တောမ်ႏခမ်းသား
"တောမ်ႏခမ်းသား ထောက်ခံႏအာႏတွော့ꩻ ဩဇာႏထင်ႏလဲန်းတဲင် ခမ်းသားကမော့ꩻယပ်ꩻခုဲင်ႏ ပျဿနာႏဖုံႏယို အဝ်ႏလိုႏထွားကိုချာငါႏ" အကျာꩻယိုတောႏတွင်ꩻ ပအိုဝ်ႏဒေႏသကို ပွိုင်းဝွို့တောမ်ႏသီႏသဲင်ႏ ဟံႏယာႏကိစ္စတဲင် တဲက်ဆဲင်ႏတောမ်ႏထံꩻသာꩻ သွို့ꩻခြံသားပဲင်ႏဆဲင်ႏခွင်ꩻ၊ ယိုယိုခါ ဟို့ꩻပေႏအံႏအွꩻရေꩻအတာႏ နားဟွိုန်ꩻစီꩻပွါꩻရေꩻအတာႏ လိုပ်ꩻမာꩻခွင်ꩻဖေႏကအဝ်ႏ၊ ဖေႏကလꩻချာ ကဆို့ꩻရုဲင်ခုမ်မာꩻလွေꩻတဲ့နဝ်ꩻ၊ ဆဲင်ႏရာꩻကဏ္ဍအဒဝ်ႏဒဝ်ႏ တာႏဝွန်ႏကအဝ်ႏဒါႏသားဖုံႏ လင်ꩻမော့ꩻခွဲး ဖြေႏသျင်ꩻဖေႏသားတဲ့အဝ်ႏ၊ တခံႏမော့ꩻခွဲးဖြေႏသျင်ꩻတဝ်းသားတဲ့အဝ်ႏ စစွဉ်ႏအခေႏနေႏဖုံႏယို တောမ်ႏထာꩻထီႏ တဖြာꩻတစွိုးတဖြာꩻတမျိုꩻတွော့ꩻ တဲမ်းဝွေႏဖန်ႏလိုꩻမုမီဒီယာအလောင်းနဝ်ꩻ အဝ်ႏထီႏဗာႏ ပနဲးအာငါႏနဝ်ꩻသွူ။ ခေတ်ဟန်ႏသနီꩻယိုနဝ်ꩻ တဗွိုန်တဝ်းဒုမ် နုဲင်းခေတ်ကရီးခါ နီလိုꩻသီးအသောင်အရင်ꩻကို ကအဝ်ႏထွာဒါႏ အဟဝ်အကုဲင်ဖုံႏယိုတဲ့နဝ်ꩻ၊ နီကမာꩻဒါႏ ထာꩻတစွို့ꩻစွဉ်ႏတဝ်းဖုံႏတဲ့နဝ်ꩻ၊ နီကအံႏနွောင်ꩻ မာꩻနွိုင်ႏဒါႏဝင်ꩻဖုံႏတဲ့နဝ်ꩻ၊ ဖြေႏသျင်ꩻထာꩻတရာꩻတဝ်းဖုံႏတဲ့နဝ်ꩻ၊ နီထာꩻမာꩻဖုံႏယို ထူႏတာႏဝွန်ႏ ခံႏတာႏဝွန်ႏ အဲန်ထဝ်းဖုံႏတဲ့နဝ်ꩻ စစွဉ်ႏဖုံႏယို မိဉ်ဖေႏသေတဝ်းဝင်ꩻ၊ မိဉ်အွောန်ႏပေ့ꩻ၊ မိဉ်မာꩻတေ့ꩻတေ့ꩻ၊ မိဉ်အွောန်ႏဗိဉ်တဲ့ တလꩻတဝ်းဒမ်နဝ်ꩻသွူ။ အရီးသွတ်ꩻ ကမိဉ်ဒေါ့ꩻနဝ်ꩻ ဟန်ႏသနီꩻယို ထွာမီဒီယာအာႏတလာခေတ် ရိုꩻဗာႏနေးနဝ်ꩻသွူ၊ လိုꩻသီးအသောင်အရင်ꩻကို စွုမ်ႏနီꩻစွုမ်ႏဟာ ကအဝ်ႏထွာဒါႏ အထွာဟဝ် အထွာအကုဲင်အဖုံႏယို တနီꩻချင်ꩻ၊ တခိန်ႏချင်ꩻအတွင်ꩻကို လီစွစ်ꩻစဲစ်ꩻနွောင်ꩻ၊ သေထွꩻနွောင်ꩻအီစွဉ်ႏ မီဒီယာအလောင်းနဝ်ꩻသွူ၊ မီဒီယာကရိုꩻနဝ်ꩻတဲ့ ခေတ်ဟန်ႏသနီꩻယိုနဝ်ꩻ နယ်ꩻပညာႏထင်ႏထိုခေတ်တဲင် လိုꩻမုမီဒီယာ(တစွိုးဟဲ့ꩻ)အွန်လိုင်းမီဒီယာယို အာႏတလာဟဝ်ကယ်ꩻလဲန်းဝင်ꩻနဝ်ꩻသွူ၊ လိုꩻမုမီဒီယာသားဖုံႏအကို နီသေငါꩻထွꩻ မီဒီယာတဲ့ အဝ်ႏအတွိုင်ꩻ နီတသေငါꩻထွꩻတဝ်း မီဒီယာဖုံႏတဲ့ အဝ်ႏပါဒါႏနဝ်ꩻသွူ၊ ခံႏတာႏဝွန်ႏ ထူႏတာႏဝွန်ႏမု အဝ်ႏမီဒီယာဖုံႏအဝ်ႏအတွိုင်ꩻ ခံႏတာႏဝွန်ႏ ထူႏတာႏဝွန်ႏမု တအဲန်ထဝ်း မီဒီယာဖုံႏတဲ့ အဝ်ႏနဝ်ꩻသွူ။ အထျꩻအွောန်ႏခမ်းသားအကျိုꩻတွော့ꩻ ဖေႏလွေꩻထာꩻသေပညာႏတောမ်ႏ သတင်ꩻအချက်အလျက် မီဒီယာဖုံႏအဝ်ႏအတွိုင်ꩻ ထွားကမ္ပဏီအကျိုꩻတဲင် အွောန်ႏအထျꩻကျောႏညာႏလွေꩻဒျာႏ ကွန်ႏစီꩻပွါꩻရေꩻမီဒီယာဖုံႏ၊ ထွားအစွိုꩻအဗူႏအကျိုꩻတဲင် အွောန်ႏအထျꩻဖြေ့ꩻလွေꩻဒျာႏ အစွိုꩻအဗူႏမူဝါဒတောမ်ႏထာꩻမာꩻစဲန်ႏ အစွိုꩻအဗူႏမီဒီယာဖုံႏစတဲင် အဝ်ႏအမျိုꩻမျိုꩻနဝ်ꩻသွူ။ နဝ်ꩻတဲင် ပအိုဝ်ႏဒေႏသကို မိဉ်ႏထွာလွောန်သွူ တစွိုးစွိုး၊ နုဲင်းဒါႏ နဲင်ႏငံႏရေꩻ ရုဲင်ꩻတသွိုးမုဖုံႏ၊ လွောန်ꩻကာႏယားကုဲင် လိုꩻအခွင်ꩻအရေꩻဖုံႏ၊ ထူႏသိမ်ꩻဟံႏယာႏပျဿနာႏဖုံႏ၊ မာꩻဘောလုံးပွယ်ꩻတဲင် ကေပ်ꩻကောက်ꩻရွောန်ကိစ္စဖုံႏ၊ ထောက်ခံႏနဲင်ႏငံႏရေꩻ-ကန်ႏကွက်နဲင်ႏငံႏရေꩻ အွောန်ႏနယ်ဆန္ဒပွယ်ꩻဖုံႏ-စစွောန်ႏ ရုဲင်ꩻတသွိုးမုဖုံႏ မိဉ်ႏထွာလွောန်၊ မိဉ်ႏအဝ်ႏလွောန်သွူနဝ်ꩻ ပွိုးတမုဲင်ꩻ အထွာဗာႏနုဲင်းယို၊ ကောပ်တမုဲင်ꩻ အမာꩻဗာႏနုဲင်းယို၊ ဖေႏကထွာမွုန်းနုဲင်းယိုနဝ်ꩻ တဲက်ဆဲင်တောမ်ႏပျဿနာႏယို ပအိုဝ်ႏတစွိုးခွိုꩻလုမ်း အဝ်ႏလိုႏမာꩻသင်ꩻတမုဲင်ꩻ၊ တဲက်ဆဲင်ႏတောမ်ႏပျဿနာႏနုဲင်းမုဲင်ꩻနတ်ꩻ ပအိုဝ်ႏတစွိုးခွိုꩻလုမ်း အဝ်ႏလိုႏမာꩻသင်ꩻတဝ်းတမုဲင်ꩻကရိုꩻဒါႏ အီႏအုံကိုမ် အီႏသုင်ꩻသပ်သေႏသေႏချာႏချာႏနဝ်ꩻ တအဝ်ႏတဝ်း၊ တမာꩻတဝ်းတွော့ꩻ တောမ်ႏစူနဝ်ꩻ ထိုမ်ႏယီးငီႏငီႏငါငါဒျာႏ ပါꩻတဖြာꩻထွူတဖြာꩻ၊ တောမ်ႏခွေါန်းဝါႏယွားနဝ်ꩻ ထိုမ်ႏပို့ꩻလွင်ꩻလွင်ꩻလိန်ꩻလိန်ꩻဒျာႏ ပါꩻတစွိုꩻထွူတစွိုꩻနဝ်ꩻ အဝ်ႏထီႏဗာႏအာငါႏနဝ်ꩻသွူ။ ပအိုဝ်ႏဒေႏသကို ကထွာဒါႏပျဿနာႏ၊ ပအိုဝ်ႏထံꩻသာꩻသီး ကကျုံႏတလူႏဗာႏဒါႏ အယပ်ꩻအခုဲင်ႏဖုံႏယို ကခံႏထူႏဒါႏ ပအိုဝ်ႏလိုꩻမျိုꩻအွောန်ငါသား၊ ကခံႏထူႏဒါႏ စွိုးခွိုꩻအွောန်ငါသား၊ ကခံႏထူႏဒါႏ ခုမ်မာꩻဖေႏပအိုဝ်ႏခမ်းသား နဲင်ႏငံႏရေꩻသားသီးဖုံႏ မိဉ်ႏတထွားဖြေႏသျင်ꩻဖေႏတဝ်းနဝ်ꩻ ပါꩻမုဲင်ꩻအီႏထွားဖြေႏသျင်ꩻဖေႏဟောင်း၊ မိဉ်ႏအဝ်ႏလိုႏနဲင်ႏငံႏရေꩻအာႏခိန်ႏ၊ မိဉ်ႏအဝ်ႏလိုႏထောက်ထံႏမဲးထွူ တောမ်ႏခမ်းသားထောက်ခံႏအာႏတွော့ꩻ နီဩဇာႏထင်ႏလဲန်းတဲင် ခမ်းသားသီးမိဉ်းမော့ꩻ အယပ်ꩻအခုဲင်ႏခိန်ႏနဝ်ꩻ အဝ်ႏလိုႏထွားကူချာဖေႏငါႏနဝ်ꩻသွူ။ ယူႏသွူ အကျိုꩻတောမ်ႏအကျောင်ꩻတွော့ꩻ ထွားချာအရွေꩻတောမ်ႏအခြောင်ꩻတဲင် ပါꩻမုဲင်ꩻနဝ်ꩻ တာႏဝွန်ႏအဝ်ႏ၊ ပါꩻမုဲင်ꩻနဝ်ꩻ အဝ်ႏလိုႏထူႏတာႏဝွန်ႏဖေႏ၊ ပါꩻမုဲင်ꩻဖုံႏနဝ်ꩻ အဝ်ႏလိုႏသေတာႏဝွန်ႏနဝ်ꩻ ကခံႏထူႏဒါႏ ပအိုဝ်ႏတစွိုးခွိုꩻလုမ်းအွောန်ငါသား အဝ်ႏလိုႏသေသင်ꩻငါႏသွူ၊ ယိုပေႏနဝ်ꩻ မိဉ်ႏတသေတဝ်းနဝ်ꩻ ခံႏထူႏစွောန်ႏပအိုဝ်ႏတစွိုးခွိုꩻလုမ်းအွောန်ငါနဝ်ꩻ အဓိပ္ပါယ်ႏထူꩻဒုမ်တမုဲင်ꩻ။ နဝ်ꩻမꩻ ပအိုဝ်ႏလိုꩻမျိုꩻကို အစွိုꩻမုဲင်ꩻတယဝ်း ပေါႏမိဉ်ႏခံႏထူႏသွူ ခုမ်မာꩻပအိုဝ်ႏလိုꩻမျိုꩻအရေꩻ၊ ပအိုဝ်ႏနဲင်ႏငံႏရေꩻနဝ်ꩻ ပအိုဝ်ႏဒေႏသကို ထွာလွောန်ခန်း ပျဿနာႏမုဲင်ꩻတယဝ်း "ယိုနဝ်ꩻ ဆဲင်ႏဒျာႏဝွေꩻ၊ ယိုနဝ်ꩻ ဆဲင်ႏဒျာႏခွေ"အဝ်ႏလိုႏထူႏတာႏဝွန်ႏ ဖြေႏသျင်ꩻငီꩻငီꩻငါႏဝင်ꩻနဝ်ꩻသွူ၊ ခွေအစွိုꩻတဲ့ မိဉ်ဖြေႏသျင်ꩻတဝ်းသွူတကာႏတဝ်း သမ်းဒေါ့ꩻခတ်ꩻပါက ဝွေꩻအစွိုꩻ၊ ဝွေꩻအစွိုꩻတဲ့ ဖြေႏသျင်ꩻတဲ့ တလꩻတဝ်းလဲ့ သမ်းအဝ်ႏဒေါ့ꩻသောမ်ꩻသဲ့ꩻပါက ဝွေꩻအစွိုꩻဖုံႏနဝ်ꩻသွူ၊ အီႏဟဲ့ꩻဖြွမ်းဗူႏဒျာႏလွဝင်ꩻတွော့ꩻ ယိုနဝ်ꩻ နီလိုꩻမျိုꩻပျဿနာႏ၊ ယိုနဝ်ꩻ နီစွိုးခွိုꩻအယပ်ꩻအခုဲင်ႏ နီဖြေႏသျင်ꩻရောင်၊ နီထိုမ်ႏရောင်အနယ်ꩻ အီႏတွိုင်ႏပင်ႏဝင်ꩻနဝ်ꩻ တအဝ်ႏတဝ်း၊ တထီႏဗာႏတဝ်းသွူ၊ အဝ်ႏလိုႏတွိုင်ႏပင်ႏဝင်ꩻ ထိုမ်ႏငါႏအနယ်ꩻသွူ။ တွိုႏနဲင်ႏငံႏရေꩻ ဂုဏ်ႏသိက္ခာႏနဝ်ꩻ အစွိုꩻမုဲင်ꩻငါတဲ့ တမဲန်ခံႏထဲ့တဝ်း၊ တွိုႏအဝ်ႏလိုႏဖြေႏသျင်ꩻပျဿနာႏနဝ်ꩻ ခွေစွိုꩻတဲ့ ယွူးနာꩻ၊ နာꩻအစွိုꩻတဲ့ ယွူးခွေ၊ ကွဲးညည တမာꩻတဝ်းနဲင်ႏငံႏရေꩻသား ကထွာနုဲင်းခမ်းသားငေါဝ်း သတင်ꩻဌာႏနဒျာႏတဲ့ အီႏနုဲင်းတေားစွောန်ႏဒျာႏ နဲင်ႏငံႏရေꩻအစွိုꩻအဗူႏ တဗာႏလွိုႏလွိုႏနဝ်ꩻသွူ။ နဝ်ꩻမꩻ တဲက်ဆဲင်ႏတွမ်ႏ အစွိုꩻအဗူႏအဒဝ်ႏဒဝ်ႏသီး ပါတီနဲင်ႏငံႏရေꩻအစွိုꩻသီးတဲ့နဝ်ꩻ၊ နဲင်ႏငံႏရေꩻအစွိုꩻအဗူႏသီးတဲ့နဝ်ꩻ တောမ်ႏပအိုဝ်ႏထံꩻသာꩻသီး ကားလို့အခါႏ မိဉ်ဖေႏသေဖြောင်နယ်မွေးငါႏနဝ်ꩻ ခမ်းသားငေါဝ်းသတင်ꩻဌာႏနယို အဓိကခုမ်မာꩻလွေꩻဒျာႏ ဖေႏထာꩻသေပညာႏ တောမ်ႏဖေႏသတင်ꩻ အချက်အလျက်နဝ်ꩻသွူ။ ခမ်းသားငေါဝ်းသတင်ꩻဌာႏနယိုနဝ်ꩻ နဲင်ႏငံႏရေꩻပါတီအစွိုꩻအဗူႏတဲ့ တမွေးတဝ်း၊ တောမ်ႏနဲင်ႏငံႏရေꩻပါတီအစွိုꩻမုဲင်ꩻမုဲင်ꩻတဲ့ ပွိုင်းဝွို့တဲက်ဆဲင်ႏမုတအဝ်ႏတဝ်း၊ မြန်မာခမ်းထီအစိုႏရစွိုꩻတဲ့နဝ်ꩻ၊ ခမ်းထီမုဲင်ꩻမုဲင်ꩻအစိုႏရအစွိုꩻတဲ့နဝ်ꩻ တပွိုင်းဝွို့တဝ်း၊ တအုံနောင်တဝ်း၊ လွစ်လွစ်တခြင်ခြင်ဒျာႏ ပအိုဝ်ႏလိုꩻမျိုꩻကို ခမ်းသားငေါဝ်း သတင်ꩻဌာႏနတဗာႏနဝ်ꩻသွူ။ ခမ်းသားငေါဝ်းသတင်ꩻဌာႏန ကမာꩻထာꩻမာꩻယို ဖေႏထွာအစိုႏရ၊ ဖေႏကလꩻအာႏဏာႏ၊ အီႏထူႏစွောန်ႏခင်ႏလမ်း၊ ဖေႏကထွာစွောန်ႏလွတ်တောႏအမတ်၊ ဖေႏကထွာစွောန်ႏဝွန်ႏတန်နုဲင်းနဝ်ꩻ တအဲန်ထဝ်းအတွိုင်ꩻ အစွိုꩻမုဲင်ꩻမုဲင်ꩻအလောင်းလဲ့ အွောန်ႏရန်ႏနီးအာဃာတဖုံႏ၊ ထာꩻစင်ꩻထာꩻလွꩻထီႏဖုံႏ တအဝ်ႏတဝ်းသွူ၊ အဝ်ႏသွုပ်သံႏခုမ်မာꩻလွေꩻလို့လို့ဒျာႏအကျောင်ꩻ တဲမ်းဖြုဲင်ꩻဖေႏသေလွေꩻနယ်ဗာႏသွူ။[၁][၂]