ဆဲင်တောင်းပွို

"ဆဲင်တောင်းပွို သွမ်ꩻချိုဆွန်ꩻစူစွီႏ အွဉ်ဝင်ꩻရဲဉ်ႏထင်ႏညီႏခန်းကျောင်ꩻ" ခမ်းလွီးယွိုင်ႏ တအီႏချိုသွမ်ႏလွဉ်ခိန်ႏ လာထာꩻလျားလို့ ခမ်းနွို့လွဉ်သွူတဲင် ခွိုꩻသွုပ်တသာ အနာႏဂတ်တာႏ ပညာႏရေꩻ သွဉ်ထူႏခိန်ႏတွိုႏလွဉ်လဲဉ်းသွူ၊ "ပညာလို-အိုသည်မရှိ"ကရိုꩻနဝ်ꩻအတွိုင်ꩻ သွဉ်ထူႏပညာႏယို ဖဝတသက်လုမ်း အခိန်ႏတလို့ဒါႏတဝ်းထာꩻနဝ်ꩻသွူ။ ခေတ်စနစ်ပြောင်ꩻလုဲင်ႏမုအလꩻ မန်းခမ်းပညာႏရေꩻယို အစိုႏရအနေႏ အွဉ်ႏရေꩻမွေးစွဉ်ႏတဲင် ပညာႏရေꩻဌာႏနယိုလဲ့ ပြောင်ꩻလုဲင်ႏမုဖုံႏ အဝ်ႏမာꩻလွဉ်လဲဉ်းဒျာႏသွူ၊ အွိုးဒုံဆောင်ႏ၊ အွိုးဝေင်ꩻကို ခွယ်ꩻချာꩻတဝ်း တရျားတွောင်းတွာ သွဉ်ထူႏပညာႏအခွင်ꩻရေꩻယို အဗွေတဗာႏ အဝ်ႏဖန်ဆင်ꩻလွေꩻဖေႏလဲဉ်းနဝ်ꩻသွူ၊ နဲင်ႏငံႏတောႏအစိုႏရအနေႏလဲ့ ပညာႏရေꩻယို အွဉ်ႏလွိုလွိုမွေး ရွဉ်ဘဏ္ဍာႏဖုံႏနဝ်ꩻသွူ။ နေင်ႏ ၂၀၁၇-၂၀၁၈ ဗာႏနေင်ႏ အစိုႏရသွဉ်လိတ်ကျောင်ꩻယို အပ်လွေꩻလိုꩻပေႏကျောင်ꩻမွူးနီꩻ အွဉ်ႏထွော့လွေꩻ မေလာ ၂၅-ဗꩻလွေꩻ မေလာ ၃၀-နီꩻ ငတ်ꩻနီꩻတောႏတွင်ꩻ အပ်လွေꩻဗာႏလိုꩻပေႏကျောင်ꩻဖုံႏနဝ်ꩻသွူ၊ သွဉ်ပညာႏ ကျောင်ꩻသားဖုံႏဖေႏကအာ၊ ထန်ႏထိုꩻကျောင်ꩻ သွဉ်တဝ်းပညာႏသား ဖေႏကဆေ့ꩻသဲင်ꩻ၊ လိုꩻတွိုင်ꩻစွုမ်ႏဖြာꩻ သွဉ်ပညာႏသွဉ်လိတ်အခွင်ꩻအရေꩻယို ဖေႏကလꩻလို့နဝ်ꩻ ဒီမိုကရေစီအစိုႏရသီး အဝ်ႏဖန်ဆင်ꩻမာꩻလွေꩻဖေႏလဲဉ်းသွူ။ လဲင်ႏခါနဝ်ꩻ ရွဉ်အဝ်ႏတဝ်း ဖေႏနွောင်ꩻတဝ်းပိုပညာႏ၊ ပိုအာငါႏတွော့ꩻ ထောက်နွောင်ꩻတဝ်း ပိုပညာႏဖုံႏယိုနဝ်ꩻ သꩻကိုယူႏယပ်ꩻဗာႏတဝ်းဒွုမ်၊ မဉ်ႏထင်ႏဒါႏ မူလတန်ꩻသားဖုံႏယို ခွမ်ꩻလာꩻလဲ့ အစိုႏရအဝ်ႏထောက်ကမ်းလွေꩻပါဒျာႏနေဒွုန်းနဝ်ꩻသွူ၊ မွိုးဖါ ပိုခိုပိုမူႏ မဉ်သွဉ်ငါႏလိတ်၊ မဉ်သွဉ်ငါႏပညာႏ၊ မဉ်ထင်ႏငါႏကျောင်ꩻမွိုး-ဒေါ့ꩻရိုꩻဒါႏငါနုဲင်းယိုငါနဝ်ꩻ ထင်ႏကျောင်ꩻခွင်ꩻ အဝ်ႏ၊ သွဉ်ပညာႏခွင်ꩻ အဗွေတဗာႏ လꩻဗာႏလဲဉ်းဒျာႏသွူ။ ကျောင်ꩻအိုပ်၊ ကျောင်ꩻဆရာႏမူႏ/ခို ကားကအဝ်ႏတွမ်ႏ ကထေင်းထံႏဒါႏ တာႏဝွန်ႏအဝ်ႏသားဖုံႏနဝ်ꩻ ပညာႏရေꩻဝွန်ႏတန်ဌာႏန ကအွဉ်ႏချꩻလင်ꩻဖေႏဒါႏ စီꩻကန်ꩻချက်ဖုံႏနဝ်ꩻ ၂၀၁၇-၂၀၁၈ သွဉ်ပညာႏနေင်ႏကို အကျောင်ꩻခရာႏတမုဲင်ꩻတယဝ်း ကေပ်ꩻကောက်ရွဉ်လꩻတဝ်း၊ ရွဉ်တွမ်ႏ လက်ဆောင်ႏဖုံႏယို လက်ခံႏလꩻတဝ်း၊ ခွမ်ꩻလာꩻထင်ႏကျောင်ꩻတာႏ အတန်ꩻတံႏဆိတ်တွမ်ႏ ကျောင်ꩻတံဆိတ်ဖုံႏယို စာလွေꩻလꩻတဝ်း၊ ထင်ႏကျောင်ꩻဖေႏကမဲဉ်ႏ၊ သွဉ်လိတ်အခိန်ႏတွိုင်ꩻ ပွုံႏမဲဉ်ႏသွဉ်လွေꩻဖေႏဗာႏ၊ ထင်ႏမဲဉ်ႏမဲဉ်ႏဗာႏရုမ်ꩻ၊ ကျောင်ꩻသားမူႏခို ယံထင်ႏမဲဉ်ႏကျောင်ꩻအရေꩻတွမ်ႏ မာꩻလိတ်လမ်းတာႏ စွုမ်ႏနီꩻဖေႏကမာꩻထွာ မွိုးဖါတွမ်ႏကျောင်ꩻဆရာႏဖုံႏ ဆွန်ꩻစူမာꩻလွေꩻဖေႏဗာႏ၊ ကျောင်ꩻကြောင်းစင်ရေꩻထာꩻမာꩻဖုံႏတွမ်ႏ ကျောင်ꩻပြွူႏဖြိုရေꩻထာꩻမာꩻဖုံႏယို ခုမ်မာꩻလွေꩻငီꩻဝင်ꩻ ဖေႏကဒါႏ အဝ်ႏလိုႏနွန်ႏထွာႏလွေꩻ ကျောင်ꩻသားမူႏ/ခိုသီးဖုံႏနဝ်ꩻသွူ။ နဝ်ꩻသွူတကာႏတဝ်း မူလတန်ꩻကျောင်ꩻသားဖုံႏ ထန်ႏထိုꩻကျောင်ꩻ ဖေႏကဆေ့ꩻနဝ်ꩻတဲ့ မာꩻလွေꩻဗာႏ၊ အလယ်တန်ꩻတွမ်ႏအထက်တန်ꩻယို အရန်းရန်း ဖေႏကသွဉ်ထူႏနွောင်ꩻပညာႏနဝ်ꩻလဲ့ ဆွန်ꩻစူတွမ်ႏကျောင်ꩻသားမွိုးဖါသီးဖုံႏတွော့ꩻ မာꩻလွေꩻဗာႏသွူ။ နဝ်ꩻမꩻ သွဉ်ပညာႏအရွယ်ႏ လိုꩻပေႏဖုံႏယို ကထွာမွိုးဖါ လိုႏအွဉ်ႏဖေႏကျောင်ꩻ၊ လိုႏဖေႏသွဉ်ပညာႏ၊ လိုႏဖေႏအာႏ၊ ကထွာကျောင်ꩻဆရာႏမူႏဖုံႏလဲ့ နေးတွမ်ႏ နာႏသိုမ်နာႏ စေႏတနာႏ၊ ဝါႏသနာႏ၊ အနေစ်နာႏတဲင် လိုႏသွဉ်လွေꩻဖေႏ၊ ကျောင်ꩻသားမွိုးဖါသီးအနေႏ ဖေႏလွေꩻတံꩻစိုꩻလက်ဆောင်ႏဖုံႏယိုတဲ့ လိုႏမာꩻတဝ်း၊ ကထွာကျောင်ꩻဆရာႏခို/မူႏဖုံႏလဲ့ ပညာႏရေꩻဝွန်ႏတန်ဌာႏန ကချꩻလင်ꩻစီꩻကန်ꩻအတွိုင်ꩻ လိုႏလွောက်ꩻနာႏလွေꩻငါႏသွူ။ ကျောင်ꩻဆရာႏခို/မူႏဖုံႏ မဉ်ႏတလွောက်ꩻနာႏတဝ်းနဝ်ꩻ ကထွာကျောင်ꩻသားမွိုးဖါဖုံႏ ဒင်ႏကီထင်ႏနွောင်ꩻဒျာႏ တာႏဝွန်ႏအဝ်ႏ ပညာႏရေꩻဌာႏနရုမ်ꩻကိုဖုံႏလဲ့ အဝ်ႏယီးထွဉ်ႏ အွဉ်ႏနယ်ခါꩻအဝ်ႏနဝ်ꩻသွူ။