ဆွုံꩻမꩻယပ်ꩻငါႏ ခေးဒျာႏလို့ဝင်ꩻ
"ဩဝါဒသုတ် (ဆွုံꩻမꩻယပ်ꩻငါႏ ခေးဒျာႏလို့ဝင်ꩻ ဟော်ꩻတရာꩻ)"
နီဗွေႏဘုရာꩻအောဝ်ႏအုံ ရာႏဇဂျိုဟ်ႏခမ်း၊ ကျောင်ꩻဝေဠုဝွန်ႏကိုအတွင်ꩻ ဗွေႏမဟာကဿပ ကျွꩻလွဉ်ဗွေႏဘုရာꩻထျꩻ၊ ကန်းတော့ꩻရိုႏသေႏ ဝုဲင်ႏဗွေႏဘုရာꩻထွူခါ ဗွေႏဘုရာꩻရို- "ကဿပ- ဆွုံꩻမꩻရဟန်ꩻဖုံႏနဝ်ꩻလုဲင်း၊ ဟော်ꩻဖေႏရဟန်ꩻသီးဖုံႏ တရာꩻဟုဲင်း၊ ဘုရာꩻခွေယိုတဲ့နဝ်ꩻ၊ နာꩻတဲ့နောဝ်ꩻ လိုႏဆွုံꩻမꩻခွိုꩻခွိုꩻရဟန်ꩻဖုံႏ၊ လိုႏဟော်ꩻဖေႏကုဲင်းကုဲင်း ရဟန်ꩻသီးဖုံႏတရာꩻ" "ဩဗွေႏ ဘုရာꩻမျတ်ဗွေႏဩ- ရဟန်ꩻယိုခါဖုံႏနဝ်ꩻ ဆွုံꩻမꩻယပ်ꩻငါႏဗွေႏ၊ အကုသိုလ်ႏ အဝ်ႏဗွေသော့ꩻအသꩻ၊ ဆွုံꩻမတလꩻတဝ်း၊ ဗွေႏအာနန္ဒာႏတပဲ့ꩻ ရဟန်ꩻ'ဘဏ္ဍ'တမ်ႏ အနုရုဒ္ဓါႏတပဲ့ꩻ ရဟန်ꩻ'အဘိဇိက'သီးနဝ်ꩻ ခေးဒျာႏလို့ဝင်ꩻ ဟော်ꩻတရာꩻ။ 'ပါꩻယိုနဝ်ꩻ မဉ်ႏကျတဲ့လွဉ်ဟုဲင်း- ဟော်ꩻခေးလို့ဝင်ꩻ တရာꩻယို၊ ခွေဟော်ꩻအာအာနွောင်ꩻနဲ့၊ နာꩻဟော်ꩻအာအာနွောင်ꩻနဲ့၊ ခွေဟော်ꩻညညနွောင်ꩻနဲ့၊ နာꩻဟော်ꩻညညနွောင်ꩻနဲ့၊ ခွေဟော်ꩻတရာꩻယံနဲ့၊ နာꩻဟော်ꩻတရာꩻယံနဲ့' ဟဲ့ꩻဟော်ꩻခေးလို့ဝင်ꩻ တရာꩻနုဲင်းနဝ်ꩻ၊ နေးတွမ်ႏအဟွန်ုအထီႏ ဝွေꩻသီးဗဟုသုတပေႏတဲင် ထေင်လို့ဝင်ꩻ၊ အာငေါဝ်းလို့ဝင်ꩻ ဗွေႏဩ"၊ ဗွေႏဘုရာꩻရိုꩻ- "ယိုဗွေႏစင်ꩻနဝ်ꩻ လွဉ်ယိုမွိုင်- လွေꩻဟဲ့ꩻလွဉ် ဘဏ္ဍတွမ်ႏ အဘိဇိတသီးသူꩻ၊ 'ဘုရာꩻဟဲ့ꩻလွဉ်ယိုခါခါတဲ့'-ရိုꩻနုဲင်းနဝ်ꩻနော" ဗွေႏဘုရာꩻ ထွဉ်ႏလွေꩻဟဲ့ꩻ နုဲင်းနောဝ်ꩻသွူ။ ရဟန်ꩻနဝ်ꩻနီပါꩻ ဖျော်လွဉ်တဲင် ဗွေႏဘုရာꩻရီနုဲင်းယို- သီယိုနီပါꩻ ခေးလို့ဝင်ꩻဟော်ꩻတရာꩻ၊ ပါꩻမုဲင်ꩻဆွာꩻ ပါꩻမုဲင်ꩻည-ရိုꩻနုဲင်းနဝ်ꩻ မွေးနေဟောင်း" "မွေး-ဗွေႏဩ" 'ဟော်ꩻခေးလို့ဝင်ꩻ တရာꩻလုဲင်း၊ ပါꩻမုဲင်ꩻဆွာꩻ ပါꩻမုဲင်ꩻည'ဘုရာꩻထွဉ်ႏခေး ငေါဝ်းနုဲင်းနောဝ်ꩻ သီဟွုန်ဖိုဟောင်း၊ 'ပါꩻယိုတွမ်ႏပါꩻယို ဟော်ꩻခေးလို့ဝင်ꩻတရာꩻ၊ ပါꩻနဝ်ꩻဆွာꩻ ပါꩻနဝ်ꩻည'ကရိုꩻနောဝ်ꩻဟာ ဟွုန်ဖိုနေဟောင်း" "နီသွဉ်းသီး ဟွုန်ဖိုတောဝ်း ဗွေႏဩ" မောဃပုရိသာ- ရဟန်ꩻခွဉ်ႏဆေ့ꩻဖုံႏဟွေး- ခွေမဉ်ႏတဲ့ ထွဉ်ႏဖိုတဝ်း၊ ဝင်ꩻမဉ်ႏတဲ့ တခေးဖိုတဝ်းနဝ်ꩻ တွိုႏသီနီပါꩻ အွဉ်ႏကျသီနမ်း၊ သီငမ်းတဝ်းလို့ဝင်ꩻ၊ ထေင်ညင်ꩻခွန်းနေး၊ သီမခေးတွိုးလို့ဝင်ꩻ ဟော်ꩻတရာꩻဟောင်း" တွိုႏနဝ်ꩻခါ ရဟန်ꩻနဝ်ꩻနီပါꩻနဝ်ꩻ တွမ်ႏအကတောင် လွေꩻအွဉ်ႏတွစ် ဗွေႏဘုရာꩻခင်ႏထွူတဲင်- "ဩဗွေႏ ဘုရာꩻမျတ်ဗွေႏဩ- - ယထာ ဗာလေ - ကွပ်နီသွဉ်းသီး မွိုက်ငါႏတဲင် - ယထာ မူဠှေ - ပွိုးနီသွဉ်းသီး သူႏသေတဝ်းထာꩻတွော့ꩻ - ယထာ အကုသလေ - ကွပ်ပွိုးနီသွဉ်းသီး တလိန်ႏမာႏတဝ်းနဝ်ꩻမꩻ အပဲ့စ်ဗွို့ꩻလꩻလဲဉ်း နီသွဉ်းသီး၊ ကားယိုမာꩻငါနဝ်ꩻ နီသွဉ်းသီး ဟော်ꩻဖေႏတဝ်းဒွုမ်လို့ဝင်ꩻ၊ အွဉ်ႏစွꩻခွင်ꩻသွော့ နီသွဉ်းသီး ဗွေႏဩ" လောဝ်းတောင်ꩻပြန်ႏယင်း နုဲင်းနဝ်ꩻတဲင် နီဗွေႏဘုရာꩻရိုꩻ- ရဟန်ꩻသီးဟွေး- သီအမာႏသီစဲစ်၊ သီအပဲ့စ်သီမော့ꩻ သီကန်းတော့ꩻ နုဲင်းယိုနဝ်ꩻ မွေးငါႏ၊ ဆရာႏဗွေႏဘုရာꩻရင်ꩻ အွဉ်ႏစွꩻခွင်ꩻဖေႏ နုဲင်းနောဝ်ꩻသွူ။ (သုတ္တန်ႏပိဋကတ်၊ နိဒါနဝဂ္ဂသံယုတ်ပါဠိ၊ ဩဝါဒသုတ်)[၁][၂]