ဆရာႏဇီဝကရီ-ဥပါႏသကာႏ
"ဇီဝကသုတ် (ဆရာႏဇီဝက ရီ-ဥပါႏသကာႏခရာႏ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ဆရာဇီဝက တခေါ့ꩻဥယျာဉ်ႏခြံကို၊ ခွန်အဘယ ကထူႏလွူးဒါႏ ဆရာႏဇီဝကနဝ်ꩻ လွေꩻထေ့ဗွေႏဘုရာꩻ၊ ဝုဲင်ႏဗွေႏဘုရာꩻထွူခါ ရီပါနုဲင်းယို- "ဩဗွေႏ- ကွပ်အကျောင်ꩻထမုဲင်ꩻတဲ့ ဟဲ့ꩻဗာႏ'ဥပါႏသကာႏ'ဟောင်း ဗွေႏဩ" "တကာႏဇီဝက- ကွပ်ကိုꩻကွယ်ႏဘုရာꩻ၊ တရာꩻ၊ သံဃာႏတဲင် ဟဲ့ꩻဗာႏ'ဥပါႏသကာႏ'နောဝ်ꩻသွူ"။ "မွေးသွူ ဗွေႏ- ပွိုးအကျောင်ꩻတကားမုဲင်ꩻတွော့ꩻ ဥပါႏသကာႏနဝ်ꩻ ဟဲ့ꩻဗာႏ'လိုꩻသီႏလသား'ဟောင်း ဗွေႏဩ" "တကာႏဇီဝက- ဥပါႏသကာႏနဝ်ꩻ 'မာꩻသီတဝ်းဝင်ꩻသက်၊ ထူႏတခွန်ꩻတဝ်းဝင်ꩻတခြိုꩻ၊ ပဲ့စ်မာႏတဝ်းဝင်ꩻပိုမာ၊ ဒေါ့ꩻလဲဉ်တဝ်းထာꩻ၊ အွꩻတဝ်းဒေါဝ်'ပွိုးအကျောင်ꩻဟောဝ်ယို ငတ်ꩻချက် အကျင်ꩻမျတ် ယိုငတ်ꩻမျိုꩻအောဝ်ႏတွော့ꩻ ဟဲ့ꩻဗာႏ'လိုꩻသီႏလသား'နောဝ်ꩻသွူ"။ "မွေးလဲဉ်းသွူဗွေႏ- 'ဥပါႏသကာႏနဝ်ꩻ ကျင်ꩻဒျာႏနမ်းတာႏ အကျိုꩻလွုမ်ꩻ၊ ဝင်ꩻတာႏအကျိုꩻနဝ်ꩻ ကျင်ꩻပါတဝ်း'ကရိုꩻနောဝ်ꩻ အကျင်ꩻနုဲင်းမုဲင်ꩻဟောင်း ဗွေႏဩ" "တကာႏဇီဝက- ဥပါႏသကာႏနဝ်ꩻ သဒ္ဓါႏတရာꩻအဝ်ႏဝွေꩻလွုမ်ꩻ၊ ဝင်ꩻတဲ့ သဒ္ဓါႏတရာꩻဖေႏကအဝ်ႏနဝ်ꩻ ဒေါ့ꩻသွဉ်ဖေႏတောဝ်း၊ သီႏလအဝ်ႏဒျာႏဝွေꩻလူမ်ꩻ၊ ဝင်ꩻတဲ့ သီႏလဖေႏကအဝ်ႏနဝ်ꩻ ဒေါ့ꩻသွဉ်ဖေႏတဝ်း၊ လူႏတန်ꩻဒျာႏဝွေꩻလွုမ်ꩻ၊ ဝင်ꩻတဲ့ ဖေႏကလူႏတန်ꩻနဝ်ꩻ နိုꩻဆောႏတမာပါတဝ်း၊ မဉ်ဝုဲင်ႏရဟန်ꩻသံဃာႏတဲ့ ဝွေꩻတဖြာꩻလွုမ်ꩻ၊ ဝင်ꩻတဲ့ ဖေႏနေးကမဉ်ဝုဲင်ႏ ရဟန်ꩻသံဃာႏနဝ်ꩻ နိုꩻဆောႏတမာပါတဝ်း၊ မဉ်နာႏသူႏတောႏကောင်ꩻတရာꩻတဲ့ ဝွေꩻတဖြာꩻလွုမ်ꩻ၊ ဝင်ꩻတဲ့ ဖေႏနေးကမဉ်နာႏ သူႏတောႏကောင်ꩻတရာꩻနဝ်ꩻ ခြုဲင်းနယ်ဒေါ့ꩻပါ တမာဖေႏတောဝ်း၊ နာႏတရာꩻထွူ တောင်ꩻခါꩻ၊ ဒါႏခါꩻဒျာႏဝွေꩻလွုမ်ꩻ၊ ဝင်ꩻတဲ့ ဖေႏနေးကတောင်ꩻခါꩻ၊ ဖေႏနးကဒါႏနဝ်ꩻ ဖေႏအာႏဒေါ့ꩻရိုꩻ တနိုꩻဆောႏတမာတဝ်း၊ နာႏတရာꩻထွူ တရာꩻမွေး/ တမွေးတဝ်းနဝ်ꩻ ယူႏစွေးဒါႏငါႏ၊ သေနာႏဝွေꩻလွုမ်ꩻ၊ ဝင်ꩻတဲ့ ဖေႏနေးကယူႏစွေးဒါႏ၊ ဖေႏနေးကသေနာႏနဝ်ꩻ ဒေါ့ꩻသွဉ်ဖေႏတဝ်း၊ အကျင်ꩻကလꩻအီ မဂ်ဖိုလ်ႏနဝ်ꩻ ကျင်ꩻဒျာႏဝွေꩻလွုမ်ꩻ၊ ဝင်ꩻတဲ့ ဖေႏကကျင်ꩻနဝ်ꩻ ဒေါ့ꩻသွဉ်ပါတဝ်း' ပေါႏမာꩻနုဲင်းနဝ်ꩻနဝ်ꩻ ဟဲ့ꩻဗာႏ ကျင်ꩻနမ်းတာႏ အကျိုꩻလွုမ်ꩻ၊ ဝင်ꩻတာႏအကျိုꩻနဝ်ꩻ ကျင်ꩻပါတဝ်းနောဝ်ꩻသွူ။ တကာႏဇီဝကဟွေး- "သဒ္ဓါႏ၊ သီႏလ၊ လူႏတန်ꩻ၊ ဝုဲင်ႏသံဃာႏ၊ နာႏတရာꩻ၊ တောင်ꩻခါꩻ၊ ယူႏစွေး၊ ကျင်ꩻလွဉ်ꩻ"ယိုသွစ်ꩻမျိုꩻနဝ်ꩻ နမ်းတဲ့ကျင်ꩻ၊ ဝင်ꩻတဲ့ မဉ်ႏထွဉ်ႏကျင်ꩻပါနဝ်ꩻ ထွာနမ်းတာႏ အကျင်ꩻယင်၊ ထွာဝင်ꩻတာႏ အကျင်ꩻယင်နဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ ဇီဝကသုတ်)[၁][၂]