စွုမ်ႏနီꩻရွစ်ဗာႏလက္ခဏာႏ

အနိစ္စအခန်ꩻ သဗ္ဗေႏသင်္ခါရာႏ အနိစ္စ၊ ခဏရွုမ်ꩻနဲး အုံဗာႏတဲး၊ သီယွဲးခွိုꩻယုဲင် လီလာပြုဲင်၊ ဟုဲင်လုဲင်ထိုꩻဒါႏ မွိုင်ကြွိုင်ငါႏ၊ ဓမ္မတာႏမွော့ ယူႏဒွါႏသွော့၊ ခြွော့တဉ်ႏငထဝ်း မယ်ꩻပွိုင်ႏတဝ်း၊ ပဉ္စဝ်းဗွန်ထို ငဝ်းငွါယို၊ ဟို့ꩻကိုသွင်ꩻသော့ꩻ နဝ်ꩻမꩻရော့ꩻ၊ အီႏမော့ꩻလꩻဗာႏ ထာꩻချမ်ꩻသာႏ၊ ငိမ်ꩻချမ်ꩻဗာႏမွေး တင်ꩻလုဲင်ဟွေး။

"ဒုက္ခခန်ꩻ" သဗ္ဗေႏသင်္ခါႏရာႏ ငဝ်းဒုက္ခ၊ လောကခင်ႏလမ်း လောကီႏခမ်း၊ ထာꩻငမ်းခြုံးတူႏ ဘေꩻရန်ႏသူႏ၊ ဆင်ꩻရယ်ꩻယူႏပက် ယပ်ꩻစိုးသက်၊ ဝင်ꩻနိစ္စငါႏ ငွိုးအွီႏဗာႏ၊ ကင်ꩻသာႏတဝ်းနဲး တရျိုးတဲး၊ ဆင်ꩻရယ်ꩻကိုယ်စိတ် ဟိတ်ကိတ်ကိတ်၊ ထိတ်လန်းကိုတ်ဆွော့ꩻ ငမ်းငါႏတွော့ꩻ၊ သꩻဝꩻစွော့ꩻငါႏ မဲ့ပြꩻဗာႏ၊ စောက်ꩻအာႏလောက်လေး ခြီႏငမ်းမွေ၊ ယူႏစွေးသေမꩻ သံႏဝွေႏလꩻ၊ လောဘပြုဲင်ပြင်ꩻ ဒေါသကင်ꩻ၊ မောဟသျင်ꩻလွစ် နဝ်ꩻမꩻချွစ်၊ ဖျော်ရွစ်တွိုႏဗာႏ နိဗ္ဗာန်ႏရွာႏ၊ ချမ်ꩻသာႏပုံႏသေႏ ငိမ်ꩻနောဗွေႏ၊ သေႏချာႏထွူနော ဗွေႏသီးဩ။

"အနတ္တခန်ꩻ" သဗ္ဗေႏသင်္ခါႏရာႏ အနတ္တ၊ ရွစ်လွခေ့ꩻလေ ယံထီႏသေ၊ ခွေအဲ့အဲဉ်ထဝ်း နမ်းမွေးတဝ်း၊ အုံရဝ်းစွမ်ႏပါꩻ တဆဲဉ်ညာꩻ၊ ငတ်ꩻပါꩻခန္ဓာႏ ရုပ်နာမ်ႏဒွါႏ၊ ကိလေႏသာႏရွဉ်း တဏှာႏသွဉ်း၊ ရာႏဂခြွဉ်းဟုမ် နမ်းထီႏဒွုမ်၊ ထဲ့စွုမ်အဝ်ႏခံ ပါꩻဟုမ်ဟံ၊ ငဝ်းယံပြင်ꩻငါႏ ဟိတ်အာႏဏာႏ၊ နိစ္စက်ဒါႏဝင်ꩻ မေတ္တာႏကင်ꩻ၊ ဝင်ꩻမီႏခိုးရဝ်း လꩻဖိုတဝ်း၊ ဗွေႏငထဝ်းငါႏ မကွိုꩻဗာႏ၊ ခုဲင်ႏခွေါ့ꩻငါႏနော ယပ်ꩻငါႏဩ၊ ခွေရေꩻကောနေး ငထဝ်းမွေး၊ ယိန်းစွေးယိန်းယူႏ တလွိုးသူႏ၊ ယူႏလꩻထွူစဝ်း နမ်းမွေးတဝ်း၊ နမ်းအဲဉ်ထဝ်းတဲ့ သေထွူနဲ့၊ ခွေမွေးပဲးနဲ့ သေထွူတဲ့၊ မꩻလဲ့လဲင်ႏခါ ကျံႏဖျင်ဟာ၊ ဆင်တသာရော့ꩻရော့ꩻ ယံကဗော့ꩻ၊ မော့ꩻတဝ်းထောင်ဗာႏ တဖူꩻသာႏ၊ ကူꩻလဲဉ်းကာႏဗꩻ လောကမꩻ၊ လွစ်လꩻကင်ꩻညာꩻ ဝွဋ်သွံပါꩻ၊ ထာꩻခွꩻထာꩻငိမ်ꩻ ရုပ်နာမ်ႏသိမ်ꩻ၊ ငိမ်ꩻချမ်ꩻမွေးမန်ႏ ကင်ꩻဘေꩻရန်ႏ၊ နိဗ္ဗာန်ႏချမ်ꩻသာႏ ဖျော်လꩻဗာႏ၊ သွံပါꩻလက္ခဏာႏရေႏ ယိုနဝ်ꩻဗွေႏ၊ သွတ်ꩻထွူသေႏချာႏ လို့မဲဉ်ႏရာႏ၊ မဉ်ႏမဉ်ဒါႏလဲ့ သွဉ်ဒွါႏတဲ့၊ ကြောင်းကြဲ့စွဉ်ႏနော လို့ထွူဩ။