နီကမဲန်ဒေါ့ꩻငါႏငဝ်း

"နီကမဲန်ဒေါ့ꩻငါႏ ငဝ်းတငွါနဝ်ꩻ" နီပအိုႏယို အိုင်ဒင်ႏသွူ ခမ်ꩻပုမ်ꩻလောင်းတဲ့ အဝ်ႏထွာဒျာႏလိုꩻကေန်ꩻခြေားအကျောင်ꩻနဝ်ꩻသွူ၊ ကထွာဗာႏနုဲင်းနဝ်ꩻ ပွိုးဝွေꩻအဝ်ႏရိုꩻဒျာႏ "ခမ်ꩻပုမ်ႏယို ဝင်ꩻထာꩻဒျာႏ၊ ပါꩻထာꩻဒျာႏ"ကရိုꩻဒါႏ (ဟီနမာန်)မာꩻထွာနဝ်ꩻမꩻသွူ။ ပအိုႏလိုꩻမျိုꩻယို ပိဋကတ်တဲ့အဝ်ႏ၊ သာႏသနာႏတဲ့အဝ်ႏ၊ အာႏဏာႏတဲ့အဝ်ႏ၊ ထွာသွလိုꩻမျိုꩻတန်တမျိုꩻတဲ့ ပွိုးအိုင်ဗာႏညငါႏ ပါꩻခလ၊ ထွာဗာႏညငါႏ ပါꩻသွောန်းနဝ်ꩻမꩻတဲင် နမ်းအစိုန်ꩻ တံꩻခိုꩻအဝ်ႏယို အသေချာတဝ်းဒုမ်တဲင် အဝ်ႏမဲန်ထွာစွူစွူစွောန်ႏဒျာႏ ပါꩻသွောန်း၊ အဝ်ႏမဲန်တရေ့စွူစွူစွောန်ႏဒျာႏ ပါꩻခလတိက်ꩻတိက်ꩻနဝ်ꩻမꩻသွူ။ ပါဠိငဝ်းယို မီႏဖတ်မန်းနေးနဝ်ꩻမꩻ ရိုꩻအမဲန်ႏ ဟီနမာန်တန်နဝ်ꩻတဗာႏ အဝ်ႏဗွို့ꩻခြောႏမွေးစွောန်ႏ၊ နီသွောန်း မဲန်မာꩻစင်ဖေႏငါႏ၊ ကွဲႏတွော့ꩻ ဉာဏ်ႏလဲ့သမ်းဆေ့ꩻ၊ ထာꩻဒါႏလဲ့ သမ်းပေႏငါႏတဲင် ကွိုꩻဗာႏနေးထာꩻသꩻခိꩻ၊ ကွိုꩻဗာႏနေးစေႏတနာႏမဲန်ႏတဲင် မာꩻလွေꩻဗာႏနဝ်ꩻသွူ။ မန်းဖိုင်ႏ ဝင်ꩻကဖတ်ထန်ႏ ပါဠိငဝ်းနဝ်ꩻ တောမ်ႏဝင်ꩻငဝ်း၊ ဝင်ꩻလေက် အဝ်ႏမဲန်ႏလွောန်ႏဒျာႏ၊ ဥပမာႏ- စက္ကဝါဠေသု၊ ကူးစက်ရောဂါ၊ စက်ယန္တရား၊ ယံမင်္ဂလံ၊ ခင်ခင်မင်မင်၊ သိပ္ပ မန်းသုင်ꩻ သိပ်ဟုတ်ဒါပေါ့၊ အိပ်ရာလိပ်၊ ပအိုႏငဝ်း ခင်ႏလိပ်ꩻ၊ စူမီႏရိပ်ꩻ၊ ကိမ်ꩻကိပ်ꩻမေႏအွူ၊ ပေါတ္ထက၊ ယောဗ္ဗန (မန်းငဝ်းအဲန်ထဝ်း)၊ ပအိုႏငဝ်းအဝ်ႏ ဟို့ꩻပေါတ်ꩻ၊ အိုင်အောပ်ꩻ၊ မီႏထွားနုဲင်းနဝ်ꩻ ပအိုႏလိုꩻဒါႏဖိုင်ႏ တထွားချာတဝ်း အလိုꩻမျိုꩻ၊ မွိုးဖါဆရာႏဖိုင်ႏ ခမ်ႏလို့ရွောန်တဲင် ကအွောန်ႏလွေꩻသွောန် ဉာဏ်ႏပညာႏဖိုင်ႏနဝ်ꩻ သဲင်ꩻလွောန်မွိုးဖါဆရာႏထျꩻ တဖြာꩻသဲင်ꩻလွောန်တဲ့ ဒါႏသဲင်ꩻဗော့ꩻ ပညာႏခုမ်စေႏစောတောမ်ႏ အဗေင်ႏယာထာꩻနဝ်ꩻလွုမ်ꩻ၊ ဆရာႏကဒေါ့ꩻငဝ်းနဝ်ꩻ မွေးမဲန်ႏငါႏ၊ ကွိုင်ႏဒေါ့ꩻငါႏဒျာႏရင်ꩻ။ ပအိုႏယို ဒေါ့ꩻအင်္ဂလိပ်ထာꩻတဲ့ဖြွောင်ႏ၊ ဒေါ့ꩻထုဲင်ႏထာꩻတဲ့ဖြွောင်ႏ၊ ဒေါ့ꩻကလာꩻထာꩻတဲ့ဖြွောင်ႏဒျာႏနဝ်ꩻမꩻ အင်္ဂလိပ်ခွိုꩻ၊ ထုဲင်ႏခွိုꩻ၊ ကလာꩻခွိုꩻဒျာႏ၊ မန်းခွိုꩻ တမွေးတဝ်းကရိုꩻနဝ်ꩻ အဝ်ႏလိုႏသေချာငါႏလဲန်းဝင်ꩻနမ်း စုမ်ႏဖြာꩻသွူ။ မန်းငဝ်းတအဲန်ထဝ်း လေက်ပါဠိကို ပအိုႏငဝ်းအဝ်ႏစားဖိုင်ႏနဝ်ꩻ တိတိက္ခတိ၊ လိင်္ဂသာသနာ၊ အဋ္ဌာရသသိပ္ပ၊ ဗိမ္ဗိသာရ၊ ဥက္ကဋ္ဌ၊ ဥလုင်္ဂ၊ ဥပ္ပလ၊ ကုမ္ဘဃောသက၊ ဥပေက္ခာ၊ ဥပေန္ဒ၊ ဃေပ္ပတိ၊ ပေါတ္ထက၊ ဟောန္တိ၊ ပပ္ပေါန္တိ။ ပွိုးဆရာႏနဝ်ꩻ ထွာဒျာႏမန်း၊ တပဲ့ꩻနဝ်ꩻ ထွာဒျာႏပအိုႏ၊ ပအိုႏငဝ်း ဆရာႏတဒါႏတဝ်းနဝ်ꩻမꩻ ပအိုႏယို အိုင်ဒင်ႏသွူခမ်ꩻပုမ်ႏလောင်းတဲ့ အဝ်ႏထွာစွူစွူဗော့ꩻဒျာႏ လိုꩻကေန်ꩻနဝ်ꩻသွူ။ အဆုဲင်ꩻသွတ်ꩻ ငဝ်းတငွါ မဲန်ႏဒေါ့ꩻထဲင်းငါႏနဝ်ꩻ ပအိုႏငဝ်းယို ပါꩻတဲမ်းတလꩻလို့တဝ်း၊ ပါꩻငဝ်းယို ပအိုႏတဲမ်းလꩻလို့ မီႏယူႏနုဲင်းနဝ်ꩻ ပအိုႏယို လိုꩻညမ်းတမွေးတဝ်း။ ဗွေႏဘုရာꩻ ထွာထွူဘုရာꩻ အီႏဟော်ꩻဖေႏ သတ္တဝါႏသီးတရာꩻခါ ယူႏယူႏလွေꩻဒျာႏ သတ္တဝါႏသီးလောင်း တဏှာႏမာႏနဒိဋ္ဌိဖိုင်ႏ တန်ငါႏဒွုန်ငါႏ ခြောႏငါႏတဲင် ဟော်ꩻချောက်ပေါတ်ဒွူဖေႏ အကိလေႏသာႏတခြီႏ တဏှာႏမာႏနဒိဋ္ဌိနဝ်ꩻ အီႏတယိုꩻတဝ်းနဝ်ꩻမꩻ သꩻပလဲင်ꩻကုဲထိုꩻနေးစွောန်ႏ၊ အစခါ ကျမ်ႏဟော်ꩻတဝ်းဒွုမ်တရာꩻတဲ့ သဟမ္ပတိဗြဟ္မာႏ လွောန်လဝ်းတမာယင်းမꩻ ကွဲးဟော်ꩻယင်းတရာꩻ။ ယိုလဲ့ ပီနုဲင်းနဝ်ꩻနေနေ၊ ပအိုႏသီးအလောင်း ကအဝ်ႏစွယ်ꩻခြꩻသေꩻခါꩻဒါႏ အထာꩻစွယ်ꩻမန်း၊ အထာꩻထွားနုဲင်းမန်း၊ အတထီႏချာတဝ်း အပအိုႏလိုꩻမျိုꩻ ထာꩻစွယ်ꩻတန်နဝ်ꩻတဗာႏ ဖေႏကစင်ထိုꩻနဝ်ꩻ ဗွောင်ႏထိုꩻ၊ ပေါတ်ထိုꩻ၊ ပသေစင်ထိုꩻ အီႏလꩻဒါႏနေဟောင်း သꩻအဝ်ႏနန်းရီးစွောန်ႏဒျာႏ မရေႏမရာႏတန်။ ကွဲႏတွော့ꩻ လိုꩻအာဖြာꩻတန်အကို လိုꩻကအီႏသေနာႏထွꩻသား မဲ့ꩻအပါဒါႏနေနေ ချꩻသꩻဗာႏနေးနဝ်ꩻတဲင် ကျမ်ႏစဲႏဗွောင်ႏလွေꩻဗာႏနဝ်ꩻ ညစွောန်ႏအနေင်ႏပေါင်ꩻတန်၊ အစခါ ဝင်ꩻရိုꩻတေားဒျာႏ အလံတယာသားတဲ့အဝ်ႏ၊ ရိုꩻတေားဒျာႏ အမာꩻလီဝင်ꩻသား ခံႏဗာႏဝင်ꩻထင်းအမျိုꩻမျိုꩻ ဗꩻတွိုႏစွောန်ႏယိုခါသွူ။ တွိုင်ႏပင်ႏစမ်ꩻ ဗွေႏဆရာႏတန်ဖိုင်ႏ၊ ဗွေႏဆရာႏဖိုင်ႏ ဖေႏကျံႏဉာဏ်ႏ မာꩻနေးအဖွဲ့မꩻ အောင်ႏနွောင်ꩻ၊ ထွာနွောင်ꩻ၊ ထင်ႏဟွုန်ဗာႏတဲင် အီႏမာꩻနေးအဖွဲ့ ဉာဏ်ႏလဲ့ သမ်းဆေ့ꩻဒျာႏတရဝ်း၊ အဝ်ႏငမ်းဗာႏဒျာႏ ဝင်ꩻရိုꩻလိုꩻမာꩻကွယ်ꩻထာꩻတဲ့တရဝ်း နာꩻတမာꩻတဝ်း တောမ်ႏအဖွဲ့နဝ်ꩻမီႏတဲ့ ဝင်ꩻအဝ်ႏထင်းအမာꩻကွယ်ꩻထာꩻ၊ ဝင်ꩻအလောင်း ကအဝ်ႏခြꩻဒင်ႏဒါႏ ထာꩻစွယ်ꩻတန်နဝ်ꩻ အဒွုန်လွောန်ꩻငါႏနဝ်ꩻမꩻ မာꩻလဲ့တဒါႏတဝ်း၊ မာꩻလဲ့တဗွုန်ႏတဝ်းဒျာႏရင်ꩻတဲင် ဗꩻတွိုႏယိုခါ အဝ်ႏခန်းဒျာႏလီꩻလီꩻ ကြိုႏကြိုႏတန်နဝ်ꩻသွူ။ ဗိုန်ပီနုဲင်း ပါꩻအဝ်ႏထိုမ်းပနားနဝ်ꩻ၊ အဝ်ႏရိုꩻဖေႏသွူ "နာꩻပနားနဝ်ꩻ အမွူးတန်ဒျာႏ"နဝ်ꩻလဲ့ ဝင်ꩻတယွုမ်းတဝ်း၊ "ထွားချာစမ်ꩻမွိုင်ဟွေး"ရိုꩻတဲ့ ဝင်ꩻတထွားတဝ်း၊ အနာဒွို ထူႏအစူအွောန်ႏစမ်ႏတွိုႏသွူ ပနားမွူးထာꩻတဲ့ အဝ်ႏရိုꩻနွိုင်ႏနွိုင်ႏဒျာႏ "ပနားထီး"၊ ယပ်ꩻထာꩻတွိုႏစွောန်ႏခွုင်းနဝ်ꩻသွူ။ ငဝ်းနဝ်ꩻ မွေးမဲန်ႏငါႏ၊ နီပအိုႏကအဝ်ႏသုင်ꩻဒါႏ လေက်ယိုခါနဝ်ꩻ လေက်မန်းသီးတာႏဒျာႏ၊ ပအိုႏသီးတာႏ တမွေးတဝ်း၊ ပွိုးတမွေးတဝ်းနဝ်ꩻမꩻ တဲမ်းအီပအိုႏငဝ်း တလꩻလို့တဝ်း၊ တတိကျတဝ်း၊ မီႏထူႏသုင်ꩻဗာႏ လေက်ပအိုႏစဲတ်နဝ်ꩻ ပအိုႏလိုꩻမျိုꩻတဲ့လွောင်ႏဗူႏ၊ အမိန်ꩻတဲ့ အီႏကျောႏထဲင်းယို အာတန်။