တနေညီႏညွတ်ဝင်ꩻ

တနေနဝ်ꩻရာꩻ ဒေါ့ꩻအရျာꩻ၊ ဒေါ့ꩻအရေင် ဒေါ့ꩻအမွုန်ႏ၊ ဒေါ့ꩻအသဲဉ်ဆွူ၊ တဖူႏဖူႏနောဝ်ꩻ ကအီႏတကေးကေးတာလွဝင်ꩻလဲ့ တအဲဉ်ထောဝ်း၊ ကနိစ္စက်လွဝင်ꩻ အချင်ꩻင်ꩻလဲ့ တအဲဉ်ထောဝ်း၊ တာႏဝွန်ႏပငါပရာꩻ ထာꩻမာꩻစွဉ်ႏငခြေင်င်၊ ယဟန်ႏသား ပွေါးအဖူꩻ၊ ငမ်းသꩻရန်ႏသူႏဖျောဝ်၊ ယဟန်ႏသားနဝ်ꩻ ထိုမ်ႏအာဟာႏရ အွꩻအံႏတာႏ၊ ယဟန်ႏသားနဝ်ꩻ ထိုမ်ႏအပေႏဆာႏ၊ ခွေပိုနာꩻပေႏ မရွေꩻချေႏ ဗွူႏလို့ထံ၊ ယံကတန် ယံကလဲင်း၊ ယူႏစဲင်းင်း တနေမျိုꩻ၊ နီလိုꩻတန်ယိုခါ၊ ကထွာသဲင်ꩻ မနုဿာႏ၊ မိဉ်ꩻအွီႏငါႏ အမျိုꩻမျတ်၊ ကမ္ဘာႏကပ် ထူႏနေးရေꩻ၊ အုံစီꩻဝွေꩻ အောဝ်ႏစီႏရင်ႏ၊ ကမ္ဘာႏဟံႏ မနုဿ၊ အုံကယ်ႏမ အောဝ်ႏသညင်ꩻ၊ အချင်ꩻင်ꩻ ပအိုဝ်ႏပို၊ ခွေသီယို အွဉ်ႏသပုဲႏ၊ ကောစှဲဟ နိစ္စက်ဝင်ꩻ၊ တင်ꩻလှဲဆာ နီလဲ့ငွိုး၊ တမွိုးချင်ꩻ ဖါယိုꩻယာႏ၊ ဘာႏသာႏချင်ꩻ ပအိုဝ်ႏစွိုး၊ ဖါတွမ်ႏမွိုး ပအူခွိုꩻ၊ တစွိုꩻချင်ꩻ ထွူနောဟာ၊ တကာချင်ꩻ လွေꩻညီꩻဝင်ꩻ၊ တဆင်ႏချင်ꩻ ရက်လွဗဲင်း၊ မေတ္တာႏထဲင်း အွမ်ခံꩻထီ၊ မေတ္တာႏထီ သီႏတာႏခွꩻ၊ အုံညီꩻသွꩻ အုံညီꩻဖေါဝ်ႏ၊ မောက်ꩻစံကောဝ်ႏ မူလေꩻဟွမ်၊ ခိုႏတွမ်ႏဒွမ် နောဝ်တွမ်ႏထင်ꩻ၊ မေတ္တာႏခံꩻ အွဉ်ႏထေ့ဗဲင်း၊ ယူႏစွေးစဲင်း ကိဉ်ꩻစာꩻသွော့၊ အွဉ်ႏဖေင်ꩻမွော့ အုံကြွို့ꩻမွုန်း၊ ကျိုꩻစာꩻယွုန်း သꩻဗာလာႏ၊ ဇော်ꩻမိစ္ဆာႏ ဒိဋ္ဌိယုတ်၊ ယံပယ်ႏထုတ် အွဉ်ႏကုဲညာꩻ၊ စိဉ်ꩻစာꩻသွော့ ထာꩻသားတွဉ်၊ ဝင်ꩻမအွဉ် သꩻနိစ္စက်၊ အချင်ꩻရက် ဖူႏစွိုꩻအာ၊ သꩻခံꩻထာ မေတ္တာႏရောက်၊ နောဝ်ထင်ꩻသျောက် တွို့ꩻကွဉ်ႏလယ်ႏ၊ ထိုမ်ႏကယ်ႏဆယ်ႏ သွꩻပေါင်ꩻဖက်၊ ခိစ်ရက်ဝင်ꩻ တဖူႏလွုမ်း၊ မွေးတောဝ်းဒွိုန်း နီလိုꩻမျိုꩻ၊ ထာꩻသားရိုꩻ တိရစ္ဆာန်ႏ၊ ဒီကွိုင်ႏတန်ႏ တုခိုးနှဲး၊ တွမ်ႏအွဉ်ႏဖှဲး ညာꩻမွုန်းဝင်ꩻ၊ သꩻထာခံꩻ ဒီနေးထူႏ၊ ငိမ်ꩻရောင်းရျူႏ ဒီနေးဗဲင်း၊ ယူႏစွေးစဲင်း ထာꩻသားအာ၊ ဆရာႏထွာ စရိယော၊ ထွားနှဲးနော တင်ꩻလှဲဖုံႏ၊ အုံညီꩻပြုံႏ တထွောင်းစု၊ နုမောပျု သွꩻရက်ဝင်ꩻ၊ နီလိုꩻချင်ꩻ ပအိုဝ်ႏယာႏ၊ မျာꩻတကာႏ တင်ꩻလှဲအာ၊ သꩻရူꩻခါ ပယ်ႏထန်ႏဗဲင်း၊ ဇော်ꩻလော်ထဲင်း တွမ်ႏအောဝ်ႏပုဲႏ၊ ကောစဲလုံ လိုꩻခိုထီး၊ သꩻတသီး ခံꩻရောင်ႏပေါ်၊ ဇော်ꩻတသီး ခံႏရောင်ႏပေါက်၊ သꩻဖြေင်းဖေါက် အောဝ်ႏမွော့ဝင်ꩻ၊ မေတ္တာႏခံꩻ ဒင်ႏသွꩻလောင်း၊ မေတ္တာႏရောင်း ဒင်ႏသွꩻဒွို၊ နင်းဟွူခွꩻ နင်းဟွူငိမ်ꩻ၊ ထူႏသိမ်ꩻသွော့ ဇော်ꩻသမ္မာႏ၊ ပအိုဝ်ႏယာႏ ယံထင်ႏထို၊ ပအိုဝ်ႏပို ယံတသွောင်း၊ ထိုမ်ႏသွဉ်ဗဲင်း ပိညာႏထူႏ၊ ထိုမ်ႏကူဗဲင်း ဉာဏမျတ်၊ ယံလျောက်ပတ် ယံတင်ႏတယ်ႏ၊ ယံတီႏမယ်ꩻ ထီတွမ်ႏခမ်း၊ တင်ꩻလှဲယမ်း တွမ်ႏဗွိုႏမွော့၊ အွဉ်ႏသꩻဆွော့ꩻ ထိုမ်ႏသွဉ်ဉာဏ်ႏ၊ သိစ္စာႏမဲဉ်ႏ စောင်ꩻတရာꩻ၊ အမျာꩻအာ ပအိုဝ်ႏဖုံႏ၊ ခိုႏတပြုံႏ ဒွမ်စွိုꩻဟွေး။