ထီကိုဘေꩻ သာႏသနာႏကိုရန်ႏ

"ဦမိဘယသုတ် (ထီကိုဘေꩻ သာႏသနာႏကိုရန်ႏ)" နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး- ပေါႏလွေꩻထီကိုနဝ်ꩻ မော့ꩻဗာႏဘေꩻယိုလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ ဦမိဘယံ - ထီလဲင်ꩻဘေꩻ ၊ ခံႏဗာႏထီလဲင်ꩻအီထိုꩻ ၂။ ကုမ္ဘီလဘယံ - ယမ်းဘေꩻ၊ ခံႏဗာႏယမ်းအဲင်ႏသီ ၃။ အာဝဋ္ဋဘယံ - ထီဝယ်ꩻဘေꩻ၊ ခံႏဗာႏထီဝယ်ꩻစုတ်ꩻ ၄။ သုသုကာဘယံ - ထကုဲင်ဘေꩻ၊ ခံႏဗာႏထကုဲင်အဲင်ႏသီ၊ ထီကိုနဝ်ꩻ ဘေꩻအဝ်ႏလစ်ꩻမျိုꩻနဝ်ꩻသွူ။ ဘေꩻ-နဝ်ꩻလစ်ꩻမျိုꩻနဝ်ꩻ အဝ်ႏဒျာႏထီကိုလွုမ်ꩻကာႏတဝ်း သာႏသနာႏကိုတဲ့ နုဲင်းထီကိုနောဝ်ꩻနေနေ၊ ဘေꩻအောဝ်ႏလစ်ꩻမျိုꩻ၊ ဘေꩻလစ်ꩻမျိုꩻကရိုꩻနဝ်ꩻ- ရဟန်ꩻသီးဖုံႏဟွေး- ၁။ လောကကိုယို လိုꩻယင်ဟန်ႏနဝ်ꩻ 'ကွုတ်ဖြားဆာသီ၊ ပူလီသောက၊ ပရိဒေဝမေႏ၊ ယံဖေႏကလွစ်လꩻ'အွဉ်ႏသꩻနုဲင်းနဝ်ꩻတဲင် နွို့သော့ꩻသာႏသနာႏကို ဗုဲင်ရဟန်ꩻ၊ ဗုဲင်ရဟန်ꩻထွူတွော့ꩻ ဝင်ꩻဒေါ့ꩻသွဉ်ဖေႏနုဲင်းယို-'ရဟန်ꩻကရိုꩻနဝ်ꩻ ကာငါဗာႏနုဲင်းယို၊ ဆွတ်ꩻချာဗာႏနုဲင်းယို'ဝင်ꩻဆွုံꩻမꩻသွဉ်ဖေႏ စတဲင်နုဲင်းနဝ်ꩻ။ ကွဲႏတွော့ꩻ- ဝွေꩻယူႏနုဲင်းယို 'မဉ်ကာနုဲင်းမုဲင်ꩻကာ၊ မဉ်ဆွတ်ꩻနုဲင်းမုဲင်ꩻဆွတ်ꩻမွိုင် ထွာကဲထမုဲင်ꩻ'ယူႏ(ဝင်ꩻဖေႏအမိန်း)နုဲင်းနောဝ်ꩻတွော့ꩻ သꩻလျားထာꩻ၊ ထွက်သဲင်ꩻချာလမ်း၊ ပါꩻယိုနဝ်ꩻ တွမ်ႏ'ထီလဲင်ꩻ-ကနွန်ႏထင်ႏဖင်ႏ၊ တွမ်ႏထီလဲင်ꩻ-ကငင်ႏသဲင်ꩻချာ'နဝ်ꩻ ဗွန်ဝင်ꩻ၊ ထင်ႏထွာစင်ꩻ-ထွက်ချာနောဝ်ꩻသွူ။ ရဟန်ꩻသီးဖုံႏဟွေး- ၂။ လောကကိုယို လိုꩻယင်ဟန်ႏနဝ်ꩻ ထွာစင်ꩻထွူ ဝင်ꩻဆွုံꩻမꩻနုဲင်းယို- 'သွုံꩻဗာႏနုဲင်းယို၊ သွုံꩻလꩻမွူးနွောင်းမာꩻကွဉ်ႏလွုမ်ꩻ၊ ပေါႏမွူးခွယ် မာꩻငါနဝ်ꩻ သွုံꩻလꩻတောဝ်း'ဝင်ꩻဆွုံꩻမꩻနုဲင်းနဝ်ꩻနဝ်ꩻ ဝွေꩻရိုꩻ'ဝင်ꩻပေ့ꩻခါꩻဝွေꩻဖြောင်း၊ အံႏတွိုင်ꩻလꩻတဝ်း'တဲ့ ကေႏနပ်တဝ်း၊ ထွက်သဲင်ꩻချာ၊ ပါꩻယိုနဝ်ꩻ တွမ်ႏ'ယမ်းကအဲင်ႏသီနဝ်ꩻ ပီဝင်ꩻ၊ ထာꩻအံႏအဲင်ႏသီထိုꩻ ဝွေꩻရဟန်ꩻဘဝ'နောဝ်ꩻသွူ။ ရဟန်ꩻသီးဖုံႏဟွေး- ၃။ လောကကိုယို လိုꩻယင်ဟန်ႏနောဝ်ꩻ ထွာစင်ꩻထွူ ထီႏပါꩻတမာဝါꩻ မွန်းပျောႏထာꩻတဲင် ဝွေꩻယူႏချာ ဝွေꩻကထွာလိုꩻလမ်းဘဝ တွမ်ႏဝွေꩻမာ ကမွန်းပျောႏပွုံႏ ကာႏမဂွုဏ်ႏဖုံႏနဝ်ꩻတဲင် ထွက်သဲင်ꩻချာ၊ ပါꩻယိုနဝ်ꩻ တွမ်ႏ'ထီဝယ်ꩻကစို့တ်ꩻလလင်ꩻနဝ်ꩻ ဗွန်ဝင်ꩻ၊ ဝွေꩻတဲ့ အဝ်ႏရဟန်ꩻဘဝ ကာႏမဂွုဏ်ႏ အာႏရွုံႏစုတ်ꩻလꩻသဲင်ꩻယင်း လိုꩻလမ်းဘဝ"နောဝ်ꩻသွူ။ ရဟန်ꩻသီးဖုံႏဟွေး- ၄။ လောကကိုယို လိုꩻယင်ဟန်ႏနဝ်ꩻ ထွာစင်ꩻထင်ႏထွူတွော့ꩻ လွေꩻမော့ꩻပါꩻမူႏယောင်ꩻရေꩻ၊ ယဲ့က်လွေꩻပါ ဝင်ꩻသꩻအင်၊ ရာႏဂဘီလူꩻ-နွို့ပူꩻအသꩻတဲင် ထွက်သဲင်ꩻချာ၊ ပါꩻယိုနဝ်ꩻ တွမ်ႏ'ထကုဲင် ကအဲင်ႏသီလိုꩻနဝ်ꩻ ပီဝင်ꩻ၊ ယိုတဲ့ လိုꩻမူႏအာႏရွုံႏ အဲင်ႏသီထိုꩻ ဝွေꩻရဟန်ꩻဘဝ'နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ဦမိဘယသုတ်)