ထာꩻကုဲင်းအကျောင်ꩻသွစ်ꩻမျိုꩻ

"ကုသီတာရမ္ဘဝတ္ထုသုတ် (ထာꩻကုဲင်းအကျောင်ꩻသွစ်ꩻမျိုꩻ)" ရဟန်ꩻသီးဖုံႏဟွေး- 'သꩻကုဲင်း-မာꩻထွာ'အကျောင်ꩻနဝ်ꩻ အဝ်ႏသွစ်ꩻမျိုꩻ၊ သွစ်ꩻမျိုꩻကရိုꩻနဝ်ꩻ- ၁။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ အီႏမာꩻဗာႏထာꩻမာꩻ၊ ရဟန်ꩻနဝ်ꩻနဝ်ꩻ ယူႏနုဲင်းယို- "ခွေအီႏမာꩻဗာႏသွူထာꩻမာꩻ၊ ခွေမာꩻထာꩻမာꩻတွင်ꩻနဝ်ꩻ နမ်းယပ်ꩻပင်ႏပန်ꩻတဲင် ယူႏနီဗွေႏဘုရာꩻ အဆွုံꩻအမꩻ တလꩻလို့တဝ်း၊ စောဝ်းစောဝ်းခါယို (ခါးလားကကမာꩻထာꩻမာꩻယို) အားထွုတ်ရီးက တရာꩻမꩻ"အသꩻထွာနုဲင်းနဝ်ꩻတွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ ပထမသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၂။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ ထာꩻမာꩻထွူလဲဉ်း၊ ရဟန်ꩻနဝ်ꩻနဝ်ꩻ ယူႏနုဲင်းယို "ခွေမာꩻထာꩻမာꩻတွင်ꩻနဝ်ꩻ ခွေနမ်းယပ်ꩻပင်ႏပန်ꩻတဲင် ဗွေႏဘုရာꩻအဆွုံꩻအမꩻတဲ့ တယူႏလꩻလို့တဝ်း၊ တရာꩻတဲ့ တအားထွုတ်ဗာႏတဝ်း၊ (အခိန်ႏလို့ခြေင်ထိုꩻဒျာႏ တွမ်ႏထာꩻမာꩻ)၊ ယိုခါနဝ်ꩻ ထာꩻမာꩻထွူလဲဉ်း၊ အခိန်ႏအဝ်ႏခြေင်လဲဉ်း အားထွုတ်ကတရာꩻမꩻ"အသꩻထွာနုဲင်းနဝ်ꩻတွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻမာꩻမွေး၊ တလꩻဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ ဒုတိယသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၃။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ အီႏလွေꩻဗာႏထာꩻ၊ ရဟန်ꩻနဝ်ꩻနဝ်ꩻ ယူႏနုဲင်းယို- "ခွေအီႏလွေꩻဗာႏသွူထာꩻ၊ ခွေမဉ်ႏလွေꩻထာꩻနဝ်ꩻ နမ်းယပ်ꩻပင်ႏပန်ꩻတဲင် ယူႏနီဗွေႏဘုရာꩻ အဆွုံꩻအမꩻ တလꩻလို့တဝ်း၊ စောဝ်းစောဝ်းယိုခါ (ခါးလားကလွေꩻတဖူꩻယို) အားထွုတ်ရီးက တရာꩻမꩻ"အသꩻထွာနုဲင်းနဝ်ꩻတွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ တတိယသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၄။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ လွေꩻတဖူꩻထွူလဲဉ်း၊ ရဟန်ꩻနဝ်ꩻနဝ်ꩻ ယူႏနုဲင်းယို- "ခွေလွေꩻတဖူꩻတွင်ꩻနဝ်ꩻ ခွေနမ်းယပ်ꩻပင်ႏပန်ꩻတဲင် ဗွေႏဘုရာꩻအဆွုံꩻအမꩻတဲ့ တယူႏလꩻလို့တဝ်း၊ တရာꩻတဲ့ တအားထွုတ်ဗာႏတဝ်း၊ (အခိန်ႏလို့ခြေင်ထိုꩻဒျာႏ တွမ်ႏထာꩻလွေꩻ) ယိုခါနဝ်ꩻ လွေꩻတဖူꩻထွူလဲဉ်း၊ အခိင်ႏအဝ်ႏခြေင်လဲဉ်း၊ အားထွုတ်ကတရာꩻမꩻ"အသꩻထွာနုဲင်းနဝ်ꩻတွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ စတုတ္ထသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၅။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ လွေꩻတွုံꩻသွမ်ꩻ ဒုံပေႏကိုတရိုꩻတဝ်း၊ ဒုံတန်ကိုတရိုꩻတဝ်း၊ ဒဲဉ်သွမ်ꩻဆွော့ꩻဆွော့ꩻတဲ့ယဝ်း၊ ဒဲဉ်သွမ်ꩻပနဲဉ်ႏနဲဉ်ႏတဲ့ယဝ်း လꩻလုမ်းတဝ်း (သွုံꩻကွို့ꩻတဝ်း) ရဟန်ꩻနဝ်ꩻနဝ်ꩻ ယူႏနုဲင်းယို-"လွေꩻတွုံꩻသွမ်ꩻတဲ့ လꩻလုမ်းတဝ်း၊ (သွုံꩻကွို့ꩻတဝ်း)၊ နဝ်ꩻမꩻ နမ်းဖွီ၊ (ဟို့ꩻခိုးအဝ်ႏယေန်လꩻဒျာႏ) မာꩻထာꩻမာꩻအဝ်ႏဒါႏဒျာႏ၊ အားထွုတ်ကတရာꩻမꩻ"အသꩻထွာနုဲင်းနဝ်ꩻတွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ ပဉ္စမသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၆။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ လွေꩻတွုံꩻသွမ်ꩻ ဒုံပေႏကိုတရိုꩻတဝ်း၊ ဒုံတန်ကိုတရိုꩻတဝ်း၊ ဒဲဉ်သွမ်ꩻဆွော့ꩻဆွော့ꩻတဲ့ယဝ်း၊ ဒဲဉ်သွမ်ꩻပနဲဉ်ႏနဲဉ်ႏတဲ့ယဝ်း လꩻလိုမ်းဒျာႏ (သွုံꩻကွို့ꩻကွို့ꩻဗာႏဒျာႏ) ရဟန်ꩻနဝ်ꩻနဝ်ꩻ ယူႏနုဲင်းယို- "လွေꩻတွုံꩻသွမ်ꩻတဲ့ လꩻလိုမ်းဒျာႏ၊ (သွုံꩻကွို့ꩻကွို့ꩻဗာႏဒျာႏ)၊ ကွပ်သွုံꩻဗာႏကွို့ꩻကွို့ꩻတဲင် သွုံꩻသွမ်ꩻထွူယိုနဝ်ꩻ အာႏတလာဗွေဗိတ်စွဉ်ႏ၊ မဉ်ႏမာꩻထာꩻမာꩻနဝ်ꩻ ထွာငေါဝ်းယိုꩻတန်သနယ်၊ ပွိုးနဝ်ꩻမꩻ အားထွုတ်ကတရာꩻမꩻ" အသꩻထွာနုဲင်းနဝ်ꩻတဲင်တွော့ꩻ၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ ဆဋ္ဌမသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၇။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ ဆော့ဆာပသာႏထာꩻ (တတောဝ်တဝ်း)၊ ရဟန်ꩻနဝ်ꩻနဝ်ꩻ ယူႏနုဲင်းယို- "ခွေဆော့ပသာႏထာꩻ၊ ယိုခါနဝ်ꩻ တတောဝ်တဝ်း၊ မဲ့ꩻဆာတဝ်ဒါႏ၊ ခါးလားကတောဝ်ယို အားထွုတ်ရီးရီးခန်း တရာꩻမꩻ"အသꩻထွာနုဲင်းနဝ်ꩻတဲင်၊ တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ သတ္တမသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ ရဟန်ꩻသီးဖုံႏဟွေး- ၈။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ ဆော့ထာꩻဟောဝ်လဲဉ်း၊ ရဟန်ꩻနဝ်ꩻနဝ်ꩻ ယူႏနုဲင်းယို- "ခွေဆာထာꩻ ဟောဝ်စလဲဉ်းသွူ၊ ဟောဝ်စလဲဉ်းသွူတဲ့ ဆာတောဝ်ချာဒါႏ၊ ခါးလားကဆာတဝ်ချာယို ခွေအားထွုတ်ရီးခန်းတရာꩻမꩻ" တတွိုႏတဝ်းဒွိုန်းတရာꩻသူꩻ ဖေႏကတွိုႏလွေꩻ မာꩻမွေး၊ တလꩻတဝ်းဒွိုန်းတရာꩻယို ဖေႏကလꩻ အွဉ်ႏသꩻကျိုꩻစာꩻမွေး၊ တရာꩻဖေႏကလꩻစွဉ်ႏ ယိုခါခါ သောင်ႏသာနဲ့စ်မာꩻမွေး၊ ယိုနဝ်ꩻ အဋ္ဌမသꩻကုဲင်း-မာꩻထွာ အကျောင်ꩻတမျိုꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ ကုသီတာရမ္ဘဝတ္ထုသုတ်)