ဒုံပင်တခွါꩻ၊ မောက်ꩻမုဲင်ႏဝေင်ꩻနယ်ႏ

"သမဲင်ꩻ"ကရိုꩻနောဝ်ꩻ ကထွူထိုꩻလဲဥ်းဒါႏ အမဲဥ်ႏတရာꩻနေင်ႏ(၂၀)မာꩻချာနောဝ်ꩻ နီလိုꩻသီးအွဥ်ႏထွော့သဲင်ꩻ သမဲင်ꩻဖုံႏသွူ။လိုꩻမျိုꩻတမျိုꩻတဲ့နောဝ်ꩻ ခမ်းထီနုဲင်ႏငံႏတဲ့နောဝ်ꩻ ကမ္ဘာႏလောင်းကီ ကထင်ႏသျာꩻအီဗာႏ အကျောင်ꩻခရာႏနောဝ်ꩻ ပွိုးအွဥ်ႏရေꩻသဲင်ꩻ အသမဲင်ꩻဖုံႏဒျာႏသွူ။ ဝွေꩻသီးကွပ်ပွိုးသေထွꩻချာဗာႏ အလိုꩻမျိုꩻသမဲင်ꩻ၊နုဲင်ႏငံႏခမ်းထီသမဲင်ꩻတဲင် သဲက်ကကွုတ်ထွာလိုꩻတဲ့ သꩻရက်ချာအလိုꩻမျိုꩻ၊ အနုဲင်ႏငံႏခမ်းထီယို အဗွေဗိတ်တဗာႏ တယ်ႏပေႏခါကာႏ အောဝ်ႏထွတ်ꩻထန်ႏလဲဥ်းအသꩻကိုသွူ။ကွပ်ပွိုးစွဥ်ႏဒျာႏ ခေတ်အဆွိုက်ဆွိုက် ပညာႏသျင်ႏ၊ရက်စွိုးရက်ခွိုꩻသား တဲမ်းမုဲင်သေဖေးနေးတွမ်ႏ လိတ်သမဲင်ꩻအောဝ်ႏအထွူသွူ။ "ငေါဝ်းအဖြုံႏတရျာꩻ၊ တထွꩻတောဝ်းလိတ်တဖြုံႏ"ငေါဝ်းယိုအတွိုင်ꩻ နီမဥ်ႏတဲမ်းမုဲင်သေꩻခါꩻတွမ်ႏလိတ် မဥ်ႏတအောဝ်ႏတောဝ်း နီလိုꩻမျိုꩻသမဲင်ꩻ၊နီရပ်နီရာႏမတ်တန်ꩻ သမ်းအောဝ်ႏဒျာႏဖြောင်းရာႏဇာႏဝင်ႏလွုမ်တွော့ꩻ မဥ်ႏဒေါ့ꩻနယ်၊မဥ်ႏခြုဲင်းနယ်ဝင်ꩻနောဝ်ꩻ ဝင်ꩻရိုꩻလꩻထဲင်း အဒေါ့ꩻကြွို့ꩻကြꩻထာꩻ၊ဒေါ့ꩻဗားကွို့ꩻထာꩻတွမ်ႏလိတ်သမဲင်ꩻ မဥ်ႏတဲ့တအောဝ်ႏတောဝ်း ကွပ်နောဝ်မꩻ ဖေႏကထွာဗာႏမွိုန်း ဆုဲင်ꩻချာခွိုꩻသွုပ်တသာသားအတာႏ ဖေႏကထီႏထွꩻဗာႏနီရပ်နီရာႏသမဲင်ꩻ အကျောင်ꩻခရာႏရေႏရွယ်ႏနုဲင်းနောဝ်ꩻစားဒျာႏသွူ။

အခိန်ႏခါႏညဆွာꩻ ဒုံပင်တခွါꩻ

ဘီစီ-၁၂၀၀အခိန်ႏတွင်ꩻ ပအိုဝ်ႏလိုꩻမျိုꩻပꩻဖြယ်လီထိုꩻ သွံစွိုꩻတဲင် တတိယအစွိုꩻပအိုဝ်ႏလိုꩻမျိုꩻနောဝ်ꩻ အောဝ်ႏခယ်ႏခမ်းထိုꩻလင်ꩻ ဖျော်လင်ꩻအုံစုတောင်းကီꩻသွူ။အောဝ်ႏနောဝ်ꩻမꩻ ကွပ်ပွိုးဖြောဝ်ꩻလိုꩻမျိုꩻလွဥ်သျုတ်တဲင်တွော့ꩻ ပꩻလီထိုꩻခန်းဒျာႏ ဖြာꩻနယ်ႏနယ်ႏတဲင် ပအိုဝ်ႏလိုꩻမျိုꩻယဟန်ႏနောဝ်ꩻ တွိုႏဖျော်လွဥ်ခန်းဒျာႏ မောက်မုဲင်ႏနယ်ႏတွမ်ႏလွယ်ကောႏနယ်ႏနောဝ်ꩻသွူ။ မဥ်ႏထွားချာယင်းသမဲင်ꩻကိုနောဝ်ꩻ မောက်မုဲင်ႏနယ်ယို နီပအိုဝ်ႏလိုꩻမျိုꩻနောဝ်ꩻ တွိုႏညလွဥ်အုံညလဲဥ်း နေင်ႏပေါင်ꩻအရျာꩻနေးတဲင် ကတယ်ႏအုံသော့ꩻဒါႏ ဒုံဟံႏယာႏအကိုနောဝ်ꩻ ဒုံပင်တခွါꩻယိုနောဝ်ꩻလဲ့ အောဝ်ႏပါသော့ဒျာႏနေနေ ဖြောင်းဖြေꩻမော့နာ လိုꩻဖြားစခါဒေါ့ꩻအောဝ်ႏဟွိုန်ထွꩻဗာႏသွူ။ အခိန်ႏအွိုးနောဝ်ꩻခါ ဒုံပင်တခွါꩻနောဝ်ꩻ အောဝ်ႏဒျာႏလဲဥ်းဒျာႏဝင်ꩻအစောက်အမော့တဲင် ကအီႏဖြေꩻစာကူႏကားချာထာꩻနောဝ်ꩻ တဖူꩻတဲ့ညာꩻတန်တဖဲ့ꩻ အလွေꩻအသဲင်ꩻဖဲ့ꩻနောဝ်ꩻ တဖူꩻအထင်ႏအလင်ꩻ ကြုတ်ကြုတ်ကဲက်ကဲက်ဖွိုႏတဲ့အောဝ်ႏ၊ထိုတဲ့အောဝ်ꩻဒျာႏ ယပ်ꩻငါႏခုဲင်ႏငါႏတဲ့တမွေးတောဝ်းသွူ။ သွို့ꩻယာႏခြံကို ကထန်ႏဒါႏအဒီႏ၊အရာႏ၊အကောဝ်ႏဖုံႏနောဝ်ꩻလဲ့ စာပေါꩻဗာႏနေးဒျာႏလွုမ် ကဲဥ်းအာအာနောဝ်ꩻတဲ့ လုဲင်ႏအံႏချာငါနေးဒျာႏလို့ဝင်ꩻသွူ။ထွုမ်ႏကျံႏကျိုꩻစာꩻ ရိုꩻရိုꩻသာꩻသာꩻ ဖဝလွူးနမ်းကမ်းကြိုꩻနောဝ်ꩻ သမ္မာအာဇီဝအနယ်ꩻနေးဒျာႏသွူ။ထွုမ်ႏကျံႏအံႏ ပွုံႏမဲဥ်ႏနေးငါလယ့် တအံႏမဗာႏတောဝ်း ငိမ်ꩻချံꩻသာႏယာႏ ခွꩻစုံငါႏပင်တခွါꩻရပ်ရာႏ ကထွိုင်ႏဟွိုန်ချာဗာႏ မွိုးဖြားဖာဖြားဒေါ့ꩻနယ်ချာနုဲင်းယိုစားလဲ့ သမဲဥ်တွိုႏချာမွေးစွဥ်ႏအခိန်ႏနောဝ်ꩻသွူ။

၁၉၄၀-ဗာႏ ခေတ်အပြောင်ꩻအလုဲင်ႏ

ခေတ်ကရိုꩻနောဝ်ꩻ အောဝ်ႏဒျာႏခေတ်အရင်ꩻ ကွပ်နီလိုꩻသီးမာꩻတဲင် တနီꩻထွူတနီꩻအောဝ်ႏတဗန်ႏသဲင်ꩻသွူ။ကွပ်စွဥ်ႏနီလိုꩻသီး မာꩻတဗန်ႏခေတ်တဲင် ကငိမ်ꩻချံꩻသာႏယာႏခွꩻစုံငါႏ ဒုံပင်တခွါꩻရပ်ရာႏနောဝ်ꩻ ကံႏကြမ္မာႏလဲင်ꩻတဖေႏတောဝ်းဒွုမ်အခိန်ႏဆေ့ꩻဆေ့ꩻပေႏ တဟာချင်ꩻ၊တနာꩻချင်ꩻထိုꩻခေ့ꩻထိုꩻနာꩻဗာႏစွဥ်ႏထာꩻသွူ။ ၁၉၄၀-ဗာႏနောဝ်ꩻ လိုꩻမျိုꩻတန်မာꩻဖျတ်(၄)ဖျတ်တဲင် ကခံႏဗာႏအကို ဒုံပင်တခွါꩻတဲ့အောဝ်ႏပါသွူ။ကွပ်ပွိုးအခေႏနေႏအခွင်ꩻသာႏ ဒုံပင်တခွါꩻသားအတာႏ ကံႏဇာတ်ဆရာႏဖန်ဆင်ꩻဖေႏဟောဝ်ဟောဝ်ခါႏသွူ။ ပွိုးတမုဲင်ꩻဟောင်း လိုꩻဒါႏလိုꩻယံအီႏပေါႏလွဥ်၊သွဥ်ပညာႏအခွင်ꩻတဲ့ အီႏလꩻလွဥ်ႏဗာႏသွူကရိုꩻနောဝ်ꩻ အောဝ်ႏထီႏတမို့မို့လွေꩻနောဝ်ꩻစားသွူ။၁၉၄၀-ဗာႏမာꩻချာနောဝ်ꩻ လိတ်အတန်ꩻကျောင်ꩻရိုꩻဒွုမ်တွော့ꩻ လိတ်ဗွေႏဗွန်ကျောင်ꩻ၊နီလိတ်ပအိုဝ်ႏပေႏငါလဲ့ သွဥ်ခွင်ꩻတလꩻဖိုတောဝ်းအကျောင်ꩻ အတိတ်လီꩻဇာတ်ခြောင်ꩻ ညံးမွေးမုဲင်းငါႏ ဒုံပင်တခွါꩻသားအတာႏသွူ။

တယ်ႏစယင်း ဒုံပင်တခွါꩻတလဲင်ႏ

လိုꩻဖုံႏကထွိုင်ႏထိုꩻလို့နောဝ်ꩻ ဒုံပင်တခွါꩻယေန်သူႏတလွိုး လဲင်ꩻငွိုးနေးစွဥ်ႏသွူ။နေင်ႏပေါင်ꩻကထွိုင်ႏအာ အခါႏပေါင်ꩻကထွိုင်ႏညလွဥ်တဲင်တွော့ꩻခေတ်ကထွိုင်ႏဟောဝ်လွဥ်နောဝ်ꩻ ကွပ်ပွိုးစွဥ်ႏဒျာႏ နီဖာဖြားသီးကေꩻဇူႏတရာꩻတဲင်တွော့ꩻ နေင်ႏ၁၃၅၂-ဗာႏ ကထိန်ႏလာလောင်း(၁၅)နီꩻ၊မွူးနီꩻသောကျာꩻနောဝ်ꩻ စင်ꩻဖာလွန်ႏ၊(စင်ဖာတိဒေါ်ꩻ)၊(ဖြားမောင်ႏ)၊(ဖြားဟိတ်)နီဖာဖြားသီးနောဝ်ꩻ ကောႏစတွမ်ႏလမ်း(၄)ဗာႏတဲင် တယ်ႏချာယင်းဒုံပင်တခွါꩻတလဲင်ႏသွူ။ ကွပ်နီဖာဖြားသီး ရက်ငါႏထီႏဆွာꩻငါႏ ရပ်ရာႏပင်တခွါꩻတဲင် အွဥ်တယ်ဖေႏတဲင် ခွေတဲ့သဲင်အုံချာယင်း၊နာꩻတဲ့သဲင်ꩻခွိုန်ချာဗွိုန်ယင်း လမ်းငင်းအာပသာႏလွဥ်တွော့ꩻ နေင်ႏ၁၃၅၄-ဗာႏနောဝ်ꩻ တယ်ႏဆို့ရီးလွေꩻခန်းဒျာႏကျောင်ꩻယို့ꩻသွူ။ကထွိုင်ႏတွိုႏနေင်ႏ၁၃၆၂-ဗာႏ၊ဒဲဥ်သီႏလာဆန်ꩻ(၁၃)နီꩻ၊ မွူးနီꩻသောကျာꩻမွူးရောဝ်ꩻခိုႏအယံတွင်ꩻ တယ်ႏဆို့ꩻလင်ꩻခန်းဒျာႏကျောင်ꩻတန်သွူ။ ကထွိုင်ႏတယ်ႏငါယင်း နေင်ႏ၁၃၆၅ဗာႏ၊ဒဲဥ်ဟားလာလောင်း(၁၄)နီꩻ၊မွူးနီꩻဗုဒ္ဓဟူꩻနောဝ်ꩻအခိန်ႏခါႏ မင်္ဂလာႏအောဝ်ႏငါႏ မွူးရောဝ်ꩻခိုႏခိန်ႏခါႏ တယ်ႏဆို့ꩻကျောင်ꩻတန်ထွူလွေꩻတဲင် မာꩻနွောင်ꩻခန်းဒျာႏထင်ႏကျောင်ꩻတန် ဝိဟာႏရအကိုသွူ။အောဝ်ႏနောဝ်ꩻထွူတွမ်ႏကျောင်ꩻမဗော့ꩻတွမ်ႏမညာꩻနောဝ်ꩻ နေင်ႏ၁၃၆၅ဗာႏ၊ဝါႏဆိုႏလာဆန်ꩻ(၅)နီꩻ၊မွူးနီꩻဗုဒ္ဓဟူꩻနောဝ်ꩻ တယ်ႏလွေꩻပါခန်းဒျာႏသုဲင်ꩻပြုံႏစေႏတီႏနောဝ်ꩻသွူ။ တယ်ႏစစွဥ်ႏခိန်ႏနောဝ်ꩻ ဒုံပင်တခွါꩻအောဝ်ႏချာခန်းဒျာႏတစုတဗူႏ၊တဖူးတဝေးဖုံႏသွူ။ပျောႏပျောႏသွင်ႏသွင်ႏခွုမ်စံႏလွုပ်ꩻငီꩻ သွီႏထီခေါဝ်းပဲင်ꩻရက်ရက်သဲင်ꩻဒျာႏလို့ဝင်ꩻဖုံႏသွူ။ဒုံဆောင်ႏထာꩻမာꩻလဲ့ ခွေအရေꩻ၊နာꩻအရေꩻ ထွားလွိုတောဝ်းလို့ဝင်ꩻ အစဲင်ႏသွစ်ꩻနား အရပ်လစ်ꩻဖဲ့ꩻနောဝ်ꩻ ချိုသွမ်ႏငါႏကောင်ရွေꩻသွမ်ႏတွမ်ႏ သေင်ႏဝါႏဖုံႏနောဝ်ꩻလဲ့ အောဝ်ႏဒို့ꩻရဲးခါꩻ ဒုံပင်တခွါꩻတဲင် ဖန်ဆင်ꩻဖေႏအီမွေးစွဥ်ႏ သဘာႏဝတရာꩻအတရေꩻဖုံႏသွူ။ ဒုံဆောင်ႏရပ်ကိုလိုꩻပေႏဖုံႏနောဝ်ꩻလဲ့ ခေတ်ပညာႏထာꩻဒါႏ သွဥ်ခွင်ꩻအောဝ်ႏလဲဥ်းတဲင် ကꩻတွမ်ႏဆဲင်ꩻဗွာ တွမ်ႏသွꩻပေါင်ꩻအာထင်ႏသွိုလို့ဝင်ꩻနောဝ်ꩻ ထီႏထီႏဗာႏပီတိစွုမ်းမွေးငါႏသွူ။မူးနံꩻ၊ခိုဗင်ႏအတာႏလဲ့ ဗွေႏဗွန်ꩻဗွေႏစင်ꩻအွိုးကျောင်ꩻ အောဝ်ႏသွဥ်လွေꩻဖေႏလိတ်ပအိုဝ်ႏဖုံႏသွူ။ မဥ်ႏထွားယင်းရပ်သား၊ဒုံသားလဲ့ (၁၂)လာရာႏသီႏ အကောဝ်ႏ၊အဒီႏ ကလွောက်ညီႏဒါႏ ဗွူ၊ဗေဟံႏ၊ ထေင်၊ဗေ၊ နံ၊နွေႏ၊ဖက်ခေါဖုံႏနောဝ်ꩻလဲ့ ရိုꩻသာꩻကျိုꩻစာꩻ ခွုမ်မာꩻလွေꩻဒျာႏ အောဝ်ႏဆို့ရုဲင်လွေꩻ လွူးအီနမ်းစီꩻပွာꩻရေꩻအတာႏသွူ။

ဒုံပင်တခွါꩻအတာႏ ကံႏကြမ္မာႏ

ဒုံဂွုဏ်ႏသိက္ခာႏ၊ဒုံအင်္ဂါႏကပြဲ့ꩻစွုံႏငါႏ နီရပ်ရာႏနောဝ်ꩻ ရွိုင်ꩻကျံꩻငါႏကံႏကြမ္မာႏ ဖန်ဆင်လွဥ်တွော့ꩻ တထွာထွိုက်သင်ꩻတောဝ်း ရပ်ရာႏဒုံကိုပျဿနာႏအခရာႏဖုံႏယို သမ်းဖန်ဆင်ꩻလွဥ်ဖေႏတဲင် ကငိမ်ꩻချံꩻသာႏ ပင်တခွါꩻရပ်ရာႏနောဝ်ꩻ ဖထန်ႏခေါဗာႏယင်းထာꩻတလဲင်ႏ တရာꩻခံႏနောဝ်ꩻ ပွိုးနီလိုꩻသီးစူသꩻ၊ မာႏန၊အတ္တဒျာႏသွူ။ သီအမာႏ၊နီအမာႏ ထွုမ်ႏယွူးချာငါတောဝ်းလို့ဝင်ꩻတဲင် ကထွာထွူလဲဥ်းနုဲင်းယိုစားလဲ့ အရီးတွမ်ႏအဆုဲင်ꩻယိုတလဲင်ႏငါ လိုꩻသီးအခါႏပျဿနာႏ ဖေႏကဖေ့ဝုဲင်ႏအတာႏ ရပ်ရာႏပင်တခွါꩻသားနောဝ်ꩻ ခံႏထူႏအွိုင်ႏသံဃာႏဗွေႏဆရာႏတောႏတန်အထျꩻ ငေါဝ်းခွင်ꩻသြဝါဒ၊ ထုဲင်ႏခမ်းကိုသတင်ꩻသွုံအုံဒါႏ ဗွေႏဆရာႏတောႏဘဒ္ဒန္တနာဂိန္ဒနောဝ်ꩻ ငမ်းငါႏတကာႏအမျာꩻ ကွင်အတွူးတဲင် ကွပ်ရက်ငါႏထီႏသညင်ꩻငါႏ တွမ်ႏထာꩻထီႏဆွာꩻဆွာꩻ အမျာꩻတွက်တာႏတဲင် တွမ်ႏတကာႏဆွန်ꩻစူတွူႏဖာႏညီꩻလို့ဝင်ꩻတဲ့မွေးမွေး ကွပ်ရက်ငါႏစွိုးခွိုꩻဘာႏသာႏ သႏသနာႏတဲ့မွေးမွေး တွမ်ႏလမ်းငင်း(၆၅)ဗာႏ တယ်ႏထောင်ႏလွေꩻယင်း ‌‌ကျောင်ꩻပင်တခွါꩻသွူ။ ကတယ်ႏထောင်ႏယင်းကျောင်ꩻပင်တခွါꩻနောဝ်ꩻ ဥက္ကဌဗွေႏဆရာႏတောႏနောဝ်ꩻ ဘဒ္ဒန္တနာဂိန္ဒ(ခေတ္တထုဲင်ႏခမ်း)၊(ဗွေႏဆရာႏတောႏ ဗွေႏဇာဂရ)၊ဗွေႏသုမ(မန်းနောင်)၊ဗွေႏကဝသေဌတွမ်ႏသာႏမဏေႏ(၁၂)ပါꩻ၊ဒုံကတူႏကထွာဒါႏ စင်ꩻဖါလွန်ႏ၊စင်ꩻဖါဟိန်၊စင်ꩻဖာကျန်၊စင်ဖါဟဲဥ်၊ထွက်ကျောပါတွမ်ႏတကာႏဒုံပင်တခွါꩻအမျာꩻတဲင် နေင်ႏ၁၃၇၅-ဗာႏ၊ဒဲဥ်သီႏလာဆန်ꩻ(၈)နီꩻ၊မွူးနီꩻစနေႏ(၃.၈.၂၀၁၄)အခိန်ႏခါႏနောဝ်ꩻတွင်ꩻ တယ်ႏဆို့ꩻအုံလင်ꩻခန်းဒျာႏ ကျောင်ꩻသꩻမီꩻတွမ်ႏဒါတွာနောဝ်ꩻသွူ။ ကထွိုင်ႏတယ်ႏဆို့ꩻနုဲင်းယိုနောဝ်ꩻ တနာႏလိုႏတောဝ်းအသောင်အရင်ꩻငေါဝ်း၊လွဥ်တွိုက်ꩻခꩻ ကျံႏစယ်ႏယားကုဲင်းနောဝ်ꩻစားလဲ့ အောဝ်ႏအာတန်ဒျာႏ ကွဲတွော့ꩻ ကွပ်ယွုမ်းအံႏအမဲဥ်ႏတရာꩻတဲင် ကွဲညညနောဝ်ꩻအမဲဥ်ႏတရာꩻဒေါ့ꩻငေါဝ်းတဲင်တွော့ꩻ အဆူႏအနာႏကင်ꩻကင်ꩻ ဖြွုမ်းဗူႏလို့ဝင်ꩻ တွမ်ႏဖူးဝေးဗော့ꩻညာꩻတဲင် ကျောင်ꩻပင်တခွါꩻနောဝ်ꩻ တနီꩻထွူတနီꩻ အောဝ်ႏတိုꩻတက်ဖြွဥ်ကီလဲဥ်းသွူ။ အခိန်ႏနုဲင်းယိုခါ ကျောင်ꩻပင်တခွါတွမ်ႏဒုံပင်တခွါꩻနောဝ်ꩻ သာႏယာႏငိမ်ꩻချံꩻလွဥ်လွဥ်း ကျောင်ꩻကိုတဲ့နောဝ်ꩻ၊အွိုးအညာꩻပညာႏကသွဥ်ထူႏဒါႏတဲ့နောဝ်ꩻ ဗွေႏရဟန်ꩻ(၆)ပါꩻ၊သာႏမဏေႏ(၃၂)ပါꩻ အောဝ်ႏသတင်ꩻအုံသော့ꩻ အောဝ်ႏထေင်းထံႏလွေꩻဒုံတာႏ သာႏသနာႏအတာႏ အကျိုꩻထာꩻမာꩻသွူ။ နီသွဥ်းသီရပ်ရာႏဒုံ ဖူးဝေးဗော့ꩻညာꩻ မဥ်ႏလွဥ်လယ်ႏ၊မဥ်ႏထင်ႏလယ်ႏနောဝ်ꩻ အောဝ်ႏပအိုဝ်ႏနမ်းထိန်ꩻထွားခွင်ꩻလꩻဝေင်ꩻနယ်ႏသီႏသဲင်ႏ၊ရပ်တန်သုဲင်ခေါဝ်ယို ထင်ႏကွဥ်ႏထင်ႏစွဥ်ႏစွဥ်ႏနောဝ်ꩻ ကာႏဖျတ်သဲင်ꩻဗာႏပအိုဝ်ႏဒုံ ရပ်တန်လွပ်ပွတ်ꩻ၊ ဒုံပင်ညိုးတွမ်ႏ ဒုံထမ်းသုဲင်ဖုံႏသွူ။မဥ်ႏသဲင်ꩻငါငါ ကာႏပါထဲင်းဒွိုန်းက ပွဥ်ခြွောင်မꩻ အောဝ်ႏပွဥ်ခြောင်ဖင်ႏကွဥ်ႏ ထင်ႏငါစွဥ်ႏစွဥ်ႏမဲ့တွိုႏရီးရီးဒုံပူႏယာစင်းတွို့ꩻ၊မဥ်ႏသဲင်ꩻငါထဲင်းတစိꩻငါ တွိုႏပါဗာႏရပ်တန်အွိုင်ႏဟိုနမ်းသွူ။အောဝ်ႏဟိုနမ်းကာႏသဲင်ꩻထင်ꩻ တဖူꩻလင်ꩻမောက်မုဲင်ႏဖြယ်ထန်ႏထင်ꩻ ကာႏထဲင်းဒွိုန်းက ပအိုဝ်ႏဒုံနောဝ်ꩻ ဒုံဖါစန်ꩻတွမ်ႏ ဒုံလေကောင်၊ဒုံပန်တင်ႏ မဥ်ႏနက်ထင်ꩻထင်ꩻယင်း ကာႏထဲင်းပါကောင်ပေႏတဖြုံႏငါ ညတောဝ်းတဆင်ႏမဲ့တွိုႏဖျော် နီသွဥ်းသီးကအုံ ရပ်ရာႏပင်တခွါꩻဒုံသွူ။ ဖူးဝေးသီးမဥ်ႏဖျော်တွိုႏ နီသွဥ်းသီးရပ်ရာႏဒုံနောဝ်ꩻ တဗွိုန်တောဝ်းဒွုမ်အွိုးကရီးခါ တဖူꩻတထာလဲ့နောဝ်ꩻ၊အလွေꩻအသဲင်ꩻဖဲ့ꩻတဲ့နောဝ်ꩻ သာႏယာႏပိုႏအာငါႏလဲဥ်းသွူ။ရိုꩻရိုꩻသာꩻသာꩻ ပရီႏပရာႏပအိုဝ်ႏဖုံႏဒျာႏ ဖေႏကထီႏသေထွꩻဗာႏ နီသွဥ်းသီးရပ်ရာႏ ထွုံꩻစံꩻယိုယာႏ၊အွဥ်ႏရေꩻရောင်ဒျာႏ မွိုးစိုးဖာပန်အမွီႏဖုံႏ၊နီလိတ်လုဲင်ႏတွမ်ႏငေါဝ်းငွါဒေါ့ꩻချာဒျာႏ ဖူးဝေးသီးမဥ်ႏတွိုႏဒါႏ အံႏအွꩻတာႏ၊အုံတာႏ နန်းခရာႏဗာႏတောဝ်း တွမ်ႏဝတ္တရာꩻကေႏကေႏ မူႏခိုတန်ပေႏအောဝ်ႏမောင်ꩻတသေႏ ကျိုႏဆွုမ်ႏသေႏသေႏဒျာႏ မဥ်ႏဖုဲင်ႏဒါႏထင်ႏလယ်ႏသွော့တခါႏခါႏနေား။ နီသွဥ်းသီးရပ်ရာႏဒုံတွမ်ႏဒုံဗော့ꩻနောဝ်ꩻ ဆꩻတွို့ꩻဖဲ့ꩻနောဝ်ရပ်တန်ထီပဲဥ်တွမ်ႏကောင်တန်လွယ်မော်၊ဆꩻနောဝ်ဖဲ့ꩻနောဝ်ꩻ ဒုံပန်တင်ႏတွမ်ႏဒုံလေကောင်၊ဆꩻကွဥ်ႏတွမ်ႏဆꩻထင်ꩻနောဝ်ꩻ ထွာဒျာႏတနွိုင်တန်ကောင်ဆောင်ႏ သေင်ႏငိုမွူးခြာ သွို့ꩻယာႏခြံယာႏဖုံႏဒျာႏသွူ။

ထူႏတောမ်

ကအုံနောင်လိတ်အုတ်နောဝ် ဗွေႏဇာဂရတဲမ်းကျောင်ꩻပင်တခွါꩻ/ဒုံသမဲင်ꩻ၊ပအိုဝ်ႏသမဲင်ꩻစောင်ႏ၊ကျောင်ꩻပင်တခွါꩻမတ်တန်ꩻ