝါးခွိုꩻ၊ လိုꩻတဲ့လိုꩻခွိုꩻ အအုံအအောဝ်ႏ၊ အအံႏအအွꩻ၊ အခင်ႏလမ်း အထာꩻမာꩻ အငေါဝ်းငွါ အထွုံႏစံႏဖုံႏယို တပီဗွိုန်တောဝ်းဝင်ꩻ၊ သဘာဝကဖန်ဆင်ꩻလွဉ်ဖေႏထွူအတွိုင်ꩻ ယံထွူကျထွူလဲဉ်းတဲင် အောဝ်ႏလိုႏထိန်ꩻသိမ်ꩻ၊ အောဝ်ႏလိုႏမာꩻစွစ်ꩻလီ၊ အောဝ်ႏလိုႏမာꩻထင်ႏထို၊ အောဝ်ႏလိုႏမာꩻတဉ်ႏခွေါင်ထဲင်းအတာႏနောဝ်ꩻ လိုꩻတွိုင်ꩻစွုမ်ႏဖြာꩻ တာႏဝွန်ႏအောဝ်ႏညီꩻဝင်ꩻနောဝ်ꩻသွူ။ ကအောဝ်ႏထွူလဲဉ်းဒါႏ ယိုꩻယာႏထွုံꩻစံႏ ယေန်ႏငဲမုꩻဖုံႏ သက်မွန်ဗန်အီတာႏ အုံအောဝ်ႏမုꩻ အဆင်ႏအရန်းဖုံႏ စွိုးခွိုꩻလိုꩻမျိုꩻဘဝတသွောင်းထိုရေꩻဖုံႏယို နေင်ႏပေါင်ꩻအာ အလာပေါင်ꩻညဆွာꩻ သွတ်ꩻကမ္ဘာႏဖေႏကအောဝ်ႏတဉ်ႏခွေါင် တသေႏသေႏနောဝ်ꩻ အွဉ်ငါဖေႏသားအောဝ်ႏမꩻ လꩻသွူ။ အွဉ်ငါဖေႏသားကရိုꩻနောဝ်ꩻ သꩻရက်စွိုးခွိုꩻ အဗွေတဗာႏအောဝ်ႏမꩻ၊ အစွိုးအခွိုꩻလဲ့စဲစ်မꩻ၊ ထာꩻသေထာꩻဒါႏ ဉာဏ်ႏပညာႏလုမ်းကုမ်ႏမꩻ စွိုးခွိုꩻလိုꩻမျိုꩻအတာႏ ထွာအီအွဉ်ငါယံ ခေါင်းဆောင်တန်ဖုံႏနောဝ်ꩻသွူ။ အွဉ်ငါခေါင်းဆောင်တန် လိုꩻယံအောဝ်ႏလဲဉ်းလဲ့ ထောင်လွဉ်ꩻသား မဉ်ႏတအဲဉ်ထောဝ်း၊ ယံတောဝ်းနောဝ်ꩻ လိုꩻမျိုꩻမုဲင်ꩻဝယောဝ်း၊ ခွိုꩻနွယ်ႏမုဲင်ꩻတယောဝ်း ထဲ့ဖွိုႏထိုꩻဗာႏသွူတကာႏတောဝ်း အနာလွိုနောဝ်ꩻ အထိုꩻမားတငါဗာႏသွူ။ မဉ်ႏထွားနုဲင်း လိုꩻမျိုꩻသမဲင်ꩻတရိုꩻတောဝ်း၊ ယူးဝါးတိရစ္ဆာန်ႏသမဲင်ꩻကိုတဲ့ယောဝ်း အွဉ်ငါသားမဉ်ႏအောဝ်ႏ၊ ထောင်လွဉ်ꩻသားအဲဉ်ထောဝ်း၊ ထောင်လွဉ်ꩻသားမဉ်ႏအောဝ်ႏ အွဉ်ငါသားအဲဉ်ထောဝ်း၊ လိုꩻတဖြာꩻစီႏလဲ့ ထိန်ꩻသိမ်ꩻချာတောဝ်းတဲင် ခွိုꩻနွယ်ႏထိုꩻမားထိုꩻဗာႏ သမဲင်ꩻသက်သေႏဖုံႏနောဝ်ꩻ အောဝ်ႏဗောႏထာꩻသွူ။ အွဉ်ငါသားတဲ့နောဝ်ꩻ စွိုးခွိုꩻအကျိုꩻတရာꩻ၊ ကောမာꩻဖေႏသားတဲ့နောဝ်ꩻ အလင်တမွေးတောဝ်း နီနမ်းတွမ်ႏနီနမ်းဒျာႏ ကွပ်ပွိုးတမုဲင်ꩻနဲတဲင် ခွိုꩻနွယ်ႏအကျိုꩻစီꩻပွာꩻတာႏ အရီးသွတ်ꩻ နီနမ်းနီဖျင်ချာ၊ နီလမ်းနီဖျင်ချာ၊ နီဖူးဝေးနီဖျင်ချာ၊ နီပိုလီꩻ နီမွိုးဖါ နီဖျင်ပါ၊ အနာလွို နိစွိုးခွိုꩻ တခွိုꩻလွုမ်းတာႏ နီအွဉ်ငါ နီဖျင်လွေꩻတဲင် နမ်းတွမ်ႏနမ်းနောဝ်ꩻ ထွာလွဉ်ဗာႏ အွဉ်ငါခေါင်းဆောင်တဖြာꩻနောဝ်ꩻသွူ။ ကအောဝ်ႏထွူလဲဉ်းဒါႏ နီခွိုꩻနွယ်ႏ လိတ်လုဲင်ꩻ ငေါဝ်းငွါ ယေန်ႏငဲမုꩻ ဓလေ့ꩻထွုံႏစံႏဖုံႏယို လိုꩻသေလိုꩻဒါႏ လိုꩻပညာႏသားဖုံႏ၊ အွဉ်ငါခေါင်းဆောင်တန် အဆက်ဆက်ဖုံႏ နွောင်ꩻရာꩻအခန်ꩻကဏ္ဍကို အွဉ်ဝင်ꩻထူႏတာႏဝွန်ႏ ထေင်းထံႏထွူလဲဉ်းတဲင် အောဝ်ႏကုဲင်ဒါႏ ခွိုꩻသွုပ်တသာ လိုꩻယွဲးစွိုꩻဖုံႏ သမဲင်ꩻကဖေႏလွဉ်ဒါႏ နီစွိုးခွိုꩻတာႏဝွန်ႏယို အွဉ်ဝင်ꩻထေင်းထံႏ ထိန်ꩻသိမ်ꩻလွေꩻခန်းဝင်ꩻ စွုမ်ႏဖြာꩻဖြာꩻ၊ စွိုးခွိုꩻအကျိုꩻတရာꩻလဲ့ အွဉ်ဝင်ꩻမာꩻခန်းဝင်ꩻတဲင် နီကအောဝ်ႏလိုႏ လꩻထွိုက်လꩻသင်ꩻဒါႏ ခွိုꩻနွယ်ႏအကျိုꩻစီꩻပွာꩻဖုံႏ၊ အခွင်ꩻအရေꩻဖုံႏ ထူႏလꩻလꩻခန်းဝင်ꩻတွော့ꩻ ဗꩻစွဉ်ႏခြေင်ႏကမ္ဘာႏ နီလိုꩻမျိုꩻဖေႏကအောဝ်ႏဗာႏစွူစွူနောဝ်ꩻ နီနမ်းတွမ်ႏနီ နီဖျင်ချာ နီမာꩻခန်း အွဉ်ငါယံခေါင်းဆောင်တန်တဖြာꩻကရိုꩻနောဝ်ꩻ နိုꩻဆောႏဗာႏလိတ်ထွားသား မူႏခိုခွန်နင်ꩻသီးဖုံႏသွူ။