ဒိဋ္ဌိသိုမ်ပါꩻ

ဒိဋ္ဌိသိုမ်ပါꩻ-ကရိုꩻနဝ်ꩻ ၁။ နတ္ထိကဒိဋ္ဌိ၊ ၂။ အကိရိယဒိဋ္ဌိ ၃။ အဟေတုကဒိဋ္ဌိ ယိုသိုမ်ပါꩻနဝ်ꩻသွူ။ ၁။ နတ္ထိကဒိဋ္ဌိ-ကရိုꩻနဝ်ꩻ မာꩻဒါႏန ကံကျင်ꩻသီႏလဖုံႏနဝ်ꩻ ခံႏစာꩻဗာႏဘဝယိုလူမ်ꩻ၊ မာꩻသီဝင်ꩻသက် ထူႏတခူန်ꩻဝင်ꩻဝင်ꩻတခြိုꩻနဝ်ꩻ ခံႏစာꩻချာဗာႏအပဲတ်ဘဝယိုလူမ်ꩻ၊ တပါလွေꩻလွဉ်ꩻတဝ်းဘဝငါသူꩻ အထွူထိုꩻဗော့ꩻနုဲးနဝ်ꩻလူမ်ꩻ၊ ကပယ်ႏထိုꩻအကျိုꩻနုဲးယိုနဝ်ꩻ ဟဲ့ꩻ"နတ္ထိကဒိဋ္ဌိ"နဝ်ꩻသွူ။ ၂။ အကိရိယဒိဋ္ဌိ-ကရိုꩻနဝ်ꩻ မာꩻအကျောင်ꩻအကျိုꩻလꩻတဝ်း၊ ကုသိုလ်ႏကံႏအကုသိုလ်ႏကံႏဖုံႏ အဲန်ထဝ်း၊ မာꩻထွူခန်းလဲ့ အထိုꩻမားချာဗော့ꩻနုဲးနဝ်ꩻ သꩻကယူႏနုဲးနဝ်ꩻနဝ်ꩻ ဟဲ့ꩻ"အကိရိယဒိဋ္ဌိ"နဝ်ꩻသွူ။ ၃။ လောကကိုယို ထာꩻရာꩻကားကအဝ်ႏနဝ်ꩻ ထာဝရဖရာꩻဖန်ဆင်ꩻဒျာႏလွဉ်းလွဉ်း၊ မီႏသီလွေꩻငါသူꩻနဝ်ꩻလဲ့ ဖျော်လွေꩻထေ့ယင်းဒျာႏ ထာဝရဖရာꩻထျꩻ၊ ဘဝအွိုးချာလဲ့ တအဲန်ထဝ်း၊ ဘဝငါလဲ့ တအဲန်ထဝ်း၊ ထာဝရဖရာꩻဖန်ဆင်ꩻဒျာႏခြေင်ခြေင် ကယူႏနုဲးနဝ်ꩻနဝ်ꩻ ဟဲ့ꩻ"အဟေတုကဒိဋ္ဌိ"နဝ်ꩻသွူ။ ဒိဋ္ဌိတန် ယိုသိုမ်ပါꩻနဝ်ꩻ အဝ်ႏသက္ကာယဒိဋ္ဌိမာꩻထွာလွဉ်တဲင်တွော့ꩻ သက္ကာယဒိဋ္ဌိမီႏထဲ့ထိုꩻနဝ်ꩻမꩻ ဒိဋ္ဌိအလင်ဖုံႏလဲ့ ပေါႏထန်ႏလွဉ်တဝ်း ထွာလွဉ်တဝ်းဒူမ်နဝ်ꩻသွူ။ သက္ကာယဒိဋ္ဌိကရိုꩻနဝ်ꩻ ကောပ်ပွိုးအယော့ဆုံးငါႏတဲင်တွော့ꩻ မီႏအာႏထုတ်ကျပ်ဒျာႏ ဝိပဿနာႏတရာꩻနဝ်ꩻမꩻ သဖောꩻဗွောင် ဝွေꩻ(သက္ကာယဒိဋ္ဌိ)ခရာႏနဝ်ꩻသွူ။ သက္ကာယဒိဋ္ဌိကရိုꩻနဝ်ꩻ "ခွေနမ်းလောင်းယို ရုပ်အဝ်ႏဒင်ႏ၊ ရုပ်လောင်းယို ခွေအဝ်ႏဒင်ႏ"ကယူႏဒါႏ ထာꩻယူႏနုဲးယိုတဲ့နဝ်ꩻ၊ "ခွေအဝ်ႏလွေꩻထာꩻ ခွေအဝ်ႏအုံထွိုင်ႏထာꩻ ခွေအုံလင်ꩻထာꩻ ခွေဗေင်ႏထာꩻ ခွေယောင်းစူယောင်းခင်ႏ"ကယူႏဒါႏထာꩻယူႏနုဲးယိုတဲ့နဝ်ꩻ ၊ "ယိုနဝ်ꩻ ခွေလမ်း ခွေပိုမာ ခွေတခြိုꩻဥစ္စာႏ" ကထူႏဒါႏ ထာꩻယူႏနုဲးယိုတဲ့နဝ်ꩻ ဟဲ့ꩻ"သက္ကာယဒိဋ္ဌိ"နဝ်ꩻသွူ။ သက္ကာယဒိဋ္ဌိဖေႏကထဲ့ထိုꩻမား ဖေႏကကင်ꩻနဝ်ꩻ ထွားမတ်အာႏထုတ်ဗာႏတရာꩻသွူ။ ကအဝ်ႏထွားမတ်အာႏထုတ်တရာꩻတွင်ꩻ မဉ်ႏထောင်လွေꩻတဖူꩻခီင်ႏနဝ်ꩻလဲ့ ကအဝ်ႏထွားမတ်ဒါႏ "ဒဲင်သွူ ကာသွူ ယမ်းသွူ"နုဲးနဝ်ꩻနဝ်ꩻ ခွေပါတဝ်းဒူမ်။ ကောပ်ခွေပါတဝ်းဒူမ်တဲင် သက္ကာယဒိဋ္ဌိထဲ့ထိုꩻနဝ်ꩻသွူ။