စွိုးခွိုꩻအတာႏ

"စွိုးခွိုꩻအတာႏ" စွိုးခွိုꩻဘာႏသာႏ သာႏသနာႏတွမ်ႏ စွိုးခွိုꩻရေꩻရာႏတာႏ နမ်းခြောင်ꩻတင်သော့ꩻဖေႏထွူတဲင် အွဉ်ႏရေꩻအွဉ်ငါ ကမာꩻလွေꩻဒျာႏ ပုဂ္ဂိုလ်ႏနောဝ်ꩻမꩻ ထွာထွိုက်ထွာသင်ꩻ စွိုးခွိုꩻအွဉ်ငါအကတူႏအကယ်ႏအတန်သွူ။ စွိုးခွိုꩻအွဉ်ငါအကတူႏ အကယ်ႏတန်ယိုနောဝ်ꩻ အထီအသွီႏလဲ့ဗွေ၊ အသေဒါႏလဲ့လုမ်း၊ သေထွꩻသမဲင်ꩻဖဲ့ꩻချာ ချင်းလွေꩻပါအနာႏဂတ် ဖဲ့ꩻငါတဲ့ဒါႏသွူတကာႏတောဝ်း စွိုးခွိုꩻရပ်ရာႏဒေႏသခမ်းနယ်ႏအကို နီတွမ်ႏနီ ကအောဝ်ႏအုံလွေꩻဒျာႏ စွိုးခွိုꩻရေꩻရာႏကရိုꩻဒျာႏ ဘာႏသာႏ သာႏသနာႏတွမ်ႏဓလေ့ꩻထုံꩻစံႏ နီယေန်ႏငဲးရေꩻအလꩻ ထွားလွေꩻဖေႏတသေႏသေႏ အကျိုꩻတရာꩻ၊ အွဉ်ႏရေꩻအွဉ်ငါလွေꩻဖေႏပုဂ္ဂိုလ်ႏနောဝ်ꩻသွူ။ စွိုးခွိုꩻရေꩻရာႏ အကျိုꩻတာႏနောဝ်ꩻ တအွဉ်ႏရေꩻတောဝ်း၊ အွဉ်ႏရေꩻဖေႏတော ဝင်ꩻအလောင်ႏအလင်၊ အွဉ်ႏတသွိုန်တောဒျာႏပါꩻ အခွင်ꩻအရေꩻ၊ ထင်းတန်တောပါꩻ၊ ထီႏပေႏတောစွိုးခွိုꩻ၊ ငမ်း/ရိုႏသေႏတေားဒျာႏပါꩻနောဝ်ꩻ စွိုးခွိုꩻဟံႏနယ်ႏကို အရန်းမုဲင်ꩻမုဲင်ꩻတရိုꩻတောဝ်း ထွာထွိုက်ထွာသင်ꩻတောဝ်း နီစွိုးခွိုꩻအကယ်ႏအတန်သွူ၊ အုံဖေႏဒျာႏပါꩻဖဲ့ꩻ၊ အောဝ်ႏဖေႏဒျာႏ ပါꩻရေꩻနောဝ်ꩻ အောဝ်ႏလိုႏလွေꩻအုံဒျာႏပါꩻရပ်၊ ပါꩻခမ်းနောဝ်ꩻသွူ။ စွိုးခွိုꩻဖေႏကထင်ႏထို စွိုးခွိုꩻဖေႏကအောင်ႏဗꩻ၊ ထင်ႏထိုလွဉ်နောဝ်ꩻ အရီးသွတ်ꩻ အောဝ်ႏလိုႏငါႏ လုမ်းဗဉ်ႏရေꩻတွမ်ႏ လွောင်ႏဗူႏရေꩻနောဝ်ꩻသွူ၊ နီစွိုးခွိုꩻ ကအောဝ်ႏအုံဒျာႏ နီရပ်ရာႏဒေႏသ နီခမ်းနယ်ႏကိုယို လွုမ်းဗဉ်ႏရေꩻမဉ်ႏအောဝ်ႏမꩻ အုံအောဝ်ႏရေꩻယို သꩻခွꩻဗာႏသွူ၊ အုံအောဝ်ႏရေꩻယို သꩻခွꩻမꩻ နီခမ်းနယ်ႏကိုယို လုမ်းဗဉ်ႏရေꩻအတာႏ အောဝ်ႏလိုႏငါႏ ပွေါရဲရေꩻ စဲ့ꩻတွမ်ႏပွေါးထိန်ꩻထွားရေꩻ ရပ်သားဖဲ့ꩻအစွိုꩻနောဝ်ꩻသွူ။ ပွေါးရဲရေꩻစဲ့ꩻ ပွေါးရဲရေꩻစဲ့ꩻနောဝ်ꩻ အောဝ်ႏအသောင်သား နေးတွမ်ႏစူခွုမ်အစွူႏတဲင် မဉ်ႏလွဉ်တွိုက်ꩻခꩻအံႏနွောင်ꩻ မဉ်ႏလွဉ်တေက်ꩻနျꩻ မာꩻစဲင်ဆာနောဝ်ꩻ နီအောဝ်ႏလိုႏခြေင်ႏခွိုန်ꩻအီသွူ၊ ဝင်ꩻမဉ်ႏအံႏနွောင်ꩻနီတွမ်ႏစဲ့ꩻ နီခြေင်ႏခွိုန်ꩻဗာႏတွမ်ႏစဲ့ꩻသွူ၊ စွိုးခွိုꩻလွုမ်းဗဉ်ႏရေꩻအတာႏ စွိုးခွိုꩻပွေါးရဲရေꩻစဲ့ꩻယို အောဝ်ႏဗာႏသွူတကာႏတောဝ်း အောဝ်ႏလိုႏခြွဉ်းဗူႏခါꩻသွူတကာႏတောဝ်း အောဝ်ႏလိုႏခြွဉ်းဗူႏခါꩻအာအာ၊ မာꩻတလာသေꩻခါꩻ ခြွော့ခြွော့တဉ်ႏတဉ်ႏ မွန်မွန်ဗန်ဗန်နောဝ်ꩻ အရေꩻတန်ငါႏသွူ၊ အစုအစွိုꩻ အရန်းရန်း စူခွုမ်ခြွိုင်ႏခြိုꩻ ဖေႏကဗွေစွုမ်ႏနောဝ်ꩻ ဒပ်ꩻဆဲင်ဖေႏထွူတဲင် စွိုးခွိုꩻဟံႏနယ်ႏအကို ရုဲင်ꩻတသွိုးချာငါ ပွေါးရဲရေꩻတာႏ ဖေႏကလုမ်းစွစ်ꩻနောဝ်ꩻ မာꩻလွေꩻဗာႏသွူ။ ပွေါးရဲးရေꩻစဲ့ꩻယို စူခွုမ်ခြွိုင်းခြိုꩻ မဉ်ႏဗွေစွုမ်ႏ၊ အုံအောဝ်ႏစရိပ်ယို မဉ်ႏလုမ်းကုမ်ႏနောဝ်ꩻ ရုဲင်ꩻတသွိုးလွေꩻ ခမ်းကူခမ်းနားတွမ်ႏ ရပ်ရာႏခမ်းနယ်ႏကိုတဲ့ မွန်ဗွန်လွဉ်၊ ရုဲင်းတဲ့ရုဲင်း၊ ကုဲင်းတဲ့ကုဲင်းလွဉ်သွူ၊ စဲ့ꩻပိုလ်ႏတွမ်ႏစဲ့ꩻပေႏ အရန်းရန်းယို အရွယ်ႏလဲ့မဲဉ်မဲဉ်ႏ ရုဲင်းရုဲင်းဟန်ဟန် မွန်ဗန်ဗာႏစွုမ်ႏဖြာꩻဖြာꩻနောဝ်ꩻသွူ။ စဲ့ꩻအွဉ်ပိုလ်ႏပေႏ ပိုလ်ႏတန်ဖုံႏယိုတဲ့ စဲ့နယ်ꩻပရိယာယ်ႏ စဲ့ꩻပညာႏယို ဒါႏဗာႏစွုမ်ႏဖြာꩻဖြာꩻထွူတဲင် စွိုးခွိုꩻအလောင်းတွမ်ႏ ပွေါးရဲးရေꩻစဲ့ꩻတပ်အလောင်းသား တဉ်ႏခွေါင်မုꩻယိုတဲ့ အောဝ်ႏဗာႏစွုမ်ႏဖြာꩻဖြာꩻသွူ။ စွိုးခွိုꩻပွေါးရဲးရေꩻစဲ့ꩻယိုအလောင်း စွိုးခွိုꩻရပ်မွိုးရပ်ဖါတွမ်ႏ လိုꩻအာဖုံႏ ဖေႏကအာႏကွိုꩻသꩻဆွော့ꩻ ဟွိုန်ဟောဝ်လွေꩻဗာႏ တသေႏသေႏသွူ။ စွိုးခွိုꩻပွေါရဲးရေꩻစဲ့ꩻကတူႏ ပိုလ်ႏကယ်ႏတန်သီး ကအွဉ်ႏထွော့ဖေႏ စီꩻကန်ꩻဖုံႏယိုတဲ့ နေးနာႏခံႏထူႏ အွဉ်ႏရေꩻဗာႏတသေႏသေႏသွူ၊ စွိုးခွိုꩻလိုꩻမျိုꩻတပါꩻအကို ပွေါးရဲရေꩻစဲ့ꩻယို မဉ်ႏအောဝ်ႏမꩻ ပါꩻမာꩻပါꩻခွေါင်း တငီႏတငါဗွိုန်ႏတောဝ်း၊ စွိုးခွိုꩻစဲ့ꩻနောဝ်ꩻ စွိုးခွိုꩻအစွူႏ၊ အစွူႏမဉ်ႏအောဝ်ႏမꩻ ပါꩻအံႏနွောင်ꩻဗွိုန်ႏတောဝ်း၊ မော့ꩻလဲင်ႏစခါ စွိုးခွိုꩻစဲ့ꩻအဲဉ်ထောဝ်းတဲင် ပါꩻကအံႏနွောင်ꩻ နီစွိုးခွိုꩻနောဝ်ꩻ အောဝ်ႏလိုႏအွဉ်ႏဖေင်ꩻတောဝ်းသွူ။ ပွေါးရေꩻအစွိုꩻ စွိုးခွိုꩻရေꩻရာႏကရိုꩻဒျာႏ စွိုးခွိုꩻဘာႏသာႏ သာႏသနာႏတွမ်ႏ ဓလေ့ꩻထွုံꩻစံႏယေန်ႏငဲရေꩻအလꩻ နီစွိုးခွိုꩻကအောဝ်ႏအုံလွေꩻဒျာႏ နီရပ်ရာႏဒေႏသခမ်းနယ်ႏကို နီတွမ်ႏနီ ပွေါထိန်ꩻတီပွေါထိန်ꩻထွားချာဒျာႏမꩻလꩻ၊ အွဉ်ႏဗာႏပွေါးထိန်ꩻရေꩻအစွိုꩻ အရန်းရန်း (အွိုင်ႏ/ဝေင်ꩻနယ်ႏ/ခမ်းနယ်ႏ)သွူ။ ပွေါးရဲရေꩻစဲ့ꩻနောဝ်ꩻ ရဲကမ်းဖေႏစွိုးခွိုꩻရန်ႏသူႏ၊ ပွေါးထိန်ꩻရေꩻနောဝ်ꩻ ရပ်ရာႏဒေႏသခမ်းနယ်ႏအကို ပျဿနာႏ စွန်တခွန်ꩻ၊ လိုꩻတဟောဝ်တောဝ်း လိုꩻကလွဉ်စောက်ꩻကာꩻဒျာႏ ဘာႏသာႏသာႏသနာႏ၊ လိုꩻကယားကုဲင်၊ အွဉ်ကုဲင်ဒျာႏဓလေ့ꩻထွုံꩻစံႏ၊ ယေန်ႏငဲရေꩻတွမ်ႏ လိုꩻလွောက်ꩻနာႏတောဝ်း ရပ်ရာႏဒုံဆောင်ႏ ဥပဒေႏစီꩻကန်ꩻဖုံႏယို မဉ်ႏပေါႏ၊ မဉ်ႏအောဝ်ႏလွဉ် သွဉ်ဖေႏဒေါ့ꩻဖေႏ မဉ်ႏတလꩻတောဝ်း ထူႏရေꩻလွေꩻဗာႏသွူ၊ စွိုးခွိုꩻရပ်ရာႏ ခမ်းနယ်ႏအကို ပွေါးထိန်ꩻရေꩻအစွိုꩻယို စူꩻငီꩻတွမ်ႏ လိုꩻကသေဒါႏ ရပ်ရာႏအကို သမာဓိဖြားတန်ဖုံႏတဲင် အရေꩻအရာႏ ပျဿနာႏအမျိုꩻမုဲင်ꩻတရိုꩻတောဝ်း ဖေႏကထွူစွိုးခွိုꩻသောဝ်ꩻလွေꩻနောဝ်ꩻ အွဉ်ႏထွော့လွေꩻဖေႏဗာႏ၊ ဖေႏကထွာဆုဲင်ꩻမွိုန်းတောဝ်း တောင်ꩻသေꩻခါꩻအတာႏ မာꩻလွေꩻဖေႏဗာႏသွူ၊ စွိုးခွိုꩻရပ်ရာႏခမ်းနယ်ႏအကို လွိုင်ႏသာႏယာႏရေꩻဖဲ့ꩻတဲ့ အွဉ်ႏရေꩻအွဉ်ငါ မာꩻလွေꩻဖေႏဗာႏသွူ။ ပွေါးထိန်ꩻရေꩻအစွိုꩻ အရန်းရန်းဖုံႏယိုတဲ့ ခံႏထူႏလွေꩻ စွိုးခွိုꩻအွဉ်ငါ အကတူႏလိုꩻတန် ငေါဝ်းထွန်ႏလောဝ်းဟွိုန်အတွိုင်ꩻ စပ်ငီꩻတွမ်ႏ ရပ်မွိုးရပ်ဖါအကို လိုꩻအာသꩻဆန္ဒတဲင် စွိုးခွိုꩻရေꩻရာႏအတာႏယို မာာꩻလွေꩻဗာႏသွူ၊ ပွေါးထိန်ꩻရေꩻအစွိုꩻယို အစွူႏအာႏဏာႏ ဖေႏကအောဝ်ႏနောဝ်ꩻ မာꩻပဲင်ႏခွင်ꩻယို အွဉ်ႏထွော့ဖေႏအပ်ဗာႏသွူ၊ ကလိုႏအပ်ဒျာႏ စူခွုမ်ခြွိုင်ႏခြိုꩻတဲ့ ဖေႏခွုမ်ခါꩻဗာႏသွူ။ ပွေါးထိန်ꩻရေꩻအရန်းရန်းယို ခွုမ်စံႏမာꩻလွေꩻ မဉ်ႏတနွောင်ꩻတောဝ်းမꩻ ဒင်ႏငါအပ်လွေꩻ ပွေါးရဲးရေꩻစဲ့ꩻစူကိုနောဝ်ꩻသွူ၊ စွိုးခွိုꩻအတာႏ အရေꩻတန်မဉ်ႏပေါႏလွဉ်စိန်ႏစွဗာ့ꩻ မဉ်ႏအောဝ်ႏလိုႏစွိုးခွိုꩻအာႏရဲင်ꩻ လိုꩻအာအာႏနောဝ်ꩻ ပွေါးထိန်ꩻရေꩻသားယို ဟဲ့ꩻစုဟဲ့ꩻဗူႏခြွဉ်းစုဖေႏဗာႏ ကလိုႏဒါႏအရပ်နောတ်ꩻသွူ။ ပွေါးထိန်ꩻရေꩻအစွိုꩻ အရပ်သားဖဲ့ꩻယိုတွမ်ႏ ပွေါးရဲးရေꩻစဲ့ꩻယိုနနောဝ်ꩻ ဆွန်ꩻဝင်ꩻစူတဲင် အွဉ်ႏရေꩻဗာႏ ရပ်ရာႏမွိုးဖါ ကဒင်ႏဟွိုန်နယ်ႏတွမ်ႏနေးနာႏခံႏထူႏလွေꩻဗွေဗွေသွော့ စွိုးခွိုꩻအွဉ်ငါ အတကူႏလိုꩻတန်ဖုံႏ ကအီႏအွဉ်လွေꩻ စွိုးခွိုꩻရေꩻရာႏအကျိုꩻတာႏ တဖူꩻရဲဉ်ႏဖုံႏနောဝ်ꩻသွူ။ လွောင်ႏဗူႏရေꩻ (သိုႏမဉ်ႏလီနောဝ်ꩻ လွောင်ႏချာယိုꩻ၊ လိုꩻမဉ်ႏလီနောဝ်ꩻ လွောင်ႏချာယပ်ꩻ) လွောင်ႏဗူႏရေꩻယို အရန်ꩻတန်ငါႏ၊ စွိုးခွိုꩻလိုꩻမျိုꩻတပါꩻယို လွောင်ႏမူႏမုꩻ မဉ်ႏကုဲင်ပြုဲင်ပြင်ꩻနောဝ်ꩻ လိုꩻမျိုꩻယို ထိုꩻမား၊ စွိုးခွိုꩻယို အစွိုးထဲ့သွတ်ꩻထိုꩻဒါႏသွူ၊ အစ္စရေးလိုꩻမျိုꩻယို အောဝ်ႏဒျာႏဖြာꩻခမ်းခမ်းလဲ့ လွောင်ႏဗူႏမုꩻသွီႏပီဝင်ꩻ၊ အာႏယိုစွိုင်ႏယံ မွန်ဗန်နောဝ်ꩻ ငမ်းဗာႏတောဝ်းဒွုမ် ပါꩻမုဲင်ꩻမုဲင်ꩻ သေထွꩻဗာႏနောဝ်ꩻသွူ။ လွောင်ႏဗူႏရေꩻယို မဉ်ႏအောဝ်ႏနောဝ်ꩻ စွိုးခွိုꩻဘာႏသာႏ သာႏသနာႏအရောင်ႏတဲ့လေ၊ စွိုးခွိုꩻအာႏတဲ့ တလာ၊ မွန်ဗန်မုꩻတဲ့အောဝ်ႏ၊ အောင်ႏပွယ်ꩻတဲ့ လꩻလွေꩻဗာႏသွူ၊ နောဝ်ꩻမꩻ နီတွမ်ႏနီ နီစွိုးနီခွိုꩻဒျာႏ စွဲးကမ်းပင်ႏကိုဝင်ꩻတဲင် အာႏကွိုꩻဒျာႏစွိုးခွိုꩻအာႏ၊ နာႏဒျာႏစွိုးခွိုꩻငေါဝ်း၊ အုံကွူႏဒျာႏစွိုးခွိုꩻဟေ့ꩻယို ထွာဗာႏတောဝ်းဝင်ꩻသွဉ်း၊ ထွာဗာႏတောဝ်း ဝင်ꩻလိုꩻနောဝ်ꩻ အဟောဝ်သွတ်ꩻသွူ။ ယိုခါ နီခမ်းတန် ခမ်းနယ်ႏခြွဉ်းစုနဲင်ႏငံႏတောႏအကို ခံႏထူႏလွေꩻလဲဉ်း တဖူꩻစဲဉ်ႏပါတီစွုမ်ႏ ဒီမိုကရေစီစနစ်တဲင် ဖေႏကပါငီꩻသော့ꩻ ထွာနွောင်ꩻနဲင်ႏငံႏတောႏ အကယ်ႏအတန်နောဝ်ꩻ ပါတီစွုမ်ႏစွိုꩻနမ်းခြောင်ꩻတင် အမတ်ဖုံႏနောဝ်ꩻ ခေးပြဲင်ႏလွေꩻဗာႏနေးတွမ်ႏမဲး အဆေ့ꩻအအာ၊ အလꩻအာမဲသားနောဝ်ꩻ နွောင်ꩻထွူ အီႏလꩻအီႏတွိုႏကီဗာႏ လွတ်တောႏအမတ်နောဝ်ꩻသွူ၊ လွတ်တောႏအမတ်ကို ပါꩻမုဲင်ꩻပါတီအမတ် လိုꩻအဖြာꩻမဉ်ႏအာတဲ့ ထွာနွောင်ꩻစွဉ်ႏ နဲင်ႏငံႏတောႏသမ္မတတန်သွူ။ ကလꩻလွေꩻဒျာႏ လွတ်တောႏအမတ်ယိုတဲ့ လွတ်တောႏပွယ်ꩻအုံကွံအကို ဒင်ႏနယ်လွေꩻနီထာꩻလိုႏယို အခွင်ꩻအရေꩻ လꩻလွေꩻနုဲင်းနောဝ်ꩻသွူ၊ နောဝ်ꩻမꩻ နဲင်ႏငံႏတောႏအလောင်း စွိုးခွိုꩻရေꩻရာႏအကျိုꩻတာႏ ဖေႏကဒင်ႏကွိလွေꩻနွောင်ꩻ ယိုမာꩻငါ နေးစွိုးခွိုꩻအာႏ အွဉ်ႏခံႏအရွီးအခိုႏ တယ်ႏဆို့ꩻဖွဲ့ဗူႏလွေꩻ နီပအိုဝ်ႏစွိုးခွိုꩻတစွိုꩻ(P.N.O)ပါတီယို အောဝ်ႏလဲဉ်းသွူ၊ နောဝ်ꩻမꩻ အီႏအွဉ်အီႏမာꩻလွေꩻဖေႏဒျာႏ စွိုးခွိုꩻရေꩻရာႏအကျိုꩻတာႏတွမ်ႏ နီစွိုးခွိုꩻရပ်ရာႏ ခမ်းနယ်ႏကို ကအောဝ်ႏလိုႏဒါႏ လွိုင်ႏကွိုန်ꩻသာႏယာႏရေꩻအတာႏ နဲင်ႏငံႏတောႏဖေႏကသေ၊ ဖေႏကဖန်းပွန်းဖန်းဖြယ်လင်ꩻနောဝ်ꩻ နီစွိုးခွိုꩻ(P.N.O)ပါတီနနမ်းခြောင်ꩻတင် လွတ်တောႏအမတ်ယို ဒင်ႏပျꩻလောဝ်းဟွိုန် ကွီလွေꩻဗာႏသွူ။ စွိုးခွိုꩻလိုꩻမျိုꩻတပါꩻအကို အောဝ်ႏထိုꩻနီစွိုꩻ၊ အောဝ်ႏထိုꩻနီပါတီတဲ့ တဟောဝ်တောဝ်း၊ အာႏတဲ့အောဝ်ႏထိုꩻနီခေါဝ်၊ နီစွိုးခွိုꩻတဲ့ ကွင်ကယ်ထိုꩻ၊ နီအောင်ႏမဲတဲ့ အီႏလီထိုꩻ၊ နီရပ်ဒေႏသ ခမ်းနယ်ႏကိုဒျာႏသွူတဲ့ ဖေႏမဲခေးပြဲင်ႏပွယ်ꩻယို လိုꩻစွိုꩻပါတီအလင် ဝင်ꩻလွဉ်ပြဲင်ႏသား အီႏလꩻအီႏနွောင်ꩻထိုꩻနောဝ်ꩻ နီအောဝ်ႏလိုႏသေခါꩻဗာႏသွူ။ နီစွိုးခွိုꩻအကို မူႏမူႏခိုခို ပေႏပေႏတန်တန် ဖြားဖြားဆားဆား စွိုးခွိုꩻရေꩻရာႏအကျိုꩻတာႏ ရေႏမိုးချက်ယို ဖေႏကအောဝ်ႏဒျာႏသွော့ဝင်ꩻ တဖူꩻတလီးချင်ႏ၊ ဖေႏကအောဝ်ႏဒျာႏသွော့ တစွိုꩻချင်ႏ၊ ပအိုဝ်ႏနောဝ်ꩻ ဖေႏကအောဝ်ႏဒျာႏငါ တအိုဝ်ႏလွုမ်ꩻနောဝ်ꩻ ဟောဝ်ငါႏသွူ။ မော့ꩻနောဝ်ꩻခါမဉ်ႏလဲ့ ဝင်ꩻအသောင်သား အောဝ်ႏဟဲ့ꩻဖန်ဗာႏလဲဉ်း ပအိုဝ်ႏတနျာႏတွမ်ႏ ပအိုဝ်ႏဗွာကရိုꩻနောဝ်ꩻ ဟောဝ်ပေႏသꩻငါႏသွူ။ ခွေယွုမ်းနမ်း ခွေထွိုင်ႏမာꩻ၊ နာꩻယွုမ်းနမ်း နာꩻထွိုင်ႏခွုမ်တဲ့ အာႏပေႏထိုꩻ၊ အာႏပꩻထိုꩻလွုမ်ꩻသွူ၊ စွိုးခွိုꩻအကို ဖြောင်ဖြောင်ဒေါင်ဒေါင် ထီႏသေထွꩻဝင်ꩻမꩻ သံႏသယကင်ꩻယိုꩻဝင်ꩻလောင်း၊ သံႏသယကင်ꩻယိုꩻဝင်ꩻလောင်းယို မဉ်ႏအောဝ်ႏမꩻ ယွုမ်းအံႏလွေꩻယိုꩻဝင်ꩻလꩻ၊ ယွုမ်းအံႏယိုꩻဝင်ꩻမဉ်ႏလꩻမꩻ လွောင်ႏဗူႏရေꩻယို အီႏလꩻ၊ အီႏဗꩻ၊ အီႏတလာလွဉ်၊ စွိုးခွိုꩻတာႏအီႏအောဝ်ႏလွဉ်နောဝ်ꩻသွူ။ မော့ꩻလဲင်ႏနောဝ်ꩻခါနောဝ်ꩻ နီပအိုဝ်ႏသမဲင်ꩻတဲ့ တဟောဝ်တောဝ်း၊ ခံႏဗာႏဒျာႏ ဝင်ꩻတေက်ꩻနျꩻအမျိုꩻမျိုꩻ၊ တွယ်ႏစွဉ်ႏဖြားတန်လိုꩻရုဲင်းသီး အွဉ်အထျꩻ ခြေင်ႏခွိုန်ꩻချာပဒေႏသရာဇ်စွုမ်ꩻစွိုꩻမာꩻလွဉ်ယိုမꩻ ပအိုဝ်ႏသွီႏနောဝ်ꩻ မွန်ဗန်ချာယင်းတဲင် တွမ်ႏသꩻရက်စွိုးခွိုꩻ ကအောဝ်ႏသားဖုံႏနောဝ်ꩻ ခြို့ꩻထွိုင်ႏခြို့ꩻထွိုင်ႏ တွူႏတရန်အွဉ်ငါထဲင် အစွုပ်စွုပ်မꩻ လꩻထန်ႏလွဉ်ယင်း ပအိုဝ်ႏနမ်းပဲင်ႏ ပွေါထိန်ꩻခွင်ꩻလꩻဟံႏနယ်ႏဒေႏသနောဝ်ꩻ သꩻရေꩻဗာႏသွူ။ နီပအိုဝ်ႏစွိုးခွိုꩻလိုꩻမျိုꩻယို ကမ္ဘာႏဆꩻကီ လိုꩻမျိုꩻလောင်ႏလင်တဲ့ သေငါꩻလွေꩻလꩻသွူ၊ စွိုးခွိုꩻအွဉ်ငါ လိုꩻဖြားမော့ꩻလဲင်ႏကေꩻဇူꩻတဲ့ အောဝ်ႏလိုႏအွဉ်ႏဖေင်ꩻတောဝ်း၊ စွိုးခွိုꩻအကျိုꩻတာႏယိုခါ စွိုးခွိုꩻအွဉ်ငါအကတူႏ လိုꩻတန်ငေါဝ်းထွန်ႏဖုံႏယိုတဲ့ နီအောဝ်ႏလိုႏနေးနာႏခံႏထူႏလွေꩻဗွေဗွေနောဝ်ꩻသွူ။ ဝင်ꩻခမ်းဝင်ꩻထီ၊ ဝင်ꩻအုံဝင်ꩻအောဝ်ႏ၊ ဝင်ꩻလုပ်ꩻဝင်ꩻမာꩻ၊ ဝင်ꩻစီꩻကန်ꩻဝင်ꩻဥပဒေႏ၊ ဝင်ꩻတိုꩻတက်ထင်ႏထိုမုဖုံႏယို တွမ်ႏနီစွိုးခွိုꩻယိုခါ ကွာႏအာငါႏဒွိုန်းကတဲင် ဖေႏကထွꩻလွဉ်ꩻဝင်ꩻနောဝ်ꩻ ဖေႏကသေထွုမ်ႏနာႏ၊ ထွုမ်ႏထွား၊ ထွုမ်ႏဖတ်နောဝ်ꩻမꩻ နီအီႏထွꩻလွဉ်ꩻဝင်ꩻ၊ မဲဉ်ႏနဲ့ အမာႏနဲ့နောဝ်ꩻလဲ့ သေပါဗာႏသွူ။ စွိုးခွိုꩻရေꩻရာႏတွမ်ႏ လွိုင်ႏကွိုန်ꩻခြွေခြာႏရေꩻ-ယိုနီမျိုꩻအကိုနောဝ်ꩻ စွိုးခွိုꩻရေꩻရာႏယို နီအွဉ်ႏဗာႏအဓိကသွူ၊ မဉ်ႏတအွဉ်ႏတောဝ်းနောဝ်ꩻ နီစွိုးခွိုꩻ ဘာႏသာႏသာႏသနာႏတဲ့ဖေ့ထိုꩻဒါႏ၊ ဓလေ့ꩻထုံꩻစံႏယေန်ႏငဲးရေꩻလဲ့ ထိုꩻမားထိုꩻဒါႏ၊ စွိုးခွိုꩻတဲ့ ထိုꩻမားနွောင်ꩻသွူ၊ မဲ့ꩻဗွိုန်ထိုꩻ အင်ဒိုနီးရှားတွမ်ႏမလေးရှားခမ်းဖုံႏနောဝ်ꩻသွူ၊ စွိုးခွိုꩻရေꩻရာႏယို အွဉ်ႏအဓိက အွဉ်ငါခွုမ်စံႏမာꩻလွေꩻဖေႏမꩻ လွောင်ႏဗူႏရေꩻယို အာႏတလာလွဉ်ဗာႏသွူ။ နောဝ်ꩻမꩻ စွိုးခွိုꩻဖေႏကထင်ႏထိုနောဝ်ꩻ စွိုးခွိုꩻအတာႏ အောဝ်ႏလိုႏငါႏလုမ်းဗဉ်ႏရေꩻ၊ လုမ်းဗဉ်ႏရေꩻယို ဖေႏကအောဝ်ႏနောဝ်ꩻ အောဝ်ႏလိုႏငါႏ စွိုးခွိုꩻအတာႏ ပွေါးရဲးရေꩻစဲ့ꩻတွမ်ႏ ပွေါးထိန်ꩻရေꩻအစွိုꩻနောဝ်ꩻသွူ။ စွိုးခွိုꩻအကို လုမ်းဗဉ်ႏရေꩻ ပေါႏအောဝ်ႏသွူတဲ့ လွောင်ႏဗူႏရေꩻယို အာႏတလာလွဉ်သွူတဲင် အဖဲ့ꩻဖဲ့ꩻအခေါဝ်ခေါဝ်ယို အောင်ႏမျင်ႏထင်ႏထိုတသွောင်းလွဉ်ဗာႏသွူ။ နီစွိုးခွိုꩻအကို နီတွမ်ႏနီ ကံႏကျမ္မာႏအခွင်ꩻယို နီဖန်ဆင်ꩻချာလꩻသွူ၊ နီစွိုးခွိုꩻအကို နီတွမ်ႏနီ အစွူႏအာႏဏာႏ နီသွုံꩻချာလꩻ၊ အစွူႏအာႏဏာႏ အောဝ်ႏလို့ချာဒျာႏ နီစူကိုသွူ၊ ဝင်ꩻအလင်နေးတွမ်ႏအာႏဏာႏ အံႏခြယ်ꩻ ထိန်ꩻတီနီ တလꩻတောဝ်းတဲင် ယိုမာꩻငါနောဝ်ꩻ ခွꩻသꩻလွေꩻဗာႏသွူ။