နမ်းကျင်ꩻတရာꩻမီႏ

"နမ်းကျင်ꩻတရာꩻမီႏအဲန်ထဝ်းနဝ်ꩻ" ဗွေႏဘုရာꩻကဟော်ꩻခါꩻဒါႏ (၃၈)ပါꩻ မင်္ဂလာႏတရာꩻနဝ်ꩻ ပါဠိဂါႏထာႏပေါင်ꩻ အဝ်ႏတဆီသွူ။ ဂါႏထာႏတဆီအကို တတိယဂါႏနဝ်ꩻ နုဲးယိုအတွိုင်ꩻသွူ။ - ဗာဟုဿစ္စဉ္စ သိပ္ပဉ္စ၊ ဝိနယော စ သုသိက္ခိတော။ သုဘာသိတာ စ ယာ ဝါစာ၊ ဧတံ မင်္ဂလ မုတ္တမံ။

တတိယဂါႏကိုယို ကပါသော့ꩻဒါႏ မင်္ဂလာႏတရာꩻ ၄-ပါꩻနဝ်ꩻ

(၁) အဟွုန်အထီႏ ဗဟုသုတအာဗာႏ။ (၂) စက်မုꩻစူမုꩻ ထာꩻဒါႏလွူးနမ်း တစွိုးစွိုးယို ဒါႏဗာႏ။ (၃) နမ်းကျင်ꩻတရာꩻ ဟဝ်ဗာႏ။ (၄) နေးတောမ်ႏငဝ်းအွီႏငွါသာႏတဲင် ဒေါ့ꩻဒါႏငဝ်းယေန်ႏကေႏပနဲန်ႏ။ ယို(၄)ပါꩻသွူ။ မင်္ဂလာႏတရာꩻ ယို(၄)ပါꩻအကို အမုဲ(၃) မင်္ဂလာႏတရာꩻနဝ်ꩻ "နမ်းကျင်ꩻတရာꩻဟဝ်ဗာႏ"ရိုꩻနုဲးနဝ်ꩻတဲင် နမ်းကျင်ꩻတရာꩻ မီႏဟဝ်တဝ်းနဝ်ꩻ ထွာနုဲးမုဲꩻ၊ ဖေႏကသေ ဖေႏကစဲင်းတဲင် တဲမ်းနယ်လွေꩻဗာႏ "နဝကနိပါတ်၊ တိတ္တိရဇာတ်"နုဲးငါယိုသွူ။

နဝကနိပါတ် တိတ္တိရဇာတ်

ပွိုင်းလဲင်ႏစခါ နေင်ႏပေါင်ꩻအာအကို တက္ကသိုလ်ႏခမ်း ဒိသာပါမောက္ခ ဆရာႏတန်နဝ်ꩻ လွေꩻအုံယာႏယီႏသွူထာꩻ ဟိမဝန္တာႏကောင်ထျꩻတွော့ꩻ အဝ်ႏသွဉ်ဖေႏလွေꩻခန်း တပဲ့ꩻငတ်ꩻရျာꩻပညာႏသွူ။ ကျောင်ꩻထျꩻနဝ်ꩻ ဖိုးမွူးတမွိုးပိုလဲ့နဝ်ꩻ၊ ဖွတ်မွူးတဗာႏတောမ်ႏ အပေႏနီဗာႏလဲ့နဝ်ꩻ၊ ဝါးဖြဲ့ꩻလဲ့နဝ်ꩻ၊ ချင်ႏသေ့ꩻတောမ်ႏကေလဲ့နဝ်ꩻ အချင်ꩻချင်ꩻ မꩻသွꩻလွဝင်ꩻတွော့ꩻ အဝ်ႏအုံညီꩻလွေꩻခန်းတဝင်ꩻသွူ။ ဝွေꩻသီးသောင်ထျꩻ မဗော့ꩻမညာꩻသေင်ႏမွူးတန် တမွူးလောင်းနဝ်ꩻ လူꩻရုက္ခစိုꩻတပါꩻလဲ့ အဝ်ႏသွူ။ ဆရာႏတန်တပဲ့ꩻဖုံႏနဝ်ꩻ ထာꩻဒါႏပညာႏ တလိုမ်ႏကိုမ်ႏတဝ်းဒွိုန်းလဲ့ ဆရာႏတန်သံးသီထိုꩻတွော့ꩻ သွဉ်ထေ့လုဲႏခန်း ဆရာႏတန်တပဲ့ꩻ အဖြာꩻဟံးပေါင်းဒါႏလွိုဝင်ꩻ ဝါးဖြဲ့ꩻထျꩻနဝ်ꩻသွူ။ ချင်ႏသေ့ꩻ၊ ဖိုး၊ ဖွတ်ဖုံႏနဝ်ꩻလဲ့ အဝ်ႏလွောန်နာႏစွုမ်ႏနီꩻနီꩻသွူ။

ရသေ့ꩻကျင်ꩻကုဲင်ဖျော်လွောန်

တွိုႏခꩻတလဲင်ႏ ဆရာႏတန်တပဲ့ꩻဖုံႏ သဲင်ꩻလယ်ႏလို့လံးတချာ ရသေ့ꩻကျင်ꩻကုဲင်တပါꩻနဝ်ꩻ ဖျော်လွောန်ခန်းသွူ။ ထွိုင်ႏထီႏရသေ့ꩻဖျော်နဝ်ꩻ ဖွတ်မွူးနဝ်ꩻ ထင်းရသေ့ꩻကျင်ꩻဟဝ်တဲင် ရပ်ကျိုႏဆွုမ်ႏခန်းသွူ။ လွူးတဲင်ဆွုမ်ႏခန်း သေင်ႏရောင်ꩻသေင်ႏရာꩻဖုံႏ၊ ထီလိုမ်ꩻထီခွꩻဖုံႏသွူ။ ထွိုင်ႏနုဲးမွူးရဝ်ꩻ ဖွတ်မွူးလွေꩻထိုမ်ႏအံႏအဆာႏတွင်ꩻ ရေသ့ꩻကျင်ꩻကုဲင်နဝ်ꩻ ဒဲန်ရဝ်ꩻအတာႏ ဖို့ꩻအံႏခန်းဒျာႏ ဖိုးပေႏသွူ။ မွူးယာခိုႏနဝ်ꩻ ဖို့ꩻအံႏခန်းဖိုးမွူးသွူ။ ဒဲန်ဟာတာႏနဝ်ꩻ ဖို့ꩻအံႏခန်းဒျာႏ ဖွတ်ပေႏနီဗာႏတောမ်ႏ ဝါးဖြဲ့ꩻနဝ်ꩻသွူ။ အံႏထွူနဝ်ꩻ ဗေင်ႏအွီႏအဲန်ခန်းဒျာႏထာꩻသွူ။ နုဲးမွူးဟာ ဖွတ်မွူးလွေꩻထိုမ်ႏအဆာႏ ထွိုင်ႏသဲင်ꩻလွောန်နဝ်ꩻ လူꩻရုက္ခစိုꩻနဝ်ꩻ ခြုဲင်းနယ်ဆွုမ်ႏသွူ ရသေ့ꩻကျင်ꩻကုဲအခရာႏတွော့ꩻ ထွောန်ႏခန်းဖွတ်မွူးဖင်းထိုꩻသွူ။ ဖွတ်မွူးလဲ့ ငမ်းတွော့ꩻ ဖင်းထိုꩻမွေးခန်းဒျာႏသွူ။

ရသေ့ꩻကျင်ꩻကုဲင်တောမ်ႏကေ မော့ꩻလွဝင်ꩻ

ထွိုင်ႏလꩻလစ်ꩻငတ်ꩻနီꩻနဝ်ꩻ ချင်ႏသေ့ꩻနဝ်ꩻ "သွꩻကေဟွေး- နီသွꩻဝါးဖြဲ့ꩻဖုံႏ၊ ဖွတ်ဖုံႏ၊ ဖိုးဖုံႏနဝ်ꩻ ထီႏတဝ်းဒွုမ်ကွေး၊ ထွာထာꩻမုဲꩻဟောင်း၊ နာꩻလွေꩻစောႏတနာႏစံꩻမွိုင်"ဒေါ့ꩻဖေႏခန်းကေနုဲးနဝ်ꩻ၊ အွဉ်ႏကေလွေꩻထိုမ်ႏစောႏတနာႏနဝ်ꩻသွူ။ ကေထွိုင်ႏလွေꩻစုံစမ်းနဝ်ꩻ ရေသ့ꩻကတူႏထိုမ်းလောင်းနဝ်ꩻ ထီႏခန်းအဝ်ႏဒျာႏတောမ်ႏ ဝါးဖြဲ့ꩻဆွဉ်ႏသွူ။ ကျောင်ꩻထျꩻနဝ်ꩻလဲ့ ထီႏခန်းဖိုးဆွတ်ꩻ၊ ဖွတ်ဆွတ်ꩻဖုံႏတဲင် "လိုꩻယုတ်တန်ယိုနဝ်ꩻ အအံႏသီလို့လဲန်း ခွေသွꩻဝါးဖြဲ့ꩻဖုံႏ၊ ဖွတ်ဖုံႏ၊ ဖိုးဖုံႏအလွိုး"ယူႏသွူနုဲးနဝ်ꩻတွော့ꩻ တောမ်ႏခင်ႏတပတ်ꩻမဲ့သေခန်းဒျာႏ ရေသ့ꩻကျင်ꩻကုဲနဝ်ꩻသွူ။ ရသေ့ꩻမဲ့ထွိုင်ႏသေနဝ်ꩻ ထီႏခန်းကေအဝ်ႏဗော့ꩻတဗာႏတဲင် သꩻဝီးသꩻဝꩻ ကျမ်ႏထွိုင်ႏဖင်းထိုꩻခန်းသွူ။ ရေသ့ꩻထွိုင်ႏကျမ်ႏဖင်းနဝ်ꩻ ကေလောႏရဲသွူတွော့ꩻ "ဟွေ့ ရသေ့ꩻယုတ်- ရေသ့ꩻမွိုက် ရသေ့ꩻကျင်ꩻကုဲဟွေး၊ နာꩻယို အံႏသီလို့လဲန်းခွေသွꩻဝါးဖြဲ့ꩻဖုံႏ၊ ဖွတ်ဖုံႏ၊ ကေဖုံႏမွေးနေꩻ"ရီခန်းနုဲးနဝ်ꩻသွူ။ တွိုႏနဝ်ꩻတွော့ꩻ ရသေ့ꩻကျင်ꩻကုဲနဝ်ꩻလဲ့ ငမ်းမွေးစွဉ်ႏကေတွော့ꩻ "ဗွေႏကေဟွေး- ခွေတအံႏဗာႏတဝ်းလာꩻလာꩻ"ဒေါ့ꩻလဲန်ခန်းထာꩻနုဲးနဝ်ꩻသွူ။ ကေလဲ့ "ရသေ့ꩻယုတ်၊ နာꩻတအံႏတဝ်းပါꩻမုဲꩻအံႏ၊ ယိုကိုနဝ်ꩻ ပါꩻမုဲꩻကဲးအီႏလွောန်၊ အဝ်ႏတဝ်းနာꩻလွုမ်ꩻနဲ့၊ ဒေါ့ꩻစွောန်ႏစွောန်ႏဟုဲး၊ ပေါႏလဲန်ထာꩻ ခွေအံႏသီသွူနာꩻကွေး" ဒေါ့ꩻလောက်ꩻထဲင်းစွဉ်ႏနုဲးနဝ်ꩻသွူ။ တွိုႏနဝ်ꩻတွော့ꩻ ရေသ့ꩻကျင်ꩻကုဲင်နဝ်ꩻ သꩻဝꩻငမ်းမွေးစွောန်ႏကေတဲင် လဲန်ဗွုန်ႏဒွုမ်တွော့ꩻ- "ဗွေႏကေဟွေး- ဖွတ်တောမ်ႏဖိုးနဝ်ꩻ အံႏဗာႏမွေး၊ ဝါးဖြဲ့ꩻနဝ်ꩻ အံႏဗာႏတဝ်း"ဒေါ့ꩻလဲန်ထဲင်းဒွိုန်းနုဲးနဝ်ꩻသွူ။ ကေနဝ်ꩻ တယွုမ်းတဝ်းရေသ့ꩻငဝ်းတဲင် "နာꩻအဝ်ႏမုဲꩻကိုလွောန်၊ နာꩻလွူးနမ်း တောမ်ႏထာꩻမုဲင်ꩻ"ရီခန်းနုဲင်းနဝ်ꩻသွူ။ ရသေ့ꩻလဲ့ ခြုဲးနယ်ခန်း ဝွေꩻကအဝ်ႏဒါႏ အရပ်လွောန်၊ ခြုဲးနယ်ခန်း ဝွေꩻလွူးနမ်းဖုံႏသွူ။

ဟဲ့ꩻလွေꩻခန်းချင်ႏသေ့ꩻထျꩻ

တွိုႏနဝ်ꩻတွော့ꩻ ကေနဝ်ꩻ "ဟီ- လိုꩻယုတ်ရေသ့ꩻဟွေး- မီႏနာႏနုဲးနာꩻကဒေါ့ꩻ ငဝ်းဖုံႏယိုနဝ်ꩻ နာꩻယိုꩻ လိုꩻကျင်ꩻဟဝ်တမွေးတဝ်း၊ လိုꩻယုတ်ဒျာႏ၊ ဝါးဖြဲ့ꩻလဲ့ နာꩻဖို့ꩻအံႏဒျာႏ၊ လွေꩻလွောန်ꩻခွေယိုဟုဲး"ရိုꩻထွူနုဲးနဝ်ꩻတွော့ꩻ ဟဲ့ꩻလွေꩻခန်းဒျာႏ ချင်ႏသေ့ꩻထျꩻသွူ။ ထွိုင်ႏတွိုႏချင်ႏသေ့ꩻထျꩻနဝ်ꩻ ကေနဝ်ꩻ "သွꩻချင်ႏသေ့ꩻဟွေး- ရသေ့ꩻယုတ်ယိုနဝ်ꩻ ရိုꩻ'ဝွေꩻဖို့ꩻအံႏဖွတ်တောမ်ႏဖိုးလွုမ်ꩻ၊ ဝါးဖြဲ့ꩻနဝ်ꩻ ဝွေꩻဖို့ꩻအံႏဗာႏတဝ်းရိုꩻနဝ်ꩻ၊ မီႏထွားနုဲးဝွေꩻကခြုဲးဒါႏ ဝွေꩻထာꩻမာꩻ လွူးနမ်းဖုံႏနဝ်ꩻ ဝါးဖြဲ့ꩻလဲ့ ဝွေꩻဖို့ꩻအံႏဒျာႏနေနေသနဲ့"ဒေါ့ꩻဖေႏခန်း ချင်ႏသေ့ꩻနုဲင်းနဝ်ꩻ၊ တွိုႏနဝ်ꩻတွော့ꩻ ချင်ႏသေ့ꩻလဲ့ "သွꩻကေဟွေး- ကဲန်းဒေါ့ꩻနယ်မွိုင် နာꩻထာꩻထင်းနဝ်ꩻမွိုင်"ရီချာခန်းနုဲင်းနဝ်ꩻ။ တွိုႏနဝ်ꩻတွော့ꩻ ကေနဝ်ꩻ "သွꩻချင်ႏသေ့ꩻဟွေး- ရသေ့ꩻယိုနဝ်ꩻ ကုန်ႏသယ်ႏသားသွောန်းသယ်ꩻလဲ့ မာꩻဗာႏ၊ ကွန်ႏဖုံႏတဲ့ ဖြေꩻစာဗာႏဖို၊ ဝါးဖုံႏလဲ့ ဒေါင်ဆောမ်ꩻထွူတွော့ꩻ စာအံႏဗာႏဖို၊ လိုꩻလဲ့ မာꩻသီဗာႏဖို၊ ရသေ့ꩻလဲ့ ထွာဗာႏဖို၊ မီႏထွားနုဲး ဝွေꩻထာꩻမာꩻ ကစွုမ်ႏငါႏနုဲးယိုနဝ်ꩻ ဝါးဖြဲ့ꩻလဲ့ ဝွေꩻဖို့ꩻအံႏဒျာႏ၊ ဖိုးဖုံႏ၊ ဖွတ်ဖုံႏနဝ်ꩻ အံႏဗာႏမွေးလဲန်း၊ တွိုႏဝါးဖြဲ့ꩻနဝ်ꩻ မာꩻသီဗာႏတဝ်းကရိုꩻနဝ်ꩻ ယွုမ်းခရာႏအဲန်ထဝ်း"ဒေါ့ꩻနယ်သံးခန်း ချင်ႏသေ့ꩻနုဲးနဝ်ꩻသွူ။

ထွာဗာႏကေဆာႏ

တွိုႏနဝ်ꩻတွော့ꩻ ချင်ႏသေ့ꩻနဝ်ꩻ "ရသေ့ꩻဟွေး- ဝါးဖြဲ့ꩻလဲ့ နာꩻဖို့ꩻအံႏနေနေကရို"ရီခန်းနုဲးနဝ်ꩻ၊ အခိန်ႏယိုနဝ်ꩻ လူꩻရုက္ခစိုꩻ ပျꩻအနမ်းတဲင် 'သီသွꩻ ဝါးဖြဲ့ꩻဖုံႏ၊ ဖိုးဖုံႏ၊ ဖွတ်ဖုံႏနဝ်ꩻ ရသေ့ꩻကျင်ꩻယုတ်ယို ဖို့ꩻအံႏဒျာႏ"ဒေါ့ꩻထွူနုဲးနဝ်ꩻတွော့ꩻ အွဉ်ႏထိုꩻမားချာခန်းဒျာႏ အနမ်းသွူ။ ရသေ့ꩻကျင်ꩻကုဲလဲ့ လဲန်တဗဉ်ႏဒွုမ်တဲင် 'ဝါးဖြဲ့ꩻလဲ့ ခွေအံႏဒျာႏနေနေ"ဝွန်ႏခံႏခန်းနုဲးနဝ်ꩻသွူ။ ရသေ့ꩻထွိုင်ႏဝွန်ႏခံႏနဝ်ꩻ ချင်ႏသေ့ꩻနဝ်ꩻ ရိုꩻရသေ့ꩻဝွန်ႏခံႏဒျာႏ ဟဝ်ဟဝ်နုဲးနဝ်ꩻတွော့ꩻ အွဉ်ႏစွꩻခန်းဒျာႏ ရသေ့ꩻသွူ။ ကွယ်ႏတွော့ꩻ ကေနဝ်ꩻ "ရသေ့ꩻယုတ်ယိုနဝ်ꩻ တဗဉ်ႏဒွုမ်တွော့ꩻ ဝွန်ႏခံႏခန်းဒျာႏ၊ လိုႏအွဉ်ႏစွꩻတဝ်း၊ လိုႏမာꩻသီ"ရိုꩻနဝ်ꩻတဲင် အဲင်ႏသီခန်းဒျာႏ ရသေ့ꩻယုတ်နဝ်ꩻ အယာႏသွူ။ ရသေ့ꩻထွိုင်ႏသီနဝ်ꩻ လူꩻပွေါးတခြာဖုံႏနဝ်ꩻ - "နမ်းကျင်ꩻတရာꩻတအဲန်ထဝ်း၊ လိုꩻသꩻကဲင်ႏ၊ လိုꩻယုတ်တဖြာꩻနဝ်ꩻ သီဝွစ်ထိုꩻလဲန်း"ခြီခြဝ်လွခန်းနုဲးနဝ်ꩻသွူ။ သီႏလနမ်းကျင်ꩻတအဲန်ထဝ်း၊ လိုꩻသꩻတကဲင်ႏ၊ ရသေ့ꩻကျင်ꩻကုဲယိုနဝ်ꩻ ပေါႏသီသွူထဲ့ ငါးရုဲꩻသားသီး ထွို့ꩻငင်ႏလင်ꩻခန်းဒျာႏ ငါးရုဲꩻခမ်းသွူ။

=ဥပဒေသ

နမ်းကျင်ꩻတရာꩻ ကတအဲန်ထဝ်းလိုꩻနဝ်ꩻ ဘဝယိုခါ ဘဝငါ ချမ်ꩻသာႏမုယို တခံႏစာꩻဗာႏတဝ်း၊ စိုးသက်တဆွာꩻတဝ်း၊ မော့ꩻဗာႏခံႏစာꩻဗာႏဒျာႏ ဒုက္ခဆင်ꩻရယ်ꩻမျိုꩻလွဉ်းလွဉ်းသွူ။ "စီꩻကန်ꩻအဝ်ႏမꩻ ကအံႏအွꩻ" - မီႏအံႏပေႏပေႏ အံႏဗာႏသေႏ မီႏအံႏချွေတာ အံႏဗာႏအာ မီႏအံႏဆေ့ရေး အံႏဗꩻထွꩻနေး မီႏအံႏတန်ႏတန်ႏ အံႏဗာႏပုံႏမန်ႏ။ - မီႏအံႏဖြုဖြ လွစ်အံႏဗာႏည မီႏအံႏဒုံးဒင်း ညတဝ်းကြောင်းကြင်း မီႏအံႏမွိုꩻမာꩻ လွစ်အံႏဗာႏဆွာꩻ မီႏအ့ႏဖုတ်ဖုဲꩻ တဆင်ႏလွုမ်ꩻဝုဲꩻ မီႏချင်းတဝ်းနေား တဆင်ႏလွုမ်ꩻခြေား စီꩻကန်ꩻအဝ်ႏမꩻ ကအံႏကအွꩻ။